Ka Makaainana, Volume VII, Number 17, 26 April 1897 — Page 7
This text was transcribed by: | Ku'uipo Thomson |
This work is dedicated to: | AWAIAULU |
Ka Makaainana.
HONOLULU, OAHU, POAKAHI, APERILA 26, 1897.
NA AINA MAMAO
--------------
Mau Lono Huikau mai kela a me keia Wahi Like Ole.
Ulele Io na Helene me na Tureke
Kakahiaka Poalima, Aperila 9, ua aʻe aku he puali o na poe powa Helene i ka palena a komo aku la i ko Tureke wahi ma kahi kokoke i Gerevena, a ua ki pu koke ia aku lakou e na koa Tureke ma ia wahi. Ua hoomaka keia hooili kaua ana mai ka hora 5 o kakahiaka a e mau ana no ka noke ana ia awakea ae. He 1,000 paha ka nui o keia poe Helene o ke komo ana i ka hora 3, a i ike a e na koa Tureke kiai iloko o kekahi ululaau a kauohaia ai e hoomaka e ki aku, a ma ia hope koke iho i nee hope ai na Tureke a hui me ka puali nui.
Ua hoopuniia na Helene iloko o ka ululaau i ka hora 5, a no ke ano hoi o ia kahua, ua hiki ole loa i na Tureke ke ki aku me ka holopono, no ka mea, ua keakeaia na Helene e na kumulaau. Me ka e eu i p@@@ia ae ai ka na Tureke ki pu ana a keakeaia aku ko lakou nee ana aku no mua. A hiki ia awakea, i ka wa i hoounaia ae ai o ka lono, e noke haha@a ana no ka hooili kana ana a e paa ana no na Helene i ko lakou kulana. Ke awiwiia la ka hoouna ana i na pukuniahi no ke kahua o ka hana, me ka manaoia in a e hoomakaia aku ana keia mau mea luku weliweli, aole e hiki ana i na Helene ke hoomau a ku ana ma ia wahi.
Aohe i hiki ke hoomaopopoia he poe koa maoli kekahi o ka puali kumai iwaena o na Helene, eia nae, no ka nui launa ole mai o ia puali, ua ulu ae ka manaoia pela io no. Ina ka pela io, o ka hoomaka no ka ia o ka hakaka io aku ma ka palena holookoa. Ke maopopo loa ia mea o na koa maoli kahi, alaila, e nee koke aku ana o Edeheme Pasa, ka alihikaua Tureke ma Masedonia. Ua hoopukaia ae kauoha no ia mea. Aole loa e hoohuoiia in a e nee koke aku ana ka pualikaua holookoa o Tureke iloko o Helene. Kupilikii loa kulana, a aohe wa i oi loa aku ai o ke kokoke o ke kaua mai ka hoomaka ana mai o ke ano eena okaikai e like la me ia i nei wa. Ke kukui mau la na telegarama malu mawaena o na alakai koa ma Gerevene a me Konakinopela.
Na Lonolono Kaua Helene -- Tureke
E olelo ana kekahi lono mai Konakinopela o Maraki 24, ua hoomana aku ka ke Aupuni o Tureke i kona mau elele ma Europa e komo aku ma na kukai a hoomaopopo no ke kuai ana i ekolu mokukaua hao ma kahi o @1,500,000 ka lilo.
Nui ka hopohopoia ma Atena@, Maraki 24, no ka palekana o ka mokumahu Helene Hora o ka haalele ana no Kereta i Maraki 19 me kekahi piha i na lako ai no na pualikoa Helene ma ia mokupuni, no ka huli hoi koke ole aku. Maluna on a ma ke ano ohua ka Peresidena o ka Hale o na Elele a me kekahi heluna o na poe koikoi e ae.
Ua loheia ma Atenai Maraki 30, ua hoole o Rusia i ke komo pu aku e paniku i na awa o Helene, mamuli ka o ke kumu ua lohi loa ia hana i nei wa i mea e holopono ai ma ka malama ana i ka maluhia. Nui ka hauoliia o keia l@no ma Helene, oiai, ua manaoioia he hoike ana ae ia i kekahi manao lokahi ole mawaena o na Mana.
Ma ka aha-ike i haawiia i@ M. Onou, ke Kuhina Rukini, ka Moi o Helene i Maraki 22, na haawi wale aku no oia i kekahi mau palapala i ka Moi mai ke Za a me ka Emeperese Kanemake o Rusia. Maloko o ka palapala a ke Za he 50,000 rubela no ka pomaikai o na poe Kerete i holo auhee a e noho ana ma Atenai. O ko M. Onou huli hoi ana aku no ia mai Sana Peserobuga. Ua hoole aku ka Moi o Helene e lawe i keia kokua a ke Za.
He kuahaua ka i hoopukaia ae ma Konakinooela i Maraki 30, e ae ana me kekahi mau hooioliloli ana, i kahi mau hooluolu ana aku i noiia e Monosiniua Omaniana, ka Makua Ekalesia Amenia.
No Suda, Kerete, ka lono o Maraki 28, e hoike ana ua ki poka ia kekahi waapa-topido Rukini e na kipi me ka panaiia aku no. Ua hopohopoia e ulu ae ana he kaua a ka hopena loa mawaena o na poe Karistiano Kerete no ke kue aku i na Tu reke a me na Europa.
Eha waapa hali mea-ai i loaa i kekahi mokukaua Beritania i ka la mamua aku e hoopae ana i na waiwai i keakeaia. Ua hoopiholoia elua a hopu pio ia elua, ua pau aku nae hoi ka hapanui o na waiwai i ka hoopaeia. Eena loa na kipi a ki poka okoa ia ka moku Pelekane a ua ki aku hoi i kekahi waapa me Adimerala Herisi a me kabi alii moku (lutanela), me ka paa no o ko lakou aahu koa.
Ia Haku Saulebure ma Parisa, Farani, Maraki 26, ma kona ala no Cimieze no ka ukali ana aku i ka Moi Vitoria, ua kukakuka pu ae oia me M. Hanoto (Hanotaux), Kuhina o ko na Aina E. Ua oleloia ua hooholo ka laua e hooko aku i ke paniku ana ia Atanai ke hoopaakiki o Helene e ae aku e hookaawaleia ae i palena kuikawa he hookahi mile ma kela a me keia aoao o ka palena o Helene me Tureke.
Lawe Pio ia ia Alakai Kipi o Cuba.
Ma kekahi hooili kaua ana ma Cabezeda, Apana o Pina dele Rio, i ka La Pule, Maraki 28, ua hopu pio ia o Generala Juana Ruiza Rivera, ke alakai o na kipi, e ko Generala Velaseco mahele a ua hoopaaia ma Sa@a Caristobola, kahi i hele nui aku ai o na poe kakau nupepa e ike iaia i ka Poalua ae. Ua eha ino loa oia ma ia hakaka ana a ua hopu pio ia oiai o Konela Bacalao, ke poo o kona mau ukali, e hoao ana e lawe aku iaia mai ke kahua aku. Oia a me ke Konela ka i hopu pu ia. Ua loaa aku oia i na poe kakau nupepa e moe oluolu ana mamua ae o ka mea i oleloia nona i ka la mamua ae, malalo o ka lawelaweia ana o kona mau eha e na kauka Sepania.
Aohe on a kamailio nui no ka na kipi mau hana ma na apana, a ua hoole loa no hoi oia i ka pane ana i na ninau. Ma na mea e ae oia i kamailio ai a me ka moolelo o ke kaua mua o umi makahiki, a oia no ka hoi kahi mea alakai iloko o ia hana ana. Ua ninau aku kekahi o na poe i hele aku ai e ike iaia in a paha aole anei he mea waiwai ole no ka hookahe nui loa ia o ke koko ma ke kue ana aku i ko Sepania mana. Ia wa i ano kuoo ae ai ka kona nanaina a pane ae la: "Na ka manawa e hoike, na ka moolelo e hooholo."
Ua mahalo na pio a elua no ko laua malama a hookipa maikai ia mai ko laua hopuia ana. A ua haawi makana aku hoi ke Generala he komo daimana, ana no hoi e komo ana, i ke kauka nana oia i lawelawe lapaau mai kona hopu pio ia ana.
E Kipa a e Ike Ae
I kela hoa oiwi o kakou, ia S. M. Kamakau, ma ka halekuai waiona o Lovekeoe Ma, kihi o na alanui Nuuanu a me Marine. He heahea a he oluolu oia, a ua loihi kona kamaainaia ma ia hale, malalo o kona mau haku mua elua, i pau. O na waiona maikai wale no ke loaa malaila, a pela no hoi me na waina Kaleponi maikai loa. Oluolu na kumukuai, a pela no me na hookipa a kuka pu ana me ua hoa la malalo o kona mau haku hou.
Kakahiaka nui, hora 6, o ka La Pule, la 18 nei, i holo aku ai ka mokumahu Kepani Kinai Maru no kona aina o ka hoea ana mai, a ua lawe aku he 549 poe @@moku i hooleia, ana no hoi i lawe mai ai, a me 229 no nei aku, hui he 778 ohua. Makai o ka uwapo Pakipika kona wahi o ka hoomalu a uhao lauahu @@@ iho nei. Ua hooko ke kapena i na mea a pau i kauohaia iaia e ka Oihana Dute. E like no hoi me ke ano mau i nei wa, ua waiho ae ke Kuhina Kepani i kekahi keakea no nei ano hana kipaku
HUI HAWAII KUAI AINA.
NA LUNA NUI,
JAS. H. BOYD Peresidena
J.K. KAULIA Hope Peresidena
C. A LONG Puuku
ENOCH JOHNSON Kakau Olelo
JOS. PAAKAULA Luna Hooia
W.C. ACHI Luna Hoohana
NA LALA O KA PAPA ALAKAI
J. K. KAHOOKANO, R.W. WILCOX
J.W. BIPIKANE.
He Hui i kukuluia no ka hookuonoono a kokua ana i ka lahui Hawaii; ua makemakeia na Hawaii a pau loa e komo mai i ka Hui.
Honolulu, Ianuari 11 jan. 11-1yr
E HOOPAA POHO
I Kou Hale a me na Pono o loko mai ka poino ana i ke Ahi me ka
-HUI-
Panihakahaka Ahi Springfield
WAIWAI IO, $4,105,374.75.
-------------
Oluolu a Haahaa loa na hoouku ana.
-------------
W.F. WILSON, Agena,
Helu 209, Alanui Kalepa, Honolulu.
[1by. 15-16ml.]
William Kamali.
Pena Hale @ na ano a pau, Kau Pepa a Lu One paha, e like me ko oukou makemake. Ua hiki ke hoohinuhinu i na Umeke, Pakaukau, Pahu-ume, Moe, Puniu, i hiki ole ke hoomaemae hou ia. Ua hiki ke hookoia na hana me ka eleu loa, a o na kauoha a pau mai na kuaaina mai ua hiki ke hookoia. He oluolu loa ka uku ma ke kuka olelo ana. E kipa mai e na makamaka, mai poina.
Keena hana, ma ko S. K. Pua keena, Helu 7 1/2, Alanui Konia.
Wahi Noho, Kapalama. mar 15-6m
NO KE KUAI.
He hale o Elima Keena, hookahi makahiki o ka paa ana, a me Elua Apana Aina ma Kalia, Waikiki, ma ka mahele aina o Bruce Waring & Co., e hooliloia aku no i ka mea e makemake mai ana. Aia keia wahi ke pili kokoke la ma kahi noho o E. S. Boyd.
KUMUKUAI: -- $1,000; $500 ma ke kuike a ma ka Moraki ke koena no ekolu makahiki ma ka 8 pa-keneta ukupanee.
No namea i koe, e ninau ia
BRUCE WARING & CO.,
a i ole, ia F. J. TESTA, ma ke keena o keia nupepa. sep7--mhp.
Hoolaha Manao Hooko a Kuai a ka Mea Paa Moraki.
Mamuli o ka mana kuai i hoikeia ma kekahi Moraki i hanaia e G. W. OKUU o Honolulu, Mokupuni o Oahu, Paeaina Hawaii, ia A. Rosa, Kahi Waiwai, i kakauia ma ka la 5 o Iune, M. H. 1889, i kopeia ma ke Keena Kakau Kope Aupuni ma Honolulu i oleloia, iloko o ka Buke 110, ma na aoao 368 a me 369;
Ke hoolahaia aku nei ma keia ua manao ka Mea Paa Moraki e paniku aku i ka Moraki i olelia no ka uku ole ia o ke kumupaa a me ka ukupanee i ka wa e kupono ai no ka hookaa ana, a mamuli hoi o ia hooko ana e kuai aku ai ma ke kuai kudala akea ma na Keena Kudala o W.S. Lu@e, ma ke kihi komohana o na Alanui Papu me Moiwahine, ma Honolulu i oleloia, ma ka
POAKAHI, LA 10 o MEI, 1897
ma ka hora 12 awakea, i na aina a pau loa i hoikeia maloko o ia palapala a i hoakaka piha loa ia hoi malalo iho.
A. ROSA,
Kahu Waiwai no ka Mea Paa Moraki, Kumu: Kuike, ma ke dala gula o Amerika Huipuia.
I ka mea kuai mai na lilo palapala. Honolulu, Aperila 10, 1897.
No na mea hou aku i koe, e ninau ia A. Rosa, Loio, Alanui Kaahumanu, Honolulu.
O kahi i paa malalo o ka Moraki i oleloia, o ia no: Kela mau apana aina a pau loa e waiho la ma Moanalua, ma ka Mokupuni o Oahu i oleloia, a i hoakakaia ma ka Palapala Sila Nui @27, Kuleana 1186, no Kukalamanu, no laua hoi ka ili o 465 Kaulahao, a i lilo mai i ka Mea Hana Moraki ma o kekahi Palapala Kuai i hanaia i Mei 12, 1886, i kopeia ma ke Keena Kakau Kope i oleloia iloko o ka Buke 102, ma na aoao 37 a me 38.
Ua paa keia aina i ke kanu laiki ia e kekahi Pake e uku mua ana he uku hoolimalima @ Dala no ka makahiki. apr.12-51s