Ka Makaainana, Volume III, Number 16, 24 June 1895 — Page 4

Page PDF (848.09 KB)

4 HONOLULU, OAHU, POAKAHI, IUNE 24, 1895.

KA MAKAAINANA,
HE NUPEPA OILI PULE.
-

                     E hoopuka mau ia aku ana i kela a me keia Poakahi o na pule a pau.

-
W.H. KAPU,
Ona, Luna Nui a Lunahooponopono.
Wahi noho, ma Honolulu.
F.J. TESTA (Hoke),
Puuku.
-

                     Me ka puuku wale no na hookaa dala kua, aole i kahi mea e ae.
                     KEENA. Helu 327, Alanui Moi, kokoke i Aanui Konia.

-
UKU O KA NUPEPA.

No Hookahi Kope - $.10
No Hookahi Malama - .25
No Ekolu Malama - - .75
No Eono Malama - - 1.25
                     Ina e hookaa mua ia peneia ka uku:
No Ekolu Malama - $.50
No Eono Malama - - 1.00
No Hookahi Makahiki - - 2.00

UKU O NA LUNA NUPEPA.

5 Inoa - - .15
10 Inoa - - - .20
Maluna aku o 10 Inoa - .25
                     Aia a elima inoa a kekahi luna mawaho ae o kona inoa iho, alaila, loaa he pepa iaia me ka uku ole.

-
POAKAHI, IUNE 24, 1895.
-

                     ME nei helu e pau ai ka hapaha elua, ka hapalua mua o keia makahiki, a me ka Buke III. o KA MAKAAINANA nei. Ke kauleo hou aku nei no hoi makou i na luna a me na poe lawe pakahi, ke hookaa ole ia mai ke ola o ka nupepa, e pau ana ko lakou hui a launa a kaunu pu ana me makou. He makehewa ka hana me ka loaa ole mai o ka luhi.

-

                     UA ko ka makou i uwalo ai no kekahi halawai makaainana, a ke haawi aku nei KA MAKAAINANA i kona mahalo i na oiwi a pau i hoolohe i ka leo a hele nui ae no ka hoalohaloha ana i ka ohana o Kuhina Nui Geresehama i make. Hookahi no hana i koe, o ke kokua a kakoo mai o na Ahahui Aloha Aina a pau loa a puni ka Paeaina nei i na olelo hooholo i hooholo lokahi ia ma ke akea e ko Honolulu nei poe. Oia, nawai mai ana la ke eo?

-

                     NUI na lono no ka hookuu io ka ae o kekahi poe o na pio ka laiaina e paa nei i ka inea, aka, e nana aku no hoi kakou no ka oiaio loa o ia mau lono. A eia no hoi ke lonoia nei aohe ana no ka e hookuu nui ia, no ka mea ka, wahi a ka oleloia, he nui loa ka walaauia e ka lehulehu, a hui pu aku la ka hoi me ko na nupepa. Ke hooko io mai ke Aupuni, ia manao, alaila, he moali aku ia e loaa io ai o ka laulea like ana me ka lahui. Aka, ina hoi e oiaio ole ana ka hookuu io ia ae o na pio, alaila, ua maopopo no ko lakou nei ma ae ano, oia hoi, he maunu wale no kela mau hoohoihoi ana, i mea no ka lahui e puni ai, a he hoopalaimaka wale no hoi. Ina hoi e hookoia mai ana, alaila, nui no ko lakou mahaloia.

HE PIO A HE KIPI PAHA?
-

                     O na poe pio kalaiaina anei, a i ole ia, o na poe kipi paha? Ina ua hewa makou ma ke kapa ana ae i na poe i kipi iho nei i keia Repubalika he poe pio kalaiaina, alaila, aia no ke koikoi o ia kapa ana maluna iho o makou, aole no nae o makou wale, ua pau pu no a me ke Kuokoa ma ia mea hookahi Ina o ka lakou kipi ana a ua lanakila, alaila, aole loa lakou he poe kipi, eia nae, aole loa i hiki ia makou ke kapa aku ia lakou he poe kipi, no ka mea, eia lakou iloko o makou a o makou hoi iloko o lakou, hookahi io, hookahi koko a hookahi ewe. Ua kipi hoi paha lakou, no ka mea, ua ae kahi poe i na hewa, a ua ahewaia a hoopaiia hoi lakou; a o kahi poe hoi me ke akaka ole loa no o ka hewa, ua pau loa no i ka ahewa a hoopaiia, a ke paa nui mai nei hoi malalo o ke kanawai, i hookauia aku hoi maluna o lakou e kakahi aha hookolokolo mana a kuleana ole malalo o na kanawai a me ke kumukanawai, eia nae, ua mana iho la no ia mau hana ana i nei au. A o ka makou hoi ia e kaunui aku nei no ka olelo hooholo a ka Aha Kiekie ma kela hoopii noi palapala kuu kino a Kama'lii Kalanianaole. O ka makou no ia he poe pio kalaiaina lakou, no ka mea, i ulu kela oehu ana mamuli o na hana kalaiaina; a o ka lakou la ma ae no hoi ia o ke kapa aku ia poe a he poe kipi. Pehea, aole no anei hoi i pili like ia olelo ana i na poe i hookahuli ai i ke kulana hooponopono oiwi, e like no hoi me na mea i ikemakaia, mamuli hoi o ke kakooia ana mai e kekahi mana kuwaho makamaka? Oia no, pololei! Eia nae, aole makou e kapa aku ana ia lakou ma ae pela, aka, ua na hana no i hoike ae i ko lakou ma ano, a ua nalo ole no. E hoao wale no e palaina puna a e hamo vaniki ae, aohe e nalo, no ka mea, ua aai a ua paa loa. Malia o keia kekahi o na "kaana pono" ana a kela "popoki huna lepo" i manao iho ai o kona pono ia. Hele pela, e ke ino hololua! Imi hou aku i ua ko'a hou e lawaia ai, oiai, aole loa he mea e loaa i ka palaualelo ianei.

-

                     Aia ka halepai o ko makou Puuku ma Birito Hale, Alanui Konia, a malaila e hanaia ai na hana pai a pau. Ua manaolana makou i keia helu ae paha e pau ai ko makou pili wale ana ma kahi okoa e pai ai, a i ko makou puuku no o uku ponoi ai. E aho no ia, loaa no kahi pono iki me ka hopohopo ole.

MALOO NA IWI I KA LA."
-

                     Ua wini no hoi ke Kalabu Repubalika Hawaii i kahi halawai ana i kahi o keia mau po iho la, me ka hooholo ana ae he olelo hooholo e kakoo ana i ko Wile Kakela waeia a hookohuia i Kuhina Hawaii ma Wasinetona, me ko lakou koi pu aku i ka Aha Senate e apono mai i kona hookohu. O ka wini paha ia o kamalii lei pohue la, ke ao aku la i ko lakou mau poo ae a lakou i hiki ole loa ai e hoopakele ina i komo nui mai na liona hae o Laeahi iloko nei i ka wa o ke onene kaua o Ianuari i hala. Aohe no hoi i hewa, no ka mea, aia no a nui ka mahaoi ana, alaila, loaa kahi ponopono iki.

-

                     O keia poe ohakulai ka i hoihoi ia Wile Kakela, aka, aole paha hoi pela ka makemake o ka Aha Senate. Poaha iho la i halawai malu ai ia aha, no ka noonoo ana i ka mea pono e apono i na hookohu a ka Peresidena i hana ai, ana hoi i hoouna palapala mua ae ai. Ua aponoia na hookohu e ae a pau loa, a koe hoi kela o Wile Kakela. No keaha hoi? He mea apono aku no hoi paha ia a o ka pau ae la no hoi ia

-

                     Na Kamauoha no hoi kahi olelo hooholo wini e kakoo aku ka Hale i kela hookohu, eia nae, ua kue oolea ia mai e Lopikana, no ka mea, he hoohauhili wale ana aku no ia i kuleana o ia aha. Pololei, loaa nae hoi ka mea o ua o Panila e lohaloha ai. Malia ua manao paha oia nana e pani ae kela pohaka o luna ae o Kakela. Ua maopopo he hookohu kela i hoihoi ole loa ia, oiai, ke kue loa nei ka Hoku a me ka Ligi Amerika, no ko lakou makemake ole i kahi welo mikanele. Ia lakou mai no ia, o ke apuapu ae i ka pauku iwi.

-

                     A ia lakou nei ma ae hoi e pauaka nei maanei no ka hoaponoia ae o kona hookohuia ana, aia hoi, ua hoopahaohaoia o Wasinetona mamuli o keia hookohu. Ua manao wale ia iwaena o ka poai o na luna pili oihana malaila o Palani Hasetine ke hookohuia ana, no ka mea, aia no oia i kahua a ke lawelawe kuikawa la i na hana pili aupuni no Hawaii nei malaila. E hoihoiia mai ana paha o Kakela, aole paha. Oia no ka hoi kekahi i kakau palapala aku nei ia Senatoa Kaile iloko aku nei o Feberuari, a me he la e lilo ana ia i mea nona o lealea ole ia ai. Aia no paha hoi a ike aku no kakou.

-

                     Haohao no hoi na hana o nei au. Mahope iho nei o ka lawe ana o na kaa o ka Papa Ola i na opala o na pa, ano iho nei ua kauohaia na limahana e hooki, a e ku malie hoi na kaa a me na hoki me ka hana ole. Aia a nui ka lilo no ia mau mea, alaila, awiwi e hooki. O ia iho la no ka hoi ke ano o ke aupuni kupaa ole, he mea lole mau ka hoi ka hana i hookumu mua ia. No ke ano e mai no paha hoi kahi o ka noonoo ana.

-

                     Nolaila, o ka puhipuhi opala ana no paha hoi ka hopena aku i koe. O ia hewa okoa aku ana no paha hoi ia, he nui ka uwahi me ka hohono, a paa ae na pukaihu o kahi poe. Aia nae paha a nui na hale pau i ke ahi, alaila, ike nui iho i ke ino a awiwi e hoopau. Malia he ake nui no e hooi loaaia ae ka poino a me ka popilikia ma ko ka lehulehu aoao. Ua nui na dala i hooliloia no nei hana, a eia paha ke kapae nei no ka hoemi lilo.

-

                     Ua kakau aku kekahi haole malihini i hiki mai ianei mamua aku nei a hoi aku no kona wahi i hele mai ai, ma kekahi nupepa o kona wahi, i kona haohao i ka oleloia maanei no na poe like ole o ka manao me ko keia Aupuni, he poe roialisa (aoao alii) lakou. Ma kana hoakaka aohe oia i ike ia mea, eia nae, ma kana hoomaopopo, he poe no ka aoao alii ka lahui Hawaii holookoa, oia hoi, o na oiwi a me na hoaloha haole. Wahi no a ua mea la, ma ka aoao o na haole, o lakou no na poe i hoihoi a makemake ole i na hana pakaha i noho mana ae ai o na mamo mikanele ma ka hoeuli o ka moku Aupuni. Pololei no ka hoi na hoakaka a nei makamaka.

-

                     Wahi no hoi a ia mea hookahi aohe oia i hui a i ike iki i kekahi kanaka Hawaii i nele ole me ka hoike aku no kona aloha i kona aina a me kona Moi, a no ia mea oia i haohao loa ai. Ma kona manao koho wale iho, ua hanaia a ua hoopukaia paha kela hea ana i ka lahui a me ko ka lahui poo hoa'loha i mea e inoia ai ma Amerika Huipuia, oiai, he lahui hoino a hoowahawaha loa ia i na mea pili alii a pau loa. Oiaio loa kela mau olelo, aka, he mea ole loa ia i ko makou a i ko ka lahui manao. No ka oi loa aku no o ke aloha i ka aina a me ke Alliaimoku e paa nei i "mohailani" no ka lahui ua like na olelo hoino a hakuepa wale me ka ole, a na ke au no auanei hoi o ka manawa e hoike mai owai la ka i pono.

-

                     Mao ole no ka hoi ka holapu a ka eleao i kekahi kumu pua opuu