Ka Nonanona, Volume II, Number 10, 11 October 1842 — Page 47
1842.] KA NONANONA. 47
a me ka hooponopono ana i na mea e pono ai ka moku; aole hiki ia ia ke kuhikuhi i kahi pono e holo ai. Nolaila, ua akaka loa ka waiwai o ka helu. He waiwai nui hoi. Mai palaka a hoomolowa i ka imi i ka helu. Pela ko'u manao.
Na LAGARO.
KA NONANONA.
Honolulu, Tusede, Okatoba 11, 1842.
Kialua Chenamus.
I ka la 5, o Oka. nei, ku mai keia moku ma Honolulu nei, mai Komelewa mai, a ua lawe mai ia i mau haole hou, e noho iki maanei a holo hou aku. Eia ko lakou mau inoa o Mi. Leslie (kahuna pule) me kana mau kaikamahine elua; Kauka Richmond (kahuna pule a me kahuna lapaau) me kana wahine, a me na keiki elima; Mi. Whitcum me kana wahine a me na keiki elua a o Kauka Baily me kana wahine.
E hoi ana keia poe i Amerika, aole nae akaka loa ka hoi o Mi Leslie malaila. Hoi hou paha ia i Oregona.
Aole mea hou a makou i lohe ai no ka hana a ke Akua, ma Oregoa. Oia mau no na Inikini, he paakiki ma ko lakou aoao iho: aea no hoi ma kela wahi, keia wahi, aole noho a imi i ka naauao a me ke ola, Ua oluolu iki no nae kekahi poe, a ua hele mai na kamalii i ke kula. He nui na Inikini haipule, aole nae he oiaio ka lakou pule, no ka mea, aole o lakou haalele i ka hewa, a malama i ka ke Akua. Heaha ka pono o ka pule, ke haalele ole kakou i ka hewa? Aloha ino lakou! mai haalele kakou i ka pule i ke Akua no lakou; mamuli paha wehe mai ia i na puka o ka lani, a a hooua mai i kona uhane maluna o lakou, a huli nui lakou i ke Akua a ola. Aloha ino na kumu malaila! nani ko lakou ahonui, a me ke aloha i kela poe uhane auwana. Aole nae nele lakou i ka ukuia mai.
Kinai Rama ma Amerika huipuia.
Ua holo loa na oihana kinai Rama malaila i keia wa; akahi no a holo kamahao. He nui na lii a me ka poe waiwai i haalele loa i ka inu waina a me na mea ona a pau: a he nui no hoi ka poe ona pinepine mamua a oki loa i ka ilihune, a me ka ino, ua haalele loa i kela hewa nui i keia manawa a ua noho naauao. Olioli na wahine i ke ala hou ana o na kane mai ka make mai; pela hoi na keiki, ua hilahila a me ke kaumaha mamua no ka ona pinepine o na makua; ua nele loa i ka ai a me ka ia no hoi, a i keia wa ua piha i ka hauoli no ka mea ua pau ka ona ana o na makua.
E ko Hawaii nei, e kupaa kakou ma ka inu wai, mai inu iki i na mea ona a pau, o lilo auanei kakou i poe haumia imua o ko ke ao nei a pau.
Kanikele Beritania.
Ua holo aku ua kanikele nei ma ke Kialua Merelani, i Mekiko. Ua holo malu ka! aole o makou lohe e holo ana. Ua oleloia ua hoi i Beritania, aka, o kona mea e hoi ai, aole au i lohe maopopo. E hoi mai ana paha, aole paha.
KEIKI KANE HOU.
I keia la i loaa mai,
He wahi momi makamae,
He keikikane nae.
He malihini maikai nei,
Akahai no a hiki mai,
Ua nemonemo hoi.
He pua ala oia nei,
He rose maoli ke nana'e,
He rose ala no;
Na ke Akua i haawi mai,
I keia pua nani e,
Mahalo ka manao.