Ka Nupepa Kuokoa, Volume III, Number 39, 24 September 1864 — Kanikau Aloha no P. Kamakanana. [ARTICLE]

Kanikau Aloha no P. Kamakanana.

Kuu makuakane mai ke one hanana e Pahalona, Mai ka piina ikiki la e Kuakahiki, A hiki mai ko aloha e uwe no au, Kuu makuakane mai ke kula o Kaapoko, Mai ka malu hale la e Huaipau, Ua pau ka pili ana me ka makua, Ua wehe mai oe i ka pili a kaua, Kuu makuakane mai ka i-a wawae hookahi o ka aina, Mai ka ia wale nui o Koolau, Mai ka ia hoailona mai ma ke kai, Akahi au a ike i ka mea nui he aloha, Ke uilani hooluhi nei i kuu kino, Ke hoolono nei au i ko leo i ka pane mai, He leo keia e mapu nei, E ano nei la i ke kahakai, Ka maka aloha o kuu makuakane, I walea i ka ai kihamu pua niu, I paepae leo me kupinai, Me na hoa haiwale i ka nahele, Hapapa wale iho no ka manu hulu ole, He uhane aneane aloha e maalo nei, I waiho lua i ka lai o Lele, Lele makawalu auhono i ke kai, Ke nu mai la i ka nahele aloha, Aloha wale kahi a kaua e hele ai. Aloha ka piina loa o Kaluaopele, Hiki aku kaua i Omaolaulau, Lalau wale ana au ia oe i Puenaena, Kuu makuakane mai ke one o Kahualoa, Mai ka pahoehoe loa la e Puukoae, Mai ke kula wela la e Kanukupili, I piliia e kaua ka nani o Keomuku, Hoomaha aku kaua i Ohiaokalani, Kuu makuakane mai ka piina o Uwekahuna, E huna ana au i ko aloha, Aole e nalo ua ikea ae nei, Aloha wale ka wailohi o ke kanaka, I kakaia e ka makani kaiaulu o Waianae, Kuu hoa pupuu anu oia uka, Oia aina koekoe ke noho, Ka li anu haukeke a ka ua i ke kula, I kahi a kakou e noho ai, Kuu makuakane mai ka ua leo nui o Hilo, Mai ka Bele kuilua o Haili, Ilihia au eehia i ko aloha, Aloha wale kau wahinekanemake e uwe nei, A me au mau keiki e u-o ana, Aloha oe aloha no hoi makou, Ua hele oe i ke alanui hoi ole mai, Ua wehe oe i ka pili a kaua, I piliia e kaua ka ua me ka la, Ke anu hoi me ke koekoe, Aloha wale ia wahi a kaua e hele ai, Aloha oe aloha no hoi au. S. E. K. Papaai. Waikane, Koolaupoko, Sep. 10, 1864.