Ka Nonanona, Volume II, Number 7, 30 August 1842 — Page 29

1842.] KA NONANONA. 29

kela ahaaina i mohai maoli o Iesu. Oia ka mea hoole i ka Iesu mohai. Lehulehu ka lakou mau mohai; aka, ua kuhikuhi ka palapala hemolele i ka Iesu kaumaha hookahi ana ia ia iho, oia ka mohai e pau ai ko kakou hewa. Heb. 7:17. Lehulehu na kalahala ia lakou; a malaila ke kalahala hookahi, o Iesu o ka mea uwao iwaena o ke Akua a me kanaka, lilo ia i mea ole. O na kahuna pule o lakou, ua lilo lakou i poe mohai i ke kino maoli o Iesu. Oia ka mea hoole i ka Iesu oihana kahuna. I ko lakou hoolilo ana i na olelo i palapala ole ia i mea ike pu me ka palapala hemolele, hoole lakou i ke ao ana a Iesu. I ko lakou manao, hiki i na kahuna a pau a lakou ke kala i ka hewa; aku, ma ka palapala hemolele hookahi wale no mea kala i ka hewa, o ke Akua. Nolaila, he akaka ko lakou haalele ana i ka euanelio a Iesu. Aole e kala io ia ko lakou hewa. Aohe ola ma ko lakou aoao e make mau loa ai ia.
                5. He aoao hookahe koko ia. O ka ka poe pope hookahe koko ana, ua oi loa aku ia mamua o ka hana ana a na'lii hoomanakii o Roma, i ka wa kahiko. Aole hiki ke hai aku i ka lakou hana a pau ma na aupuni o Europe. O kahi mau hana kaulana wale no ke hoikeia. Eia kekahi hana a lakou, ua kaulana ma na aina a pau o ka honua; o ka lakou pepehi wale ana, me ka hoomainoino loa, i ka poe Waledene, ma ka aoao akau o Italia. Mai ka makahiki o Iesu 1150 a hiki i ka makahiki 1300, keia pepehi ana; a mahope mai paha kekahi. O ka poe Waledene, he poe kaulana loa lakou, no ko lakou noho malie, no ka noho pono, no ka hookiekie ole, no ka maemae o ka lakou hana ana; kaulana no hoi ko lakou ike i ka olelo a ke Akua, a me ko lakou ikaika i ka malama ia Iehova. Aole i loaa kahi hala e ae o lakou; eia hookahi wale no ko lakou hala, o ko lakou hoole ana i ka pope, aole oia ko lakou akua; aole lakou e malama i kana ke kue i ka olelo a ke Akua. Nolaila, hoomaauia lakou me ke ahi, a me ka pahikaua, a me na koa, a me na hale paahao. Pulehuia lakou he nui loa i ke ahi, a hoehaia i keia hoomainoino kela hoomainoino. Aole pau i ka heluia ka poe Waledene i pepehi wale ia e ka poe pope 200,000 o lakou i make i kahi mau malama wale no, ma ke kauoha a ka pope, a Inocene III.
                Eia kekahi hana a ka poe pope, he hewa kupanaha loa; o ko lakou luku wale ana i ka poe Hugenota, ma Farani, i ka la o Baretolomaio, i ka makahiki 1572. He poe hoole pope lakou a pau, a kaulana hoi no ko lakou noho haipule ana. Hoopunipuniia ko lakou poe alii a kiiia e ka poe pope, e hele mai i kekahi mare alii; a pau iloko, pepehiia lakou a pau, a mahope mai, luku wale ia kanaka. Kanaha tausani paha o lakou i make, ia la hookahi, ma Pari a me na wahi e o Farani. Aohe o lakou hala; pepehi wale ia lakou, i lanakila ka aoao pope.
                Na ka poe pope i hoomakaukau i na manuwa o Sepania, i kapaia ka Aramada, i ka makahiki 1588, e kaua ia Elisabeta, ke alii wahine o Beritania, me ka manao e lawe ia aupuni no lakou a e hoopau loa i ka poe hoole pope malaila. Hookahi haneri a me kanalima manuwa me na koa 20,000. Pio kahi mau moku i ko Beritania, a puhiia ka nui i ka makani a nalowale.