Ka Nonanona, Volume IV, Number 8, 6 August 1844 — Page 46

46 KA NONANONA. (AUGATI,

                Na Lunaauhau o Kauai.—Kaanana, A nala, Kauakahi, Wana, Naumu.
                Na Lunaauhau o Maui.—Ilae, Kaenaena, James Nowliens, Kuihelani, Kenui, Manu.
                Na Lunaauhau o Hawaii.—Naihe, Kapipi, Kapau, Kawaihoa, Kawi.

NO KA HANAI I NA KAHUNAPULE. HELU 3.

Makawao, Maui Hikina, Maraki, 20, 1844.
                E na hoahanau Ekalesia, mai Hawaii a Kauai.
                Ua maopopo paha, i ko oukou manao, ka pono o ko oukou malama ana i na kumu a oukou, ma na mea o ke kino, no ka mea, ua lohe oukou, he poe aie oukou, na lakou no ka Euanelio, a ua hoike mai ke Akua i kona manao malaila. Aka, i ole e hiki ia oukou ke kanalua iki hou aku ma keiu mea a i hana wawe oukou ia hana maikai, ke manao nei au e hoakaka hou aku i kekahi mau mea e ae e pili ana i keia wahi.
                3. He mea pono e malama oukou, e na hoahanau, i ka oukou poe kumu, i pau ka molowa, a me ka palaualelo o na hoahanau ekalesia a pau loa.
                O ka molowa a me ka palaualelo, he kamaaina ia iloko o na kanaka a pau ma ka hanau ana, I ka wa i hoohanauhouia mai ka naau o ke kanaka, ua kaulia pu kona kanaka kahiko, oia hoi, kona ano hewa me Iesu ma ke kea. Aole nae i make koke na hewa a pau. A ua mamanao ia, o ka palaualelo, o ka molowa i ka hana, oia ka hewa hope loa i make. Pehea na hoahanau o Hawaii nei? Aole anei he nui ka poe e noho ana me ka hana ole, a me ka hana uuku? Pela ko'u manao. Hana no kekahi poe me ko lakou ikaika, aka, aole paha pela ka nui. Kakaikahi wale no. Hoopoina kekahi poe i ka Paulo kauoha, aia ma 2 Tesalonike 3: 10. 'Ina aole e hana kekahi, aole hoi ia e pono ke ai;"—aia ma 1 Tesalonika 4: 11. "A e imi oukou e noho malie me ka hana aku i ka oukou hana iho, a me ko oukou mau lima iho e hana'i; e like me ka makou kauoha ana aku ia oukou." Nolaila, noho wale kekahi poe, moe ma ka moena i ke ao kekahi poe, hele ia wahi aku ia wahi aku, e makaikai, a e kamailio pu me na hoalauna. Pela lakou i hoomaunauna i ka manawa. Aole pono iki keia noho ana. Aole oluolu ke Akua i ka poe palaualelo, ka poe molowa i ka hana. Penei ka Paulo, Roma, 12: 11. "I ka hana mau ana, mai hoopalaleha."
                No ke aha keia noho palaualelo ana? Heaha ke kumu? I ko'u manao, eia kekahi kumu, o ke ano o ka aina o Hawaii nei. He aina oluolu keia, aole anu e like me Amerika, aole hau; aole aina paakiki e like me ka nui o na aina: no ia mea, aole oukou makemake i ka lole hulu hipa; aole oukou makemake i na kamaa, a me na kaukini, a me na mea a ae e like me ko Amerika poe. Aole oukou makemake i ka wahie nui, a me ka mauu maloo no na holoholona. He hapa wale no ke kumukuai i ka oukou ai, a me ka ia, a me na mea e ae e pono ai ko oukou noho ana. Nolaila paha ka palaualelo a kekahi poe. Aole anei, ea? Aloha ino! o ko ke Akua lokomaikai nui ua lilo ia i mea e pono ole ai ko oukou noho ana! Ua oki, e na hoahanau, mai hoonaukiuki aku i ka mea nana i hoopomaikai mai ia oukou.
                A heaha ka mea e pau ai ka molowa o na hoahanau a pau o Hawaii nei, i ole e hihia hou lakou malaila?