Ka Nonanona, Volume II, Number 9, 27 September 1842 — Page 44

44 KA NONANONA. [SEPATEMABA,

Ka make ana o Paaoao me ka olioli.

                He hoahanau kahiko ia ma Kaawaloa. He hoahanau kupaa no hoi, a me ka noho pono. Aole loihi kona mai ana, pokole wale no, nawaliwali koke kona kino, aka, o kona manao ua lana loa e hele aku a noho pu me ka Haku. I kona wa kokoke hele, haalele ia i ka laau hoola, aole ona makemake e ai hou, a noho liuliu hou ma keia ao; koi ikaika kona manao e hele i ka lani. I aku la ia i kana wahine, "Aloha oe, aloha ko kaua noho pu ana; e huli ikaika loa oe i ka pono o ka Haku a make, i noho pu kaua ma kahi hookahi. A pela no hoi ka kaua mau keiki, e ao ikaika oe ia lakou i ka pono; mai hooki i ke ao ana, no ka mea, eia ka la hope o ko'u ao ana ia lakou."
                I ka wa kokoke pau kona hanu ana, ua pau ka pana ana o kona lima, aole ona hoohewahewa i na hoaaloha ona, kamailio pu no ma ka pono o ka Haku, a hiki i ke awakea o ka la Sabati make aku la. Me he hiamoe la kona make ana; olioli a lanakila loa kona manao. He oiaio kela olelo a ka Haku penei, "Lana ka manao o ka poe pono i kona make ana." "Pomaikai io ka poe make iloko o ka Haku."
G. W. LILIKALANI.

Ka halawai i ka la Sabati.

                I ka manawa e pau ai ka hana, oia no ka pule hope loa, e kakali pono a oki loa ka pule ana, a me ka olelo hoakaka--a lohe oukou i ka "amene,"--mai holo kiki mawaho me he holoholona hihiu la. Aka e hele malie a me ke kuoo, a me ka makaala. Mai walaau, mai wawa; —e noonoo no i ka olelo a oukou i lohe ai. Pela oukou e hana ai.

Ka hapa hope o ka la Sabati.

                Pehea ka hana hope o ka la Sabati, ka hapa mai ke awakea a hiki ka pau ana o ka la? Ua kapu anei? aole anei? Nawai i hoakaka mai i ke kapu ole? Nawai la? Aole na ke Akua; na ka poe hewa paha; ka poe molowa; ka poe makemake ma ka uhauha, a me ka lealea, a me ka hiamoe. He olelo wahahee ka! ka lakou, he hoopunipuni no; mai lohe iki malaila. Ua kapu no, ua laa; o ke ahiahi ua like ia me ke kakahiaka;—ua laa loa.

No ka halawai ahiahi.

                O na halawai ahiahi, ua like hoi ia me na halawai kakahiaka; aole pono ke haalele, a noho ma ka hale. O ka haalele ana i na halawai, he mea hou ia, a he mea ano e. Aole mea like ma na aina e. Ma Amerika ma ko makou aina ka aina naauao loa no ia, ua like pu ka halawai ahiahi me ka halawai kakahiaka; a i kekahi manawa, ua oi aku ka poe halawai ma ke ahiahi i ka poe halawai ma ke kakahiaka; no ka mea, noho kekahi poe ma kahi loihi, a nolaila, aole paha loaa ka halawai kakahiaka i kekahi manawa; a o ka halawai ahiahi ua loaa no. A o ka poe hele mai kahi loihi mai ma ke kakahiaka, noho lakou ma kahi e halawai ai a pau ka halawai ahiahi, hoi aku i ko lakou wahi. Aole lakou halawai ma ke kakahiaka wale no, a pau ua halawai la alaila hoi, aole pela. L. L.

                Ke kaapuni nei kekahi mau alii, o Kekauluohi, o Kuakini, a o Ioane Ii, ia Oahu nei i keia mau la; a ua hele aku Kekuanaoa e komo iloko o ka luakini hou ma Waialua.

NA LIMAIKAIKA e hoopuka'ku.