Ka Makaainana, Volume VI, Number 6, 10 August 1896 — Page 2
2 HONOLULU, OAHU, POAKAHI, AUGATE 10, 1896.
MOOKUAUHAU ALII.
Na Iwikuamoo o Hawaii Nei Mai Kahiko Mai.
KO WILLIAM HOAPILI KAAUWAI MA
1. Piilaninui k, noho ia Laielohelohe w, loaa o Kiha-a-Piilani k.
2. Kiha-a-Piilani k, noho ia Koleamoku w, loaa o Kekauhiakalani k.
3. Kekauhiakalani k noho ia Kaouomauu w, loaa o Makakuikalani w.
4. Ikeakaponoole k noho ia Makakuikalani w, loaa o Kaoao-a-Makakuikalani k.
5. Kaoao-a-Makakuikalani k, noho ia Puaoikamahiki II. k.
6. Puaoikamahiki II. k. noho ia Kailuakea w, loaa o Koookalani k.
7. Koookalani k noho ia Hoolelekikaupea w, loaa o Hapuu k.
8. Hapuu k noho ia Haikamanono w, loaa o Kahakauwila k.
9. Kahakauwila k noho ia Koleamoku II, loaa o Kameilihiwa me Wiwiokalani.
10. Kameilihiwa noho ia Kuikuipua, loaa o Kalanikauleleiaiwi III. w.
11. F. Kaauwai k noho ia Kalanikauleleiaiwi III w, loaa o William Hoapili Kaauwai me George Kaleiwohi Kaauwai.
12. William Hoapili Kaauwai mare me Mary Ann Kiliwehi, aole pua. Noho me Keanolani a loaa o William Hoapili Kaauwai Opio.
13. George Kaleiwohi me elua wahine loaa keia mau keiki pakahi: Luka Kaauwai me Lydia Kahanu Kaauwai.
KO HATTIE PANANA PARKER MA.
(E nana i ka mookuauhau o William Hoapili Kaauwai, a hoea ia Kahakuwila k, ia Koleamoku II. w, alaila mana aku mai ke keiki elua, oia o Wiwiokalani w.
1. Hawaiiwaaole k noho ia Wiwiokalani w, loaa o Napela k.
2. Napela k mare ia Catherine Richardson, loaa o Hattie Panana Hianaloli Kaiwaokalani Hailauaala Napela.
3. Hattie Panana mare ia Samuela Parker, loaa keia poe:
(1) Mary (Mrs. Maguire), (2) Eva Kalanikauleleiaiwi Kahiluonapuaonahonoapiilani, (3) Heleu Umiokalani, (4) John Palmer, (5) Hattie Kaonohilani, (6) Palmer Kuihelani, (7) Samuel Keaoililani, (8) Ernest Napela, a me (9) James Kekoookalani.
KO NA ALII KALAIMOKU ME BOKI MA.
He mau inoa ae keia e kaalo mau ana imua o na maka o ka hanauna hou iloko o ka moolelo Hawaii nei o keia keneturia e panee malie nei. Nolaila, he mea pono e maopopo ke kuauhau o keia mau alii kalaiaina.
. Kekaulike k (Moi o Maui) noho ia Haalou w, loaa o Namahana w (makuahine o Kaahumanu w ma) me Kekuamanoha k.
2. Kekuamanoha k noho ia Kamakahukilani w, loaa o Kalaimoku k, Boki k, me Kahakuhaakoi w.
3. Kalaimoku k noho ia Kuwahine w, loaa o W.P. Leleiohoku I k.
4. W.P. Leleiohoku I k mare ia Ruth Keelikolani w, loaa o W.P. Kinau k.
5. Boki k noho ia Liliha w, aohe pua.
6. Kahakuhaako w noho ia Kahoanokukinau k, loaa o M. Kekauonohi w.
7. M. Kekauonohi w noho ia Keliiahonui k, aohe pua.
8. M. Kekauonohi w mare ia L. Haalelea k, aohe no he pua.
(Aole i pau.)
Hui Kaa Alahao Hawaii.
Mahope iho ka puka ana aku o ka Helu 4, ua hoike ae ka Luna Nui o ka Hui Alahao Hawaii, ua hooko oia e like me kela olelo hooholo a ka Aha Kiekie, he hapaumi wale no ka uku ke kau i na kaa panee ma alanui Nuuanu a holo hoea i alanui Beretania a holo loa iwaho o Punahou. Ke hoao nei kekahi poe e paipai ae ina no he hapaumi ka uku no na kaa a pau maloko mai o na palena a ke kanawai i hoakaka ai, alaila, pau pu me alanui Moi nei. E hewa anei hoi ia, ka i no hoi o ka pono a me ke ola ia.
I kahi o na la i hala iho la, ua komo ae he hoopii na kekahi e pili ana i ka uku hookahi no na wahi a pau, ina no ma alanui Moi nei e kau ai i ke kaa. O ia kau ana ka o kekahi mea ma alanui Moi nei, ua loaa ka iaia ke kuleana e kau ma na kaa e ae maloko o ua palena a ke kanawai i hoakaka ai no ka uku hookahi, oia hoi, he hapaumi (5 keneta) wale no. He hihia hoao keia.
Puahiohio ka na poka a na koa e hoomaamaa kiki pu nei o kai o Kakaako i na kakahiaka La Pule. O ka poino mai paha koe o kekahi poe ke hele ae mawaho o kuaau. E makaala no ka pono loa.
I ke keena ka o ka nupepa Aloha Aina kahi o ka mea a makou i hoomanawanui loihi ai kahi i poalo ai, no ke ake ka e loaa kahi hunahuna, aohe nae hoi i apoia mai, no ka makemake ole ia, oiai, ua hala mua aku no kona ino a mahope wale iho nei no hoi ka hele ana. Malia o hui ae me Kamaki, loaa ke kaulua o ia waa hou, ke apoia mai nae hoi.
IO SEPINE
---KA---
EMEPERESE PUUWAI OLU
O FARANI.
MOKUNA IV.
NA HIONA O KA HALEPAAHAO.
[E hoomanaoia, ua hora aku ke kaikamahine Hotenese mawaho o ka pukaaniani o ka rumi paahao o ka makuahine pilikia Iosepine, a ua loaa mai ka leta kipaku a ka makuahine iaia, a ua huli hoi aku oia me ka naau ehaeha. I keia kakahele hou ana aku a kakou ma keia helu aku e ike ai kakou i ka hana a na poe pilikia maloko o ka halepaahao o Kamelite.]
Oiai na poe paahao e pukukui malie nei iloko o ka rumi paahao me ka ohumuhumu nui ana no ko lakou hopena, ua puapuai malie ae la na kahoaka o ka hauoli iloko o Iosepine, ua kokoke mai ka hora o ko lakou hoopakeleia aia ma ka ipuka, a pela pu no hoi na hoa o ka inea e kakali malie ana no ka hopena. No keia kumuhana ano nui, ua kakauia he palapala uwalo e Iosepine imua o na poe i laweia mai ai na kumu kue ia M. Bohane. Ua loaa io aku la keia palapala ia lakou, a ua lilo ia i kumu e hoolalelaleia ai na manao o ka Lunahoomalu o ke Komite e noonoo akahele oia no ka hoopakele ana ae ia Iosepine me kana kane mai loko ae o ka halepaahao, aka, he hana nui a koikoi nae ia ma kona aoao, i ka hoao ana e hoopakele ae i na mea hala ole i hookahihi wale ia aku no e na poe kue.
Nolaila, i mea e laelae ai, he inea pono e alakaiia mai laua a elua imua o lakou no ka ninaninauia ana, malia paha, he kumu kupono io no kekahi e hiki ai e hookuu ae mamua hoi o ka hoopaa wale ia ana no.
Ma kekahi kakahiaka, aia na akaku o ke aloha keiki, a pela hoi ke aloha o ke kane ke hooninipe mao ole la i ka puuwai ehaeha o Iosepine, a pela pu no paha hoi me na keiki i na makua. Ua maopopo no iaia, ina paha e nanaia mai ana kana mea i kakau aku ai, alaila, aole auanei e nele kona ike aku i na helehelena o ka laua mau keiki, e alakai pu ia mai ana no ka ninaninauipu ia ana.
Oiai oia e u ana no keia mau mea, ua loaa mahuihui mai la ia Iosepine he lono, e kaiia aku ana oia e halawai pu he alo a he alo me kana kane aloha.
Aole i emo, poha io mai la he leo e i ana, e hoomakaukau iho o Iosepine iaia iho no ka nee ana aku mai kona rumi paahao aku. Hoomakaukau ae la keia iaia iho, e like me ka mea hiki iaia ia wa a hoolai iki iho la no ka manawa pokole.
Mahope iho o ia manawa, kiiia mai la oia a kaiia aku la keia maloko o kekahi keena i hele a ula pu i ke koko o na poe i liki hoomainoino wale ia, a oiai na ea polopolona a hauna e pohuhu ana, ua hoonohoia iho la keia malaila, no ka hoomaha iki ana iho no kekahi mau minute, no ke kali hou ana aku, heaha ana la ka mea e hoaoia mai ana, no ka make paha, a i ole, no ke ola paha.
He mau minute keia hoalu iki ana iho me na haawina eehia maluna o Iosepine e hakoko nei, a aole i emo, hemo koke mai la ka puka e kupono mai ana i ka ia nei wahi e noho ana, ike pu aku la no keia he pualikoa i lako pono i na mea kaua e kai mai ana, a aia pu iwaena o lakou na poe kiekie o ka aina i lilo i mau pio e kai pu ia mai ana iloko o ka ia nei rumi e o-pu malie aku nei.
Haka pono aku la o Iosepine i keia lehulehu e kokomo mai la, auwe! he-mea e ka lele o kona oili, aia ka o kana kane pu kekahi iwaena o lakou.
[Aole i pau.]
Ma Ke Kauoha.
HOOLAHA HOOKAHEKAHE WAI.
Ke hoolahaia aku nei ma keia i na poe a pau e paa ana i na Pono Wai, a i ole ia, i na poe paha e uku ana i na uku wai, o na manawa no ka hookahekahe wai ana, aia ia mai ka hora 6 a 8 A.M., a mai ka hora 4 a 6 P.M.
ANDREW BROWN,
Luna Nui o ko Honolulu Oihana Wai.
Aponoia:
J.A. KING,
Kuhina Kalaiaina.
Honolulu, Iulai 16, 1896.
jul 20-mhp
C.B DWIGHT
[KALE KUAIKA.]
Mea Hana Pohaku Kaekae Alanui, na He Kupapau a me na Kia Hoomanao Mabala.
E loaa no oia ma kona wahi noho ma Koiuiu, Honolulu nei.
Telepona Helu 833. 17-1mk
Robert Napunako Boyd
[I TALIA.]
He Ana-aina a he kokua no hoi ma ka hooponopono ana i na waiwai paa, huli ana paha i na Buke o ke Aupuni, a pela aku. Keena Hana: Mauka iho o ka Hale Leta, maluna ae o ka haleaina Pake,
Alanui Betela. apl 13-mp
HALEKUAI LAHUI KALAHIKI.
Helu 405, Alanui Moi, ma Waikiki aku o Alanui Nuuanu, ma ka aoao mauka, ke keena mua o ka "Hawaii Holomua."
Ma ia halekuai o na oiwi e loaa ai na anoi a me na paihi o na ano hou loa, e laa Na Kalakoa, Na Keokeo, Na Makalena, Na Kinamu, Na Huluhulu, Na Lihilihi, Na Kamaa o na Kane, Wahine me Keiki a pela aku.
Oluolu no ke kuai ana. Aohe hewa ke kipa mai e ikemaka, a aohe no hoi he kunu kunuia no ka hoikeike ana i na mea kuai.
M. PALAU, Luna Nui.ok 14-tf