Ka Leo o ka Lahui, Volume II, Number 569, 20 October 1892 — KA LUNA AUHAU. [ARTICLE]

KA LUNA AUHAU.

Oiai ke olelo hooholo hilinai ole e paio ia ana iloko o ka Hale Ahaolelo, i ka Poakahi nei, ua hele ae la, ke Duke o Waikapu e haha i na kahu hanai o ka aoao kuhina, i maopopo ai ke kulana o ka mai, ka make a me ke ola o ka lakou mau hanai-a-huhu. I ka wa i maopopo ai, ua huli aku kekahi o lakou ma ka aoao o ka poe e pule anaana ana i na Kuhina, ua maopopo iho la ka make i ka Duke, a hoike koke aku la oia i ke kulana i ke poo o ka Aha Kuhina. No keia olelo make, ua lele aku la ka hua wale make mai ka waha o ka uhane deregona iloko o ke poo o ka papa kuhina, a pa aku nei i kekahi luna aupuni, i ili aku ai ka inaina a pau o ua deregona nei, a ua haua aku la ka Luna Auhau o Honolulu e ka hiu o ua deregona Kuhina nei. ua pa aku la ka Luna Auhau, a kunewanewa aku la, aka aole nae i make, a me he la e ala mai ana oia e like me Puapuakea, i ala mai ai mai ka hauna laau a Makaku, kona hoa paio, a e hoopio aku i kona hoa ma ke kau pale ana i kona mana aole ke poo a me na lala o keia Aha Kuhina e hui hou a e noho hou ma ko lakou wahi i hoopunana iho nei. E hoomanao kakou o ke Keiki Baraunu i hoopau ia aku la e ke Kuhina Makapolena, mamuli o ka ukiuki wale no me ke kumu ole. he moopuna oia na Kaahupahau, a aia no ke kahu ke noho mai la i Waipio, (he wahine) a mai haohao kakou ke nahu ia kekahi Kuhina ma keia mua aku e keia kahu wahine, no ka hoina ia o ka moopuna.