Ko Hawaii Pae Aina, Volume XII, Number 40, 5 October 1889 — HE LEO POLOAI. [ARTICLE]

HE LEO POLOAI.

He leo poloai keia i na keiki hanau o ka malu Ulu o Lele, i hoopunana ia e na manao aloha no ko lakou aina. E ala, E ku, E eu, e ka manu o Lihau, ka manu kiai i ka lai a Hauola la-e. Hoolono mai. Ma o ke komite la o ke kula Sabati o Wainee, Lahaina, Maui, ke ualo nei, a ke konoia aku nei na keiki kupa kulaiwi a pau o ua malu ulu aloha nei o Lele. E noho kauliilii ana ma na mokupuni a pau o keia Pae Aina. Pa kahea a na kini o ka aina. E hoi mai, E nana, E ike no oukou iho. Eia he la nui, he la hauoli, he la hanohano no kou aina hanau, aole i ikeia mamua aku nei, aole no hoi e ikeia ana ma keia hope aku. Eia ma Lahaina nei ka Hoike Hui o na Kula Sabati o na moku o Maui, a me Molokai ma ka la 7 o Ian. M. H. 1890, oia hoi ka la Hapenuia. E Kauai o Mano, wehea ka poli ou, hookuuia mai ko Maui mau keiki. E Oahu o Kakuhihewa-e, wehea kou ma u puka ka lala i ka wai la kuua mai, ko ka malu Ulu o Lele mau kupa. E Maui o Kama, aole hoi au, eia no oe i ka piko. E Hawaii o Keawe-e, nau e kauoha ae e hoi na keiki o ka makani he Maaa. D. Kahaulelio. A. H. Makekau. Wm. White. A. Pali. Charles Makekau.