Ka Lahui Hawaii, Volume II, Number 8, 17 February 1876 — Page 1
KA LAHUI HAWAII.
"Ua mau ke Ea o ka Aina i ka Pono."
BUKE II.} HONOLULU, POAHA, FEBERUARI 17, 1876. {HELU 8.
KA NUPEPA KA LAHUI HAWAII.
Paiia ma kela Poaha me keia Poaha.
H. H. PALEKA, Luna Hooponopono.
He pepa i hoopukaia i kela me keia hebedoma no na Ohana a me na Ekalesia o Hawaii; he mea kokua i ka noho pono ana o na ohana, ka maluhia o kanaka, a me na pomaikai kino a uhane o ka Lahui Hawaii. "Aole paonioni; aole haanui; aole hikiwawe ka huhu; aole noonoo ino."
O na Kumumanao a pau, na Nu Hou o kela me keia ano, na Mare, Hanau, Make, e kakau mai i ka Luna Hooponopono, a e paiia no ke kupono.
Aole e aeia ka pilikino, ke kuamuamu, ka hoino, a me ka huhu, a ua makemakeia ka hoohoihoi, hoolana manao, hoonaauao, a me ka hoopono.
He $1.75 ka auhau o keia pepa no ka makahiki, a he $1.00 no ka hapa makahiki.
E hookaa mua ia ka auhau o ka pepa mamua o ka loaa ana i kekahi mea makemake e lawe.
NO NA OLELO HOOLAHA.
E lawe ana keia pepa i na Olelo Hoolaha a na makamaka, e like me ke kupono, a e lawa pono ai hoi me ka hoohaiki ole i ka huina o na kolamu kukulu manao, no ka uku haahaa.
O kela a me keia makamaka e makemake ana e hoolaha, e hele mai ma ke keena a e hui pu me ka Luna Hooponopono.
Aole e paiia kekahi Olelo Hoolaha ke ole e hookaa mua ia ka auhau.
Eia kekahi, ke noiia aku nei na makamaka e hoouna mau mai i na mea hou; mai hooloihi loa i na palapala; e hai pololei mai i na manao me ke kuawili ole, a e kakau mai me na hua moakaka.
H. H. PALEKA,
Luna Hooponopono .
PAPA, PAPA.
AIA MA KAHI O
LEWE RS & DICKSON
(O LUI MA.)
KE KAHUA KAHIKO MA
Alanui Papu a me Alanui Moi
E LOAA AI NA
PAPA NOUAIKI o kela a me kaia ano.
NA PAPA NANI
A PAA NO KE KUKULU ANA I NA HALE.
Na Pani Puka,
Na Puka Aniani,
Na Olepelepe,
Na Pou, na O-a,
Na Papa hele,
Na Papa Ku,
Na Papa Moe.
Na Pili o na ano a pau!
NA PEPA HOONANI,
Na PENA o na wai a pau.
Na Kui mai ke nui a ka makalii,
Na Ami-puka,
Na Ami-puka Aniani,
Na Ami o na ano a pau.
NA AILA PENA,
NA AILA HOOMALOO,
NA AILA o na ano a pau.
NA VANIKI
Na mea HOOHINUHINU o na ano a pau.
Na Balaki o kela ano keia ano.
A KE HAI IA'KU NEI KA LONO i na makamaka a pau, ua makaukau keia mau Hoa o oukou e hoolawa aku ma na mea a pau e pili ana ma ka laua oihana no ka
UKU HAAHAA LOA!
E like me ka mea e holo ana mawaena o
LAUA a me ka MEA KUAI.
E hele mai! E na makamaka!
A e lawa no hoi ko oukou makemake me ka oluolu
1] a me ka maikai [3m
E LOAA NO I KA POE E
MAKEMAKE I NA
INIKA KAKAU,
PENI, PEPA,
WAHI-LE TA,
BUKE,
MA KAHI O
TARAMU.
Manae iho o Kini Hana Wati.
KAHI HOI E LOAA AI IA OUKOU
NA BUKE!
Oia hoi na nupepa i humuia, a e kuniia ka inoa mawaho o ka buke, a ka mea makemake ana, eia no ma kahi o
TARAMU.
KAHI E LOAA AI KO OUKOU MAU
Papa Kuni Inoa!
No ke kuni ana i na Lole,
Na INIKA a me na BALATI,
NO KA
$1.50 NO KE KUNI KELEAWE,
2.00 NO KE KUNI DALA.
MA KAHI O
TARAMU.
NA KII a me na LAKO MAKANA
Paani hoohauoli no na Kamalii.
Na HAE LIILII,
No ka HOONANI ana.
MA KAHI O
1-3m TARAMU.
The Heritage.
P. C. A. Ian. 8, 1876.
1 He waiwai ili nui kou,
He keiki hooilina nei,
Na aina, hale, dala no,
He kino palupalu e,
Mae wale nae a helelei.
He waiwai nei ma kuu manao,
Kupono ole ke paa mau.
2 He mau makau iloko ou
O poho wale kou waiwai.
He ahi paha a pau no,
A ilihune koke mai
Kou kino palupalu nei.
He waiwai kou ma kuu manao,
Kupono ole ke paa mau.
3 He waiwai ili aha kou,
Ka hooilina hune nei?
He kino paa palua no
Na lima ikaika a maa e
Ke hana a hoopololei.
He waiwai nei ma kuu manao.
Kupono ke hoopaa a mau.
4 He waiwai ili aha kou?
He oli ma na mea haahaa
I loaa ma ka hana no,
Ma kela la ma keia la,
He naau mele a mama.
He waiwai nei ma kuu manao,
E pono ai ke mau a mau.
5 He waiwai ili aha kou?
He ahonui ke kau mai
Na eha, ino, na luuluu,
He aloha, a he hoomaikai,
Ke kokua aku ia hai,
He waiwai nei ma kuu manao,
Kupono ke hoopaaia nou.
6 Ke keiki a ka mea waiwai,
Me ia e hana like ai,
Kokua a hoopomaikai
I koonei kini hune, mai,
Ka poe pololi, e hanai,
Ka waiwai nei ma kuu manao,
Kupono i ka naauao.
7 Ke keiki a ka hune nei,
Mai lili i ka mea waiwai.
Nanea ia a luhi e
I kona imi ana'e;—
Ka loaa nae ua pane ae
Heaha nei? ma kuu manao,
He naaupo, he nele mau.
8 He aina ili like nae
No laua nei, kokoke mai,
E ono ia mau kapuai
Malalo ma ka lepo e :
He aina lii laula nae,
Mao, maluna, ma ke ao,
Kupono ia ke paa a mau.
HAWAII.
ELINA KE KOA
HE KANAKA OPIO
KA PALEKAUA LIONA HOI O KONA MAU LA.
KE PUKONAKONA O KONA LAHUI, A O
KA OI WELINA HOPO O KONA
MAU ENEMI.
Mokuna II—Helu 7.
AOHE hana i koe i na luina, o ka hooko wale no i ke kauoha. He manawa pokole mahope iho, e pakika malie ana keia mau waapa maluna o ka ilikai, i huna ia hoi e na eheu o ka pouli, kaalo aku la ma kela aoao o ka lae, a hoea malalo o ka omalu o na pali, kahi hoi o ke kuna Zelina e moku ana.
O keia Egemona i hoonoho ia iho la e Elina i hoa nona, he keiki opio wale no oia, a no ko Elina ike ana i kona ano koa a wiwo ole, oia kona mea i hoonoho ia ai i hoa nona e alo ai i na ulia me na poino e kau mai ana.
Ku iho la laua nei ma ka ae-kai e hoolohe ana i ka owe malie o ku hoe o na waapa o ko laua mau hoa aukai, a hiki i ka nalo ana iloko o ke anoano o ka ne o ke kai ; a apo ae la ko laua mau lima, a huli aku la ke alo no ka hale nui ano kupua e ku mai ana.
"Ano e Egemona, e paa oe i na manao koa a me ke kulana wiwo ole o kou kino a me kou puuwai mai keia minute aku," wahi a Elina i pane aku ai i kona hoa me ka leo mama.
"Ua paa, ua sila ia, a ua wili ia ke ki o ko'u mau iini no ka ukali ana mahope o kou meheu e kuu haku alii ; a maluna ae o na mea a pau, aole loa e kuemi hope keia mau kapuai wawae, a hiki i ka lawe ana aku o ka make i kana o ka hanu," me ka leo ano koa oiaio o Egemona i pane mai.
Pai iho la o Elina maluna o ka poohiwi me ka hauoli a pane mai la. "O oe ko'u hoa. E ukali oe ia'u, a mai hahau oe i kuu makakila, aia wale no a hai aku au ia oe i ka hua. O kuu manao, ua paa, a o ko'u inaina hoi ke haehae nei i kuu puuwai, a ke haawi aku au ia oe i ka huaolelo e hoomoe i ka oi o kau pahi, alaila, e hooko oe, mai hopo, no ka mea, ina oe e hopo a hala kau uhau ana, alaila, na ka'u makakila no oe e hoomoe, oiai, owau no ka make mua loa o ke kanaka wiwo wale, ina no ia he enemi a he hoa'loha paha." O Elina me ka manao paa ia i pane mai ai i keia.
Hui ae la ko laua mau pulima, a me na leo pule i hoohiki ae ai imua o na lani, e hooko i na koni a me na iini o ko laua mau puuwai no ka pomaikai o ke aupuni o ko laua Moi Rikeke, ke one hanau hoi o ko laua mau kupuna aloha.
Ua napoo aku la ka la malalo o ka ilikai he mau hora elua a oi paha i hala ae. Ua uhi mai la ka pouli, a ke nee mai la ka noe maluna o na puu a iho ma na kualono. O ko laua nei komo ana aku ia maloko o ka ipuka nui o ua hale nei.
Me ka nihi malie o ko laua mau kapuai wawae i hele aku ai, aka, ua pihoihoi loa ka manao o Emeline, e like me ka pepeiao o ka popoki, ua lohe mai la no ia laua nei, a ku ana ia imua o ko laua nei alo. "E wiki, e wiki," wahi ana i pane mai ai me ka leo hawanawana ano pihoihoi. "Ua ike au i kahi kupono no olua e pee ai ; aia maluna ae o ka puka o ka rumi hookipa o na powa, he wahi keena i ike ole ia e lakou mamua ae. E hele mai a na'u olua e lawe aku a hiki ilaila."
Hele awiwi aku la oia, a ukali aku la na koa opio mahope ona. Maluna ae o ka ipuka ana i hai mai ai, kau ae la kona lima, a i ka hoopa ana ae i kekahi wahi pana e kau ana, o ka wa ia i holo ae ai ka laka, a ike aku la laua nei he wahi ipuka uuku.
"Maanei olua e komo aku ai, a aole olua e ike ia mai, aka, o olua ke ike aku ia lakou."
"Ua hana anei oe i ka'u mea i noi aku ai ia oe, no na mea e pili ana i ka waina?" wahi a Elina i ninau aku ai.
"Ae e ke koa, ua hoo wau he kulu i kela a me keia pahu o lakou. Mai hopo oe no ia mea."
Ia lakou no e kamailio ana, ua loheia aku la ka leo o na powa e walaau mai ana. "E wiki olua, ma ke ano o na leo me he la ua pomaikai keia huakai a lakou, a ua ano ona lakou i ka waina." Nalo aku la ua kaikamahine nei, a i ko laua nei komo ana aku iloko o ua wahi keena nei, o ka holo hou ae la no ia o ke pani a paa. Maloko mai o ua wahi keena nei, he mea hiki wale no ia laua nei ke nana mai i na mea a pau e hanaia'na, oiai, he hakahaka wale no, aka, mawaho aku nei he paa loa, a aole e ikeia.
Aole i liuliu ko laua noho ana iho, poha mai ana he leo nui kalakala ma ka ipuka mawaho loa, i ke kahea ana mai, "Emeline! ano e hele mai imua o'u nei."
Aole no hoi i hakalia iho, lohe aku la laua i ka leo makau nawaliwali o Emeline, a pane mai la.
"Eia no au no ka hooko ana i kou makemake e kuu haku."
"Owai kau malihini. E pane mai ano !" wahi a ka powa.
"Aole malihini hiki mai ma kou home nei, oiai, ua holo aku ka weli ia nou a puni ka aina, a aohe paha kanaka e naaupo ana e hele mai."
"Ma ke ano o na hiohiona o ka hale a'u e ike nei, me he la, he oiaio, he malihini kekahi o ka hale nei. Aka, e kauoha no wau i ka'u mau Bea e hele aku e hanu, a ina e loaa kekahi mea, a ina e loaa kekahi mea, alaila, e make oe e pono ai."
Kahea aku la ia i na luina ona, a haawi aku la i ke kauoha ia lakou e hele aku a e huli i na keena o ua hale nei.
Iloko o keia manawa, e kahe-awai ana ka hou ma ko Elina ma mau lae, no ka mea, ua pii mai la ka wela inaina, a ua aneane e hiki ole ia laua ke uumi iho i ka manao e hoike aku ia laua iho, a paio aku. Lohe aku la no laua nei i ka huli ia mai o na keena, me na kukui lamalama lakou e noke ana ma na wahi a pau, ike aku la no laua nei i ko lakou mau ano a pau, aka, aole loa i hookokoke mai i ko laua nei wahi e pee ana.
He hora paha ko lakou noke ana i ka huli, a hoi ae la lakou a hai aku la i ko lakou haku, "Ua puni na keena a pau o ka hale nei, aole nae kanaka. Nolaila, ke hooia aku nei makou imua ou, he oiaio ka keia kaikamahine i hoopuka ae nei."
No keia mea, ua hookuu ia aku la o Emeline e hoi aku ma kona keena, a kauoha ia aku la na luina e kii aku a lawe mai i na waiwai o luna o na moku. Aole no i liuliu, ua pau mai la na ukana o luna o ua moku nei i ka aina, a hoihoi ia ae la a waiho iloko o ka rumi waiho ukana. Ma ka laua nei nana aku, ua ike ia aku la na waiwai o na ano a pau. Komo mai la na kanaka powa iloko o ko lakou rumi luana, a noho iho la kela a me keia maluna o na noho. Kuni ia ae la na ipukukui nunui o loko o ua hale nei, a piha ae la i ka malamalama.
O kekahi poe o lakou, ua hooliloia he poe kuene. Maluna o ka noho nui ua ike ia aku la o Don Padilo, oia hoi ka inoa o ke alii o na powa. Maluna o kona mau hiohiona ke ano hae o kona mau manao ino, e anapa mau ana ke ahi ano wela o na onohi o kona mau maka. O kona aahu, ua kaumaha i na wai gula, a ma kona aoao e paa ana he pahi kaua nui.
Lawe ia mai la na mea ai i hoomakaukauia no lakou, lawe pu ia mai la no hoi na omole waina, a waiho maluna o ka pakaukau. A i ka makaukau ana o na mea a pau, o ko lakou wa ia i hoomaka ai e ai, e inu, a hauoli- O na olelo weliweli a pau, e hai ana lakou i ka moolelo o ka lakou mau hana. Ua piha ka hale okoa me ko lakou mau leo himeni, a ma ko lakou ano iho, ua hauoli lakou me ka noonoo ole no kekahi mea e ae. O ka waina, ua inu lakou me he wai la; a he hora okoa paha ko lakou hauoli ana, aia hoi, hoomaka mai la ia e hoike i kona ano e. Opili mai la na wawae o lakou, a kaumaha ke poo, a ano e ae la ke ano o ka lakou mau olelo.
Iloko o ia manawa, ua hemo mai la o Elina me kona hoa, a ku ana imua o lakou. Ua hooikaika mai lakou e ala mai a pepehi ia laua nei, aka, ua nele iho la ko lakou mau kino i ka ikaika, a ua waiho lolo iho la lakou.
"Ano, e na ilio powa o ka moana, ma ka inoa o ke alii ka Moi Rikeke o Beritania Nui, ke lawe nei au, o Elina, ka mea a oukou i enemi nui ai, a hoopaa aku ia oukou ma ke ano he mau pio."
"Owai oe e na kauwa kuapaa o ka hele ana mai me ka hookano a hoopuka mai i na huaolelo o ia ano. E kuhikuhi mai imua o'u, a na'u e hookaawale i kou poo mai ke kino," wahi a ka haku alii o na powa.
"Ua hoopuka oe i kau kaena e Dona Padilo, aole loa oe e pio a hiki i kou make ana, oiai, ma ko'u manao iho, aohe lua, a aohe kolu o ke koa a ikaika e like me oe; nolaila, ano, ke hai aku nei au ia oe, aole e haawi aku i ka manawa kupono no kou kukuli ana mai, aka, e hoopaa ia oe ano i ka hao, a e kali no ka hiki mai o na liona o ke kuna Zelina , ka poe hoi nana e hoolele liilii ko oukou heluna, a neo iho ka ilikai mai na ilio pepehi kanaka."
Huki ae la o Egemona i kana pahi a lele mai la imua, a me ka leo nui i pane ae ai, "e make me he ilio la, a na ko ka lani e hoopomaikai i kou uhane!" A me ka ikaika oia i hahau mai ai i kekahi o na kanaka a moku ae la kona a-i.
Lele aku la o Elina a kau aku la i kana pahi a pane aku la,"e Egemona, ke hai aku nei au ia oe, ina oe e hoomoe hou i kau pahi maluna o kekahi mea hookahi o lakou, o kou make koke ana no ia ia'u, no ka mea, he ano lawe ana ia i na pomaikai a pau ma kou aoao, oiai, ua ike oe, ua pau ko lakou ikaika."
"Aole e hiki ia'u ke kali, e kuu haku, no ka mea, o ka'u kanaka kela i lohe mai nei e kamailio ana no kona pepehi ana a make loa he ekolu mau keiki opio, a na ia mea i hoala ae i ko'u inaina, a ano ua hooko ia." (Aole i pau.)
KA HALE KAKELA BOLOISA.
HE NANEA
NO NA AU I HALA.
HELU 3.
ILOKO o kekahi manawa pokole, ua hiki mai la o Mausonete ma ka aoao o Heneri ; a iloko hoi o ka hapalua hora ma ia hope iho, e hiolani ana o Heneri iluna o kahi moe kupono iloko o ka hale o Mausonete. Ke nana aku nae i kona ano, me he la ua hele ka pili o ke poo, a ua ane pilikia ka waihona o kona puniu lolo.
* * * *
O Hene ri, ke keiki muli loa a kekahi keonimana o ke kulana kiekie, aka no na ulia pakalaki o ka manawa, ua hoilihune ia oia, a i ka wa i kuu aku ai kona luhi mai na poai aku o keia ao inea, ua hooili iho oia i kona mau wahi waiwai uuku no kana keiki hiapo, a pela i hoonele ia ai ke keiki muli.
No keia mea, ua waiho ia ke keiki muli a o ke koa eha o ka kakou moolelo, nana ponoi iho no e huli aku i ke alanui o kona pomaikai, a me ke kaulana. I kona wa opiopio, ua komo aku oia iloko o ka puali koa o Farani, a no kona eleu, ka miki, a me ka wiwo ole, na ia mau mea i hoopaneenee liilii ae iaia mai ke kulana koa hele wawae, a hiki i ke kulana Lutanela.
Ma ia kulana oia a hiki i keia wa, a he pono no hoi e olelo ae, o ka wa o neia mau ulia i hoike ia ae la, o ia no ka wa i hiki aku ai oia i ka 25 o kona mau makahiki.
He ui a mohaha kona helehelena, a na ia mea i huki mai i ka puuwai o Pauline, ke kaikamahine a kekahi o na 'lii kaulana a waiwai o Farani.
O M. De Lavala ka inoa o ka makuakane o ua kaikamahine nei, a i kona wa i ike ai ua lilo e ka puuwai o kana kaikamahine i ke koa ilihune, ua huli oia i na mea a pau e hoopale ia ai ko laua launa ana, a e alai ai hoi i ka holomua ana o ko laua mau iini.
O kona ohana, ua kaulana mau i na hanauna a pau mai kahiko mai, o ka ohana waiwai nui o Louraine, a me ka poe o ke kulana kiekie, nolaila, o ka mea kupono i ka manao o ua makuakane nei, e huli aku oia i kane na kana kaikamahine, mailoko mai o kekahi alii kaulana o Farani,—a o ke Count Befota ke kane ana i manao ai e hoopalau na kana kaikamahine.
Ma na huli ana a ka makuakane i mea e holopono ai kona mau makemake, ua ukali wale ia mai no e ka pomaikai.
Ua ae mai ke Count Befota e mare me ua ui Pauline nei o Beloisa. A i mea hoi e halawai hou ole ai o Pauline me kana ipo o na la opiopio, ua hoopaaia oia iloko o ka palama.
Ua hiki mai la ke Count Befota, a ua hoopaaia hoi ka ipo ana a hiki i ka wa e mare ai laua no kekahi la e hiki mai ana.
O Heneri hoi, e i la ihea?
Ua hai aku la na poe powa nana i pepehi i ua makuakane nei, ua pepehiia e lakou a make, a no kona nalowale loa ana, nolaila, ua hooia iho la ua makuakane nei he oiaio ka mea i haiia aku iaia. Aole he mea e ae i ike i keia mea huna.
Aole no hai he mea hookahi i moeuhane mua, o ua hoa nei o Pauline o na la opiopio, eia oia iloko o ka hale o Mausonete kahi i malamaia'i, me na haili o ka manaolana no ka hoihoi hou ia mai o kana ola a me kona ikaika o na la mua. Aka, hookahi malama okoa o ke kali ana mahope iho o kela po i powaia'i oia, akahi no a loaa iaia ka ikaika kupono. Na Mausonete i malama pono iaia iloko o ia manawa me he makua la i kana keiki ponoi, a na kona aloha a me kona lokomaikai i aie nui ai o Heneri i kona ola hou ana, me ha la mailoko mai o ka luakupapau.
Aka, he mau makahiki he nui i kaa hope ae, a oiai hoi e ola ana ka makuakane o Heneri, ua aie nui ua kanaka kalai pohaku la i na lokomaikai a me na manawalea palena ole o ua makua la o ke keiki i hoehaia, a no ia ano, ua hoohauoli nuiia mai la ka mea kalai pohaku i keia wa, no ka loaa ana iaia o ka wa kupono e panai aku ai i ka lokomaikai no keia lokomaikai kahiko.
I ka pau ana o ka lua o ka malama, ia wa i hoopuka aku ai o Heneri i kona manao hele.
" I keia po, e haalele ana au ia oe e Mausonete,'' wahi ana ; "E hookaawale au ia'u iho no kekahi manawa, i mea e hoopoina ia ai na mea i hala. I hookahi a'u huakai hope loa i koe i ka hale kakela; i haawi aku ai au i ke aloha hope loa i ka mea hookahi a'u i aloha ai. Pela e haawi aku ai au i na manaolana nona.—Ina e mare oia i ke kane iloko o kuu wa e hele ai—oia hoi, hookahi makahiki mai keia wa aku—aole oia e ike hou ia'u ma keia aoao o ka lua ;—a ina aole, a ina ka pomaikai a me ka laki e awihi mai ana ia'u ma keia mua aku, e hoi hou mai no au, e lawe iaia na'u e like me ke kuleana kahiko i hoohuiia e ke aloha maemae iloko o ko maua mau puuwai.''
Ia wa i ekemu mai 'i o Mausonete, "A! ina e loaa ana ia oe ka waiwai huna o ka hale kakela, ke manao nei au aole e kue ana o Lavala hookano i kau noi."
"Heaha kau mea e olelo nei?—he waiwai huna no ka hale kakela?" i ninau aku ai o Heneri me ka hoopuiwaia.
"Ina aole oe i lohe i keia mea huna a me kona moolelo, he pono au e hai aku ia oe me na huaolelo pokole," i pane mai ai o Mausonete.
"Elua haneri makahiki i hala aku nei, o Count Monetalemebeta ke Kiaaina nona ka Hale Kakela Beloisa, he kanaka waiwai nui, aole nae ana keiki o kona puhaka, nolaila, ua hoolilo oia i ke keiki a kona kaikuahine he hooilina no kona inoa a me kona mau waiwai a pau mahope iho o kona make ana. Aka, o ua keiki nei a kona kaikuahine, he kanaka opio noonoo ole, he lokoino, he kolohe, a me na hana ino a pau i ku i ka hoowahawaha loa ia; no ia mea, ua hoohiki iho la ka elemakule, aole e ili aku ua mau waiwai nei iaia.
"No ia mea, houluulu mai la oia i na dala a pau i loaa mai iaia mai na aina mai, ma ke kuai ana aku, a ma na moraki ana hoi, a i kona wa i make ai, aole he wahi hapaumi hookahi o ua mau dala la nei i ili aku i ua keiki la a kona kaikuahine. O kona wahi hooilina hookahi, o ka Hale Kakela wale no, ka home kahiko mai na kupuna mai. Mai ia wa mai a hiki i keia wa, he moolelo kaulana ia e waiho nei, o ke dala a pau a ke Count Monetalemebeta, ua hunaia maloko o ka Hale Kakela o Beloisa. A iloko o na keneturia elua mai ia wa mai a hiki i keia wa ka noke ia ana i ka huli, aohe loaa iki. Ke ake nei au ooe ka mea e loaa ai o ia waiwai huna."
"Heaha ka nui o ua waiwai la ma ke dala maoli?" i ninau aku ai o Heneri.
"Aole he mea i ike," i pane mai ai o Mausonete, "aka, ma ka noonoo wale ia a me ka hoonohonoho ana a kekahi poe i ka nui o kona mau loaa o kela a me keia makahiki a me kona mau lilo, a hiki i kona la i make ai, me he mea la, ua koe iho i kona waihona waiwai he iwakalua haneri tausani dala maoli. Ua olelo ia nae, ua hoolilo oia i kona mau waiwai a pau maloko o na pohaku makamae wale no a me ke gula, a ua hunaia ma ke kau wahi o ka hale kakela iloko o kekahi pahu tini."
"Aole io no i kanamai o ka waiwai!" i pane aku ai o Heneri me ke ano paani. "Ina paha e loaa ana ia'u kekahi ki e weheia'i ua mea huna la, heaha la ia?"
Ma ua po hope loa la o kona moe ana iloko o kahi hale pupupu o Mausonete, he moeuhane kupanaha ka i loaa iaia. Me he mea la he mau hoakuka no ka waiwai huna o ka Hale Kakela.
O ua hihio nei, he mea kino lani ano e ka i ku mai la imua ona, ua aahu ia i ke kapa ahi. Ua alohi a lilelile kona mau helehelena maka e like me ka anela, a he kookoo ke paa ana i kona lima, me ia mea i peahi mai ai oia iaia e hele aku. Ua ukali aku la oia mahope ona iloko o kekahi ala ololi a hiki aku la i ke kau wahi, aia hoi he puu o ke gula a me na pohaku makamae kana i ike ai e ahu mokaki ana. I kona wa i anehe aku ai e hao ae i ua puu waiwai la, ua puoho ino ae la oia, aia hoi, he neo ke waiho ana iloko o kona lima e like me ke ano mau o na moeuhane. Ua puka ka la, a e wena mai ana ka ululaau iloko o na hiona nani o ke ehu kakahiaka.
No kona hopohopo o noonoo e mai ka elemakule i ke ano o kana moe, nolaila, aole ia i hoike iki aku iaia. I ka hiki ana i ka hora umi o ka po, ike ia aku la ua kanaka opio nei e ku ana ma ka ipuka o kona hale i malamaia ai, a haawi aku i ke aloha a me na honi hope loa ana i kona mea nana i malama maikai.
Iaia i puili hope loa aku ai i ka lima o ka elemakule maikai, puana ae la oia i kana mau olelo hope loa me na kuluwaimaka e iho makawalu mai ana. "E Mausonete, he tausani dala ko'u wahi waiwai o ka noho hoomanawanui ana iloko o keia ao inea. Noloko mai o keia, elua haneri ka'u e haawi aku nou ano. Eia lakou. Mai hoole mai i ko'u aloha. e lawe ia mea mai a'u aku me he makana la, no ka mea, nau i hoopakele. Adieu ke aloha."
Iaia i hookomo aku ai i ua mau dala la iloko o kona lima, huli ae la ia a nalowale aku la iloko o ka ululaau, ma ke alanui e hiki aku ai i ka Hale Kakela o Beloisa. (Aole i pau.)