Ka Nonanona, Volume I, Number 6, 14 September 1841 Edition 02 — WAIALUA. [ARTICLE]

WAIALUA.

Ma Waialua no au i keia la (Sep. 9) a hoi mai nei. Anapuni au i ka aina o ke kula mahini malaila, aole nae i heluia na eka i keia wa. He ano maikai ko kela kula; he 16 haumana, a ua oluolu lakou i ka hana a i ke kula no hoi. Mahiai lakou me na bipi a me na oo; waele ko, kanu kulina, kanu papapa, kiai i ka pua bipi ma ke kula, hookahe wai, hana hale, a me na hana e ae, i makaukau lua lakou i ka hana naauao, a me ka ike. Ua ike au i ke kulina, he maikai loa, a pela no hoi ka papapa. Nana au i kela wahi aina, manao ae la au i na aina i mahiia ma Amerika, ua aneane like, a pii mai la ke aloha i ko'u aina. Ua hahaoia i ka pohaku ke kahua o ka hale pule hou ma Waialua; eia kona nui, 87 kapuai ka loa, 48 kapuai ka laula. Hiki wawe paha ka paa ana o ia hale, no ka mea, ua ahu ka laau, a me ka puna, a ua kokoke na pohaku. Aia no nae i ka ikaika a me ka hoomanawanui o na hoahanau nana e hana. E na hoahanau o Waialua, i nui ke aho, mai kanalua, a kuihe, a hoomolowa, aka, e hookanaka; a emo ole ka paa ana o ko oukou hale. Ua mahuahua iki ke anaina halawai i ka la Sabati ma Waialua i keia wa; ua pale ka palaka nui o ia wahi, a ua lana hou ka manao o kekahi poe i ka olelo a ke Akua. Ua oleloia he nui ka palaka o na hoahanau ma Ewa. Pela no ma Honolulu nei, ua piha na halepule i ka la Sabati, aole nae piha na naau o na hoahanau i ka uhane o ke Akua. He nui wale ka hiamoe, ka nanea, a me ka hoomaloka maoli. Auwe kakou, ke noho palaka kakou iloko o Ziona! E, e ala hou kakou, e koli i na kukui, a e makaala, o hiki koke mai ke Kane mare a pihoihoi kakou. LIMAIKAIKA.