Ke Aloha Aina, Volume VIII, Number 32, 9 August 1902 — Page 2

KE ALOHA AINA

 

AI PU HE POE HANOHANO ME KE KEKO KU KA AHAHUI KUOKOA

 

            Nu Pota, Iulai 3. He mau la pokole i hala ae nei ua holo aku ka mokuahi holoholo lealea Tauris i Nu Ioka no ke kii ana ia Mrs. Stryvesanat Fish, a lawe mai la iaia i kela kulanakauhale he malihini na Joseph Leiter, ka ona o ka mookuahi. Maluna o ka mokuahi he nui na holoholo a Mr. Leiter, a mawaena o lakou he keko i hoonaanao kiekie ia. I ka wa o kekahi papaaina ahiahi i haawi ia ai maluna o ka moku ua hookaawale ia he noho no keia keko, a ua haawi aku na kuene i na hoolohe ana iaia e like me na malihini e ae maluna o ka papaaina. Ua hoopiha loa ia o Mrs. Fish me ka hauoli no keia keko, a i kona hoea ana aku i Na Pati ua hoike aku la oia ia Harry S. Lehr no keia holoholona.

            Ua ulu koke ae he manao iloko Lahr no ka haawi ana i kekahi poina no ka hanohano o keia keko, a ua hoike aku oia ia Mr. Leiter i kona manao a ua ae ia. Ua hana ia he elua paa lole e ke tela lole o Mr. Lehr i kupono i ke keko. Alaila, hoopuka ae la o Mr. Lehr he palapala kono no iwakalua mau hoaloha no ka hiki ana mai i ka Arleigh no ka hui a launa ana me kekahi malihini kiekie mai Siama mai. I ka akoakoa ana mai o na poe a pau i kono ia maluna o ke pakaukau na alakai mai la o Lehr i kana malihini hanohano i kahiko ia me kekahi aahu piha no ka halawai ana aku me keia poe hanohano, a lawe ae la i kona noho ma ke poo o ka papaaina. Aole ke keko i hoopioo ia no na hiohiona hikilele i haawi ia mai e na poe i konola, aka, na lawe ae la oia i kona noho me ka pio ole.

            I ka wa o ke anaina i ike ai he keko laka loa keia ua hoohoaloha aku la lakou iaia. He mikioi na mea i ike ia no keia keko a hiki i ka wa o kekahi mea i ku ae ai e kahoahoa e inu ia ke ola o ka malihini hanohano me ka hoohainu pu ia aku o ua keko ala. Aole no i hoike mai ke keko i kona hemahema ma keia papa kuhikuhi o ke paina i haawi ia nona, aka, ua ino ae oia i na kiaha a pau i haawi ia aku nona.

            O ka hopena o keia inu nui ana na ona iho la ua keko ala. Lehei aku la oia iluna o ke pakaukau a holo ae la me ka piha hauoli e kulai ana i na mea a pau e halawai aku ana ma kona alahele. A ia wa i hoomaka aku ai oia e paki i na poe maluna o ka papaaina me na kiaha waina nana i hookomo aku i ka makau iloko o na wahine. Ua hoihoi koke ia aku o Leiter i ke keko no luna o kekahi noho paipai, kahi o ua keko ala i waiho aku ai i ka oha o ka rama. Hu ku aka i ka moolelo o keia keko.

 

He Mau Kuewa Eia i Honolulu Nei

 

            Eia iloko o ke kapitala nei he mau mamo o ka lahui kuewa o Argentine, o ka hana a keia mau kuewa oia no ke kilokilo ana i na ouli o ke kanaka. Ua ike ia he elua mau wahine kuewa e hele ana ma na alanui o ke kulanakauhale nei ma kela Poakolu aku nei e ninau ana i na poe a pau ina ke makemake lakou e ike i ko lakou ouli o keia ola ana. O ka auhau o ka nana ana he 25 a aole hoi he emi iho malalo. Ua hoea mai kela mau kuewa ma ka mokuahi Sierra mai Sidene mai, e noho iki ana lakou maanei he mau pule mamua o ko lakou holo ana aku no Kapalakiko; ma ka lakou hoike mai mai Argentine Amerika Hema lakou i hele mai ai.

           

            Ke pii mau nei ke ohohia ia o ka inoa o ke Keikialii Jonah Kalanianaole i elele i Wasinetona.

            He kaikamahine Hawaii o 7 makahiki kai pihoio a make loa ma ke kakahiaka Poalua nei, mauka o Kalihi ae nei.

 

Ma Kekahi Huakai Huli Waiwai

 

            Kapalakiko, Iulai 21. Ma ka la inehinei i haalele iho ai ka mokukuna Herman i keia awa ma kekahi huakai loihi i manao wale ia no Honolulu a me na Kai o ka Hema, aka, aole nae i maopopo loa. E hookele ia ana keia moku e Kapena James Brown a e ukali ia ana hoi oia e elima mau kanaka Pelekane. Ua lohe ia e holo ana lakou e huli he lua waiwai i hunaia ma na mokupuni o ka Hema, aka, ke hoole nei nae o Kapena Brown me ka olelo ana he huakai holo lealea wale no keia a e huli hoi mai ana lakou mamua o ke Karisimaka. O na hoolilo no ke kuai a me ka hooponopono hou ana i ka mokukuna Herman maluna aku o $18,000, a ua kaana like ia ae ka uku ana mawaena o Kapena Brown a me kona mau hoaloha.

 

            Ma Pauwela, Maui, ua oili mai la mai ka puhaka mai o Mr. a me Mrs. Nelson Kauhi, he keiki nui nepunepu, ma ka Poakolu, Iulai 30, 1902. Hii moopuna o S. K. Kaloa a me J. P. Kapihe. I ka lunahooponopono o ka nupepa KE ALOHA AINA, ke kiai naue ole ma ko ka lahui aoao,

Aloha oe:-

            E oluolu mai kou ahonui e hookomo iho i keia moolelo o kekahi halawai i malamala ma Kalaoa, Hilo Akau, ma ka la 26 o July, 1902; penei:

Hale halawai me Kalaoa,

            July 26, 1902.

 

            Malamaia he halawai makaainana ma ka hora 4 p.m., Lunahoomalu Kuikawa Waiono ma ka noho, a hoomaka ia na hana ma ka pule a ka Kaliula.

            Ku mai o D. Ewaliko a hoa kaka i ka manao nui o ke kahea ia ana o keia halawai, oia no ka noonoo ana o keia halawai e ku kuluia ka Ahahui Kalaiaina Kuokoa ma keia apana, e hoopau loa ana hoi i ka Ahahui Home Rula.

            Noi mai kekahi hoa e lilo keia kumuhana na keia halawai e noonoo ai, apono a hooholo loa ia.

            Ku mai keia a me keia hoa e hoakaka i kona manao iho, a ma ka hope loa, ua laweia mai la he olelo hooholo e J. M. Koahou e hoolilo ana i keia halawai i Ahahui Kalaiaina Kuokoa, aponoia ka olelo hooholo, a ma ka ninau a ka Lunahoomalu Waiono ua hooholo lokahi ia me ke kue ole.

            Ku mai o J. M. Kauhi a waiho mai he olelo hooholo.

            Olelo Hooholo; a e hooholoia o makou o na kupa makaainana e noho ana iloko o ka apana o Kalaoa, mahele koho ekolu, mokupuni o Hawaii, ma ka hoike a ka elele D. Ewaliko e olelo ana ke kakoo nei ka Eleie Wilikoki i ka Kalauokalani mau hana ko lohe, nolaila, ke noi aku nei makou i kou oluolu e ka mea mahaloia ke Keikialii Kalanianaole no kou ae mai e holo moho elele no ka Ahaolelo Nui o Amerika e hiki mai ana.

            E hooholo hou ia, e hoounaia aku ke kope o keia olelo hooholo i ka mea mahaloia Kalanianaole.

Ma kou komite

            J M Kauhi, (Lunahoomalu)

            J M Koahou,

            B Waialee,

            D K Kauhi,

            Samuela

 

Noi mai o Kamai e apono loa ia ka olelo hooholo, ma ka ninau ana hooholo loa ia.

            Hapai mai ke komite kukulu ahahui Kuokoa, D. Ewaliko, i ke kumuhana koho luna nui. Eia na luna nui, Waiono, Peresidena; J M Kauhi, Kakauolelo; B Waialee, Puuku; ma ka ninau ana a ka noho ua hooholo loa ia.

 

Kohoia na komite hoopaa inoa; J M Kauhi, D K Kauhi a me Waialee, aponoia.

 

Noi ia mai e hoopanee keia halawai a noho hou i kahi wa aku, apono a hooholo loa ia.

 

O keia maluna ae ka moolelo oiaio o ka halawai i malama ia ma Kalaoa, Hilo Akau.

D K EWALIKO

Komite Kukulu Ahahui

 

HE HUAKAI LEALEA NO WAILUKU

 

            Eia he huakai ke hoolala ia nei a e kekahi poe puni lealea no ka holo ana aku i Wailuku, Maui, maluna o ka mokuahi Keauhou e makaikai ai i na lealea heihei lio a me ka hookuku kinipopo nui e malamaia ana mawaena o na keiki o Honolulu nei a me ko Maui mau keiki lae ula ma ia hana, he 35 ka nui o na ohua e kau aku ana maluna ona, a iwaena oia poe na keiki o ka hui kinipopo Honolulu.

            E haalele ana o Keauhou ia nei nei i ka hora 5:30 o ke ahiahi Poakahi, Augate 11, a e huli hoi mai ana i ka hora 11 o ka po o ka la 12 mahope o ka pau ana o na lealea. Henui na poe makemake nei e kau pu aku, aka, ua hoole ka Hope Makai Nui Chillingworth, i ka ae ana i ke kahi heluna mahuahua ae, kekahi o na mea e hoolala nei i keia huakai, he $13 ka uku moku no ka hele ana a me ka hoi ana mai.

 

HE MAU WAIWAI HOU LOA

 

Na Papale Panama Maikai Loa 5 00.

 

Na Palule o Keia Au Hou .50, .70, 1 00, 1 25.

 

Na Paalole Hoolulu o na Kane 1 25, 1 50, 1 75.

 

Na Lei A i Maikai Loa Iloko Nei o ke Taona he Nui na Ano

 

Na Paleili Balbriggan he 25 keneta.

 

Na Kakini Eleele o na Wahine 2 Paa no ka 25 keneta.

 

Na Puliki Piliili o na Wahine 75 keneta o ke kakini.

 

Na Palekoki Paa Mua o na Wahine 2 00, 2 50.

 

Na Lole Pili Ili o na Wahine he emi loa iloko o ke Taona nei.

 

Kuai Hoemi Nui i Keia Pule

THE WHITE HOUSE