Ka Nonanona, Volume II, Number 7, 30 August 1842 — Page 27
1842.] KA NONANONA. 27.
ka hora 4, hiki ilaila, me kuu luhi a me ka paumaele i ha lepo. No ka mea, ua haule kuu lio iloko o ka lepo poho kokoke ma ka muliwai o Hanalei. Hiki aku au i kapa muliwai, e ku pono ana ma ka hale hana silika o Kali, a nana wau, ua kai ea, a ua hohonu loa, nolaila, holo au i kai e huli i waa a i wahi papa'u paha, o ka poho no ia o ko'u lio a mai paa loa iloko o ka lepo. Paumaele loa au. Ua hewa keia holo ana i kai. Aia no kekahi pono mauka, ma ka hale hana silika. E au no nae ka lio ke nui mai ke kai.
Na mea maikai ma Waioli.
1. He kula maikai ko Ioane. He kanaha na haumana, a ua pono ka noho ana malalo o na kanawai o ke kula. Ia'u malaila, e kula ana lakou i ka ao hoku, a ua ike iki no i na mea oluna.
2. Ua maikai ka noho ana o ka ekalesia. Aole au i lohe i kekahi hihia o na hoahanau. He mea hauoli no keia.
3. He maikai kolaila hale pule. Ua maemae oloko, a me waho, a ua piha hoi i na noho loihi.
4. Ua maikai ka hana silika. Ke hanai nei o Kali i na peelua he nui loa, 600,000 paha. I kona manao ua holo maikai keia hana: aole poho. Ua ike au i kahi mau wahine maoli e wili ana i ke silika, ua akamai loa. Olioli au i ka lakou hana. Ua kauoha aku nae au ia Alekanekero e hoakaka nui mai i keia hana ia kakou. Mamuli paha hiki mai kana palapala.
Poalua au ma Waioli a holo mai i Oahu nei ma ke Kialua, Hawaii.
KE KEIKI KAAWE.
Ua aneane kaawe kekahi keiki ano ino ma Waiawa, Ewa. Aole nae make loa, no ka mea, ua hoopakele kona makua ia ia. Eia ka pono, ina i kaawe kela keiki a make loa, mai kanu i kona kino, e hoolei wale aku i ke kula i ai na na ilio, a me na ilo. Pela no na mea kaawe a pau, mai kanu iki, e kiola wale aku no.
KA HANA KO A KA PAKE MA WAILUKU.
I ka make ana o Keone, ua manao ke alii, aole ona hope, aole hoi he pani hakahaka, a nolaila, poho ke lawe i kela hana a pau loa, a haawi i kekahi mea e aku. Hoole nae kekahi Pake ma Honolulu nei, i ka manao o ke alii, olelo ia, ua lilo kana waiwai he nui loa ia Keone, e hana i ke ko ma Wailuku, a nolaila, aole pono e kaili aku ke alii i kela hana, me ke kaa ole o kana aie. O ka hookolokolo no ia me ka iure haole, a manao ka iure ua pono no e imi ka Pake i kana waiwai i lilo ia Keone, iloko o kela ko ma Wailuku. Nolaila ua aiea ka Pake e hana ko malaila i eono malama hou aku; e uku no nae ia i ke alii $2,000 no kona hapa o ke ko paa a me ka molakeke. A pau na malama eono, pau ka hana a ka Pake, ma Wailuku.
KOHALA NUNUI.
Eia kekahi moku okohola ma Honolulu nei, o Braganza kona inoa, ua piha i ka aila, he 4,300 barela maloko. E hoi koke ana keia moku i Amerikahuipuia, eha pule koe, alaila holo aku. Ua loaa i keia moku 273 barela aila iloko o ke kohola hookahi ma Noweke! O ke kumkuai o keia aila ma Amerika, he $13 no ka barela hookahi. Ehia dala i loaa mai ma keia ia hookahi? Eia no $3,517.
Ua oleloia he nui na moku okohala ua piha i ka aila, a e hoi ana i Amerika i keia mau malama.
KA OLELO A KE KIAAINA O KAUAI
I ka wa holo ka moku i Kauai a kokoke pae iuka ma Waimea, me ke Kiaaina a me na ohua ona, i aku la ia i na ohua penei,
"Auhea oukou e na kanaka o makou, a pae kakou mauka, ea aohe uhauha, aohe paani aohe olioli, aohe aihue, aohe hana i kela hewa i keia hewa. O ka mea e hana i ka hewa e hoopaiia oia."
A e like me ia olelo ana pela lakou e noho nei. Pela mai. UNAUNA.
KA MANUWA FARANI.
I ka la 22 o Aug. nei ku mai kekahi moku manuwa Farani, ma Honolulu nei, o Ambuscade kona inoa, a o Mallet ke Kapena. I ke ku ana mai, aole kani mai na pu aloha, a nolaila haohao ko makou manao; i iho la makou, "heaha la keia? Aole kani na pu kuikahi." Hookahi kamailio ana o ke Kapena me na'lii mauka nei, a o ke ano o kana olelo mai, aole oluolu. I mai la ia "ua hai ke kuikahi, ua hooke na'lii i na kanaka Farani ma Hawaii nei." Hoole na'lii, "aole hai ke kuikahi, aole hoi i hoopilikia wale ia