Ka Nonanona, Volume IV, Number 6, 9 July 1844 — Page 34

34 KA NONANONA. (IULAI,

mai. Oiaio, He poe aie no ka poe lapaauia e na kahuna, a he poe aie ka poe i hele i ka hale kuai, a loaa mai ka lole, a me na mea kuai e ae. Aka, ea, pehea ka oukou poe kumu? Aole anei lakou i hele i ke kula nui? Hele no, a nui ka waiwai i lilo malaila. A nui na kala i lilo i ke kuai palapala. Hoolimalima lakou i na moku i hiki ia lakou ke holo mai i keia pae aina. A hiki mai lakou, nui wale ka waiwai i lilo aku no ka pepa, a me ka inika, a me ka hana i mau mea e hiki ai ke pai aku i palapala no oukou. He kanalima tausani kala i lilo no ka pai ana i ka Baibala, a me na apana o ka Baibala wale no. A i keia mau makahiki iwakalua, a na ekalesia o Amerika Huipuia i malama mai i ka oukou poe kumu, uuku wale no ko oukou kokua ana. Na na hoahanau o Amerika ka palaoa, ka lole, na kala, a me na mea e ae he nui wale. I keia makahiki, ua haawi mai ko Amerika poe i ka oukou poe kumu, he kanakolu kumamaha tausani kala, a me na haneri keu eha! Aole anei he aie nui ko Hawaii nei poe hoahanau na ka lakou poe kumu?
                A pehea ko oukou manao ma k pomaikai i loaa mai ia oukou? Mahea ka nui; ma ke kuai anei? Ma ka lapaau anei? Ma ka euanalio anei? Aole au e ninau aku i ka poe hoomaloka; ia oukou wale no ka'u e ninau aku. Mahea ka waiwai nui loa? Pane koke mai oukou ia'u. "Ma ka euanelio ka nui. O ka waiwai i loaa mai ma ke kuai lio, a me ka lole, a me ke kala, a me na mea e pili ana i ke kino, he opala wale no, he mau mea popopo wale. O ka olelo a ke Akua oia ka mea wale no e pau ai kakou i ka hukiia mailoko mai o ke kiolepo o ka haumia a me ka make; oia wale no ka mea e pau ai ka naaupo nui o Hawaii nei; oia ka mea e lilo ai kekahi poe, he nui wale no, he poe keiki a ke Akua a he poe hooilina o ka lani, o ka euanelio a ka Haku, oia, a oia wale no ka mea e lilo ai o Kaahumanu, a me Hoapili ma, a me Batimea, he poe hoanoho o Aberahama, a me Paulo. "Oiaio no, nolaila, e na hoahanau, aole anei oukou he poe aie? Aole anei he pono oukou e malama, ma na mea o ke kino, i ka oukou poe kumu? Na Iehova e haawi mai ia oukou i ka naauao ma na mea a pau, a e hoola mai ia oukou ma o Iesu la. Amene.
                Na ko oukou hoahanau aloha.
GELINA.

KA NONANONA.
Honolulu, Iulai 9, 1844.

KA AHAOLELO MISIONARI.

                Ua pau iho nei keia ahaolelo: i ka la 15 o Iune nei ka pau ana. Ua oluolu a me ka maikai ka makou hana; aole mole awaawa i kupu mai ai iwaena o makou. Pomaikai makou i ka noho pu a launa pu, a pule pu, a imi pu hoi i na mea e holo ai ka ke Akua hana.
                Eia nae ilalo iho kekahi mau mea i maopopo mai ia'u iloko o keia ahaolelo; e pono paha e nana pu kakou i keia mau mea me ka hoomanao a me ka noonoo nui.
                I. NO NA EKALESIA. No ka haunaele i ka wa ia Lokeoki, nui na hoahanau i haule, a ua lilo loa kekahi poe i ka hewa. Ua paa no hoi kekahi poe i a palaka, a me na mea o keia ao, a hiki loa i keia wa.
                Ma kekahi mau wahi nae, ua makaala na hoahanau, a ua hooikaika hoi ma na mea o ka uhane.
                Penei ke kokua ana o na hoahanau i ka ke Akua hana mai kela malama o Mei, 1843, a hiki i keia Mei, 1844.