Ke Au Okoa, Volume I, Number 10, 26 June 1865 — Page 1

Page PDF (1.31 MB)

KE AU OKOA.
BUKE 1 -- HELU 10.} HONOLULU, MONEDE, IUNE 26, 1865. {$2.00 NO KA MAK.

"KE AU OKOA,"
E HOOPUKA MAU IA'NA I KELA POAKAHI KEIA POAKAHI,
MA KA HORA EWALU O KAKAHIAKA.

ELUA DALA NO KA MAKAHIKI hookahi, he kanalimakumamalua nupepa ia. E uku e ia ke DALA HOOKAHI no ka hapalua makahiki mua, iloko o na mahina mua eono; a pela hoi ka lua o ke dala, e uku e ia iloko o ka hapa hope o ka makahiki.

"KE AU OKOA."
KA UKU O NA OLELO HOOLAHA.

NA OLELO HOOLAHA—No na lalani he 10, oia hoi 1 iniha, no ka hoopuka hookahi ana, $1 00; alua hoopuka ana, $1 50; ekolu, $1 75; hookahi mahina, $2 00.
                Aia no ke keena o "KE AU OKOA" ma ka Hale Paipalapala Aupuni, maluna ae o ka Hale Pai.

he mau Mele.

He Inoa no Heneri W. Aul d.

Nani Leahi ke kuahiwi o Kaimanahila,
I pili aloha laua me ka ua Makaupili,
I hoi e pili me ka ua Lililehua,
I hoomakua i ka ua Kuahine o Manoa,
I na auamo kii a ka ua naulu i ke kula,
I loku'a e ka ua ke Kulaokahua,
I na kikipani a ka ua awaawa,
Pupu ka laau a ka ua Holio,
Ua ma'u i ka wai a ka ua Kiowao,
He wa olelo na ka ua Apuakea,
Ua noho like laua me ka ua Kiaweula,
Ua lohe i ka noe a ka ua Kanilehua,
I na aka iki a ka ua koiawe i na pali,
Pulu ole i ka ua noe ka maka o a'u lehua,
Ua pepe i ka ua Waahila ke oho o ka Awapuhi,
Paa pono na opiwai a ka ua Eelekoa,
E hooko mai oe e ka ua Puaneiea,
Newa malie i ka ua puukoa ke oho o ke kuikui,
Ma-u ka panepoo ua Makawiliwili,
Ina koai hoowali a ka ua Makahekili,
I ka lani no ka ua hanee ke pulu,
E hoomaikai ana i ka ua Paupili,
I hoa hui no Uwilakulani,
No ke kama nona ia inoa, ke o ke hai la.

OKI.

Haina ka inoa o ko makuakane,
O Kimo, o na Lehua i ka maka o Nuuanu,
Ua pepe wale ka maka o ka Ahihi,
Ua hoopulu'a e ka liae Lehua,
O kuu lei lehua i ka pili o Malailua,
Elua—elua na wahine i ka pili o Keahole,
E noho ana na ia i ka Ipuolono,
O Hapuu ma laua o Kaleihauola,
Ola au ole ke kama,
O ka inoa ia o ko makuakane,
Nana hoi nei keiki ke o ke hai la.

OKI.

Haina ka inoa o ko makuahine,
O Uwini pua lehua i ka wekiu,
Kuu pua hau memele i ka nahele i Kahuailanawai e,
He waiwai—hookahi no waiwai aloko o ka ike
O ke aloha o ke kahea maloko mai hoi e,
Hoi mai ana kaua e ke aloha eia ka pa la o Pelekane,
O Kealohilani ka hale,
O ka inoa ia o ko makuahine,
Na olua ia hiapo ke o la. HOOPAI.
            Kealohilani, Honolulu, Iune, 1865.

He inoa no S. L. S. Kaomealani.

I aloha no wau ia Nualolo,
I ke one laula i Mahamoku,
Aia ka oe i Manuakepa,
I ka hana lohiau a ko kino,
O ke kino keia ua noho lako,
Me ka pua hala lei o Neue,
He naue iki ae no hoi ko'u,
Alai ia mai e ka Ulumano,
Manomano no oe a ka alapahi,
Kahi manu ai kikoi i ka pua,
Ua nua o ka Paa i ke kalukalu,
I ka pala kahuli i ka maile,
O ko'u hoa oe i manao ai,
Nana e hooluhi keia kino,
Ike i ka mea ino la he aloha,
Hiki mai ka manao ku pouli,
Po no Haupu i ke onaona,
I ka noho nani mai a ka lauae,
Ua ae hewa oe i ke anapuni,
O kou kuleana mua no ia,
Pono ole ia uka eha luna,
Nana e hoolulu ia kula manu,
O ka manu iiwi maka onaona,
Nana i hokai kuu pua loke,
A Polihale au i ka pahapaha,
Ike i ke kahakai kupapu,
Ua paa ka moana i ke koolau,
I ka lawe mikioi a ka opua,
O ka'u pua oe e lei ai,
Kahiko mau ai i ko'u lae,
Oili o Makana hone i ke kai,
Kilipohe ka lehua au i ka wai,
Hookahi waiwai o ko kino,
O ke kipa mai no i kou hale,
O ka hale neia a ke aloha,
Noho hookamalii ai ka manao,
He manao no ko'u e ike aku,
Kuu ipo ahilele a ka maile,
Mai noho hoi oe a maliu aku,
Kai ala kuhea mai mahope,
Eia ko hale la he aloha,
Ko poli keia e mehana ai.
WAHINE KAPU.


            HE WAHINE KOA.—Aia ma Pilau, kekahi okana o Perusia kahi i noho ai kekahi wahine o Catherine Kleinfeldt kona inoa. He mau makahiki he nui wale kona hoolilo ana i kona ola ponoi iho, ma ka hoola ana i ka poe e pihole ana iloko o ke kai. I ka wa e hiki mai ai na makani pukiki ino, ua ike ia aku ua wahine nei maluna o kona wahi waapa e holo ana i waho e kokua i ka poe i uluhia e ka ino. Ua oi aku mamua o ekolu haneri kanaka i hoola ia e ia, a ua maa mau no hoi ia i ka holo ana no na makahiki he iwakalua, me kana kane, iloko o na ale kupikipikio o ka moana, a oia paha ke kumu o kona oi lua ole ma kana hana lokomaikai. Ma na wahi a pau loa ana e hele ai, ua mahalo nui loa ia oia e na luina holo moku, a ua kapa aku no hoi lakou ia ia ko lakou anela ia nana e kiai. Ua haawi ia mai ia e ke Aupuni he mau medala kala a me ke gula mai na Aupuni mai o Perusia a me Auseteria, a ua haawi ia mai no hoi e ke Aupuni he uku makahiki nona.

            Ke mau nei no ke kuai ia ana o na keiki ma na awa ku moku o Tureke. O ka nui o na keiki, na lakou na makua Karistiano, ma ke kulanakauhale o Alexandria wale no, he umi tausani. Ua kuai ia na keiki kane mai ka $240 a hiki i ka $360; a o na kaikamahine mai ka $800 a hiki aku i ka $1,000.

KENE TE.
He Mooolelo no Sekotia.

MOKUNA XXVI.
KE KEENA PULE.

                Ua opiopiia ke keena pule iloko o ka pouli kukonukonu, a i malamalama iki wale no i na kukuna o kahi ipukukui e a uwiuwiki ana imua o ke kuahu; aka, hawanawana mai la ke kahu wahine ia Kenete e nee aku ia i kahi a ka ipukukui e a ana, me ka hai pu mai e noho ia ma ka ipuka e hoolohe ai i ka hiki mai o kekahi mea. Nee aku la o Kenete i kahi e a ana ka ipukukui, a i kona hiki ana aku ilaila, a iloko hoi o kona kahaha nui, ike aku la oia i kekahi wahine e kukuli ana imua o ke kuahu, a owai ia wahine. Ua hoi koke mai kona hoomanao ana o ke aloha opiopio a kona puuwai. Lele aku la oia imua a kukuli aku la imua ona, a lawe mai la oia i ka lima palupalu o kana aloha a kaomi iho me kona. Aole nae e hiki ia ia ke pane aku, ua piha loa kona puuwai, aohe e hiki ke hoopu-a aku i kahi huaolelo, a me he mea la nae o kona helehelena a pau e noi aku ana ia Evelina e manao mai aole ia i hana hewa. No ka nawaliwali o ka malamalama, a no ka malulelule hoi o kona kiola ana ae i kona mau kukuna, nolaila, aole i hoikeia mai ia Kenete, ka inea kukonukonu a kuhohonu hoi i kahakaha ia iluna o ko Evelina mau maka; a ua anuanu koekoe hoi kona mau lima, ia ia hoi i hopu aku ai; no ka mea, ua nui ka ehaeha o kona naau, a aohe e hiki i kekahi manao olioli iloko ke komo hou mai iloko, no ka huki ia ona ilalo o na akoakoa o na moana wai nui o ke kaumaha a me ke kupilikii.
                Iloko oia wa, olelo aku la o Kenete, "E e Evelina, e hai mai ia'u, ua manaoio no auanei oe i ka'u mau mea a pau loa i hoouna'ku ai i ou la, mao ke kahu wahine la." "Ae, ua manaoio au ia mau mea," wahi a Evelina, "i na mea no a pau loa i hanaia ai, a ke paulele ae nei no au na ke Akua iloko o kona ahonui i hoike mai i ka oiaio o kou hewa ole i ka ahahookolokolo o ka la apopo!" A ia wa koke no i hooalaalaia ae ai kona manao, ua like me ka moana wai e waiho malie ana, a paia mai e ka makani kikiao, a aleale kupikipikio ka moana wai. I aku la o Kenete, "Hana ino no hoi oe e Evelina, a heaha la kou mea i hookuu aku ai i keia kino maewa nei ou, e polukulukuia e ka ehaeha a me ka inea?" Aia ia i olelo aku ai pela, kulu mai la ka waimaka, a hoopuluia iho la ko Kenete mau lima, a lawe ae la oia i kona mau lima a kau i kona mau kuemaka. Puka mai la na umii ana a ka ehaeha i ko Evelina mau lehelehe, a i keia mau mea hooipoipo, me he mea la oia ka hooilo o na ehaeha a pau loa i loaa ai ia laua, no ka mea, ua ulu mai na hoomanao ana o na la i hala, a o ka hora hope loa no paha ia i hookuuia mai ai laua e launa oluolu hope loa ai, oiai e kakali mai ana ka ahahookolokolo ia Kenete i kekahi la ae no kona hihia.
            Pane aku la o Kene te, "E hooluolu oe ia oe iho, e Evelina, ke noi aku nei au ia oe, e hooluolu ia oe iho," a i kona hopu hou ana aku i ka lima o kana aloha, a maewa aku la, me he lala la i oi aku ke kaumaha o ka pua, a me he mea la no hoi, i hanaia o Kenete i mea nana e aloha, e malama, a e kaukoo ai i kela kaikamahine opiopio nani luaole. "Pehea la auanei oe e Kenete," wahi a Evelina, "e ao mai ai ia'u e hooluolu ia'u iho, oiai, ua ike no oe i ka ehaeha kukonukonu a aohe no hoi huaolelo e hiki ai ia'u ke hai aku i ka ehaeha a me ke kaumaha e noke hala ole nei i ka muo o ko'u puuwai." A ia ia i olelo aku ai, haka pono aku la oia i kona mau maka i na papalina o Kenete, a hoomau aku la oia i ka olelo ana, "O! heaha la auanei ka mea i koe ia'u i kupono ai ke ola ana i keia ao? Ua aloha au ia oe e Kenete—ua ike hoi ka lani i ke kukonukonu o ko'u aloha ia oe! —a ke mau nei no ko'u aloha ia oe, aka, me he mea la aohe i hoopomaikai ia ko kaua aloha ana; a ano, e hoakaka aku ana au ia oe i na mea a pau i hana ia, oiai, aole i hai aku o Dame Ursula ia oe i na mea a pau i hana ia, no kou uluhiaia ana e ka eha, oia ka mea nana i pale mai ia ia mai ka hoike ana aku ia oe. Heaha io no la ka pono nui o ko'u ae ana aku e mare au me ka Marquis, oiai e aloha ana no au ia oe, a ma ia hana ana, ua lilo ia i mea e kumakaia ia ai oe, a lilo hoi i mea nou e hoounaia ai iloko o na rumi pouli, a oia iho la ka mea e loaa mai ai ia'u no keia aloha ana o kaua kahi i kahi. O! ia'u nei la, oia ka hookauwa nui ana a na ehaeha a pau loa i ike ia—oia ka hu ana o na palapu—oia hoi ke kahe ana aku, a na hao wela loa o ke kaumaha iluna o na aakoko e waiho olohelohe nei. Ua hai aku au ia Dame Ursula e hai aku ia oe no na ehaeha a me na kaumaha i ilihia mai maluna o'u, ma ka pa-e ana mai o ka lono, ua hoouna ia oe iloko o ka rumi, i hoonohoia no ka eehia—aka, ua hookahaha ia mai au e ka hana koa loa au i hana'i no'u, no ia mea, ua aloha holookoa aku au ia oe, a aohe no hoi e hiki ke hoopoinaia e a'u ia hana koa au, a hiki wale i ka hoi ana o keia kino lepo i kona wahi mau. A ano e Kenete, oiai, o ke ahiahi hope loa keia a kaua e launa hope loa ai, apopo lawe ia'ku oe e hookolokolo no na mea i kuhihewa ia ua laulima oe, aole au e pani ana i ko'u waha no na mea e pili ana i ka'u olelo hoohiki no ka mare ana me ia."
            Hoomaha iho la oia i kana kamailio ana, a nana pono aku la i ka helehelena o Kenete, i ko Kenete manao ia wa, ua puia e ka olioli a me ka pihoihoi, no kona lohe ana mai ia Evelina mai, aohe ia i hoopau i ko Kenete aloha—a no kona ike ana aku no hoi, mai ka mole loa mai o ko Evelina puuwai ka hoea ana mai o ke aloha, a hoomau aku la oia i ka olelo ana:—"I ka la mahope iho o ko Macoma nalowale ana, a me kou kiolaia ana iloko o ka rumi pouli, hele mai la kuu makuakane iloko o ko'u rumi, me ka waiho mai, na'u e haawi i ka'u olelo hooholo no ka mareia me ka Marquis, a aole i liuliu, komo mai la ka Marquis, a haawi aku la au i ka'u olelo hooholo, me kuu manao ua mau no ka makemake ana o ko'u makua e mareia au me ka Marquis, a mahope halawai aku la au me Galenakaina, ua kahakahaia kona helehelena e ke kahaha, no kona manao e hoole ana au i ka mareia me ka Marquis." I kekahi la ae, olelo mai ka Marquis ia'u nou." "No'u," wahi a Kenete, "ae, ke ike nei au, aka, ke makemake nei au e lohe ponoi no mai kou mau lehelehe mai."
            "Ua hoomaka ka Masquis," wahi a Evelina, "ma na mea e hoahewaia ai oe, nolaila, hai aku au ia ia, no ko'u manao paa aole oe i hana hewa, a olelo mai kela, he mea makehewa ko'u hiipoi ana i ka manaolana e pakele ana oe mai na lima kakauha mai o ke kanawai, no ka mea, ua nui a ua ikaika na olelo hoike e ku ai oe i ka hewa. Ua kahakaha mai kela i ke kii o kou kulana, a me ke ano o na olelo hoike, nolaila, aole e hiki ia'u ke kaihi ae ia'u iho, mai ko'u kiolaia ana iloko o na auwaha kuhohonu o ka weliweli. E na lani maikai! ke weliweli nei no au ano ke hoomanao ae i ka mea a ka Marquis i hai mai ai ia'u, no kou hopena e kakali mai nei ia oe. E hiki anei ia oe ke kahaha i ko'u kiola ana ia'u iho nona, i kona wa i olelo mai ai he hiki no ia ia ke hoola ia oe? A! ma na kumu hea la ia i ae mai ai e hoola ia oe. Noi mai la oia ia'u e lilo au i koolua nona, a e hoouna ia oe i Pelekane; a i ko'u lohe ana i keia, ua wikiwiki loa au i ka ae aku ia. Ina o na kulu koko hope loa o ko'u kino nei ka mea e pakele ai kou ola mai ka make mainoino ana, alaila, e haawi no au ia. Hoohiki mai la kela e hoopakele ia ia oe, a owau hoi e haawi aku au i ko'u lima ia ia i wahine mare, a i koolua hoi nona e alo aku ai i keia honua kupikipikio a inea hoi. A i mea e kokua aku ai ia ia ma ka hele ana aku e halawai me oe, nolaila au i kakau aku ai ia oe i kela palapala."
            "O," wahi a Kene te, "na kela palapala i kinai iho i ka manaolana hope loa e kuewa hookahi ana iloko o ko'u uhane."
            "Aka, aohe i pau ka'u hai ana aku ia oe, i ka hoi ana aku o ka Marqui s a me ko'u makua, ua uluhia ia au e ke aloha kukonukonu nou, a mahope komo mai la na manao ehaeha a kaumaha nou, no kou hookaawale ia ma kahi e, i ike ole aku ai hoi au ia oe; aka, i ko'u hoomanao ana ae o kou ola ka'u i mohai aku ai au ia'u iho, alaila, kapae ia aku la i na leo o ka mokumokuahua o ka naau, a hookuu aku la au me ka u ole i na alana ana a ko'u puuwai. Ua hookahaha loa ia ka naau o ko'u makuakane i ko'u hai ana aku ia ia, ua ae aku au e mare ia au me ka Marquis; a ano e Kenete, ua ike oe i na mea a pau loa, i mea e kaulia ai maluna o kou naau, he mau hana kau i hana ai oe no ko'u ola, a ua haawi aku hoi au ia'u iho i mea e hooiaio ai, aole au i hoopunipuni, aka, ua kupaa au ma kuu aloha ia oe."
            "Ke haawi aku nei au i ko'u lokomaikai ia oe, ma kou hookuu ana mai e lohe au i keia mau mea a pau loa, a me kou aa ana no hoi e hookuu mai e ike hou au i kou mau helehelena. A ano e Evelina, ke noi aku nei au, pehea la auanei au a me oe, ina e hooko ia ko'u hewa ole. Ina i ka la apopo, e hookolokoloia ai au, a kue mai na hoike ana o kela aoao ia'u, a ma ia mea e hoouna ia aku ai au i ka luakupapau anuanu me ka make mainoino, a ilaila hoi e hoopau ia ko'u manaolana ana. Aka hoi, ina e ku ole ka hewa e hooili nei maluna o'u, a ikeia hoi ko'u hewa ole a hookuu ia mai, me ke kikohu ole ia o ko'u lono maikai, alaila, e Evelina, e manaolana hou aku anei au he aloha koe iloko ou no'u nei?"
            "Aohe manaolana i koe nou e Kenete," wahi a Evelina, "no ka mea, ua haawi aku au i ko'u lima e mareia au me ka Marquis, ina oia e hoopakele aku ia oe mai ka pakaua aku nei. Ua hana ia pela, aka, ua hoi hou mai no oe i ka pakaua nei, no kekahi kumu aohe oe i hai mai; a ina au e hoole i ka'u mea i hoohiki ai ke hiki mai ka manawa, alaila, e ikeia ae anei au e ke ao nei, a e i ia mai no hoi, he mea kupaa ole au ma ka'u mea i hoohiki ai. Aole oia wale no hoi e Kenete—aka, me he mea la, aohe i hoopomaikaiia mai ko kana mau aloha ana e ka lani, no ka mea, i ka la mua i papaia ai aohe kaua e halawai hou ma ke ano kahiko, ua nui na poino i paila ia iho maluna o ko kaua mau ola ana, ua like pu me kekahi kulanakauhale e hoouka kauaia ana, a oia mau popilikia a pau i loohia ai maluna ou, me he mea la he wanana eehia no ka wa e hiki mai ana me na hana weliweli o keia noho ana."
            "E ka lani! ua poniu oe e Evelina, aole oe i ike i kau mea e kamailio nei. Aole au i hai aku ia oe i ke kumu o ko'u hoi hou ana mai i ka pakaua nei. Ua hoomanao no paha oe i ka po Karistimasa i ka wa a na uhane i hoomaikai ai ia oe, ma ke kau ana i ko laua mau lima maluna iho o kou poo iloko o ka rumi aina—." "Aole anei," wahi a Evelina, "i ike kela mau uhane i ko'u manao, me he mea la ua heluhelu laua iloko o kekahi buke i kela ao, a ma kona mau aoao ua kakauia, e lilo ana au i haku wahine no ka pakaua nei o Alanadela." "Aole," wahi a Kenete, "aole ia o ka wehewehe kupono ana o ko laua hoomaikai ana ia oe, aole no hoi au e hookomo mai ana i ka manaoio e mare ia ana oe me ka Marquis, oiai, na ua mau uhane la i kau lima ai ia oe, na laua i alakai hou ia'u i ka pakaua nei. Ia laua i alakai mai ai ia'u a hiki ma ka puka mahope, kauoha mai la laua ia'u e kukuli, a kau iho la laua i ko laua lima maluna o'u me ka hoomaikai iho; a pau ia, kauoha mai la laua ia'u e komo mai au i ka pakaua nei, a komohia iho la i ka hakaka ana me na Makalapina. Ua pau, o oe no kai ike aku i ke keena—." I ko Evelina lohe ana i keia mau mea, lele aku la oia e apo ia Kenete, me ka olelo aku, "He oiaio, he mau mea eehia na mea i hanaia iloko o keia pakaua." A ia laua e ku ana ma ia ano, ia laua i puliki hou ia ai iloko o na apo'na makamae a ke aloha kuhohonu, a ia laua i hoopoina ae ai i na mea e ae a pau loa o keia honua inea, ikaika mai la ka a ana o ka ipukukui, a ia wa koke no i ikeia aku ai na uhane o ke kane a me ka wahine, i aahuia me na kapa kila e ku mai ana maluna o ke kuahu, a peahi mai la ke aka o ko laua mau lima e hookokoke aku laua imua ponoi o ke kuahu.
            Aohe i hoopunana iho ka makau iluna o laua, no ka mea, ua kuluma laua i na hana a na uhane mamua; ua hoolioli ia laua e ka olioli hemolele, a kauoha mai la na uhane ia laua e kukuli, a hana iho la laua pela, a hoomaikai mai la na uhane ia laua, me ke kau ana o ka lima o na aka maluna o ko laua mau poo. I ka pau o ka laua hana ana pela, kuhikuhi aku la ka lima o na aka ia laua i ka ipuka komo o ke keena pule, a puka aku la laua iwaho, ma kahi i kali ai ke kauwa wahine. I ko laua hiki ana aku, ua hiamoe ke kauwa wahine, a hoala aku la laua ia ia, a hoi aku la lakou i ko lakou mau keena moe. Ia lakou e kapio ana i ko lakou mau ala iloko o ko lakou mau keena moe, ike aku la lakou i kekahi kanaka me ka ipukukui, a komo aku la iloko o ka rumi pule. Hele aku la lakou a kahi i hookaawaleia ai, aloha aku la o Kenete ia Evelina, a i mai la o Evelina, "Aloha oe, a na ke ahonui o ka lani nana e malama ia oe i ka la apopo."

MOKUNA XXVII.
KA HOOKOLOKOLO ANA.

                I ka hora kakahiaka nui o kekahi la ae, ike ia aku la na kanaka oloko o ka pakaua, e hoomakaukau ana i ka rumi nui o ka pakaua i wahi e hookolokoloia ai o Kenete. Ma kekahi aoao o ka rumi, ua kukuluia kekahi wahi awai i wahi no ka Lunakanawai Kiekie e noho ai, malalo iho no ke Kakauolelo Nui o ka aha, a ua kukuluia he umikumamalua mau noho ma ka aoao akau no ka poe jure, a ma ka aoao hema hoi, ua kukulu ia he ekolu mau noho; mamua ponoi mai o keia mau wahi, ua kukuluia kekahi wahi kiekie, no ka mea e hookolokoloia ana. I ka hora eiwa o ke kakahiaka, hiki mai la ka poe i kauohaia ai i mau jure. Mahope koke iho o ko lakou hiki ana mai, komo mai la ka Lunakanawai Kiekie me kona mau lalo iho, a hoomakaukau ae la na kakauolelo i ka lakou mau mea hana. I ka wa e noho malie ana kela mea keia mea, ua meha lai loa ka rumi hookolokolo me he ilina la, a ua loheia no paha ke kui pine ke haule iho iluna o ka papahele, no ka mea, "ua lai ke kula aohe lele pueo." Ia wa koke no i alakai ia mai ai ka poe jure nana e hookolokolo ia Kenete, a pani kokeia aku la ka puka, i ole e komo wale mai ka palaualelo, a ku ae la iluna ka Lunakanawai Kiekie, a heluhelu mai la oia i ka mea i kauohaia aku ai na jure e houluulu mai mahope iho, hoohikiia iho la na jure a pau nana e noonoo i ka hihia, a i ka pau ana oia, alakai aku la ke kilo i na jure i ko lakou mau noho. Ua kauohaia aku na jure e hai mai lakou i ka oiaio, a ma ka oiaio wale no lakou e hai mai ai i ka lakou mau olelo hooholo.
            A he umi minute mahope iho, komo mai la ke kilo, a mahope mai ona o Kenete, ka mea e hookolokolo ia ana. Alakai aku la ke kilo ia Kenete a hoonoho ia ia mamua ponoi mai o ka aha, nana e hookolokolo iaia. I ko Kenete alakaiia ana mai imua o ka aha, aole i hopohopo iki kona helehelena i ka nana aku, ua kuoo oia e like me ke kumu laau ikaika e paio mau ana me na makani pukiki o ka hooilo, a i ka haka pono ana aku o ka aha i kona helehelena, me he mea la ua hala ole oia i ke karaima e kimopo ana ia ia i ka hoahewaia. I kona pii ana aku iluna i kahi i hookaokoaia nona, ua kulou hoomaikai aku oia i ka aha holookoa, a me ka poe a pau e noho ana iloko o ko keena hookolokolo; a i ka halawai ana mai o ko Kenete mau maka me ko Galenakaila, hanini mai la ko Ga1enakaila mau kio waimaka, a i ae la oia iloko iho ona, "E na lani! ua hewa anei ia? A ina aole oia i hewa! Aka, ua hewa io paha ia, aole nae keia o na hiohiona o ke kanaka hewa." Huli ae la o Galenakaila a olelo aku la i ka Marquis, "Ma ka helehelena o Kenete, me he mea la, o kau mau mea i olelo mai ai no ko Kenete mihi ana ia oe i kona hewa, aohe ia he oiaio." I ka ike ana aku no hoi o kekahi hapa o ka poe jure i ko Kenete mau ano, ua kunipaaia maluna o ko lakou manao, aohe i hana hewa io o Kenete i ke karaima ana i laweia mai ai imua o lakou e hookolokoloia ai, a ua noho kukule wale mai no hoi na Lunakanawai me ka pane ole, a he mea hiki ole ia lakou ke hai aku no ko Kenete hana hewa ole.
            Ku mai la ke Kakauolelo nui imua o ka aha, a olelo mai la, "Ua laweia mai keia kanaka opiopio no ka pepehi kanaka, aka, ke ku mai nei oia imua o kakou, me he mea la, aohe ia he kanaka i hewa i keia mea, no ka mea, aohe mau kupee hao ma kona mau lima a me kona mau wawae." I mai la ke kilo, "Ke kumu oia, no ka oluolu o ka Haku o Galenakaila."
            Ia wa, ku koke mai la no ka Lunakanawai Kiekie, a olelo mai la, "Alaila, aohe mea e ae a kakou e kamailio ai no ia mea, a e hana ia kona hihia i keia wa. E na jure:—i mea e ike lea ai oukou i ke ano o ka hihia imua o oukou i keia wa, e pono au e hai aku la oukou; o ke kanaka opiopio e ku nei imua o oukou, ua hanaiia oia e ka lokomaikai a me ke ahonui o ka hale haaheo o Galenakaila. He keiki ia i ike ole ia kona mau makua, a i ka po o Galenakaila i mareia ai me kana wahine aloha i make, ua loaa keia keiki makua ole iloko o ka rumi aina. Ua hanai ia a ua hoonaauaoia keia keiki, i oi ae mamua o ka malamaia ana o ke keiki hanai, a ua hoohalikeia kona hanai ia, kona hoaahu ia a me kona hoonaauao ia ana, me he mea la he keiki ponoi loa oia na Galenakaila. Ua lele ae, he nui na makahiki—a i kekahi mau mahina i hala ae nei, ua kipakuia mai o Galenakaila mai Edineboro mai. I kona kipakuia ana, ua haawi ka Marquis o Alanadela nei i ka noho'na o keia pakaua, a haele nui mai la ka ohana o Galenakaila, a o Kenete pu hoi kahi i huiia iloko o keia hele ana mai a noho i ka pakaua nei. He elua pule paha ko lakou haiamu ana ma na kaiaulu o Alanadela nei, ike ia ae la kekahi mea a keia kanaka opiopio i hana ai, a hookaeia aku la oia mai ka papaaina aku, no kona hooipoipo ana me ke kaikamahine a kona mea nana i hanai pauaho ole; a ua imi aku no hoi keia kanaka opiopio e omo holookoa mai i ke aloha o ka puuwai o ke kaikamahine a kona mea nana i hoola.
            "Nolaila, ua kauoha aku o Galenakaila, aohe e ai pu hou keia Kenete ma ka papaaina hookahi me ia, aole no hoi oia wale no, ua kauoha puia aku no hoi ia, aole e kamailio a e launa hou me Evelina ma na wahi a pau ona e halawai aku ai me ka opuu rose a Galenakaila. He mau pule i hala ae, hiki mai la ka Marquis i ka pakaua nei, a oia hoi he hunona na ka Haku o Galenakaila no ka wa e hiki mai ana. Ma kekahi mau la mahope iho, ua lawe maluia o Evelina e na Haku o ka pakaua o Makalapina, aohe no hoi au e hoopoina i ka hai ana ae maanei, ua pakele ka Lede Evelina i ka mea i hoopii ia, a oia paha kekahi kumu ikaika i aloha ai o Evelina ia ia. A i ka hala ana o kekahi mau pule, aole i loaa kahi wahi manawa ia Kenete e halawai pu ai me Evelina.
            "Ano, e na jure, ua hiki mai kakou i kahi o ka wa i kuia ai keia kanaka opiopio e ku nei imua o kakou i ka hewa. Ua hiki pono ae ka la i kiekiena i ka la mahope iho o ka hanau ana o ko kakou Hoola Nui, halawai ae la ka paahao me Evelina a me ke kahu wahine iloko o ka ululaau, a ua haiia mai no hoi e ke kahu wahine ua halawai aku lakou me ka manao ole e halawai ana. Iloko no hoi o ka ululaau ka Haku Macoma ia wa, a loaa aku no ia ia o Kenete e kamailio pu ana me Evelina. Na ia mea, i kena ae ia Macoma i ka panepoo o ka ukiuki, a kiola aku la imua o na maka o Kenete i na olelo ino a pau e komohia ai kela mea keia mea iloko o ka huhu, a hiki ole ia Kenete ke hoolanakila ae ia ia iho maluna o ka huhu, hopu iho la oia i kana pahikaua, a hoonenene ae e huki iwaho me ka olelo mai aole ia e ae aku e komohia oia i ka hakaka ana me Macoma. Ua noi aku ka Lede Evelina ia Macoma, aole e olelo ino aku ia Kenete; aka, ua olelo koikoi mai oia ia ia e hoi koke o Evelina i ka pakaua. Ua manao o Evelina aohe e hakaka o Kenete ma laua me Macoma iloko o ka ululaau. I ko Kenete hoi ana mai oia wale no, a hiki mai oia i ka puka, ua hai mai ka mea nana e kiai ana i ka puka, ua oki loa kona kapa komo i ka lepo, a o ka wahi wale no hoi o ka pahi kana mea e paa ana, a i ka ninau ana aku o ke kanaka kiai puka i ke kumu o ke oki loa ana o kona lole i ke koko, olelo mai la o Kenete, he wahi hana iki iloko o ka ululaau. A i ka hoomaopopo loa ana aku ona ia Kenete, huli koke ae la o Kenete a komo iloko o kona rumi.
            "Ia wa koke no, komo mai la kekahi kanaka iloko nei o ka pakaua me ke kumu o kekahi pahikaua, a olelo mai ua kanaka la, ma kahi i loaa ai ka omuku pahi, he kio koko kahi malaila, a me he mea la i kana nana iho, he hakaka kai hanaia malaila. Ma ka aoao o ua kio koko nei, ua ikeia na meheu wawae he nui wale, a me he mea la no hoi aole na ka wawae hookahi i hehi wale no. O ke kumu pahi i loaa ai iloko o ka ululaau, oia no ke kumu o ka pahi a Kenete; aole nae i loaa ka welau aku. I ka ike ia ana o keia mau mea, ua ninaninau ia o Kenete e Galenakaila, ka Marquis, a me na alii e noho ana iloko nei o ka pakaua ia mau la, a ua hai mai oia aole i ike i kekahi mea e pili ana no Macoma. I ka wa nae ona e hoohuahualau ia ana, komo mai la kekahi mea nana e malama ka ululaau iloko o ka pakaua nei, ua loaa ia ia kekahi papale me ka hulu oluna o Macoma. Ua lawe mai oia ia mau mea mailoko mai o ka ululaau, malalo aku o kahi e ku ana ke kio waikoko kahi hoi i ikeia ai ka meheu o ka hakaka ana. Ua nohaehae ka lipine kahi e paa ai ka hulu, aka, aole nae he mea ia e hoonalonalo ae ai aohe ia o ka papale o ke keiki a ka Haku o Galenakaila. I ka wa i ike ai o Kenete i keia mau hailona o ko Macoma nalowale ana, me he mea la ua kuia mai oia e ka hewa o kona lunaikehala—ua haule a maule aku la oia iluna o ka papahele." Ia wa, hoomaha iho la ka Lunakanawai Kiekie, a nana ae la i ka aha holookoa.
(Aole i pau.)

No ka hoopau ia ana o G. B. Rowela ma ka oihana kahuna.

                Ua kamailio ia no pela, no ka hewa maoli ana o Rowela ma ka moekolohe; O na mea i olelo ia pela ma ka Nupepa Kuokoa, aole oiaio o kela kamailio ana.
            Ua hiki no nae i ke kanaka naau ino ke hoolaha wale i kona makamaka me ka ike ole i ka hewa o kona hoa.
            Penei ke kumu i loaa ai keia hewa o Rowela, ua waiho loihi o Rowela i ka ahaaina ekalesia o Waimea i hookahi makahiki a oi ae paha.
            Mahope iho o ka hala ana o ka makahiki hookahi, hoopii mai la kekahi mau hoahanau o Waimea ma ka ahahui i kukuluia ma Anahola e ahaaina, ua ae ia ka ahaaina, e ia aha ma ke koho ana i mau Komite.
            Mahope iho, ua kohoia i mau Komite e noonoo i ke kumu o ka waiho ana a Rowela i ka ahaaina, o D. Nuuhiwa kekahi oia Komite.
            Iloko o ka wa a na Komite e noonoo ana ma keia kumu hookahi o ka ahaaina, puka ae la he ku hau, oia hoi ka moekolohe o Rowela, a ua noonoo pu ia na kumu a elua i ka manawa hookahi, ua kue loa nae o D. Nuuhiwa i kela, me ka olelo o D. Nuuhiwa, aole i loaa iki ia ia kekahi wahi hewa iki o Rowela ma ka hewa moekolohe, a no ka paakiki loa o D. Nuuhiwa i ka haole i ka hewa ole o Rowela, nolaila, ua hoopau koke o Ioane a me Kaukamika i ko D. Nuuhiwa haiolelo ana ma kela wahi keia wahi, a ke noho nei oia ma kona ano hoahanau, a pela no hoi o Rowela. He wahi ninau ka'u ia oukou e ka poe e hoino ana ia Rowela, ua moekolohe anei o D. Nuuhiwa i hoopau ia ai kona Luna Haiolelo ana? Ua loaa pono anei o Rowela e moekolohe ana?
            O ka poe nana i kapa aku ia Rowela he moekolohe he poe hoa paio no ia no Rowela ma kekahi mau mea pili kino, lehulehu wale na makai ma Waimea, no ke aha la ka mea i hopu ole ia ai? O ka Moi wale no ka mea i oleloia ma ke kanawai aole e hiki ke hoopii ia, aole i olelo ia o ke Kahunapule kekahi mea pakele i ka hoopii'a, ina ua ike ia e na makai a me ka Lunakanawai o Waimea ka moekolohe o Rowela, no ke aha hoi ka hopu ole, ina pela ka haalele wale ia o ka moekolohe i ike ia, ke olelo nei au, o na makai a me ka Lunakanawai ka poe nana i hoomoekolohe ia Rowela. W. PETERO. MAKA.
            Waimea, Kauai, June 6, 1865.

            KA IO LIO.—Ke nui mai nei ke kuai ia ana o ka io lio ma Europa; no ka mea ma Denemaka, a me Viena i Auseturia, ehiku mau hale kuai io lio, a iloko iho nei o ka M. H. 1862, 1,854 lio i kuai liiliii ia.