Ka Nonanona, Volume I, Number 5, 31 August 1841 — Untitled [ARTICLE]

HONOLULU, AUG. 23, 1840. E na hoahanau ma Wailuku, Hookahi makahiki i hala ae nei o ko kakou noho kaawale ana aole nae pau iki ko'u aloha ia oukou, na poe e noho pono ana iloko o ko kakou Haku. O ko'u kino, eia no ia ma Oahu nei, o ko'u manao nae, na holo pinepine io oukou la, e hoolauna pu me oukou. A iko'u lohe ana i kela manawa, i keia manawa, i ko oukou noho ana a me ka oukou hana ana, ua olioli kekahi manao a ua ehaeha kekahi manao. Hauoli maoli au i ka hooikaika ana, noho haahaa ana, i ka hipule ana a me maemae ana o kekahi poe o oukou; a ua eha loa ae nei kuu naau me ke kau-

maha i ka hana hewa ana a kekahi poe ekalesia. E na hoahanau, ina i pau ko oukou mau hale i ke ahi, a me ka oukou waiwai i ka haoia; a pau loa paha ko oukou mau kino i ka mai, a make i ka pololi, aole o'u kaumaha nui wale i keia mau mea; no ka mea, he mau pilikia pau koke wale no ia; aka, o ke kipi maoli ana o kekahi poe i ke Akua, me ka hoole i kona berita laa, a me ka hoonauikuki ia ia iloko o kona hale iho, he mea kaumaha maoli ia. Ina i haule ilalo a pio loa na hoku o ka lani, he mea uuku ia i ka haule ana o ka uhane hookahi iloko o ke ahi pio ole. O ka waiwai o ka uhane, na wai e helu? Aka, ea, mai kahaha loa a kulanalana ko lakou manao, i keia hana hewa ana a na hoahanau. Aole ia he mea hou; mai ka wa ia Kaina a hiki wale i keia wa, @ hanaia pela, a e mau loa ana paha pela, He hoahanau o Kaina, ua hoohiki oia i ka inoa o Iehova ma ka mohai. He poe hoahanau wale no o ka Ieseraela ka poe ohumu ma ka waonahele, e hoi hope i Aigupita, a hoomana kii no hoi, a me ka pakike aku ia Mose; he hoahanau o Iuda Isekariota, ka mea kamakaia ia Iesu, a me Simona, ke kilo; aole nae he mau hoahanau oiaio keia a pau loa. Aole i loaa ia lakou ka uhane o Kristo; aole mihi io, aole naau hou, aole maaaolo, aole makau i ke Akua, aole @ kohu poao, iloko o lakou. Pela no ua hoahanau hana hewa ma Wailuku a ma Hawaii nei a puni. I ko'u manao, ea, o ke kumu keia o ka haunaele pinepine o na ekalesia o Hawaii nei, o ke komo ana o na hoahanau me ko lakou naau kahiko, Ua hooikaika lakou me ke kamailio pinepine me na kumu, ua loaa ia lakou ka pule, a me ka bapetiso ana, a me ka noho iloko o ka ahaaina a ka Haku; a me ka inoa hoahanau; me ka naau kahiko wale no nae, aole wa@ naau @

ae, e like me ka olelo ma Io. 3. Aole lakou i hapalaia iloko i ke koko o ke Keikihipa, aole hoi i hoohuliia ko lakou naau i ka uhane maikai o ke Akua. Nolaila, aole hiki ia lakou ke kupaa ma ka pono; i ka wa hu wale mai ka hewa, o ko lakou haule no ia, no ka mea, aole kumu e paa ai. Ua ono maoli ka naau kahiko i kela hewa i keia hewa, i ka lealea o ke kino a me ka waiwai o kela ao; ua kamaaina loa ka moe kolohe, a me ka hoopunipuni, a me ka hookiekie, a me ka huhu a me ka hoomaloka, a me ke kuko hewa, iloko o na naau kahiko a pau, a nolaila, aole e hiki ia ia ke hoohua mai i na hua ku i ka maemae, a me ke aloha, a me ka makau a me ka manaoio. He hapa wale no paha na hoahanau i hoohanau hou ia, a nolaila, ike pinepine kakou i ka haunaele iloko o na ekalesia o Hawaii nei. E na hoahanau o'u a pau loa, penei kuu manao aloha ia oukou, e haoao mau loa i ko oukou naau iho, me ka makau, o hoopunipuniia mai oukou; mai manao, ua loaa lea mai ka naau hou, aka, e hoomau i ka hopohopo ia oukou, a e noi mau loa aku i ke Akua ma o Iesu la i naau ku i ke ola. Ua pau keia, aole nae i pau kuu palapala ana ia oukou; ma kela pepa paha, olelo hou, Me ke aloha nui ilokoo ka Haku. LIMAIKAIKA.