Ka Nonanona, Volume I, Number 16, 1 February 1842 — Page 76
76 KA NONANONA. [FEBERUARI,
i ka make ana o kekahi mau waa ma ka moana a me na kanaka pu he 11.
I ka la hoomalolo i hala ae nei (oia ka la 15 a Ianuari) holo mai na waa eha no Molokai, e holo ana mai ma Oahu nei, 9 kane a 4 wahine maluna o ia mau waa. Ma ka pau ana o ka aina awakea ka holo ana: a iwaena o ka moana, loaa ka poino, he ikaika ka makani, he kupikipikio ke kai, he nui ke ale, a kahuli kekahi waa, a kii kekahi waa e kokua i ka waa i kahuli, a o ke kahuli pu no ia a pau lakou iloko o ka moana. Hooikaika lakou e hoolana ka waa; aole hiki; hemo ke ama a popilikia lakou. Aole liuliu a pau kekahi poe i ka nalowale, a ekolu (2 kane a hookahi wahine) o lakou i paa i ke ama me ka manao e lana a pae mauka nei. Holo lakou ekolu maluna o ke ama, o ka po no ia, a liuliu iki maule kekahi, ua anu, opili. Lomilomi ka wahine, a hooikaika hou; aole nae liuliu, anu a haule mai ke ama aku, a e poho ana; hopu ka wahine ma ka lauoho a honi aku la: aloha mai kela, a o ka poho no ia, a elua koe maluna o ke ama, he kane a he wahine. Holo pu laua, aole liuliu a haule aku ke kane a poho i ka moana; o ka wahine wale no koe, a haalele oia i ke ama a ma ke au maoli ia, au no keia wahine ia po a ao, pae iuka ma ka lae o Makapuu, i ke kakahiaka o ka la Sabati kona pae ana iuka.
O kekahi kanaka i holo pu ma kekahi waa uuku, oia hookahi ma ka waa; ma ka moana ua nalowale aku, aka, ua pae ola mai. I mai la ia ekolu kona kahuli ana ma ka moana. I ka po alua i hala ae nei, ua pae iuka kekahi kupapau hookahi o keia poe i make.
Eia na inoa o na mea i make.
Na kane, o Kanakeawe, Kaopuiki, Kamohai, Kekui, Pipinohi, Opunui, Kukui, Kepaa, Apiki.
Na wahine, o Kaimu, Meeauhee.
Na mea i pae ola ma Oahu nei. Nanawale, kane; Nakino, wahine. No Kolaupaha lakou a pau.
Na ka wahine i pae ola mai e hai mai ia'u keia mau mea no ko lakou holo ana a me ko lakou popilikia
PALEKA.
HAALELE I NA MEA ONA.
1. Aole au e inu rama,
Aole inu waina hoi,
Pau ke gini, pau ke awa,
Aole loa lalau hou;
Pela hoi ka puhi baka,
Aole au e puhi hou,
Ino maoli kela hana,
Pono ole maoli no.
2. Pale au i na mea ona,
Aole loa launa hou,
Awahia kona hua,
Moonihoawa no,
Ilihune, hilahila,
Hakaka a noho e,
Hele wale, pelapela
Eha mau, auwe, auwe!
3. Paa no ko'u e waiho aku,
Aole loa hoopa hou,
Pau kuu puhi, pau kuu inu,
Pau na mea ona a pau,
E ka Haku o ka lani,
E hoopaa i kuu manao,
Mai haalele i kau keiki
O auwana a poho.
(Kamalawaina ka leo.)
HAUULA, Dek. 27, 1841.
Aloha oe e ka Nonanona.
Eia keia manao hoike aku ia oe, i kekahi hana a ka pope a'u i ike iho nei; i kauoha i na kii oloko o kona hale e hoopakele i kona hele i ka aihue, a me na mea poino a pau.