Ke Kumu Hawaii, Volume III, Number 24, 25 April 1838 — Page 93

KE KUMU HAWAII.
HE PEPA HOIKEIKE I NA MEA E PONO AI KO HAWAII NEI.
"O ka pono ka mea e pomaikai ai ka lahuikanaka; aka, o ka hewa ka mea e hoinoia'i na aina."
Buke 3. HONOLULU, OAHU, APERILA 25, 1838. Pepa 24.

No ko makou hoi ana mai mai Honolulu mai i ka la 10 o Maraki.

                Ee mai la makou ma ka waa, he kaukahi ka waa, a holo mai la makou i ka hora awalu ma Kakaako kee ana mai o makou he umikumamakahi, a waho o Kumumaua, he auwaa e holahola ana, nonoi aku la au i kekahi kanaka maluna o kekahi waa, haawi mai la ekolu wahi ia, he uu, he maiko, he puapalani, akolu ia. Holo mai la no hoi makou a kau i Kuhia o Waiawa, a kahi hale o Heana, noho iho la ilaila. A hele aku la au e ike ia Bihopa ma, a ike makou, hoi mai la au i ka hale, a poeleele, hele aku la makou i ka halawai a na ekalesia, a hoomana aku la makou i ke Akua.
                A ao ae la, he Sabati ia, hele aku la makou i ka halawai kakahiaka, hai aku la au i ko'u manao, i aku la, "E ko Ewa nei e heluhelu pinepine i ka olelo a ke Akua me ka malama io." Pela ko'u manao, a pau ia, hoi mai la makou, a hiki i ka hora aiwa, hele aku la makou i ka pule. Hai mai la o Bihopa i ka olelo a ke Akua. "A lawe mai la ia ia laua mawaho, i aku la. E na haku heaha ka'u e hana ai iola au? E manaoio aku ia Iesu Kristo, alaila e ola oe." Oihana l9: 30, 31. I ke ahiahi hai hou mai la o Bihopa i ka olelo, i mai la, "Ua aneane oe e hoohuli mai ia'u i Kristiano. Ke pule nei au i ke Akua i ole oe ma ka aneane wale no aka ma ka oiaio e lilo ai oe." Oihana 29: 28, 29.
                A pau ia, po iho halawai i na hoahanau ke kamakamailio ia po a pau ae hoi mai la makou, moe iho la a ao ala, a pau ka halawai kakahiaka.
                Hoomakaukau ko makou hoi mai i Waialua o ka la umikumamalua ia o Maraki. Ee ae la no hoi makou maluna o na lio, a holo mai la no hoi makou he ua liilii ia la mauka mai a hiki makou i Kaukuanahua, paina iho la makou ilaila, a pau kahi ai, holo mai la no hoi makou a hiki i Kawailoa o Waialua i ka hora alua; pau ia.
                I ka la 13 o Maraki. Hele aku la makou iloko o ka luakini i ke kakahiaka i ka halawai. Hai aku la au i ko'u manao i aku la au, "E heluhelu i ka olelo a ke Akua me ka oiaio aku, a me ka noonoo aku. Oia ko'u manao." A pau ae la, hoi mai la makou a hele aku la o Ka nai kanaka i Laie i ka halawai loa, a hala ia, pii aku la au e ike ia Emekona wahine a ike au ia ia, hele aku la au e nana i ka halawai a ike au, hoi mai la au a ka hale, a hiki i ke ahiahi halawai hou makou. Hai aku la au i ka olelo a ke Akua, i ka manaoio, i ka manaolana a me ke aloha, oia ka'u mau mea i hoomaopopo aku ai.
                I ka la 14 o Maraki, Wenede. Hai aku la au i ke ano o ke aloha, heluhelu aku la au ma ke Korineto l, a pau ae la ka halawai hoi aku la kanaka. A hele aku la o'u poe hoahanau ma Mokulaia, ma Kamananui, ma Paalaa, ma Kawailoa, a ma Kapaeloa, he umi lakou e noi aku i ka poe i koe, a me ka pule pu me lakou. Pela lakou i hele ai mai Laie mai. Halawai iho la makou i ke ahiahi a pau ae la, hele aku la makou i ka halawai a ka ekalesia, hoomana makou i ke Akua no na kanaka o Waialua nei no ka halawai loa ma Laie kekahi, pela ka makou haipule ana i ke Akua, no makou iho no hoi kekahi, ninau aku la au i ka lakou mea i loaa, hookahi haneri kanaiwa kumamakahi, pau ia.
                I ka la 15 o Maraki. Halawai makou i ke kakahiaka; a pau ae la ka halawai, hele aku la makou i ka halau waa, e ninau i ka manao o na kane a me na wahine a me na keiki, o ko Mokulaia koena aku a me ko Kamananui koena aku, a me ko Paalaa a me ko Kawailoa a me ko Ukoa, a me ko Lauhulu a me ko Kapaeloa, oia poe hai mai lakou i ko lakou hewa a me ko lakou holo aku io Iesu la me ko lakou naau. Pela mai la lakou. I aku la au ia lakou, "E naua aku i ke Keikihipa a ke Akua." Pela aku la au ia lakou. Pule aku la au i ke Akua i hoopaa mai ke Akua i ko lakou manao aku ia ia; pau ia. O ka hui ana o na koena a pau loa, elua haneri a me kanakolukumamaiwa. Pau ia, ahiahi iho halawai no no ke noi aku no i ke Akua e hoopaa mai i kona manao pono iloko o na kanaka. Pau ia.
                I ka la 16. He nawaliwali ko'u i kuu mai nae mai ka po mai ka hiki ana mai a ao. Aole au i hiki aku no ka nawaliwali o kuu kino, aka, o kuu naau me lakou no iloko o ka halawai e hoonani ana i ke Akua. Pau ia, hele aku la o'u poe hoahanau e noi aku i ka poe i koe aku, o na apana o Waialua mai ka lae o Kaena a Kapaeloa. A hoi nui mai lakou ua loaa no kekahi ia lakou, pau ia. Hiki mai o Kalaipaihala o Wana ke kanaka i hele pu mai me ia mai Honolulu mai la ua ea mai laua e mai ana no wau i kuu nae, pau ia.
                I ka la l7. Halawai makou i ke kakahiaka. Hai aku la au i ka olelo a ke Akua, "O na mea a pau e alakaiia e ka Uhane o ke Akua,'' Roma 8: 14. Pau ka halawai, hoi ka nui o na kanaka, noho iho la na kanaka i kau ole ia ko lakou inoa, ninau makou i ko lakou manao, hai mai no lakou e moe ma na wawae o Iesu. I aku la au o ka naau oiaio loa ke moe ma o Iesu la. Pela aku la au, pau ia, a pau na inoa o lakou i ke kauia, hui lakou hookahi haneri me kanaono kumamalima. A pau ia hiki mai la o Lota ma oia Tineka o Lote akolu lakou mai Laie mai, pulu lakou i ka ua, he la ua nui ia. Pau ia. GIDEONA LAANUI.

KAWAILEPOLEPO.

                Ua make ia, a ua kanuia ke kupapau ma Wailuku, Feb. 15, l838. Hai ao aku la Mi Gelina i ka ke Akua olelo ia manawa. Eia ke pooolelo, Na Helu, 23: 10. "I make au i ka make ana o ka poe pono. I like hoi kuu hope me kona."
                Eia kekahi manao iloko o ka haiao.
                Ua make ka poe pono me ka olioli o ka naau.
                Ua make ka poe pono iloko o ka Haku.
                O ka make ana o ka poe pono, oia ka mea e pau ai ko lakou poino, a e hoomaka ai ko lakou pomaikai.
                Ma keia ao, nui na mea e poino ai ka poe pono. Ua ike lakou me na kanaka e, i ka ilihune, a me ka mai, a me ka eha o ke kino. Uwe pinepine lakou i ka make ana o ko lakou poe hoahanau. Ua ike no hoi lakou i ka hana ino ia mai. No ko lakou hahai ana mamuli o ka pono, no ko lakou kupaa