Ka Nonanona, Volume I, Number 6, 14 September 1841 Edition 02 — Page 22

22 KA NONANONA. [ SEPATEMABA,

Aole oia i manao i kona kino manini, hele aku no me ka makemake ikaika loa e imi a e hoohuli i kona poe hoalauna, a ua manaoia aole i makehewa kona hooikaika ana, no ka mea, ua ae mai paha kekahi poe a ua huli mai no. Ua make ia; aka, he lanakila, a he oluolu loa kona make ana. Aole me he make ana la o ka holoholona kona i ka noonoo ole, aole hoi i like pu kona make ana me ka make ana o kekahi poe naaupo, aole ona manao e hele ana ia i Milu. Aole hoi he makau i ka lua ahi o kona make ana. No ka mea, eia kana olelo hope, 'Eia wau, ke hele nei io Iesu e noho pu me ia.'
          E Rahaba ka inoa o kekahi hoahanau i make, he haumana ia o ke Kula Kaikamahine ma Wailuku. He Kaikamahine haipule. Ua mahalo nui na Kumu o ia Kula i kona ano maikai. Ua hoihoiia mai no ka mai. Aole liuliu a make no ia me ka manaolana maluna o ka Haku kona mea o ola ai. O ka olelo kupapau no ia mau hoahanau, aia no ia ma ka Halelu 73:24. "E alakai no oe ia'u ma kau mau olelo ao, a mahope aku e hookipa mai oe ia'u i ka nani."
          Eia kekahi. O ka anaina pope ma Kalaupapa, ua emi aku i keia manawa. O kekahi mau kanaka i hele mamuli o lakou mamua, ua ike i ka lakou hana ana, ua ino a ua lapuwale a ua haalele ia lakou. Pela ka olelo a ke Kumu ao o ia wahi.
          Eia kekahi. Ua loaa ia makou kau wahi "Nonanona" hanau mua. He mea makemakeia no, a ina pela ke ano o kona poe hope mai, aole makou e aua i ko lakou hookipa ana me makou. Nolaila, ea, e hoonui mai i hookahi haneli a keu paha, no ka mea, nui ka hana e waiho wale ana maanei. A he mea ikaika i ka hana ka Nonanona. Nolaila o ka nui ka pono.
Ua pau. Na'u na HIKEKOKE.

Lahaina, Sepa temaba 1, 1841.
          E Nonanona e,
          Aloha nui oe, me ka mahalo, e ka malihini hou. Ua ike au i kou la i hiki mai ai. I ka la 6 o Iulai, ma Honolulu i Oahu; ua ike au i kou ano, he ano maikai loa, he mea paipai mai i na mea a pau e moe ana iloko o ka naaupo, i ko'u ike ana ia oe, hu mai la ko'u manao aloha nui ia Lama Hawaii, a me Kumu Hawaii, na malihini i hiki mua mai, me ka hoakaka pono mai i na mea kaulana o kela aina keia aina a me ka ike i na mea hou o na wahi a pau loa, he nui ka laua mau hana pono, aole nae makou i kokua nui ia laua, i na mea e pono ai, a no ka makou hana ino i kela mau malihini make laua. A eia hoi oe, ke pani mai nei i ko laua hakahaka. Ua ae au e kokua aku ia oe e like me kau kokua i hai mai nei. Eia nae kuu hemahema, aole oe i loaa ia'u, he ike ko'u na hai, ua makemake au e loaa oe ia'u mai ka mua mai a hiki i kahi au e kau ai i ko'u aloha ia oe e ka malihini.
          Aloha oukou e na mea a pau loa i ike i ka malihini hou ia Nonanona. Eia kuu manao paa loa, mai hana ino kakou ia ia, e pono ia kakou e kokua, no ka mea, he paahana maikai oia. Pela ka olelo a kakou i lohe ai, "he pono ke ukuia ka paahana e loaa ka ai nana." Auhea oukou, mai pepehi hou kakou i keia makamaka, e like me kela mau makamaka a kakou i pepehi ai. Aloha oukou e na mea a pau i ike i ka olelo a Nonanona, e kokua ia ia, e hoopau i ko oukou pepehi malihini nei.
          Aloha oe, e Nonanona, a mahope aku hai aku wau i ko'u aloha hou ia oe.
Na'u na IONA KAPENA.

          Ua kalaia ka pilikia o ke kanaka me na waiwai akolu e na mea he nui wale; aole nae pau i ka paiia ka lakou palapala; o ka Kamakea wale no, eia ilalo iho.
          No ke kala ana i ka pilikia o ke kanaka i na waiwai ekolu. He ilio kolohe, ke kao, a he lau kakipi.
          Penei e pau ai kona pilikia; e lawe mua i ke kao a hiki ma kela kapa, alaila kii mai i ka ilio, a lawe aku a hiki ma kela kapa, alaila hoihoi mai i ke kao, a hiki ma keia kapa, alaila lawe aku i ke kakipi, a hiki ma kela kapa, alaila kii mai i ke kao a lawe aku a hiki malaila, o ka pau no ia o kona pilikia, pela e hana ai.
          Ua pau keia wehe ana i ka pilikia o ke kanaka pilikia.
          Aloha oe e ka mea nana keia mea i hai mai nei i ka olelo huna.
Na KAMAKEA.

KA NONANONA.
Honolulu, Sepatemaba Tu sede 3, 1841.

KA PIKAKA.

Ua lohe iho nei makou, ua ili ka Pikaka ma Kolumebia muliwai; e koma ana na moku ekolu iloko o ka muliwai, o ka Winisani, ka Malolo, a me ka Pikaka; komo lea kela mau moku me ka poino ole, e ukali ana ka Pikaka mahope, o kona ili no ia i ke one ma kahi papau a nalo koke iho la. Pela ko makou lohe i kekahi moku mai Paniolo mai. Aole nae make kekahi o na kanaka maluna o ua