Ka Nonanona, Volume III, Number 18, 23 January 1844 — Page 82

82 KA NONANONA. (IANUARI,

hoowahawaha loa, aole nana, aole imi i na hana maikai, aole hele i na kula kanaka makua, a me na halawai. Kakaikahi na mea i hele i ka halawai sabati. E aho iki ka poe kahiko, launa iki mai lakou. Aka, o keia poe hou hihiu loa lakou. Kainoa, o ke kula ka mea e pono ai na kanaka. Pela no ma ke kauwahi; aka, aole paha pela ma Waimea. Alia, mamuli paha kupu mai ka anoano i kanuia, a ulu mai a hoohua mai i ka hua maikai he nui wale.
            Eia hoi kekahi mea hookaumaha, ke kuonoono ole o na kumu. Hookahi no kumu i kuonoono iki. He hale noho kona, a he wahi ai no hoi e ulu ana. Aka, o kona hale kula, ua ino loa. Elua kumu, aohe hale, aohe ai; ina he ai ka na makua, loaa ka laua ai, i kekahi manawa. O kekahi manawa hoi, uwe laua no ka pilikia. A i kekahi manawa, haalele kekahi o laua i ke kula, a hele aku i Hamakua he 12, 15 paha mile e imi i ka ai.
                O ka uku hoi o na kumu, ua nana aku au ia, aole akaka ka pono loa, ua loaa no kekahi uku, aka, o ka nui, aneane like ia me ka poho wale. Ina oia uku wale no ka mea e pono ai na kumu, ina ua hele lakou me ka pololi a me ke kapa ole. Nani ko lakou hoomanawanui ana! Na ke Akua paha lakou e uku pono mai.
            Nolaila ma kuu nana ana i na kula ma Waimea, ua akaka, aole e lanakila loa na kula ma na kanawai e kau ana i neia manawa. Auhea hoi na kanawai e lanakila loa ai?
            E noonoo ka poe naauao.

                (Aole e pau.)

BATIMEA PUAAIKI. HELU 4.

                Ka huli ana o Puaaiki i ke Akua. Ua haalele ia i kona ano kahiko. Ka manao o na missionari ma Lahaina ia ia. Kona komo ana iloko o ka ekalesia.
            "I neia manawa iloko o Kristo, o oukou ka poe i mamao aku mamua, ua hookokoke ia mai me ke koko o Kristo."
            Hookahi mea i maopopo ai ka poe haipule ma na aina a pau loa. O ka huli ana o ka naau i ke Akua. A ua ikeia o ua huli ana la ma ka malama ana i na kauoha a ka Haku. E like me ka Paulo olelo. "Aole mea pono e loaa mai no ke okipoepoeia, aole hoi no ke okipoepoe ole ia, iloko o Kristo Iesu, aka, o ka manaoio e hoomaopopo ana ma ke aloha."
            Oia ka mea i maopopo ai ka huli io ana o Puaaiki i ke Akua. Ua ike kakou ia ia e hele pu ana me Honolii i ka luakini o Iehova e hoolohe "i ka mea a ka poe kaula a me Mose no hoi i olelo ai" ia Iesu no Nazareta. Aole make hewa kona lohe ana. "Na ka Haku no i holahola kona naau i hoolohe ia i na mea i oleloia'i" e kana mau kauwa. Ua manaoia, ua ae koke aku ua kanaka makapo nei i ka oiaio a ka Haku olelo, a haawi koke aku i kona naau. No ka mea, mai ia manawa mai, he ano hou kona, aole noho e like me mamua. Eia ka mea mua i maopopo ai kona ano hou. Ua ike na'lii, ua maha ka mai o Puaaiki, a i ko lakou inu ana a lealea ko lakou naau, ua kii aku lakou ia ia e hula imua o lakou e like me mamua. Aka, ua make hewa ko lakou kii ana. Hoole koke o Puaaiki, aole hele io lakou la. Menei kana: "Ua pau ka'u hookauwa ana