Ke Kumu Hawaii, Volume IV, Number 3, 4 July 1838 — Page 10

10 KUMU HAWAII. (IULAI.

O ka hooikaika ma ka hana oia ka pono. Na'u na RIKADI.

NO KA HEWA O KA BAKA.

                Eia ko'u manao hoakaka no ka hewa o ka baka: Ua ike maopopo au i ka hewa o ka baka. I ka manawa mamua, ike au i kekahi kanaka i pau i ke ahi baka i ka po. Eia ke kumu o kona pau ana. I ke ahiahi, hoomau iho la ia, i ke ahi baka, hapuku iho la ia i ka opala, a kaomi iho la ia i ka pohaku, a paa, moe iho la, a wanaao hele aku la ia e puhi baka, a hiki i kapu ahi, wehe ae la ia i ka pohaku ma kapa o ke kapuahi. Pupuhi iho la ia, a ona, hina iho la ia iluna o ka pohaku komi ahi; wela ia a paapaa loa i ke ahi, mai ke kumu pepeiao a ka opu kona wela ana. A malamalama ae la, hele aku la kekahi kanaka, a ike aku la ia, e nunulu ana ua kanaka nei, i kapuahi.
                Huki mai la ia, a nana iho la ia, ua wela loa ia. A nui mai la na kanaka, i mai la kekahi kanaka, E hamo i ka poi; hamo iho la, a paa; a mahope, ike makou i kona hopena; nakaka mai ka ili, kahe mai la ka pilau, hookahi malama o ke kaa ana, a make ia, Oiamene ka inoa, no Puna, Hawaii.
                Eia kekahi hewa o ka baka. Ua hana au i ka muki baka, ua akaka ka hewa o ka hookuli i kaheaia mai e ke alii, i na hookuli eha: o ke kaili mai i ka waha, o kekahi; o ke noi wale aku ia hai me ka hilahila ole, moe no i ka po, me ka welu ahi me ka ipu baka. Oia na mea e kaikai ai, i ka po a me ke ao, he mea maikai wale no ia i ka muki baka, a mamuli hiki ka olelo a ke Akua, a malaila ka hoohewa ana o ke Akua i na mea ano ino a pau.
Na'u na NOA NUHI.

HE MANAO HOOIKAIKA.

                E na mea lawe i ke Kumu Hawaii, e aloha kakou ia Iehova, me ko kakou naau a pau, me ko kakou uhane a pau, me ko kakou ikaika a pau, me ko kakou manao a pau. Ua like hoi ka lua me ia, e aloha aku oe i kou hoalauna e like me oe iho; nolaila, e pule nui kakou i ke Akua, no na hoalauna o kakou, no na'lii, no na kumu, no na kanaka, no na kamalii, i loaa mai ia kakou a pau na hua a ka Uhane Hemolele. "Oia ke aloha, ka olioli, ke kuikahi, ke ahonui, ka lokomaikai, ka maikai, ka manaoio, ke akahai, ka hoomanawanui, ka hana pono, ka naauao, ka noho malie, ka haipule, ka launa hoahanau, ke aloha." Ina iloko o kakou keia mau mea, a i mahuahua hoi, oia ka mea e lilo ai oukou i poe hoopalaleha ole, a i poe hua nui, ma ka ike aku i ko kakou Haku ia Iesu Kristo. E nana kakou ma 2 Petero 1:9 "Aka, o ka mea nele i keia mau mea, ua makapo ia, ua powehiwehi ka ike ana, a ua poina ia ia kona huikala ana i na hewa kahiko." Aloha oukou. IOANE W. NAIHE.

LAHAINALUNA, Mar. 16, 1838.
                I ka la 13 o keia malama, i ke kula kakahiaka, ahaolelo iho la makou, e hele i ke Alii la, e noi ai, ae ae la makou a pau.
                Kula hou makou i ke ahiahi, alaila, ahaolelo hou iho la makou, me Aneru, no ke kanawai o ke kula, e noa ke kanawai no makou, a no na kamalii no ke kanawai, aole i ae mai o Aneru, i mai ia makou e imi, aku ua maopopo mua ia makou ke kumu o ka noa ana, aole anei i ae mai o Aneru.
                Alaila i aku la makou ia Anaru, e iho ana makou i ke Alii la e noi ai.
                Alaila, iho aku ia makou ikai, hookahi o makou nana e noi, hele aku la makou a hele i kahi o ke Alii, alaila elua mea i kokoke aku i ke Alii la, o ka luna noi, a me kekahi o makou, haawi aku la ua luna o makou, he palapala hooikaika na kekahi hoahanau.
                Alaila nonoi aku la ua luna nei i ke Alii, i ai na makou; ae mai la kela, ninau mai la, ehia oukou, i aku la keia he 13, alaila imi ae la na maka o ke Alii, i kanaka, a ike aku la, kunou aku la e hele mai, a hele mai la ke kanaka, i aku la ke Alii ia ia Ea, i ai na na kumu.
                Alaila noi hou aku la ua luna nei a makou i ke Alii, la, ae mai la ke Alii a laila i aku la i ke kanaka, E, ia na na kumu.
                Alaila hele mai la ua luna nei a makou me ke kanaka o ke Alii, a me kekahi o makou i lohe i kela olelo ana a hiki io makou la, i mai la ia ia makou, Ua loaa ka ai a kakou, a me ka ia; alaila maopopo ia makou he ai a me ka ia.
                Alaila hele aku la makou me ke kanaka o ke Alii, i ka ai, a hiki i kahi o ka ai, akoakoa iho la makou a pau i ka puu ai o ua luna la, a o makou a pau, olelo iho la makou no ka ia, aia i hea ka ia a kakou.
                Alaila i mai la kela, Mai kuhihewa oukou, aole na oukou ka ia, na'u no ia o ka ai wale no ka oukou. Olelo aku la kekahi, E haawi no ka ia na kakou a pau. I mai la kela, Aole, na'u wale no ka ia, aohe pono oia, i mai la kela, Ina i uuku hiki no anei? I aku la no keia, Ina he kahala, e okioki liilii. Alaila a hoole loa mai la no kela, aole a oukou ia.
                Haawi iho la no ia luna nei o makou i na paeai he 13 pakahi a pau, aole i pau ko makou manao ana i ka ia, no ka mea, na makou no a pau kela ia, a ina he la okoa kona i noi ai, ina ua maopopo no nana ka ia.
                Alaila kii aku la i ka ia ana, hahai aku ia kekahi poe o makou kahaha, hele aku la a hiki i kahi o ka ia, haawi mai la ke kanaka o ke Alii he 13 ia, i aku la ua luna nei o makou, Aole ua makou a pau ka ia, na'u wale no, aia no i kou haawi ana mai, no ka mea, na'u wale no ka ia, i mai la kela, He maopopo ole ia'u e like me ka ai, pela no ka ia, ae ae la kekahi o makou 13 ia, hoole loa aku no ua luna nei a makou, i aku la. Aole, aia no i kou haawi ana mai ia'u: a hele koke aku la kekahi o makou i waho, no ka mea, ua paakiki loa kela kanaka.
                Nolaila haawiia mai la e 9 ia, i mai la ke kanaka o ke Alii, Eia na ia e 9 i hookahi au ai 8 na kela poe o oukou, i aku la keia, ia'u wale aku no ia.
                Koi ikaika aku la keia poe o makou, e haawi i na ia na makou a pau, aole kela i ae iki mai, paakiki loa no kela kanaka, i aku la kekahi e kuai maoli i ke olala, no laila paha i haawiia ai ia makou.
                Auhea oukou e ka poe heluhule i keia manao, ua maopopo ia'u ma keia hana ana ka lapuwale o kanaka.
                Nolaila mai hele kakou ma na kapuai o na kanaka, aka e hele kakou a pau ma na kapuai o Iesu; no ka mea, ua maopopo kona lokomaikai, kona hoomanawanui, kona aloha, ia kakou i ka poe lapuwale, no ka mea, he hoawi wale mai oia i na mea a pau na ka poe e noi aku ia ia. Na MAKAIHEEKONA.

NO KA MAHINA HOU.
NO KA OLIOLI I KE KOKUA.

                Auhea oukou e ka poe hoopaa i ka puhaka o ko kakou Haku o Iesu Kristo; ke ae nei ka naau i ko ke Akua lokomaikai, i kona hooloihi ana i ko kakou noho ana, i keia ao, nolaila ko kakou ike ana i keia mahina hou, no ke ahonui o ke Akua ka ike ana. Auhea oukou, e ka poe kumu upena, e aupula kakou i ka pono o ko kakou Haku. I hei ka ia o ke ola, o ko kakou uhane, ke ae nei ko'u naau i ka lilo ana o ka kakou kala, no kona aupuni, ua lilo anei me ka makemake o ka naau? a me ke aloha, a me ke kanalua ole, a me ke kahaha ole, a me ka hoonaukiuki ole, me ke aloha ka haawi ana, e loaa mai auanei kona aupuni o ke ola o ko kakou uhane. Aka i haawi aku kakou me ka okupe o ka manao, he Akua akamai oia i ka haawi mai i ka okupe