Ka Lama Hawaii, Volume I, Number 14, 16 May 1834 — Page 1

KA
LAMA HAWAII.
HE MEA IA E HOOLAHA IKE, A HE MEA HOI E PONO AI KE KULANUI.
I naaupo ka uhane, aole ia he maikai. NA SOLOMONA.
Makahiki 1. MAUI, LAHAINALUNA MEI 16, 1834. Helu 14.

HE LIONA.

NO KA LIONA.

            Ua like kekahi ano o ka Liona, me ko ka popoki; a ma na helehelena, a ma ka hana ana, oia ka mea hanohano o na holoholona a pau i puni koko.
            Ua like kona nui me ka Tiga alii. Ekolu kapuai a me ka hapa kona kiekie, a eha kapuai a me ka hapa kekahi. Eono kapuai ka loa, a eiwa no hoi kekahi.
            He ulaula olenalena kona oho. He ula loa ma ke kua, a he hapa ma na aoao a malalo iho o ka ai.
            Ua loihi ke kino o ka Liona a ua palahalaha ka umauma a ua ikaika loa. Ua nui kona mau wawae, a me ka maka: ua uuku na pepeiao a me na maka, a ua pokole ka ai.
            O kona umauma a me ka ai, a me ke poo, ua paapui ka lauoho loihi e lewa wale ana ilalo; oia hoi ka mea i like ole ai me kekahi mau lio a me ka popoki.
          I ka wa i noho malie ai ka Liona me ka huhu ole, alaila ua maikai loa kona helehelena ke nana aku, a ua kuoo. Aka, ina huhu ia, alaila, aole mea e like ai ka ikaika a me ka weliweli loa. Hahau ikaika loa oia i kona mau aoao i ka huelo, a ku pono iluna kona oho e like me ka hulu puaa, a hamama ae la na lehelehe, i ikeia kona mau niho alohi no hoi kona mau maka, me he ahi la e lele ana iwaho.
            O na helehelena o kona kino, he mau helehelena ku i ka ikaika loa, a me ka mama. Me ka nui o kona poo, ka pokole o kona ai, ka poepoe o kona kino, a ma ka nui o kona mau wawae, ma ia mau mea ua maopopo kona ikaika nui. Ua loihi no hoi kona kino, a ua ikaika loa ka olona o kona mau wawae, nolaila, hiki ia ia ke hele ma kahi loihi loa.
            Ua loaa ka Liona ma Asia, a ma Aferika. Ma na wahi wela loa, malaila ka Liona nui; a malaila, e like me ka wela o ka la, pela no ka huhu, a me ka makau ole o ka Liona. He mea weliweli loa ke nana aku, a ke loheia kona leo nui, e uwo ana. Aole ai ka Liona i ka ai maoli a me ka mauu, o na holoholona i paa ia ia, oia kana e ai ai. No kona mama i ka lele a me ka holo, a no kona ikaika nui, he kakaikahi ka holoholona e pakele ia ia.
            I loaa pono kana mea e makemake ai, he mea mau ia ia, ke huna ia ia iho ma kahi kokoke i ka wai puna, a ma kahi e hele mai ai na holoholona e inu i ka wai; a ike aku la ia i kekahi mea, o kona lele ia a paa koke no ia ia ua mea la; no ka mea, e hiki no ia ia ke lele i kahi loihi, a ua loihi kona maiuu, a ua oioi loa a loihi kona mau kui. Pela e paa ai ia ia ka Bufalo nui, ka Dia makau, a me ka Anetelope maikai.
            Ua kapaia ka Liona, ke alii o na holoholona, aka, aole e make na holoholona a pau ia ia. O ka nuku o ka Elepani, o ka pepeiaohao o ka Laehaokela, e na uuku o