Ka Makaainana, Volume IV, Number 5, 29 July 1895 — Page 8
8 HONOLULU, OAHU, POAKAHI, IULAI 29, 1895.
(Mai ka aoao elima mai.)
-
ana ka hoi ua emi na loaa, aole nae hoi mamuli o ka manao kolohe, aka, no ke ano hawawa ka. Ina ua hawawa o Notele, no keaha la hoi oia i hookohuia ai ma ia oihana koikoi. He mau makahiki aenei kona noho oihana ana, ilaila, akahi no a hoomaopopoia kona emi pu i hope. Wahi mai nae hoi a ka lono mai laila mai, ua lilo nui ka kona manawa i kela mea iluna o kekahi pali o Kaupo, e hee holua ai a pahoe loa i ka welowelo. Apiki no paha.
-
Haakei no hoi ke Kalabu Repubalika Hawaii o ka hooholo lokahi ana iho nei i kekahi olelo hooholo, me ka makemake e hookikina aku i ka Mana Hooko a me ka Ahaolelo e hooholo lokahi ae, i loaa ai hoi ka launa kokoke loa ana me Amerika Huipuia. Aohe no ka paha he hilinai o ia poo oiwi ohakulai i ka Mana Hooko? E heneku wale no ia poe iloko o ka lepo loi, aole loa e loaa ka hoohuiaina. A o kekahi no hoi, aohe makemake o na mikanele ona mahiko e loaa ia mea. Kokoke paha hoi keia poo e kaili okoa ae i ka hoeuli a na lakou e hookele.
-
Eia ke holeholeia nei na iwi o ka Aha Kuhina no 3,320 kini opiuma (1,660 paona) i hoounaia ai o ka Oihana Dute i Vanekouwa. Malaila i hooliloia ai e ka Hope Luna Dute no $2,448, a hoolawe ae hoi no na kini i kahe, ua koe mai he $2,246.40. Ea, ole loa no ka hoi. Ua like ka mea i loaa mai me $1.30 no elua kini (hookahi paona), me ka hoolawe ae hoi i na lilo kaahele a me kahi mau lilo e ae, ua ole loa no. Mai oi loa aku no ka hoi ka pono ina i puhi ahi ia maanei, a haawi ae no hoi i na uku makana i na kiu, a pela aku.
-
Owai la ka i pomaikai ma nei hana ana? Ke lalau ole ka makou koho, ua huhewa ka ike o ka Luna Dute Nui, no ka mea, he pokii oia no Wili Kakela, ka ipu hokeo e hoounaia ana no Wasinetona i kii hoikeike. E like no ka hoi me ka mua, pela no me ka muli, a he manu pelehu hoi ka pokeokeo. Ua hoike mai ka hana kuai opiuma i ko ke Aupuni holomua ole ma ia oihana, no ka mea, ua nui ka lilo i ka Lehua me ka pala ole iho, a hoka loa hoi na kiu a me na poe na lakou i hopu,
-
"Hapala ko kea, na ka ole ka ai." O ke ano hana ia e ikeia nei imua o ka Ahaolelo, i ka huikau o na bila i kakaupoepoeia. Ma kela bila aina, ua umi paha na ano kakaulima like ole, a ane lauwili loa no hoi na mahele a elua. Ihea no la ko S.E. Bihopa ike ma ia ano hana. Ano kapulupulu no na hana, no ke ino mai no hoi o ka mea hooponopono. O kekahi hoi, ua like ole loa ka bila i kakaupoepoeia me ka bila i paiia, a kipaku ai ka Hale i kahi bila a ke Senate i kahi o keia mau la iho la.
-
Loiele a kikoola ka pane a ka Aha Kuhina i na ninau no kela hana aelike ole o ka hale pauma-mahu. He kauwa ka Lunamakaainana nana ka ninau no ka lehulehu nana oia i koho, a pela no hoi me na Kuhina. Ma kahi hoi o ka pane pololei aku, ua hoolauwili ae lakou. Ua hala ka wa no ka hoopunipuni aku. A ua hoohaahaaia no hoi ka mea ninau. Ke kali ia aku nei heaha mai ana la kana hana i koe.
-
I ke au Moi, aole i helu a hoouku auhau ia ka waiwai o ka Hui Waihona Buke Honolulu, eia nae, i nei au, ua heluia e uku i $120 maluna o ka helu waiwai o $12,000. Ke nei nei ia ahahui imua o ka Ahaolelo e hookuuia mai ka auhau. Akaka ka hune o ke Aupuni, eia ke helu nei i na mea no ka pomaikai o ka lehulehu. Me he la o ka heluia aku koe o ka Home Makuahine Kapiolani a me kahi mau ahahui e ae o ia ano like Kupaianaha no!
-
"Moe malie i ke kai o ko haku," o ia no ka puana pololei loa no ko noi pono kaokoa a ka Hui Kaa Alahao Uwila, e kakooia nei e Kimo Kakela a me W. N. Limaikaika. Ua moe aku la i ka moe kapu no noi kau a ala hou mai no paha i ke kau mau ae.
-
Ua huli hoi mai o D. Kanuha a me kana pili aoao mai ka laua huakai pokole aku nei o ka hoohala ana i na la mua o ko laua mare ana ma Maui i kela pule aku nei, aole hoi i Kohala e like me ka makou i hooia mua aku ai.
Mai poina e na makamaka a me na hoa'loha i ka hele ae e kuai i mau palapala no oukou no ka ahamele e weheia ana maloko o Kaumakapili i ka po o ka la apopo. E loaa no na palapala ma ke keena o ko makou Puuku.
Ma ka Auseteralia o ka Poaono aku nei i hala i holo mahuka ai kekahi haole, o Heneri ka inoa, me ka haalele iho i kana wahine iloko o ka nawaliwali a me na poe ana i aie aku ai. Na ka lokomaikai o kekahi poe wahine e kokua nei i kana wahine.
Elua mau keiki Pake i hopuia i ka Poalua iho la no ke kue i ke kanawai e pili ana i na palapala ae komo mai iloko nei o ka aina. Me he mea la, no kekahi mau Pake okoa aku ko laua palapala i hiki mai ai ianei. E hoihoi hou ia aku ana laua no Kina.
I ka po La Pule i hala, la 21 nei, ua lilo aku la i ke kolohe ka waa lawaia o Kailimai, oiai no e mo-ku ana no iloko o ke kai makai o Kakaako. I ka hele ana aku o Kailimai i kakahiaka ae me ka manao aia no ka waa ke waiho la, aia hoi, aole ia ma kahi e waiho ana. Ua nokeia i ka huli a aohe nae i loaa.
KELA A ME KEIA.
-
Ke konane hou mai nei ke aliiwahine o ka po.
Ua hiki aku na lilo o ke kau kiure o Honokaa mai nei i ka huina o $582.50.
Ua hoole o Keoni Maikai e hooliloia aku ana oia i lunapaahao no Kawa.
He 50 hale pili o na Kepani o ka mahiko o Wainaku, Hilo, i pau i ke ahi ma ka la 15 nei.
I keia la e paikiiia ai na hoa a pau o ka Aha Senate. Poalima nei i pau ai na Lunamakaainana.
E hoohuiia aku ana ma ka mare ma ka la 7 aenei o Augate, o Kanikela H. Foke me Misi Anita Numana.
Oia mau no ke owelawela o keia mau la iho la i hui pu ia nae hoi me na kilihune ua i ke kakahiaka.
Ua loaa aku ua, make iloko o ke ana pao kekahi o na limahana Pake o Kilauea, Kauai, i ka Poakahi, la 15 nei.
Apopo e hooloheia ai ka hihia hoopaapaa inoa nupepa imua o Lunakanawai Kaapuni Kupa ma ke kaulike.
He halekuai mea ai hou ke weheia aku ana ma ka halepaikau o Manamana ma keia mua iho no na holoholona.
Ma ka halekuai Waiona Kalepa e loaa ai ke SAKE maikai i paipai ole ia me ka wai, i like ole me ko kahi mau wahi aku ka paipaiia. He hapaha (25 keneta) ke kumukuai no ka omole hookahi. E kii nui ae!
E hoomanao i ka Alameda mai Kapalakiko i keia Poaha iho, a o ka Warimu mai na Panalaau Hema mai ia la no.
Po Poaha iho la i ku mai ai ka Miowera mai ka Akau mai, a i ke awakea Poalima nei i niau loa aku ai no na Panalaau Hema.
O ke Kalaudine ka i pani aku la ma ko Kinau wahi i ka Poa lima nei, a ua noho iho la o Kinau no ka hoomaemae hou ana iaia.
He huakai o na poe kumukula haole ka i hoea mai ma ka Miowera o ka po Poaha iho la, no ka makaikai ana i ko kakou mau kaiaulu.
He poe makai hou ia e nokeia mai nei i ka ohi no ka hoopihapiha ana ma kahi o kekahi poe makai kahiko e pau aku ana paha i ke pekuia.
Iwaena o na 223 Pake i hooleleia mai ke Kulanakauhale o Pekina mai, he 157 i aeia malalo o na palapala ae e noho maanei no eono malama.
Eia ke hoomaamaa hoehoe waapa nei kekahi poe no ke komo aku i ka heihei e malamaia ana ma Manana, Ewa, i ka la 21 ae nei o Sepatemaba.
Eia ko makou Comodoa ke hoala nei i kekahi Aha Kula Sabati, no ke alualu ana i ka makana o ka hoike hapaha ma Kaumapili. E loaa ana.
Ua kipa ike mai ka Mea Hanohano S.G. Hilibona o Okalana, Kaleponi, i o makou nei. He hoa oia no ka Aha Senate malaila. Ua huli hoi aku oia ma ka Mariposa.
He wahine haole Olelo E ka i hookolokoloia i ka Poalima nei imua o ka Aha Apana, no ka hoeha i kana kane, a ua hoahewaia a hoopaiia e uku i $10 a me na koina. E hoohalahala aku ana ka i ka Aha Kaapuni.
Ma ka Poalua iho la i hookuu ia mai ai na ohua. Pake me Kepani i hoomaluia iho nei ma Kahakaaulana a ka Pekina, i halihali mai ai no onei.
Imua o ka Aha Apana i ka Poakahi i hala, ua hoopaiia iho la he Pake no ka malama banako kipa he $150. A no ka hiki ole iaia ke uku i kela hoopai, ua lawe loa ia aku oia no Kawa.
Ma ka Poaha, la 18 nei, i hoolaaia ai ka hale halawai o ka Ahahui Opiopio o Kalaupapa, Molokai, he makana hoi na Keoki Wilikoki o Kauai. Ua heaia aku ka inoa o Wilikoki Hale.
Ua hookohu aku nei ka Papa Hoonaauao ia Misi Lepeka Panui, kekahi o na haumana a kumukula no hoi o ke kula o Maunaolu, i hope kumukula no ke kula olelo Enelani o Haiku. Maui.
Ua pau ae nei ko Lehua holoholo ana ma ke ano mokukaua no ke Aupuni, a ua pau i ka hooleleia mai na lako kaua a pau iluna ona, a ke mo ku nei oia i keia wa ma kahi o na moku popopo.
Ma ka halawai ana a ka Ahahui Kinipopo Nui i ka Poakolu nei no ka hoolohe ana i ka hoohalahala a Kapena Au kai Kamikana o ka hui Ikeoleia, no kela paani ana o ka Poaono i hala, la 20 nei, ua hoole ka Ahahui i ka hoohalahala, a ua paa aku la no kela paani ana mawaena o ka Hoku me Ikeoleia.
I kekahi keiki Pukiki e hana ana ma kahi kokoke i ka pahuhae e ku ana ma ke alo o ka Halealii i ka auwina la Poalua iho la, ua haule pono iho la ke kipikua e paahana i ka lima o kekahi keiki Geremania e ku koke mai ana me ia a moku pu ka lima, mawaena o ka manamanalima nui mua a me elua. Na Kauka Kupa i humuhumu ae i ka lima o ka mea i eha a hoihoi loa ia oia i ka hale.
He ahaaina ka na wahine kau lei a me na keiki kalaiwa o na kaa basa o ka Hui Alahao Hawaii i ka Poakolu nei. He elima mau kaa i piha me na kane, wahine a me na kamalii ka i hookikakaha iho ma alanui Moi nei a hala nui ilalo o Moanalua, a mai laila mai i holo nui ai no Waikiki, kahi a lakou i nuu iho ai i na mea ai a puu na nuku, a ilaila no hoi kahi apau nui ai i ka pikaiia. Oia no!
-
Na Mea Kanu no ke Kuai.
Aia ma ke keena o ko makou Puuku e loaa ai kekahi mau mea-kanu i hoouluia no ke kumukuai oluolu. E ninau ponoi ae no iaia. iun 3-jul I
-
NO WAIANAE
O.R. & L. CO.
MA NA POAONO A ME NA LA PULE.
E haalele no na Kaamahu ia Honolulu nei ma na hora 9:15 A.M. a me 1:45 P.M.
Ke huli hoi mai, e hoea ana i Honolulu nei ma na hora 3:11 a me 5:55 P.M.
NA PALAPALA UKU PUNI:
Papa Ekahi, - - - - $1 75
Papa Elua, - - - - 1 25
R.C. SMITH,
Agena Ohua a Palapala Nui.
iul 29-tf