Ka Nonanona, Volume II, Number 12, 8 November 1842 — Page 57

KA NONANONA.
"E ka mea hiamoe, e hele oe i ka nonanona, e nana i kona aoao a e hoonaauao iho." Solomona
Buke 2. HONOLULU, OAHU. NOVEMABA 8, 1842. Pepa 12

HE WAHI NINAUHOIKE
no ka aoao pope.
(E nana i ka aoao 46.)

                Ioane, I. "O ke koko o Iesu Kristo o kana keiki, e huikala mai ia ia kakou i ko kakou hewa a pau." Aka, o ia manao pope, ua hoole i ka mana o ko Iesu koko. 3. Ua hooleia na mea e ae a pau ma ka palapala hemolele; o ke koko o Iesu wale no ka mea mana e pau ai ka hewa. Oih. 4: 12. "Aole loa he ola maloko o ka mea e ae." Aole hiki ke ahi a me ka eha paha o ke kino ke kala i ka hewa. He lapuwale ia manao.
                4. Ua hoole ia manao pope i ke ano ino o ka hewa. 5. He mea ia e emi ai ka pomaikai o ko ke Akua poe kanaka. O ko Paulo makemake e hele, oia ka noho pu me Kristo. Pilipi 1: 23.
                I. Nohea mai ia manao kuhi hewa a ka poe pope?
                D. No ka wa kahiko loa mai; mamua loa aku o Iesu Kristo. O ka poe hoomanakii, ia manawa, aole lakou i lohe i ke koko mana o Iesu, a manao lakou, he wahi ahi e maemae ai kanaka. Eono haneri makahiki mahope mai o Iesu, hopu ka pope, Geregori, a me kana poe kahuna, ia manao a hookomo iloko o ka lakou ao ana, no ka puniwaiwai. He wahi manao maalea ia e ohi ai lakou i ka waiwai o na kanaka. Na ka pope a me na kahuna ka wahahee, i ke kapa aku ia wahi he oiaio, —a no kanaka pope ke kuhihewa, a me ka makau wale. O ka uku ia o ko lakou naaupo loa.
                I. Heaha ka umikumamalua o ke kuhihewa o ka poe pope?
                D. O ko lakou manao ana i kekahi mau hewa, aole e pili i ka make.
                I. Pehea ka manao o ka poe hoole pope ma ia wahi?
                D. Eia ko lakou manao; Aole loa pono ke kapa i kekahi mau hewa, he mau hewa iki, a pili ole i ka make; no ka mea, o keia hewa kela hewa, he mea make ia, he mea e make mau loa ai ka uhane. "E poino ke kanaka ke hoopaa ole i na hua olelo a pau o keia kanawai, e malama aku ia mau mea." Kan. 27: 26. "O ka uhane lawehala, oia ke make." Ezek. 18: 4. "O ka uku no ka hewa, he make ia." Rom. 6: 23. "O ka mea e malama i ke kanawai a pau a i haule hookahi, ua hewa no ia i na kanawai a pau." Iakobo 2: 10.

(Aole i pau.)

Waioli, Oka. 18, 1842.
                Auhea oe e Limaikaika?—Ke ae aku nei au ia oe e kakau iho i kekahi mau palapala no ka mahi silika ana. Eia mai ka mua; ina i makemake oe e hoolaha ia ma ka Nonanona, aia no ia oe, a mahope hoouka hou aku au. Na'u na W. P. Alekanedero.

NO KE SILIKA. Helu I.

                Ma Kina, ka aina o na Pake ka hana mua ana i ke silika. I ka wa kahiko loa i hoomaka ai lakou ia hana. Ehiku haneri makahiki mamua aku i ke kau ia Aberahama ia, a 2700 makahiki mamua aku i ke kau ia Kristo. Na kolaila alii i kapaia ke'lii o ka honua i hooikaika nui i kona poe kanaka ma ka hana silika.