Ka Naʻi Aupuni, Volume II, Number 95, 22 September 1906 — He Moolelo NO Hiiakaikapoli-o-Pele. [ARTICLE]

He Moolelo NO Hiiakaikapoli-o-Pele.

A ia lakou e hoomaha ana, pane aku la o Wahineomao ia Hiiaka, kana aikane aloha: "E kuu aikane aloha, aole o keia pilikia ua hala ae la; a hookahi ka hoi mea pilikia nui a kaumaha no hoi o ko'u noonoo, oia ka pilikia o kaua i pelu hou aku nei i hope a lilo aku la i pohaku pahoehoe, wahi au i hoike mai nei. Aole anei au wahi pono e hana iho ai i keia wa, i loaa ai ke ola hou ana i ka hoahanau o kaua? Hele mai la ko'u aloha no kela kaikamahine a liliko i o'u mau maka. la wa, pane mai la o Hiiaka: Ua hea mai nei no hoi au ia oe, e kahea aku ana au iaia, a loaa no iaia ka palekana, ke ae mai nae hoi na kupuna o kakou i ka po. E kahea mua ae au ia lakou, a pau ia, alaila, kahea aku au i ke kaikuaana haku o kakou. No keia wa nae, e hai aku au ia oe, e ola ana no ua pilikana nei o kaua; aka, e ku mau no nae kona kino pahoehoe, i kia hoomanao no na hanauna o muli aku nei. I ka pau ana o keia mau olelo a Hiiaka, o kona kahea ae la no ia i na kupuna o lakou, e hoomaka

ana mai ia Paliku mai a hoea ia Papanuioleka (k) me Kapapahanaumua kana wahine, e like me ka mea i hoikeia ma ka Helu 1 o keia Buke 2 e hele nei. Alaila, hahau hou aku la ia i na kupuna i pili ia lakou mai a Kapapanuikahulipali mai, ke keiki a Papanuioleka me Kapapahanaumua. O Kapapanuikahulipali ke kane, o Kapapaianapa ka wahine, hanau o Kapapanuiakalaula, i noho ia Kapapaholahola, kupu mai o Kapapakiilaula, he kane; i noho ia Kapapaiakea ka wahine, puka o Kapapaiaoa, i mo-moe aku ia Kapapapoukahi, weli ai o Kapapauli, he kane, i noho ia Kapapapoha, hanau mai o Kapapapahu ka mua, a o Kapoheenalu mai kona muli. O ka muli, o Kapoheenalu ke kane, o Kamaulikainaina ka wahine, hanau o Kahookokohipapa, i noho ia Mehakuakoko, oilo mai o Papaiao. O Papaiao ke kane, o Mauluikonanui ka wahine, hanau o Papaheenalu, i noho aku ia Hanaumua wahine, hanau o Liaikuhonua me Homaila, iloko o Puukahonualani. "O Homaila ke kane, o Honuakau ka wahine, O Kehaukea ke kane, o Kualeikau ka wahine O Mohal[illegible] i ke kane, o Luukaualani ka wahine O Kahakuiaweaukelekele ke kane, o Hinawainonolo ka wahine O Kahokukelemoana ke kane, o Hinawaioki ka wahine O Mulinaha ke kane, o Ipoi ka wahine