Ka Nupepa Kuokoa, Volume III, Number 50, 10 December 1864 — Page 1
KA
NUPEPA KUOKOA
Ke Kilohana Pookela no ka Lahui Hawaii.
BUKE III. HELU 50. HONOLULU, DEKEMABA 10, 1864, NA HELU A PAU 159.
" KA NUPEPA KUOKOA."
HOOPUKA MAU IA MA HONOLULU
I kela Poaono keia Poaono.
$2.00 no ka makahiki, ME KA HOOKAA MUA MAI.
NA OLELO HOOLAHA — aole i oi mamua o 10 laina no ka hoopuka hookahi ana, $1.00 ; alua komo ana, he $1.50 ; hookahi malama, $2.00. E uku mua ia mai ke dala o na olelo hoolaha a pau e hoounaia mai ana e pai.
KANIKAU — he hapalua dala ka uku no ka aoao hookahi o ka pepa leta, oia hoi 4 keneta no ka lalani hookahi — penei : he 25 lalani. $1.00 ; 50 lalani, $2.00 ; a pela'ku.
KA UKU NO NA OLELO HOOLAHA — ka uku pepa, a me ka uku o ka Kanikau, e haawiia no ma ka lima o na Luna o ke Kuokoa, a i oleia e hookomo mai no ma ka leta, a hoouna mai i ka Luna Pai.
O NA UKU PEPA A PAU E HOOKAA MUA MAI NO — aole e kauia ka inoa o kekahi haole a kanaka maoli paha, ma ka inoa o ka poe lawe pepa ke ole e hookaa e mai mamua. E pono ke hiipoiia keia mau rula, no ka mea, he emi no ka auhau no keia nupepa. H. M. WINI, (Luna Pai.)
KA " NUPEPA KUOKOA."
Is published in Honolulu
EVERY SATURDAY, $2.00 per annum...........in advance,
ADVERTISEMENTS not exceeding 10 lines, inserted once for $1.00 ; twice for $1.50 ; and $2.00 for one month ; all advertisements must be paid for in advance.
KANIKAUS will be charged 1.00 per page, or 4 cts. a line. PAYMENTS FOR ADVERTISEMENTS, Subscriptions or Kanikaus, may be paid to any of the Agents of the Kuokoa, or may be enclosed in a letter to the Publisher. ALL SUBSCRIPTIONS must be PREPAID. No names, either of
foreigners or natives, will be inserted on the subscription list, until fully paid for. This rule must be strictly adhered to, on account of the low subscription price.
H M. WHITNEY.
Publisher.
Volume I and II of the KUOKOA, bound, for sale, $3.50 each.
Persons having complete sets of the above, can have them exchanged for bound Volumes, by paying $2.00 each.
Kumumanao.
PEHEA LA'UANEl E NUI HOU MAI
AI O HAWAII, NO KA MEA HOI,
UA UUKU IA.
( Koena o kela pule )
He poe haipule oiaio keia i kupaa ma ka pono a moe ma na kapuai o ko kakou Haku o Iesu Kristo, me he mau pukoa la hoi i naueue ole i ke aili ia e ke kai ko-o. Hele mai na hoomana he lehulehu wale, kai hele hoi a kipalale me na wahine he lehulehu, me na kapu wai, na huihui kii, huihui akua, huihui lei, huihui laau kea, mamua'ku nei, a anoa iho nei no hoi, aohe wahi mea a neeu iki ae, aka, kupaa no mamuli o ka pono a make aku la. Pomaikai wale ke kanaka kai kupaa i ka hoowalewale ia mai ; no ka mea hoi, a pau kona hoao ia mai, e loaa auanei ia ia ka lei o ke ola i olelo ia mai ai e ka Haku no ka poe e aloha'ku ana ia ia. Iakobo 1 : 12. Aka, hoihope no nae ka nui o Hawaii, ka poe hoi i kakau ole ia ma keia pepa. A ina paha e loaa ana ia oe e Hawaii hookahi haneri kanaka haipule a keu, alaila, luku mai anei ke Akua ia oe a uuku ? " Kahaha, aole au e luku, ke ike ia hookahi haneri kanaka pono ma Hawaii a puni." Wahi ana ia Aberahama, oiai e noi ana ia no Sodoma, a me Gomora, Adema, a me Zeboima no hoi, aka, no Hawaii hoi keia ; aohe hoi a ia mau Kulanakauhale ua hala e aku la i ka make. A pehea la, ua hiki aku anei ka huina o na kanaka pono o Hawaii nei i ka hookahi haneri ?
He kanalua ko'u naau i ka hiki ana ilaila, no ka mea hoi, ina paha ua hiki, alaila, mahea la hoi auanei kahi e ikeia'i keia puhakahaka nui nana i moni iho nei i ka 330,000 kanaka, a koe wale iho no i 70,000 i keia manawa, nani ka emi ana, aole paha e hala na kauna makahiki i koe elima, a puehu ka hulu o ke poo, a i ae he ohule pahukani ka nienie, i hamo ae ka hie, e nemo ana.
Nolaila hoi, aole i emi iho keia Lahuikanaka, no ka ike ole ana i ke Akua oiaio a me kona pono, a ina pela, alaila, no keaha la ka hoi ka uuku ana, a i 1,750 mau wahi kaau wale iho no ? He hoohalahala oiaio no ia, aka hoi, ua makaukau no nae au e ekemu aku mahope iho o ka pau ana'e o keia wehewehe ana i ka hakina mua o keia haawina, a e ike no oukou i na kumu o ka uuku ana, a e oili loa'ku ai paha i ka nele loa ana, ma keia hope aku.
4. Aole i emi iho keia Lahuikanaka a uuku no na Kumulau hoolaha ole, e hoopiha hou ai i ka Aina.
Aole paha i poopoo-pilau ka hapanui o na wahine Hawaii, e nele ai la hoi ka aina i na Kumulau hoolaha ole e hoopiha hou ai i ka Lahuikanaka a nui, aka hoi, he oiaio maoli no paha, o ka hapanui ae o lakou kai anolike pela, e noho poopoo-pilau ana, a e noho ana hoi mamuli o ke ano o ka hoki-wahine hanau keiki ole, a o kekahi hoi o lakou ia, aole loa akahi i anolike pela, i lohe mai oukou. E nana'ku i ka ohana hua nui a Mr. Paulo, Kaleikini, o Waioli Kauai, he 16 keiki oia ohana ; pela paha, aole paha, ke ole nae e hoonee hewa kuu lima i ke kakau ana i keia huina, a ua loaa mai no hoi he mau moopuna. A o ka luaui makuahine nana keia ohana keiki nui, oia no o Mrs, Puniai, Kaleikini, a i na paha e loaa ana na Kumulau hoolaha anolike me keia ka hanau nui ana mai o a o a puni ka aina, alaila e emi iho auanei a uuku ka Lahuikanaka ? Hele ka pee-ka pee-u-e-u-e, ka emi iho.
Kainoa hoi o ka mea nui aku ia o ka hanau lehulehu mai o na wahine, mamuli o ka maikai o na makuahine a me na makuakane hoi, aole keia he mea na ka hoomaloka e kanalua'i, a o ke kanaka hoole mai i keia, he makapaa ia no Kalau, ke hookui nei e haha poele ai i ka lua hooleina moka, a i ike iho i ka hawahawa ana o na lima, i ae he makani wela ka mahanahana.
Eia hoi ; ua hoomakaukau ia no kekahi kula hoonaauao a malama kino no hoi no na kaikamahine Hawaii ma Wailuku i ka A. D. 1837 i hala'e nei, a ua puka mai no hoi kekahi mau kaikamahine, he mau iwa puukani na na anemanu o Kauaweli, he mau makuahine kupono hoi na Hawaii, kai hele wale a ohi ka io o ka laau o Makawao, he nani ia la he mohala ka pali o Kokomo, i noke mau ia hoi e na kulu wai liilii o ka lewa, a ke kehau anu hoi o ka po-a nohea lua kela i ka ipoahi a ka makemake, i loa no a hui me na kaikunane Lahainaluna oia pupuu hookahi o ka noho ana inea malalo iho o ka leo koikoi o na kumu, loaa no ka hua, aohe mea e nele ai, no ka mea hoi, he Iewa kiani kela no Wailuku luna, ahe anemanu kauaheahe hoi keia no Lahainaluna, ua lai no laua, no ka mea hoi, ua maluhia like na kino. E nana'ku ia Mrs. N. Kekela (wahine) e noho mai la i ko Nuuhiwa pae aina e hoohelelei ana i ka hua maikai o ko laua mau puhaka malaila. A ua lohe au, aia ka me Rev. Emesona. Kekahi o ka laua ohana, a aia hoi ma ke kula ohana a Miss Organ ma Makiki kekahi, a me kekahi poe e ae no hoi i anolike pela ma Hawaii nei.
A o kekahi hoi o lakou ; e i ae no ke ahu mai nei, e hoohanau ana paha aole paha, a ke hoohuelo mai nei hoi kekahi poe ma ka Natina (National) me na wahi palapala, liilii i ka lima, i hoailona ia paha me keia mau wahi hua. " Laikini Hookamakama." A o kekahi poe hoi, ua Ikaboka i na mai ino. A pehea no la'uanei oe e nui hou ai, no ka mea hoi, ua noho ulaia ka hapanui o ko mau Kumulau e Hawaii. Oia nae hoi, he mele no la hoi ia na na kaikamahine o ka Netina i mele mau ai la, oiai e lohe ana i kekahi hapa, penei-a : Aia ku'u ki ki'i — no. I ka u-la-i ki'i — a. I ka hale hu-la hu ku'u — la. O ka Netina wa-ka'a-le. Aole no hoi au i manao, o na makuahine wale no kai ano like pela iloko oia huikau hookahi ana i Kaeleawaa ma ke kolohe, aka, o na makuakane no hoi kekahi, ua puka mai kekahi poe mai Lahainaluna mai me ka inoa maikai, a o kekahi poe hoi o lakou ua Huaers, a ke noho nei kekahi poe o lakou me ka manao ana i mau makuakane no ka Lahuikanaka ; a o kekahi hoi, aole loa i manao like pela ; aia no e noho lealea ana, e noho uhauha ana, a e noho hookano ana hoi, a aia hoi kekahi poe ma ka inu rama, inu awa, ma ka aihue, a ma ka hoopunipuni, a ma ka lua pa-u no hoi nana e moni nei ia Hawaii i ka lua-kupapau, he moekolohe, a pela'ku. A pehea no la uanei kakou e nui hou ai.
Eia hoi ; ke hoao mai nei o J. P. Green opio, a me O. H. Gulick opio hoi, ma Makawao i Maui, a ma Waiohinu hoi i Kau Hawaii, e kanu hou i mau pulupulu no Hawaii, pomaikai maoli ka aina ke holo pono ka laua hana ana, ka keia mau keiki hoi au e Hawaii ; a i na e holo pono ka laua hana ana i ka pono a me ka pomaikai o ka Lahuikanaka Hawaii, ma keia hope aku, alaila, me laua auanei ka hoomanao mau ia ma ka puuwai o ka Lahui, ke kumu hoi i nui hou ai keia Lahuikanaka, a na makua o laua i hiipoi nui ai me ke aloha.
Alaila, e Hawaii nui o Keawe e, ala a holo aku i Waiohinu i Kau, a o oe hoi i Maui o Kamalalawalu, pii pololei aku no i Makawao, mai makau i ka hao kuehu mai a ka ua ukiukiu o Makawao, a hoololohe iho, ole, ku a eu, eia la he mau la ino. Pehea hoi ko Wailuku, a me ko Lahaina mau iwa ? E ko Oahu Kakuihewa, a me ko Kauai o Manokalanipo, e ala, liuliu ana ke o, hume kahi malo, kakua hoi kahi pa-u i ka hope, a holo imua, no ka mea hoi, aole paha i nui na la i koe, a hiki mai ua mau mea ino la e hooneoneo ai i ka aina.
Oia hoi keia, o ke Kanawai e ae ana i ka Hookamakama, ua holo mua ia, o ke Kumukanawai hoi o ke Aupuni, ua kahuli ae nei, a he mea hou keia, o ke Kanawai Puhi Rama, ua noa loa, a hookahi hoi mea i koe a holo mai, nau ponoi iho no e Hawaii e inu ka rama ; a, oki ka hana, " ku ka apa ia Hawaii he moku nui," wahi a ka olelo. Auwe he keu keia a na la ino, oia nae hoi, ua paipai mua ia mai no la hoi kakou e Solomona penei. E hoomanao oe i kou mea nana i hana, i na la a pau o kou noho opiopio ana, oi hiki ole mai hoi na la ino, a hookokoke ole ia mai hoi na makahiki au e olelo ai, aohe o'u oluolu i keia mau mea, wahi ana. Kekahuna12 : 1.
Nolaila hoi ; mai kuihe a kanalua, aka, nana mau aku na maka imua ; i ka uiuiki mai o ka lama o ke ola, aia la ke ula wena mai la i ka pilipili ula o Makawao, ke hahi ia mai la hoi e na kulu wai liilii o ka ua ukiukiu, e kikiko'u ana hoi i ka lau kukui o Piiholo, a aia hoi i ka malu lehua o Waiohinu i Kau, ke peepeahi mai la ia oe e Hawaii, e holo aku ilaila. A ke lana hauoli nei ko'u puuwai ; e nui hou ana keia Lahuikanaka ma o keia mau Kumulau hoolaha la, ke hiki pono nae ia ma keia hope aku, ke ole hoi ia e hookui ia me na alalai weliweli o keia kau i haiia'e nei maluna.
A he oiaio maoli no hoi, aole i emi iho keia Lahuikanaka a uuku no ka uuku o ka aina, a no kahi ole hoi e noho iho ai na kikala o ka Hawaii, a e hiolani iho ai na poo, a e hana'ku, a e mahiai paha, no ka mea hoi, ua oleloia ma ke Kalaiaina ; penei : " O ke kanaka e hooikaika nui ana ma ka hana, he ohana hooikaika kona, a he ohano maimai ole hoi." A i na pela, o ka hooikaika mau ana i ka hana ka mea e ikaika'i kekahi ohana, a e maimai ole ai hoi, alaila, he kumu no ia e hoomahuahua hou ai i ka Lahui.
Aole no hoi i emi iho keia Lahuikanaka, no ke ao ole ia, a no ke kumu ole paha nana e ao, a no ha palapala ole paha, a no ka hale ole hoi kekahi e ao ai, aole loa, aole hoi i emi iho no ka ike ole ana i ke Akua oiaio a me kana pono ; a no na Kumukula hoolaha ole hoi paha, e hoolaha ole hoi paha, e hoopiha hou ai i ka aina me kanaka, aole loa no, i lohe maikai mai oukou e o'u mau makamaka, aka hoi, o keia mau mea a pau loa, he mau mea wale no ia e hoomahuahua hou ana ia oe e Hawaii ; a like paha ka paapu me
ke one o kahakai ka pupupu, a me na Hoku hoi o ka lani ka pau ole i ka helu ia.
A no kau hana ole ana me keia mau mea a pau loa ea, aole no oe e nui hou ana, no ka mea hoi, he hookano, a he hookuli, aka hoi, ke hai aku nei nae au ia oe. E kokolo mai auanei ko Deragona e iniki i ko ihu, a papaa kahi, a i ko mau onohi hoi, a maka-paa, a i ka a-i hoi a alaala, a i ka opu hoi, i na he Kumulau a poopoopilau, a i ike lea iho oe i ka honi hoomau ana i ka ihu ole o ka pilikea, no kau hana ana pela he haaheo. A pehea no la auanei oe e hiki ai i ka Huinahelu o ka " mahuahua ana ? Aole e hiki, aka, e oia mau ana no oe pela a hiki aku paha i ka nele loa ana, aole au i ike, aka, aia wale no ia mea i ke Akua ; no ka mea hoi, oia wale no ka mea ike i ke kumu a me ka hope o na mea a pau, ka hikimua hoi me ka ukali, mai keia la'ku a i ka la pau ole. A i na paha o ka hana ia ana me keia mau mea a pau kona mea e nui hou ai, alaila, mahea la hoi auanei kahi e ikeia'i keia mimilo nui nana e moni okoa nei i ka Lahuikanaka, a koe iki ? Mahea hoi, ma Honolulu paha ea, mahea la ? * * ** * * *
Nolaila hoi, e nana iki kakou i kekahi mau puka e hoemi ai i keia Lahui, malalo o ka mahele alua o keia Haawina, a aole nae au e kamailio aku ana me he mea la hoi ua pii keia Mahele elua mai ka manawa ia Mr. Kapena Tuke mai, a iloko o na makahiki i hala iho nei, aole, aka hoi, e kamailio wiwo ole aku ana au i ka emi paha o ka Lahuikanaka i keia mau la'ku, e hiki mai ana, a me he la hoi, aia paha ilaila, ke kohu pono ana o keia Mahele Alua. E uuku ana keia Lahuikanaka. A nolaila hoi, e haawi mai oukou i ko oukou mau pepeiao ia'u, a e hoolohe iho i na mea e uuku ai, elike me ka Manaohai,
1. O ke Kanawai i hooholoia, e hoemi ana i na ino e loaa ma ka Hookamakama ana.
O ka ae ana'ku i keia Kanawai Hou e hoemi ana i na ino i loaa ma ka Hookamakama ana o ka hooko pono ana no hoi ia i na mea a pau i hana ia malalo o ia Kanawai, a o ka Lahui, a o ke Aupuni paha hoi i kakau inoa ma ka ili o ia Kanawai, ua lilo hoi ia i Kanawai paa no ke Aupuni, a o ke kanaka a mau kanaka paha hoi i ku e i ke Kanawai, e nanahu mai auanei na eha o ua Kanawai la i kona nui kino. Nolaila hoi ; o ka hana ana, a me ka hooko pono ana hoi mamuli o na kuhikuhi a me ke ao ana a ke Kanawai, o ka hope no hoi ia o ke Kanawai.
A o ka wehe ia ana hoi o kei Kanawai au e Hawaii a hamama, o ka wehe ana no hoi ia i na ino, na Ahi-ka-na-na hoi he lehulehu wale, no ka mea hoi, ua hamama ka ipuka e komo mai ai ia poe. A o ko hooko pono ana hoi i keia Kanawai e Hawaii, " E hoemi ana i na ino i loaa ma ka Hookamakama ana." O ka hoonele ana no hoi ia i na pono a pau o ka Hoomana Uhane ana i hiki mai i keia Aupuni, a me ka hookahuli loa ana hoi i kekahi o na Kanawai o ka pono io maoli a Iehova ko kakou Akua, ana hoi i haawai mai ai ma ka mauna o Sinai, ma ka lima o Mose, e i ana, " Mai moekolohe oe."
A o ka heluhelu ana i ko Kanawai Aupuni e Hawaii, penei no ia : " E moekolohe no oe e Hawaii. E noho hookamakama no oe e Hawaii. E noho manuahi no oe e Hawaii. E noho kukaeauli no hoi oe e Hawaii. E noho mare ole oe e Hawaii. E haalele kane a haalele wahine hoi oe e Hawaii. E haalele keiki oe e Hawaii. E haalele kukahi, a kualua, a kuakolu paha hoi oe e Hawaii." a pela'ku no. A o ka hana ana hoi a me ka hooko pono ana hoi mamuli o keia mau mea a pau, o ka hope no ia o keia Kanawai Hookamakama au e Hawaii i kakau inoa'i, aohe hope e ae, a o ka mea hoole mai i keia, ua lalau paha oe no ka ike ole, a ina paha hoi no ka maka ea, alaila, no keaha la ka hoi ka ike ole ana i na wahine i hoailona ia me keia mau hua, " He wahine Laikini ?" He kokua hewa, a he kanaka hoopilimea'i hoi mamuli o ke Aupuni, ke kanaka hoole mai i keia mau mea a pau a'u i hai aku nei, aole ia he mau hope pili pono i keia Kanawai Hookamakama.
A ke ninau hou aku nei no hoi au ia oe e Hawaii. Nohea mai la na palapu loaa wale ? No keia Kanawai no. A ia wai la hoi ka ihu hou ? I keia Kanawai no. A ia wai la hoi ka huihui kaokao e mu'u mai la i ka omole aniani a Kauka Hilabarani ? I keia Kanawai no. Ia wai la hoi na makaulaula, na makapaa, na a-i palahuki, na wawae poho ? I keia Kanawai no. Ia wai la hoi ka wehe ana i kahi huna o Ma-ma, a loaa'e keia mele a ka poe kahiko ; " Hamama pono ka waha o Haena i ka makani, Kiihelei pono i na kuemaka-pali o Makana, Ina pae-puu o Kaiwikui iluna, Kapalili oni ke ke alelo o Limahuli i ka makani, Ke ke pono ka waha o Ma-ma i ke aa lewalewa, Mimino ka ihu o ke puhi i ka makani, Hemo ke kileo o Kaaumaka i ka wai," i nokenoke ai i ke o-li-oli ? I keia Kanawai no, no ka mea hoi, ua ike nui ia e ka lehulehu mai o a o, ka hele pinepine ana o na wahine Laikini i kahi o ke Kauka e wehe wale ai i kahi huna i papa loa ia e na Iudaio, ke nana'ku ma Oihana Kahuna 18 : A mamuli hoi o keia Kanawai hou, ua noa ia mea he wehe ana i kahi huna o na wahine. A ua olelo ia hoi, o ke kanaka e hana ana i kekahi o keia mau mea i inaina ia, e o-ki ia lakou mai ka aina'ku, pela ka Baibala. Oihana Kahuna 18 : 29.
Auwe ! aloha ino kakou e Hawaii, i ko ulu ana'ku nei i na kaikamahine opio, na makuahine Kumulau hoi, na kupuna wahine paha, na moopuna wahine hoi, a ku i kahi o ke Kauka, mamuli o ke Kanawai (no ka mea hoi, ina e hoopupu iho kekahi wahine Laikini, oia pilikia okoa ia, pau i ka Halewai.) A me ke aniani hoonui kela e lena hele ai i o a ia nei. Kahaha ! " Ku-ka kalaihi a ka ua holio, hoalohi lua i ka maka aniani o ke Kauka." Aohe nao mai i ke ahuwale, o kahi kina i makamae loa ia ma ke kanawai o na Iudaio, he mea akaaka ia na keia Kanawai a o kana mea hoi i lealea'i, o ka ke Akua hoi ia i aka ole ai, a e hoopai mai kela me ka ha o kona waha, owai la ka mea hiki e hoonana ? E nana ma Ieremia 4 : 4 hapa hope. A puka mai kou ukiuki e like me ke ahi, a-a hoi, aohe mea hiki ke hoopio, no ka hewa o ka oukou hana ana. Aia la, ua pau paha kakou i ka haaleleia mai e ke Akua, no ka mea hoi, ua hewa ka kakou hana ana, a ina paha e pau ana kakou i ka haalele ia mai e ke Akua no ka hewa o ka kakou hana ana, alaila, nui hou anei keia Lahuikanaka ?
Ke ninau hou aku nei au : Nohea mai na keiki kamehai i loaa ma ka moekoloana ? Na keia Kanawai no. Nohea mai hoi na haalele kane na haalele wahine e noke nei i ke kuhea ma ka Nupepa Kuokoa ? Na keia Kanawai no. Nohea mai la hoi na mai he nui wale e moe nei ma ka Halemai Moiwahine ? Na keia Kanawai no. A nohea mai la keia Halemai ? I kuu manao ana, no keia Kanawai no, aia no malaila kahi e lapaau ia ai na wahine hookamakama a pau i ke ola, haule aku no i ka hookamakama, na wahine hoi i hoailona ia ma ka lae. " He wahine Laikini."
Aia la, kumakena ua pomaikai o Hawaii noloko mai o keia Kanawai e hoemi ana i na ino i loaa ma ka hookamakaana. I ku'u manao, aole paha i ku like ka inoa Kanawai me ke ano maoli o ke Kanawai, a ina paha penei-a. " He Kanawai e hoomahuahua ana i na pilikia i loaa mai ma ka hookamakama ana, alaila, e aho paha ia," aka hoi, e wiki nae oe ka Nupepa Kuokoa i ka hoolaha'e i keia mea, i hooponopono koke ia mai ai kahi hemahema iki o keia Kanawai e na Lunamakaainana hanohano o keia kau. A mai kuhi mai nae oukou e na hoa he hookiekie keia, a he makemake e kalai olelo wale iho no, aole loa, aka, he ike maoli iho no i ke kohu like ole o ka inoa Kanawai me ke ano maoli o na mea a pau i hana ia ma ua Kanawai hou nei, au e Haawi i kakau inoa'i.
(Aole i pau.)
Ka malu ole o ka Ekeleta.
E na makamaka i ku i ka oiaio mai o a o : E aloha auanei oukou :— He wahi manao hoohalahala nui ko ko oukou makamaka e noho nei. Oia hoi na mea e pili pono ana i kela mea keia mea pakahi o kakou, ma ka waiwai hooili aku i na makamaka a me na mea like a pau. Ua hilinai hui ia ka maluhia o na waiwai hooili aku maloko o na Ekeleta o ke Aupuni e laweia nei ; aka, ua pee loa ka maluhia a nalowale loa. Ua manao nuiia ka maluhia iloko o ka Ekeleta, no ka mea he ki paa loa kona a he Kanawai hoi e pili ana ; aka nae, ua poloke loa ka paa o ka Ekeleta. Pela hoi ko'u manao ana, he pono he maluhia hoi na palapala i hoopiliia ka hoailona poo-leta, ua makehewa loa ; no ka mea, ua nui na palapala i hoopiliia ka hoailona poo-leta, ua wehe wale ia na waiwai o loko.
Nolaila, ke kauoha aku nei au ia oukou a pau loa, mai hooili kakou i ko kakou waiwai maloko o ka Ekeleta, no ka mea, aole malu, ua pau loa i ka aihue ia. Nolaila, ua kolohe loa na Luna Leta i ko kakou waiwai hooili aku maloko o ka Eke-palapala o ke Aupuni. Aka, e kamailio aku au no ko'u mea i ike pono ai. Ma ka pule hope o Sepakemaba aku nei, hooili aku au i Honolulu maloko o ka Ekeleta o ke Aupuni e ($2.50) ia Wini he uku no kekahi Kanikau e paiia ma " Kuokoa," aka, aole paha i loaa'ku ia Wini, no ka mea, aole puka iki ua Kanikau nei ma ka " Nupepa Kuokoa."
Eia hou no ! hooili aku o E. Bona i kona dala maloko o ka Ekeleta, aole i loaa'ku. Ua aihue hou ia no ! pela hoi ke kaikamahine a Alexanedero, hooili aku oia e ($ 5.00) maloko o ka Ekeleta, aia no, ua aihue ia no. Pela kekahi poe e ae a lehulehu loa e hoohalahala nei ma ka " Nupepa Kuokoa." Nolaila, ua malu ole ka Ekeleta, ua nui loa ka aihue ia o ko kakou wahi waiwai uuku ke hooili aku. A, mahea la ka maluhia ? Eia la hoi ihea ka poe nana e aihue nei ka waiwai i hooiliia ma ka Ekeleta?
E nana hou kakou i kahi e puka ai ua Ekeleta nei. Ina he nui wale na ki e weheia'i, alaila, ua haule io paha i kahi lehulehu o na ki e weheia'i. Aka, ina elua ki o ka eke hookahi, alaila, aia ma ka wehe ana e lilo ai paha. Pela i ka nana'ku. Oia hoi, pili no keia hihia nui maluna o ka mea nana i wehe ma Honolulu. Ina aole ia ia wai la ?
E pono no i ke Aupuni e imi hou i Luna maikai, ano kolohe ole, ano aihue ole i na waiwai hooili ma ka Ekeleta. Ma ko'u ike pono no ka'u e hai aku nei i ka lehulehu mai o a o. No ka mea, e ku ana no au ma kahi o ko makou Haleleta nei : haohao ia no ka'u mau dala iloko e ka Luna-leta, ki kela a paa ; o ka lawe no ia o ke kanaka lawe leta a hooili i ka moku pau ka ike ana'ku. Oi kali wale a anahulu, a mau malama, aole hiki mai ; aole lohe iki ia, aole loa no. Nolaila, ke komohewa nei ka kakou wahi waiwai ma ka Hasai eke puka. Pela i ka nana aku. E makaala e na hoa, mai hooili hou, o komo kewa aku auanei ma ka eke o ko Hasai lole wawae. Ua loihi paha keia manao. E hoomanao no ka pono. Aloha oukou.
C. B. HAAE.
Pololu, Kohala akau, Dec. 7, 1864.