Ka Nonanona, Volume I, Number 18, 1 March 1842 — Page 85

1842.] KA NONANONA. 85.

ka moa i kona wa i komo ai iloko o ka wai wela, o ka make koke no ia.
                I. W. Auhea oe, ea; e hoi ana au: no ka mea ua loihi no ka kaua olelo pu ana; a he malihini no hoi au: aka, ea, he mea hewa i ko'u manao, na mea ona a pau. O ka wai wale no, ka mea pono ke inu.
                O. Nohea mai oe; a owai kou alii?
                I W. He kanaka kuaaina au, aia ko'u wahi i Waialae, nolaila; kapaia ko'u' inoa, Wai. A o wai hoi ko'u wahi e noho ai? a o ka wai hoi ka'u mea inu.
                O. Owau ea, he hulumanu au no ke alii; he kanaka nui au i ke alo o ka poe waiwai, a me ka poe lealea.
                I. W. Aloha no ka oe e ke kanaka o ke'lii?
                O. Ae! aloha no ka! Malama paha o halawai hou kaua, a kamailio hou.
                I W. Ae paha: he pilikia makou i ka paahao.

KA NONANONA.
HONOLULU, MARAKI 1, 1842.

HE HANA HOU.

                No ka nui o na mea ona ma Honolulu nei, a no ka lilo ana o kekahi poe kamalii a me na kanaka opiopio malaila; nolaila, ke imi nei makou i mea e pakele ai na kamalii i keia mimilo make. Ua halawai pinepine na haumana iloko o na kula, a ua hoomoakakaia imua o lakou ka hewa o ka mea ona, e like me ka lama, ka baka, ka waina, ka awa a me kela mea keia mea e ona'i. He nui na keiki liilii e puhi ana i ka baka, a ua inu kekahi poe i ka rama. Ua hahai mamuli o o na makua; aka hoi, he nui ka poe ike ole i keia hana ino, a ina i malamaia lakou, pakele paha.
                Eia ka makou e hana nei, o na kamalii makemake io e haalele loa i na mea ona a pau, ua huiia lakou i ohana okoa, a i lahuiokoa, me ka hoailona e like me keia kii malalo iho. Ua penaia keia kii a maikai i ka ulaula kekahi; i ka lenalena kekahi a i ka omaomao kekahi; a ua okiia a poepoe e like me ka poai eleele mawaho, a ua kau keia hoailona ma na papale o na kamalii haalele i na mea ona.
                O kela kanaka iloko o ke kii, he kanaka halihali wai; elua ona hue wai i lawe mai la mai iuka mai. O na olelo iloko o ke kii, "WAI WALE NO.' 'UOKI NA MEA ONA,' O na olelo ae like no ia.

                E na kamalii o Hawaii nei a puni. Pehea ko oukou manao i keia hana? Maikai anei? Ina ike oukou he maikai, e hana oukou pela. Ina makemake oukou i hoailona e like me kela maluna, e palapala mai ia'u, a loaa no. Na ka oukou kumu haole no nae e palapala mai.

PULE HOOMAU.

                He pule hoomau i keia mau la ma ka hale pule o Kamika; mai ka la 15 a hiki i ka la 20. Ua waihoia no nae ka hana nui i ka la 19. Ua hele nui mai na kanaka, a ua huli mai kekahi poe, wahi a lakou; he mau haumana pope kekahi i huli mai.

WAIOLI.

                Ua hoomakaia ke kula hou malaila. Na Mi. loane ia kula no na kumu wale no. No ka hemahema o na kula ma Kauai i ke kumu ole, a no ka hapa o na keiki makaukau e hele i Lahainaluna, nolaila keia kula. Aole no Waioli wale no na haumana, no Kauai a