Ke Kumu Hawaii, Volume II, Number 13, 22 June 1836 — Page 50

50 KUMU HAWAII. (IUNE,

                H. Kakaikahi paha, ka poe pule pela. Pehea, aole oluolu mai ke Akua i ka pule a ka poe hewa i pule aku ia ia?
                K. Aole no. I mai la o Solomona, "He mea hewa ka mohai a ka poe hewa i mohai aku ai i ke Akua." Ua heluhelu paha oe i ka mohai a Kaina laua o Abela i mohai aku i ke Akua. Mohai aku laua, aole nae i oluolu mai ke Akua ia laua. Maliu mai e Iehova ia Abela, a me kana mohai, aole maliu mai ia Kaina a me kana. He mea hewa ka mohai ana i mohai aku i ke Akua, no ka mea, aole pono kona naau, aohe naau haahaa kona, aohe naau, mihi, a me ke aloha, a me ka makemake, no ia mea, aole oluolu iki mai ke Akua i kana.
                O ka pule, oia ka mea i pane i ka hakahaka o ka mohai pipi a me ke kao. Kauoha mai ke Akua i na kanaka a pau loa e pule aku ia ia, a i ka lakou pule ole ana, ua nui loa ko lakou hewa. Aka, o ka ke kanaka pule ana me ka naau kiekie, me ka naau mihi ole, me ke aloha ole aku a me ka makemake ole aku i ke Akua, he mea hewa ia, he mea hoowahawaha aku i ke Akua. Aole loa ke Akua e oluolu iki mai i ka ke kanaka pule ana pela. Aole maliu mai oia - huhu mai no ia i ua kanaka la, a me kana pule.
                H. Pehea kou manao i ke pule ana a ka nui o kanaka ma keia pae aina?
                K. Ua kaumaha ko'u naau i ko'u lohe ana i ka oia la pule ana, a me ke oia la, no ka mea, ua pono ole ka lakou pule ana. Eia ka mea e maopopo ai ko lakou hewa ma ka pule, aole paa ko lakou manao e haalele i na mea a pau a ke Akua i papa mai ai. Elua hewa ko lakou. Hoowahawaha lakou i ke Akua i ko lakou noi ana i na mea a ko lakou mau naau i makemake ole ai. Eia ka lua, manao lakou e uhi i ko lakou hewa i ka pule. Moe kolohe kekahi poe, a pule no hoi; aihue kekahi poe, hoopunipuni kekahi poe, puhi baka kekahi poe, a pule no nae — aole o lakou makau, no ka mea, manao lakou o ke pule, oia ka mea e uhi ai ko lakou lawehala a pau loa. No ia mea, pale aku lakou i na olelo weliweli a pau loa a lakou i lohe, aole makau, aole mihi – aole hele io Iesu la; noho no me ka hewa a make loa.
                H. Pehea e pono ai makou ma keia wahi? Pono paha makou e haalele i keia hana — aole loa e pule hou aku? Pehea kou manao?
                K. Aole hiki ia'u ke olelo aku ia oukou i ka poe hewa, e haalele ia hana - e oki - mai pule hou. Aka, eia ka'u mea e olelo aku ia oukou a pau loa me keia pae aina. E noonoo pono oukou i ke ano o ka oukou pule ana i ke Akua, no ke mea he Akua lili o Iehova. Mai manao nui oukou i ka oukou pule ana ma ka waha. E malama pono oukou o hoowahawaha aku oukou i ke Akua ma ke pule.
                E nana oukou iloko o ko oukou mau naau. Pehea oukou ma ke pule? Ke pule nui anei oukou i ke Akua me ke naau haahaa, me ka mihi i ko oukou hewa, me ke hoopailua ia oukou iho, a me ka manaoio aku ia Iesu, i ka Haku? Ina pela ka oukou, ua pono. Aka, i ka oukou pule ana me ka naau kahiko, me ka naau mihi ole, makemake ole aku ia Iesu; i ka oukou pule ana a noho hou ma ka hewa, aole haalele loa, pehea e pono ai oukou malaila? Aole pono iki - aole ae mai ke Akua — aole maliu mai - aole oluolu iki mai oia ia oukou. A i ko oukou noho ana pela a make, e poho oukou ilalo i ke po o ke ahi pio ole, a e noho mau loa malaila me ka ehaeha o ka naau, a me ke kaumaha.
                H. Auwe makou! Pehea makou e pakele ai?
                K. Hookahi mea e pono ai, O ka imi wawe ana i ka naau hou - No ia mea, ke noi aku nei au ia oukou, E hele io Iesu la, ano. E lilo oukou i poe haumana ana, alaila e oluolu mai ke Akua ia oukou a me ka oukou pule ana. Amene J.S.G.

KE KUMU HAWAII.
WENEDE, IUNE 22, 1836.

O KA HALAWAI O NA KUMU.

                FE RAIDE, Iune 3 I ke ahiahi halawai hou ma ko ke Akua halelewa. Ia Mi Alekanedero ka olelo.
                Eia ke poe olelo, Mataio xvi, 26.
                "Heaha ka pomaikai no ke kanaka ke loaa ia ia keia ao a pau, a lilo aku kona uhane? heaha hoi ka ke kanaka e haawi aku ai i uku no kona uhane?'' Hoakaka iho la. He uhane ko kela kanaka ko keia kanaka: naau, nona ke noonoo ana, a me ke aloha, a me ka makau, a me ke inaina, a ma ka makemake, a me ka olioli.
                I. Eia ke manao mua. He mea nui ko ke kanaka uhane. He mea mau loa no ia.
                1. O ka makemake, o ke iini o ka naau, oia kekahi mea e maopopo ai ka mau loa ana o ka uhane.
                2. O ka ike ana o ko ke kanaka uhane, oia hoi kekahi mea e maopopo ai kona mau loa ana.
                3. Ua lookahi ka manao o na lahuikanaka a pau, he mea mau ka uhane.
                4. O ko ke Akua pono, oia hoi kekahi mea e akaka ai ka mau loa ana o ka uhane.
                5. Aka ua hoomoakakaia mai ke ola pau ole no ka euanelio. E huli ma ka palapala hemolele i keia mau olelo; 2 Timoteo I. 10, Mataio x. 28. Tesalonike iv. 17. - Mataio xxv. 26.
                He mea nui io no ko ke kanaka uhane. Aole make ke kuaiia mai ka waiwai a pau o keia ao. Aole i loaa i na anela ke waiwai e haawi aku ai i uku no ko kakou mau uhane. Ua kuaiia ko kakou poe uhane i ke kumu nui; e nana i ke olelo o Petero mua, mokuna i. na pauku l8, 19. -
                II. O ke manao elua. E hiki no ke lilo ko ke kanaka uhane.
                1. Ua maopopo keia, no ka mea, aohe hewa ke Akua ke lilo ka uhane ua pono loa no ke hoopai i ka hewa.
                2. Ua olelo paka mai ke Akua, Ezekiela xviii, 4. O ka uhane i lawehala e make oia'': a Roma vi, 23. "O ka uku no ka hewa, he make ia."
                3. E lilo ana no na uhane i keia manawa. "O ka mea manaoio ole, e kau mai ana ka inaina o ke Akua maluna iho o na wahi a Iesu.
                4. Ua akaka no hoi keia me na olelo weliweli a me na olelo hooikaika a pau ma ka palapala hemolele.
                III. O ka loaa ana o ko keia ao oia kekahi mea e lilo ai ka uhane, no ke mea!
                1. O ka mea e imi ana i na mea o keia ao, ua lilo kona naau malaila; a hoopoina aku no oia i ke Akua, a me ke ola o kona uhane.
                2. O ka mea imi i ko keia ao, a loaa ka waiwai, haanou iho la, kaena ma kona waiwai; hoowahawaha iho la i ke ola, a malaila ua lilo ka uhane.
                3. Eia hoi keia, o ka imi ana i waiwai me ka pono ole, me ka powa paha, me ka aihue paha, me ka hoopunipuni paha, oia no kekahi mea e lilo ai ka uhane. Nolaila e komo apuepue ke kanaka waiwai iloko o ke aupuni o ka lani."
                IV. He mea nui ka lilo ana o ka uhane ua ilihune ke kanaka ke loaa ia ia keia ao a pau a lilo aku kona uhane. Poino loa ka uhane i lilo, aole koe kekahi mea oluolu nana. Aole ae aku ke Akua i loaa ia lakou i hookahi kulu o ka wai.
                "Ua waihoia mai no hoi ke awawa nui iwaena o na uhane i lilo a me na uhane i ola'' ua kaawale loa. A e hoeha loa ia mai ke uhane i lilo, aole loa e make ko lakou ilo, aole loa hoi e pio ke ahi."
                He mea weliweli io no ke haule iloko o ka lima o ke Akua ola.
                Auhea ka pomaikai o ka mea i kuonoono i ka waiwai o keia ao, ua nele nae i ka manao. Ua loaa ia ia na dala, na aina hoi, a me na kauhale maikai, aka aole ona i hoolauleaia, ka ai i ke Akua. Ua poino no, o ke Akua o kona enemi no ia. A o kona puu, aia no ia me Satana. E nana oukou i ke ano o kekahi kanaka waiwai, aia ma ka Luka xii, l6 - 20. No ke manao nui i kona kino ua poinoia mai kona uhane. I kona manao ana i na makahiki i koe, ua ku ana no ka make ma kona puke. Aole i hiki i kona waiwai i hoahuia no na makahiki he nui wale ke pale aku i ka make: ia po