Ko Hawaii Pae Aina, Volume III, Number 25, 19 June 1880 — NA ANOAI O PAPAIKLOU, HILO. [ARTICLE]

NA ANOAI O PAPAIKOU, HILO.

E Ko Hawaii Pae Aina E; Aloha oe.— Anoai he mau la loihi ko kaua kaawale ana aohe papaleo mea hou, e kala mai ia'u ma keia, oiai, akahi no a huai puka nui mai na kilihau mea hou o na aina nei, a e oluolu hoi kou Luna Hooponopono e waiho ae i keia wahi ukana ma kahi kaawule o kou mau keena ukana ole, oia keia: Laukanaka ka uka o Mahulua - I keia mau la e noho ia nei o Papaikou, ua neo o kai i ke kanaka ole, ua paniku na ipuka hale, ua hoi iuka na kane, wahine me na keiki. O ka hana o ko kai noho ohana ana, he kanu ko. O ka huina o keia poe i hoihoi ia iuka he 133. Eia kekahi: o ka pake na hana i ko lakou hale me ka papa a puni he mau rumi liilii; o ko ke kanaka hale he mau hale laumaia, he mauu ka papahele; o ko na haole hale, he hale lole. Ina e ike ka poe makaikai i keia kulanakauhale, ua like me kauhale a Limaloa i Kauai. Ina hoi e ulu i kakahiaka, oloke mai na manu i ka laau, oloke aku no hoi ka pake ma na kanaka i ko lakou wahi; no ka mea, hora 5 1/2 am, hoalaia, hora 6 hana, hora 5 p m, pau ka hana

Na Luna Hana - O ka nui o na Luna hana, 11 no ia; oia hooi, 6 luna kanaka 3 luna haole; 1 luna haole maluna o keia mau luna a pau, o D. H. Hithcoock Esq. no ia, o E. G. Hitchcock ka haku me ke alakai hana. Ina oe e ike e ka mea heluhelu i na hana e hanaia nei, ua ku i ka eleu a me ka hoihoi o na ono o keia Hui.

No ke Ko— O ka nui o na ko i pau i ka wiliia, 400 * oi tona no 80 eka, aia i Amerika kahi i hoao ia ai i keia mau la. Na ko i koe aole i wiliia, 100 a oi eka; ke hui pu me ka Castle me Tenney, me he mea la e piha ana 1,000 tona a oi aku.

Kao lawe ukan»—Ke kapiliia nei ma ke awa o Puniawa, hookahi kao lawe ukana nui, nona na tona 25 kona piha. O na laau i hanaia ai i wae, oia ka hau, neneleau, puawa, kukui, koli, ohia oia na pale o mua me hope, malalo o na hana maiau ana a Mr. Lenney,

Na uku o na limahana - O ka uku o na kauwa hana pono, hoolohe pono i na kauoha a na haku, $15 a pii aku iluna. O ka poe hana pono ole a hooko pono ole i na kauoha a na haku me na luna, $12 a emi iho ilalo, oia ka uku malama, O ka uku o na luna 16 a hiki i ke $50.

Ua lawa kaʻu makakila maanei, oiai, ke koi mai nei koʻu mau hoa e hele makou i ka haha wi kaulana o ka aina i wahi kokoolua hoi no ke pai-ai puupuu a Kakahi, e hookomo aku ai a piha ka lua o ka inaina. Me ka Lunahooponopono o kou kino lahilahi koʻu aloha pumehana, hui pu hoi ia haawina hookahi i na keiki hoonoho hua metala. Owau iho no me ka haahaa, Jas. Kanoelehua. Papaikou Plant., Hilo, Iune 3, 1880.