Ke Aloha Aina, Volume VII, Number 24, 15 June 1901 — Page 1

KE ALOHA AINA

 

UA MAU KE EA O KA AINA I KA PONO

                         

HOOKUMUIA I MEI 20, 1895

---

BUKE VII.     HONOLULU, POAONO, IUNE 15, 1901.  HELU 24.

---

AOLE O DOLE I WAIHO MAI.

---

  Maluna o ka mokuahi Kinau i hala aku la no Maui a me Hawaii i keia pule i kau aku ai o Kiaaina Dole no ka holo hoomaha ana no hookahi mahina ma Hilo a me Kaluaopele. I kona wa i ninau ia aku ai ina paha he oiaio ua hoouna aku oia he hoike i Wasinetona e haalele ana oia i kona kulana kiaaina e like me ia e loheia nei, ua hoole loa mai oia me ka pane mai, e hoomau hou aku ana au i ko'u kulana lawelawe i na hana pili aupuni mahope o ka loaa ana ia'u he oluolu maikai, a aole hoi he manao iloko o'u no ka waiho ana aku i ke kulana kiaaina a'u e paa nei. Aka, malalo o ke kono a na kauka a me ko'u ike maoli iho no i ko'u kulana nawaliwali e hele hoomaha nei au.

  Ua ninau ia aku ko Dole manao i na lono e hauwawa ia nei i hoouna ia mai ana ka mokukaua Iowa i anei he hoike hoi no ke ano uluaoa kalaiaina o Hawaii nei. Ua pane mai oia he mea oiaio ina e hoopau ia ana ka oihana kaua e oi loa ia aku ana ko lakou manao nui ia ma keia hope aku.

---

ELELE WILIKOKI MA WASINETONA.

---

  Wasinetona, Mei 29.            Ua hele aku la ka Elele Wilikoki e noi i ke Keena Kaua no ka ae ia ana mai e hooloihi ia aku ka manawa e hoike ia ai o Clarence K. Laimana o Honolulu, ke keiki Hawaii mua i koho ia no ke kula koa o West Point. He kanaka opio o Laimana i mahalo nui ia no kona naauao maloko o na kula o Hawaii. He makuakane Amerika kona a he makuahine Hawaii, a oiai, ua hanau ia oia ma Hawaii, he kanaka Hawaii oia ma ka olelo ana.

---

  Ua lawe hou ia aku o Luna Nui Pain o ke Kaa Hapaumi e niele ia e ka Aha Kiure Kiekie.

 

MAI KA EUEU MAI O LAHAINA

                        Ladana, Mei 24, 1901.

  My dear friend;

            Mrs. Nawahi,

Aloha kaua: --

  He maikai au a me na kaikamahine. Ua haalele aku makou ia Nu Ioka i ka la 16 o Mei nei, a kau mai la maluna o ka mokuahi Kaiserina Maria Therisa he mokuahi Geremania keia, he nani launa ole mai keia moku, o kona rumi aina ua like no ia me kekahi o na hotele kaulana o Nu Ioka a oi aku no paha. Me ka nui no hoi o na ano mea ai like ole, o na rumi moe he nani, ua lako i na mea a pau. He nui na ohua i kau pu mai me makou ma ia huakai, e kani mau ana no hoi ka bana i na kakahiaka a pau, i na po hoi a pau e kani mau ana na pila hookani maoli e like no me ko kakou poe o ka hui himeni Kawaihau i na wa paina a pau o ka aina ahiahi, elike me ke ano mau o ka poe Geremania he poe puni mea kani, ehiku o makou la i ka moana a pae mai la makou i Southampton, mai laila mai no na hora elua ma ke kaaahi a hiki mai la i ka huikau o Ladana nei. I ka po hope ka hoi o makou iluna o ka moku, oia hoi ko ke kapena po, (the captain's night) ua haawi ia iho la au he paina ahiahi nani (dinner) no na ohua o ka moku, aia hoi na kane a me na wahine ua kahiko ia i ko lakou kahiko nani kohu noho ana no o na hotele, e holali ana ke daimana i na pepeiao o na wahine e ko lakou mau umauma me na lima, a peia pu no hoi me na keonimana, o na poe kuene ua kahiko ia lakou me na lole bolu me na pihi dala me na mikilima keokeo, a he rula paa mau ia i na kuene o na moku Geremania a pau.

  I ka pau ana o ka makou ai ana a e kali ana na mea a pau i ice cream a me ka pudini ia manawa, ua pio iho la ke kukui uwila o ka rumi aina, holookoa a noho iho la makou i ka pouli no na sekona pokole, a ia wa kani mai la na mea kani, a ike aku la makou i na kuene e maki mai ana no loko o ka rumi aina me na pa ice cream me ka pudini a e paa ana iloko o ko lakou mau lima he mau hae o na aupuni like ole, ia wa aea loa ae la ko'u a-i iluna me ke ake ana e ike aku i ku'u hae aloha malia aia no paha o Hawaii uuku iloko o keia lehau o na wai hooluu like ole, aia nae i ka wa i kaalo iho ai o na kuene ma ka aoao o ko makou pakaukau ua hooho ae la o Alice me ka leo nui (the Hawaiian flag) ka hae Hawaii, ia wa ua h@ro like ae la makou a pau me ka paipai lima ana no ka hae i aloha mau ia, aia hoi i ka hoi hou ana mai o na kuene a kaalo hou iho la ma ka aoao o ko makou pakaukau no ka lua o ka manawa, ua haawi mai la ke kuene i ua hae Hawaii nei ia'u, a lalau aku la au a hou iho la iloko o kekahi omole wai e ku ana iwaena o ka makou pakaukau a ia wa no i he a hou ia ai ke kukui uwila, ua nalo aku la na hae a pau mai loko aku o keia rumi aina, a o ka hae Hawaii wale no ke welo ana maluna o ka makou pakaukau a huli mai la ka nana ana o na mea a pau maluna o makou a me ka hae o ko makou aina, ke lohe aku la no makou i ka ninau ae o kahi poe, heaha kela hae? I ka pau ana o ka paina na lawe pu aku la au i ka hae me au o laoo ke kapena, a olelo mai la na'u i hoouna aku kela hae ia oukou no ko'u ike ana he poe Hawaii oukou, oiai, he ekolu o'u makahiki i holo ai malalo o kela hae; a haawi aku la au i ko'u hoomaikai iaia no kona lokomaikai o ka haawi ana mai i keia hanohano ia makou na Hawaii, a kau aku la ao i na hae nei ma ka puka o ko'u rumi. Ma ia po no hoi he hulahula kai malama ia.

---

(E nana ma ka Aoao 4.)

 

HOOKUU IA O L. A. KAKINA

---

  Ma ka auina la Poakolu nei i haawi mai ai o Lunakanawai Kiekie Frear i kana olelo hooholo no ka hihia hoowahawaha aha o Loio L. A. Kakina i waiho ia aku imua o kana Aha, e hookuu ana hoi i ka mea i hoopii ia malalo o ke kumu aole he mea maloko o ka moolelo o kona hihia e hoike ana ua lawelawe oia i kekahi hewa a i ole ua hoahewa a i ole ua hoopai ia oia no kekahi hana hewa.

  O ko Lunakanawai Humepera manao paha e hoopai me ka hoopaahao aku ia Mr. Kakina no ka hoowahawaha aha, aka, aole nae oia i hoike mai pela. Aole maloko o ka moolelo, ma kana olelo hoopai, a me kana palapala hoopaa lawehala i hookomoia ka huaolelo "hoowahawaha," aole pu hoi i hoakaka ia ka hewa, nona ka hoopai i hookau ia aku maluna o Kakina.

  Nolaila, o ka hoopai i hookau ia aku maluna o Kakina e hoopau ia aku ia, oiai, aole he mana o ka aha e hoopai a i ole e hoopaahao wale aku ai i kekahi kanaka maluna o na kumu ano ole, aka, koe wale no maluna o ka hana hewa ana i lawelawe ai. A i ko'u ike ana aole he mau kumu kupono ma ke kanawai no ka hoopaahao ana i ka mea i hoopai ia ke hookuu loa aku nei au iaia.

  Ma keia olelo hooholo i loaa ai ka lanakila ia Kakina, a lilo iho la hoi ka hoopai a Lunakanawai Humepera o ka Aha Kaapuni Ekahi i hookau aku ai maluna ona i mea waiwai ole.

  O keia hihia o L. A. Kakina i hookuu ia ae la no ka mea no ia e pili ana i kona hoole loa ana aku imua o ka Aha Kiure Kiekie aole oia e hoike i ka inoa o  ka mea ana e noho loio nei, nana i hoike mai iaia, ua lawelawe ia no he hana kipe e na hoa o ka Ahaolelo.

  Ua hoao o Humepera ma na ano a pau e hoike aku o Kakina i ka inoa o keia kanaka ana e noho loio nei, aka, ua punuku paa ia  kona waha, a o ka hopena i ike ia ua hookau mai la o Lunakanawai Humepera he hoopai koikoi maluna ona e uku oia i $100, a e hoopaahao pu ia e like me ka loihi o ka noho ana o ka Aha Kiure Kiekie no ka hewa houwahawaha aha.