Ka Nupepa Kuokoa, Volume VIII, Number 3, 16 January 1869 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

KE KUOKOA, HONOLULU, IANUARI 16, 1869

 

Ka Nupepa Kuokoa.

 

Keep Silence all created things.

 

1.  Hamau oukou, na mea a pau,

E kali i ke Lii;

Haalulu e ka uhane oʻu,

Ke ku e mele ae.

 

2.  Ma kou manao e kau mau ai

Ke ao me na hoku,

Ke ole me ka hanu nei

Ka make me ka po.

 

3.  He noho Moi paa mau kou,

Aole e naue ae,

Nau ponoi ke ola Ou,

Aole na hai mai.

 

4.  He buke kupanaha kau,

Malaila e paa mau

Ke ano me ka hope pu

O kanaka a pau.

 

5.  Malaila oe i kakau ai

I na manao paa ou,

Aohe hua e haule ae,

E pau no i ke ko.

 

6.  Ke homo nei i kou manao

Na hana nei a pau,

A holo e ke aupuni ou

Maanei, mao, a mau.

 

7.  Mai ake au e nana ae

Ia buke kamahao,

Na ino me na mea maikai

I kakauia noʻu.

 

8. I na ua paa ka inoa oʻu

Ma kela buke Au,

Malalo one o kuu Iesu,

E oli mau loa wau.  HAWAII

 

Kaapuni ia Hawaii ma ka Hele

MALIHINI ANA.

 

KAIPUHAA.

            Rev. S. C. Luhia ke kahu.  Ma ka la 30 Sepatemaba, halawai me kona mau ekalesia i launa mai, a pau ka halawai ana, hele pu maua me rev. S. C. Luhiau a me ka wahine ma Kawaihae e launa pu me Rev. A. Pali a hele aku ma Waioli Kauai. 

            He wahi kuanea keia, aole wahi malumalu i ka wela o ka la, no ka mea, aole kumu laau e malu ai. 

            Aka, ma o ka Haku Iesu, ka malu o kona poe kanaka ma ka uhane.

            Ua noho iho au malalo o kona malu me ka oluolu, ua ono kona hua i kuu ai ana.

            KAWAIHAE.  Ka lua keia o koʻu hiki ana ma keia kahakai, ma keia la no, i ukaliia mai e koʻu hoa lawehana Rev. S. C. Luhiau a me kona hoa kokoolua o ka wahine; ma @ awakea ka hiki ana ma kahi o ko maua makamaka ponoi ma ka Haku Rev. A. Pali. 

            La mua o Okatoba.  Ua hoopihaia ka hale o ke kahu o Kawaihae e ka waimaka luuluu o kona ekalesia a me na makamaka pili kino, no kona haalele mai ia lakou, oiai ua kani mua ke oeoe o "Kilauea," a i ka lua o ke kani ana o ko lakou hele no ia a komo i ka lua o Kilauea, alaila hoomaopopo au i kekahi olelo kahiko a kanaka Hawaii.

            Opu i ke kea ka palu ai ole,

            Ikea iho la ka mea haku ole ilaila.

            PUAKO.  Ma ke ahiahi o keia la 1 o Okatoba, hele au a moe ma keia kihapai, a ma ke kakahiaka he halawai malaila, launa mai no na hoahanau a hiki i ka manawa i pau ai ka hana a hoi kela poe keia poe.

            Eia kaʻu mea i ike malaila, ua uhiia na puka hale e ka lepo a ka wai, ekolu kapuai a eha ma kekahi wahi ka hohonu ke hele aku ka lio.

            Ua uhi pu ia no ka aina, ina e malamalama ka po, he wai wale no, alaila, pau loa kanaka i ka make.  O ka mea kupanaha, aole he ua, a hele wale no keia wai makai.

KONA AKAU.

            KAPALAOA.  Oia ke kihapai o ka hoomaka ana o Kona mai Puako mai, aole no he nui a ua hale, a pela no na kanaka, aka, ua hapai koke kekahi luna, Kealoha ka inoa, he kuli loa ka pepeiao i halawai a hana koke no ma kona hale nahaha a pau ae hele koke maua ma ke alanui o Kaniku, alaila hoi aku koʻu hoa Kauwewahine ma Puako.

KA POHAKU PELE O KANIKU.  

I kuu hele ana me kuu hoahanau ma ka uhane o ke aloha, he puaina putui kona (he pepeiao kuli kona.)  Ia maua e hele ana iloko o kea, wikiwiki e no kela mamua ma ka hele wawae a lohi aku au mahope ma ka hapauea o ka lio i ka eha o ka wawae i ka wanawana o ka pohaku pele.

            A hiki i kahi i pana ai o Kaniku, noho malie kela a hiki au kuhikuhi mai kela a lohe pono au, liki kela i na kamaa lauki ona a paa o ka holo no ia o kela mamua a lohi no au mahope.

            No koʻu malihini loa i keia mea he pohaku pele a i ka ike maka ana kahaha ka manao i ke ano e o ka hana a ke Akua ma kela wahi keia wahi o ka aina.  Pela no ka pohaku pele ma Kiholo hele a hinuhinu me he momona puaa la, a me he pilali laau la, a me he puhi paka ka panio lua o ka pohaku i kaheia e ka pele, he mania kekahi pohaku, he noi kekahi, me he pahi kaua maka oi la.

KIHOLO

            Ia maua i hiki pono ai ma Kiholo, o ke ahiahi no ia, a kani koke no ka bele halawai, akoakoa koke mai na hoahanau ma ko lakou luakini; no ke kokoke loa mai no o na hale, pela no ka uuku o na kanaka, a he uuku loa no ka Iesu i olelo ai ma ka Baibala.  O na mea elua, ekolu, e halawai pu ma koʻu inoa, owau pu no kekahi me lakou.  He iwakalua a keu ka poe launa mai, (22) he oluolu maikai a pau ka halawai.

KALAOA KEKAHA.

            Malaila ka noho o ke kahu, Rev. G. P. Kaonohimaka, maka la o 3 o Okatoba, koʻu pii ana ilaila, mai Kiholo mai, he pii maikai no me ka oluolu a hiki ma ke awakea.

            SABATI.  Ua akoakoa nui mai na hoahanau ma ka luakini i kakahiaka, la 4 o Okatoba, a piha pono no ka luakini, a ma ke ahiahi, hele maua me ke kahu ma Kaloko, he ahaaina a ka Haku malaila a pau hoi mai maua, nui no na hoahanau i launa mai ma ka ahaaina a ka Haku ma ka hale halawai.

            Ua launa mau ke kahu o Kekaha ma na hale o na hipa ma kona kihapai, owau pu kekahi i hele aku me ia ma kekahi mau la ekolu; a ma ke alanui halawai maua me na keiki kula o na aoao elua, Kala@ina a me ka Pope, o ka lakou kumu he kumu ma ka aoao Pope. 

            Eia ka mea ino a keia kumu Pope, o kona ao pu i ka pule ia Maria ma na keiki hoole Pope, oiai o ka naauao kana e ao a ike, aole o ka hoomana ia Maria, wahi a na keiki hoole Pope, ina e noho wale lakou aole e pule, e hoopaiia lakou ma ka hahau ma ka lima a me na mea ano like, nolaila, pule no lakou.

            O maua o Rev. G. P. Kaonohimaka na mea hoike pono i na keiki a me na makua, aole pono e pule aku na keiki i kela mea keia mea ma ka ano kanaka a me na kii, ua ae mai lakou, aka, o ka maikai loa i kumu hoole Pope i holo pono ka kakou mau hana.

            PAKE.  Ua halawai maua me kekahi Pake ma kona hale kuai, ua kamailio pu maua me ia ma ke ano o ke Akua a oluolu mai no me ka i aku o maua, e pule kakou i ke Akua no keia kamailio pu ana, ae mai kela, me ko maua pule a pau hoi aku.  He aina pohaku pele nui o Kekaha ma Kona Akau.

HE AHIA.

            I ke aumoe la 5 o Okatoba, a ke ahi ma ka hale o Kaonohimaka ma ka lanai kahi i a ai ke ahi, a no ka lohe ana o ke kaikamahine i ka halulu, puiwa a puka i waho aia no e a ana ke ahi.  A kahea me ka leo nui ala ae makou e a ana ke ahi a kinai ia a pio.  O ke kumu o ke ahi, he ahi kunu  mea ai, a kinai ia no a pio.  Eia ka, ua koe iki no kekahi wahi ahi, oia keia ahi e kamailio ia nei maluna ae, aka, ua pomaikai no makou no ka make koke ana o ke ahi a pakele ke ola o kanaka. 

            KALOKO.  Malaila o Mr. Aea, kekahi hoa lawehana i noho ai ma Ebona.  Ua kii mai kela iaʻu e hele a noho ma kona hale, oiai me kona ohana e noho pu ana, ka wahine a me na keiki, a me na kaikoeke.

            Ua hele no au a noho ma kona hale ma ka po hookahi, a me ke ao, a kuka maua e hele ma Kona Hema i ka halawai me na lala o ka Ahahui Euenelio ma ka la 14 o Okatoba.

KAILUA.

            Ma ka la 10 o Okatoba.  Ua bairaka ia au e ko Ebona kiai (Mr. Aea) a hiki ma Kailua, mai ka uka ko anu o Hualalai mai, o ka lua keia o ka ike ana i ke kulanakauhale kaulana o Kona, kahi a na lani mua o Hawaii nei i noho ai. 

            Ua kaulana keia wahi no ka hiki ana mai o na Misionari mua Rev. Binamu ma a hele aku kekahi holokahiki e olelo wikiwiki mawaho o kahua hale o Keopuolani, i mai la, "He kapu kahi o ka alii?"  Hoole aku na kanaka, "aole" kuhikuhi aku ua holokahiki nei i ke ano o na kumu.  "He p@ kahuna keia no ke Akua kiekie loa, i holo mai e hai ia kakou i ka inoa o ka mea nana i hana ka lani a me ka honua."  No keia olelo a ua holokahiki nei i hai aku ai imua o na alii a me na kanaka, ua kapaia kona inoa o Maoi.

            Eia kekahi olelo a ua Maoi nei.  "A mahope aku alaila e hiki mai ka la nui."  Manao iho la na alii a me na kanaka, e nui paha auanei ka la, o ka la maoli ka lakou i manao e nui.

                        E ke kiai, heaha ka po?

                        E ke kiai, heaha ka po?

            Hai mai ke kiai.  Hiki mai ke kakahiaka a me ka po kekahi.

            O NA HALE O REV. KAKINA.

            Malaila maua e ku ana na hale, ua ano inoino, no ka mea ole nana e hana, a he kia hoomanao keia mau hale, no ko Rev. Mr. Kakina kukulu ana i ka hana a ke Akua ma ke aupuni Hawaii.

            Ua hele a ula i ka lepo na hale, i ke ku no i kahi lepo ula o Kona, e like me Kona i Waimea i Kauai, he ula wale o kula kahi o Rev. S. Wini.

HALE PULE O KAILUA.

            O Mokuaikaua ka inoa o ka hale, he hale maikai keia, ma ka hooponopono hou ana a Rev. G. W. Pilipo.  Ua hana hou ia o loko me ka papa hele a me na kia hou, pela no ka awai a me ka hale bele, mahalo no koʻu naau no keia luakini, no ka mea, oia no ka makamua o kahi i hiki ai ka olelo a ke Akua ma Hawaii nei, a malaila no hoi ka noho o kekahi Kumu makua, a hiki mai kona wa palupalu hoi ma Honolulu a make.

            Ma ke awakea o keia la, hiki loa maua ma Hoiualoa, malaila ka noho o Rev. G. W. Pilipo ke kahu, a hookipa mai ia maua o H. Aea, me ka oluolu.

            Ua hoihoiia mai ke kupapau o ka lua kaikamahine mai Honolulu mai, a he mea e ka nui o ke kaumaha o na makamaka a me na makua ponoi o ke kaikamahine.

            Aka, ua hoolanaia ko ua makua manao, no ka paulele o ke keiki i kona makua nui ma ka lani Iesu Kristo.  E kuu mai oukou i na kamalii, me ka papa ole ia lakou i ka hele mai ioʻu nei, no ka mea, no ka poe e like me lakou nei ke aupuni.

NO HOLUALOA

            Ma ke kakahiaka Sabati, la 11 Okatoba, ma Holualoa ka pule, a nui no ka poe i hele mai ma ke kakahiaka, piha pono no ka hale, oluolu no ke anaina a hiki i ka pau ana.  No ka pau ole o Mokuaikaua luakini ma Kailua ponoi i ka hana ia, nolaila, hui mai ko laila poe a pau ma Holualoa.

NO HELANI

            I ke ahiahi Sabati.  Hele maua me Rev. G. W. Pilipo ma Helani.  Aole kahu oia kihapai, ma ka malama pono o na ekalesia i na hana a ke Akua, ua piha pono ka luakini, malu pono no na hana a pau me ka haka pono mai o na maka.

            I ka pau ana o ka halawai, lohe koke no au e noho ana o Rev. Kupahu i kahu no lakou, oiai malaila no oia ia manawa, pono no ke noho malaila, no ka mea, no ka mole mai no ia o Niihau, a e noho no ia i ka Hema o Kona Akau, i pau pono ai na mokupuni o Hawaii.  Oia kekahi mea e akaka ai he Hawaii imi loa.

KEAUHOU.

            Ua hookipa mai o J. G. Hoapili Esy.  Lanakanawai apena o Kona Hema ma kona hale.  He kanaka hou, he oluolu maikai na olelo i koʻu mau la ekolu ma kona hale.  He kanaka haipule e mikimiki ana ma ka baibala ma na pule ohana, pela no kana wahine e like no me ke ano o kana kane.

            Ua pili pono no na pono kino ia ia.  elua hale laau maikai ma kona pa hale.  I ka pake kekahi hale, he hale kuai, a no kona kino iho kekahi.  He nui no ka poe hoahanau ekalesia ma kea wahi, a he poe maikai no ka nui o lakou, aka, hookahi no huina ma ke kihapai o Helani.

            He wahi awa ko lakou e kupono ana i ka Hikina Hema, malaila e holo aku ai na waa me ha upena opelu, makena ua opelu a me na ia e ae.

PAPAOPIIA.

            He luakini ia ma Kona Hema, rev. Parisa ke Kahu. Okatoba 14, weheia ka Ahahui Euenelio ma ia kihapai o ke Akua ma ka haiolelo a ka Luna Hoomalu o mua Rev. G. P. Kaonohimaka ka holo kahiti i hele wale a ike i na kai ino o Lae Hao.  Eia ka! loaa koke no kona moku a ke kihapai o Kekaha ma Kona Akau, ke hookele nei no ia ma ka olelo a ke Akua.

NO LUNA O KEIA LA NO KA AHA.

            Rev. G. W. Pilipo, ka Luna Hoomalu,

            Rev. S. Papaula ke Kakauolelo.

            Ua akoakoa pono mai na Kahu ekalesia a me na lala o na kihapai no Kona Akau mai, no Kau mai, a he mau hoa lala hoi kekahi, a no na mokupuni o Oahu a me Maui kekahi, a no na aina pegana hoi kekahi.

            Pau pono na hana a na Komite imi hana i ka hanaia, nana iho, lealea na pepeiao i na manao o na kanaka o ke Akua, e kiekie ana iluna, e haule haahaa ana ilalo me ke akahai.

NO KAINALIU.

            Ma ka la 15 o Okatoba.  Hele makou ma kahi o Kaona, o H. Aea, Poheepali, a me Heulu Wailuku Maui, a me aʻu, me ka lana o ko makou manao e ike maka ia Kaona.

            O ka hale mua a makou i hiki ai no Lumeawe, he kiai mua keia, nana no e hoihoi kela mea keia mea aole e hele io ko lakou kaula Kaona, ua paa ia makou aole e hele, no ka mea, he kapu loa o Kaona wahi a ua kiai nei.

            No ka nui o ko makou makemake e hele, hoopaa no makou me ka ninau aku.  Heaha ka hewa ke hele e ike pono ia Kaona?  I mai Lumeawe, he kapu, o hoolaha wale oukou i ka inoa o Kaona ma ka nupepa me ka hewa ole?  e like me Z. Poli i hoolaha ai me ka ike maka ole ia makou, nolaila, ua kapu ka hele ana malaila.

            I aku makou e hele oe e olelo, he mau malihini kela no na aina e mai, no Fatuiva o Kaiwi, a no Maikonisia mai o H. Aea, a no Wailuku o Heulu, no Kekaha o Poheepali, hoole loa ka luna, aka, hele no makou a ka lua o na hale kiai.

            Ia makou i hiki ai ma ia hale, he kokoke no koe a hiki i o Kaona, hele ua luna nei a hoi mai, e hoole mai ana aole e ae mai ka ohana, no ka mea, wahi a lakou, he kapu. 

            Ilaila ku poai mai na koa haumana a pau e hoopuni ana me na leo Halelu, a e hoihoi ana kekahi poe ia makou ma ka leo huhu, e ueue ana o lalo o na wahine nui, e ulaula ana na maka o na kane, e hookamani ana ko lakou waha i ka olelo a ke Akua, e huna ana i ka noa a lakou, e kolekoie ana ma kehaki aoao (he manu ke akua kii) ou a poe nei.  "Pehea la e nalo ai kou akua i ka Mea mana o ka lani." Ua hoi no makou me ka ike ole i ka mea i hele aku ai.

MAKAI NUI O KONA.

            Okatoba 16.  Hele o Nevela ka Makai nui me kona mau hope ma kahi o Kaona, e hoihoi ana i na kanaka o kela wahi keia wahi ma ko lakou wahi ponoi, aole i olelo pono, kipaku no lakou i ka makai nui, a hoi nele mai no lakou, me he kanaka mea haku ole.

HOIKE KULA SABATI.

            I ka la 17 o Okatoba.  He Poaono hoike na Kula Sabati o Kona Hema, mai Kuapehu mai ka hele ana o ka huakai a hiki ma Papaopiiia ka luakini, mamuli o ka hooponopono ana o D. H. Nahinu me na hae a me na pahu e kani ana mamua, o kekahi mea hookani pahu he wahine, eia ka ua ike no ka wahine Hawaii i ka hookani pahu.  E moe imua e Hawaii!

            Ma ka hale pule, he mau himeni ma kela papa keia papa e kani ana, a mahalo no me ka olioli o ka naau.  He mau manao paipai i na keiki, no na kumu makua a pau ae huli hou ka huakai e hele pololei ana a hiki i Kuapehu ma ka hale o Rev. Parisa i kukulu ia ai e Kapiolani.  Aia no malaila na mea ai, ka mea ono liilii, ai na keiki a hoi aku.  Ua lohe ia mai ka leo o ka makani nui e hele na kanaka a pau e hopu ia Kaena ma.

NAPOOPOO

I ka la 18 o Okatoba.  Hele au ma Napoopoo i ka pule Sabati, maikai ka hale, piha pono na noho i na kanaka, Rev. Parisa ke kahu, ua noho no ia, ma Papaopiia ka lakou pule.

            Ua kaulana o Napoopoo he aina alii, oiai malailla ka ka noho ana o na alii i ka wa kahiko, a make ka o Kaleiopua, kakau ka lae o na@ i hoailona no ka Moi i make.

KAAWALOA.

            Aia ma Kona Akau mai Napoopoo aku, a he kai mawaena o laua, oia ke awa o Kaawaloa, a ma kekahi olelo o ke awa o Kealakekua kahi a na alii e hana ai i na akua makahiki e heʻe ai a puni ka aina.  Ua ike ia kahi o na iwi kupapau o ua alii la e waiho ai.  aia ma ka pali o Kaawaloa, o ka lua o Keoua o Lelemoopulani.  Kaulana maoli no kahi o na alii i waiho ai na iwi.

                                                                                                                                                            (Aole i pau.)

Naue ana e ike i ka Mokupuni o Kaululaau.

[Koena mai keia pale @]

            Hala i hope ia wahi ia makou, hiki ana i Kahue, Lae o Wahie a me Kahua, ke pili pu la no keia mau aina; holo aku no a hiki ana i Hokunui.  Ka mea i kapaia ai ka inoa o keia wahi o Hokunui, mamuli o ka haule ana o kekahi hoku nui i ka wa kahiko.  pela ka olelo mai a kamaaina.  Aka, aole nae makou i ike i na hiohiona o ka hoku, he lua nui nae ke "hamama ana ka waha o Kaena i ka makani," a he wahi maikai no hoi keia.

            Aole nae he nui o kauhale a me na kanaka malaila, aka, he mau wahi pupupu hale no e ku ana me na wahi ohua no nana e hoopumehana; o ka mau no hoi o ke kuehu a ka Mana mahope, holo aku no a hala ana o Maunalei-kai ia makou, ku ana iluna o Lae o Kahoomano.  Kualana hoi ia wahi no ka hoopunipuni ana o Kaululaau i ka ohana akua a pau i ka make  iaia; aole i emo kamumu ana makou iluna o na keiki a Naiwi.  Kaulana keia wahi no ka uwe haaloulou ana o na keiki a Naiwi i ka make a ka ono i ka wai, no ka mea, ua puehu ka wai o ka huewai, i miki aku hoi ka hia i ka punawai o ia ana no, "Ua hala ka Puulena aia i Waikiki i kahi nui o ke ahuawa."

            Mai laila makou i holo aku ai a hiki ana i Moanauli a me Kaa, e pili pu ana keia mau aina; i laila i ike iho ai makou i ka mahuahua loa o na kanaka o Lanai nei e kuku ana ma kahaone, mai ka haumakaiole a i ka bebe a hiiia ana.  Eia ka he mau wahi kauna iliulaula no koe o keia wahi mokupuni uuku.  O ka lawe wahi nupepa ole e ike ia ai ka lehulehu o na kanaka.  A he mahuahua no hoi na hale, me he mau halekua la kekahi i ka makou ike aku, me na pani puka maikai, a i hoonaniia hoi o waho me na pili opala wiliia e ka puahiohio, no ka mea, iluna no lakou nei o na lio, ke kokoke aku la ka la e huna i kona malamalama olinolino, a nolaila, haawi aku la no na malihini i ko lakou aloha i na kamaaina oia wahi e okuu ana.

            O ka mukiki iho la no ia i na wahi lio, aohe koekoe-e a koe aku ma ka poinanalu; ke hihio nei ka Land Breeze ma na papalina akau, he keu aku ka huihui e hukiki ai; e loa hoi Waimea aina mauna lua ua apuupuu-e.  Me ia makani oluolu no a kakahele ana i Kahea poeleele loa iho la.  He heiau ia e like me Puukohola i Kawaihae, Hawaii.  Ilaila i hinalipi aku ai ka la a paku ae la i kona mau kukuna malamalama.  O ka pa ikaika loa ana iho hoi a ka land breeze poholua aku la na pea hekeluna, he kauli wale no ka lakou nei hana a hiki i Kahalapalaoa hora 71/2 paha ia.  Ko pono aku la hoi o Mr. Robeta ia makou a ma ko Mrs. Paahana home ponoi.

            Ia makou i hiki ai ma kona home, ua hala kana wahi alii kane i Lahaina, a i puoho ae hoi ko makou hia i ke kakahiaka nui, ua hiki mai kona koolua o na po kehau anu, a he mea ole wale mai la no ia ia Mrs. Paahana.  A ua hookipa pono ae kela ia makou eono iluna o kahi moe koki hikiee Hawaii.  W. H. Robeta, S. E. Naihehau, P. Kauhi, J. M. Naeole, S. H. Paliopio, Mr. Makulu, a hookahi mea o makou i malele aku o Mr. Punika.  A hoomakaukau lakou nei e moe, he mau wahi leo mele ka lakou nei i ulele iho i olu mai kamaaina, a he mea hou no hoi wahi a lakou ka himeni.

            Me ka hoomaikai mua nae i ka Haku mamua o ka moe ana.  Kakahiaka Sabati la 15 o Novemaba ae hele i ka pule, aka nae, lohiapa wale iho no makou a hiki e ae ana o Rev. N. Pali i ka luahiki, hiki ae kona hana aole wahi mea a kanaka iki o loko, oia mena wale iho la no.  He luakini maikai keia a keia poe o Lanai i hooikaika iho nei iloko o kekahi makahiki i hala iho nei.

            A iloko o keia mau la e naue nei, ke ai nei lakou i ka hua o ko lakou luhi ana i ke anu, ka wela o ka la a me na pilikia ili mai maluna o lakou, aka, ua kaa ae ia luhi mea mahope, a ke noho nei lakou iloko e hoomana ai i ka Haku Iehova Sabaota.

            E like me ka mea i hoikeia mai ma ka Baibala, Me ka hou o kou lae e ai ai oe i ka ai, a hoi hou aku oe i ka lepo.  Pela no hoi lakou, me ka luhi lakou i hooikaika ai e kukulu i hale no ke Akua, ano i keia wa me ka oluolu e hoomana ai.  Ekolu puka komo, eono puke makani, aole i paa i ka papahele, he noho iho no iluna o ka opala, halii hoi ka-moena o kahi poe.  Hiki pono ae la paha i ka hora 11 hoomaka ke Kula Sabati.

            Hookipa loa ia ae la hoi lakou nei iluna o kahi amokemoke noho, pau pono nui no nae iluna.  Ke noho mumule nei makou, eia ka anei he Kula Sabati keia e hauwalaau nei.  Puuluulu ae no na wahi elemakule, pela no hoi na luahine, a o ka okua mai no hoi ka na ui.  A mea nui ia mai ana e hookapeke iho i mau wahi himeni no ke Kula Sabati he mea oluolu loa iho la ia ia makou malihini i ko makou hoohanohano ia i ka himeni.

            Pau ia, kono ia mai ana na malihini e kamaaina e hai aku i ko lakou manao, no na hana e pili ana i ke Kula Sabati ma ia kakahiaka.  Hai mai o Mr. Naeole.  Mr. Naihehau. Mr. Pali-opio.  aole i maopopo ia makou na hana i hana ia iho nei, nolaila, aole makou i mahalo.

            Aole no hoi i holo pono na hana oia Kula Sabati, no ke kahu paha ka holo ole, no ke kahu Kula Sabata paha, a i ole no na kumu papa paha?  Aka, ua mahalo no na malihini i ka ikaika o ke kahu nana e alakai ana ia poe hipa uhane, no ka mea, he makua elemakule oia.  A ua hoolohe ole na hipa i kona leo wahi ana.

            Pau na plue elua, paina iho.  Ua hoomakaukau mua na kamaaina o Kahalapalaoa i ai i ia me na wahi hunalimu.  O keia mau mea ai ua hoomakaukau ia no na hoahanau o uka o Kihamanienie a me kela aoao mai.  I ole lakou e "houpolewalewa wahi a ka olelo kahiko," no ka mea he "au-we loa.

            E kuhi ana hoi makou akahi no a hoomaka ia keia hana lokomaikai, eia ka he mea mau, me hoi kau la i ka ike iho he uuku kahi ai, oiai, aia wale no i Lahaina kahi ola oia poe a aua iho, haawi no, ko ke Akua poe kanaka iho la no ia.

            Ina hoi pela ko Lahaina poe a me ko na wahi e ae ke hele mai ko Olowalu a me Kaanapali; pau ae hoi ka pule e ku ana na kio-poi, kamakamau iho la hoi ma kahi akimona, e aho no la hoi paha ia, aole hoi e nahonaho na maka ke hoi aku i ka loa, "heuku maoli hoi ha ia he ia no Kahoolawe."

            Ma ia auina la no, haalele makou ia Kahalapalaoa a me ka malu hale o ka mea i mahaloia e na malihini Mrs. Paahana a me ia ohana holookoa; a ke haawi aku nei na malihini i ko lakou aloha.  Lulu-lima pu iho la me ka makua Rev. N. Pali a me kona ohana pu, kau iluna o na lio a holo aku ma ke ala e hiki ai i ka home o W. H. Robeta.

            Ke hele aku la ka la i lalo, ke holo la makou me na kamaaina o kahi a makou e holo aku neu.  Kulu pakakahi iho la ka mea paka-ua, "pukukui i ke anu e, me na kihei Sekotia," hiki ana i ke awa ekule, hookipa ia iho la makou, aole nae i loaa i na malihini ka inoa o na kamaaina oia wahi, aka, ke haawi aku nei na malihini i ko lakou aloha no na hookipa oluolu aia poe, kau iluna o na lio a holo aku.

            Ia makou e holo haanepa la ia kula maikai, ke olelo ae la ke kauwahi kanaka, Kokoke pau e ka nani, A ka lio e holo ai, Kapekepeke ka piina."

            Hiki ana i Mano, hookipa no hoi ka laila poe ia makou, aka, waiho aku na malihini i ka ai, no ka mea, ua piha mai la no hoi ka lua inaina o ko makou mau wahi palapaa.  He thank you ka makou i haawi aku ia lakou.  Holo aku no a hiki i Kapoho, he awa ia, pii i ka pali.

Ke pii la makou, aole hikiwawe aku, no ka mea, he pali me ka haoaoa o  ke aa, he nani wale no ia la i kamaaina e holo nui ai me ka lio, he keu ke aloha ole i ka holoholona, naue malie iho la makou e manao ana i ke ola o ka holoholona.  Hiki mai la i Hakelokelo, he kahawai nanao ia; e loa hoi "Hilo paele ku."  Ke pii la no me ke kupakupaoi o na lio i ka ka mea o ka pii ku o ke alanui, a hiki pono aku la iluna o Pohakulalani he oioina ia, ku iki no a pii aku, e anoai ai ka lio a luhi ae la ke kino i ka mea o ke kuhi kee o ke alanui, he loihi loa no ia piina aku a hiki iluna o Kuia he oioina no hoi ia e hoomaha ai; lele i lalo hooluolu i na lio.

            Hana pau ke ino holo wale aku ia kula maikai a palahalaha hoi.  Ke olelo ae la ke kauwahi keiki,

                        "Ia nei pau ka lohe i ka leo,

                          I ka nehe o ka leo o ke kai,

                          I ka haki owa mai i na pali,

                          Hookahi mea nana o na hoku."

            Kau ae no iluna o na lio holo aku a ku ana i Keaohia, he ihona olu aku ia o Kamao, Palawai, Pawili.  O Pawili ka home ponoi o Capt. W. H. Robeta, i laila hoi i noho ai na malihini iloko a na la eha me ka hapa.  Me ka pailani ia eia ohana, me he la he keiki punahele no ka makua, "e like me Iokoba ia Iosepa kona pokii muli loa."

            O keia Pawili, he ahupuaa nui ia e kahelahela la me ka uliuli i na launahele o kela a me keia ano mauu e ulu ana.  O Palawai ma o aku e pili pu ana laua, aia  i laila elua mau haole, na keiki a Kipikona (Giposn,) he kumu Moremona ia, ka mea hoi nana i olelo i na makahiki a me na pauku manawa i hala ae i auwale ka la, "E pau ana na mokupuni a pau o ka Pae Moku o Hawaii nei i ke poholo i lalo, a koe o Lanai wale no."  He keu aku na mea o ka hoopunipuni o na kaula i palamimo aku la i Amerika.  Ke ku la ka hale i kapaia o "Ziona," he ekalesia i manaoia e na kaula kukahekahe a Poiheke la, aka, aohe wahi mea a molemona i koe, he hale moe i keia wa e ku la.

            He 3 mau pake o Kina a me na Iapana elua e noho la; moe iho ia po a ao ae Poakahi la 15, iho i kai o

KAUNOLU.

            He ahupuaa no keia o Kaunolu, hookahi kanaka i halawai pu me makou i laila o Mr. Makaena, he kamaaina ia oia wahi, nana i kuhikuhi pololei mai i na mea kaulana oia awa.  Nana no hoi e malama ana i na mea kanu a ko kakou Haku Lani Kamehameha V., a wahi hoi ana, e hoi ae ana ua Imi Haku la i laila e lawaia ai, ke hiki ae iloko o Maraki, Aperila na malama kaili aku.  Na mea kanu e ulu ana, ipu-haole, ipu-ala, kulina, uala, a pela aku.  A e kukulu ia ana ka i hale no ua Imi Haku la.

            NA AKUA LAWAIA.

            Kunihi, Hilinai, penei kona wahi moolelo.  Ina he lawaia nui au, he lawaia kamaaina nae,  a he lawaia malihini kekahi, a hoi mua mai ka lawaia, alaila oiala i ka la, ha@ ko@ kua me kaʻu kaohi iloko ke alo i waho ke k@; a o ka lawaia malihini me kana @ i waho ke alo e hilinai like ai, a oia no kona mea i kapaia ai o Hilinai.

            O Lahe ke kolu o na akua.  @ @ @ i kaʻu wahine a ukiuki au, alaila, noho iho la au a hoi mai oe mai ka lawaia mai, alaila, pee ae la au me ke hiki o ka heiau me ko ike ole mai iaʻu.  Aia iloko o laila o kanemakua ka 4 o na akua.  A nanea mai la kela i ka hele, he peku iki wale aku no kaʻu a pa iki ia Lahe, oia hele no o ka lohe a na pepeiao o ka ia, o ka pau aku la no ia i ka holo, alaila, aole e loaa hou kana ia ke holo hou, a hana hou ia e ke kahuna.

            O Namakaokaia ka 5 o na akua.  Ia akua e mohai mua ai ke kahuna, i mea e oluolu mai ai ua mau aumakua la, alaila, loaa ka ia a Kalani keʻLii.  A lele wale ka pule ana a ke kahuna me ka n@kaka ole o ka puaa, alaila ua maikai, holo ke@ i ka hiaku, wili aku la hoi ke kahuna i ke kapa eleuli, a lohe ua kahuna la e awa mai ana na kanaka a penei: "A mau ke aku a Kalani e! alaila, ho-a iki ae ke kahuna, a ma@ hou ke aku a Kalani e," puoho loa kela, pau ka pilikia, aka hoi, ina aole e loaa ke aku a keʻlii, alaila, make ke kahuna, a i ole hoo@ ia ae la ka waha o kekahi kanaka i ka makau a kau i ka lele i panihakahaka no ke kahuna."

            Pau kana hai ana mai i ka moolelo, @ ae la makou ma ia pali a loea ae la iluna o Kaihalulu,, he heiau ia oia kahi e kaa ia ai kanaka i ka lele me he ahai maia la, alaila, alakai loa aku kela ia makou makai aku a hiki i ke kahuahale kula o Nahienena, o Kolokolo ka pali kahakai, ke kawa a Kahekili i hoiamo ai keʻlii o Mano, me he la he 80 kapuai ke kiekie mai ka @kai a luna.  Hai maoli no ka a-i ke nana ae malalo.

            Kuhikihi mai la kela i kahi e pu ai iluna o Kaneapua, ke ono ia o na akua lawaia, ke ku la ka makou ahu nui maluna iho o kona akua.  He puni o lalo i ke kai i ka wa hohonu.  Aole hiki o kamaaina ke pu, no ka mea, ua hanee ke alanui; i keia mau kupueu onioni wale ia ae no.  Hoi mai auau kai a hoi mai e hoopau i ka hea-kai o ka ili.

            O Paao ka inoa oia luawai kakahe mai la o Mr. Pali mamua, a iho iho i lalo o ka luawai; e kahea mai ana na wahi kamaaina ia me ka leo puiwa penei: "E! mai iho oe i lalo me kou kai."  Eia ka he punawai eepa keia.  Na @ o Mr. Makaena i hoauau mua ia Pali-opio, a na Pali-opio hoi i hoauau mai ia makou.  Ina no na maloo ka mea kai o ka ili, a iho ae i lalo e @ ai, he awaawa loa ka wai e like me ke kai maoli.  Aia ka huihui a hana hou ia e ka poe akamai e kalokalo aku ai i na aumakua, alaila ono ke inu ae.

            Pau ae la, kau iluna o na lio a hoi mai; ke haawi aku nei no na malihini i ke aloha nona, no kona kuhikuhi pololei i na mea hou o laila.  Hiki mai la makou i ke kula, i laila o Makauwahine ka hiku o na akua, ke kaikuahine o Kaneapua, mai Kauai mai kona hele ana e ike i ke kaikunane; loaa a i ka mai wahine, ku ka hale pe-a i laila, pa-u mai la no i ka puakala.  A oia ka mea i ooi ole ai ka puakala oia wahi ke lei ae i a-i.  I ka ike kamaka maoli ana aku nei, he like me ka pohaku a kakou e ike mau nei, pela no ke anoo kela poe pohaku, hookahi no mea nui o Kaneapua, aole no hoi ano nui, eia ka hoi he akua iho la ia.  He keu no hoi ka hana naaupo o ka wa kahiko, ka hoomana i na mea a na lima o ke Akua Mana Loa Hookahi i hana ai; a ke kamau mai nei no ia hana naaupo a na kupuna o kakou i hala aku la i kekahi o na hanauna opio o kaua e noho mai nei.  Aole i pau loa ia anoano ino o ke kuhihewa.  (Aole i pau.)

NA BUKE

I HOOLAHAIA E KA PAPA HAWAII.

Baibala Hemolele Nui ili gula nani me

            na kuhikuhi ma na aoao,         .           .           $12 00

            "           "           Nui ili elele kaekae wai gula,     7 00

            "           "           uuku iki iho "    "    "      "            8 00

            "           "           Pananaiki iho ili eleele "  "           5 00

            "           "           "           "           "           "  "           2 00

Kauoha Hou ili gula nani me na kuhikuhi,                       3 00

    "    "     "    eleele kaekae wau gula,    "                          1 50

    "    "     "     " . .           .           .           .           .    1 00

Kauoha Hou Hapa Haole,       .           .           .           .       75

Baibala Ohana nui me na kii moohana,

    "   "   ili eleele, M. H. 1843         .           .           .           .    5 00

    "   "   ili kao M. H. 1843 .           .           .           .    2 50

Lira Hawaii 1818, ma ke hanawai,     .           .           .       25

    "   "     "     1855,         .           .           .           .           .       25

Kumu Leo Mele ili manoanoa me ke kanawai,          .       25

    "   "    "    "    "     "   lahilahi, .        .           .           .       12@

Moolelo Ekalesia, .      .           .           .           .           .       50

Haiao, .            .           .           .           .           .           .       25

Hele Malihini ana,      .           .           .           .           .       25

No ko ke Akua ana,    .           .           .           .           .       25

Lira Kamalii,   .           .           .           .           .           .       25

Hoike Palapala hemolele,       .           .           .           .       25

Moolelo o Heneri Opukahaia, .           .           .           .       25

Hoike Akua,   .           .           .           .           .           .       25

Wehewehehala,          .           .           .           .           .       25

Ninau Hoike ili manoanoa,     .           .           .           .       25

    "     "     "     "   lahilahi,        .           .           .           .       12@

Ui Kamalii Kula Sabati,         .           .           .           .       12@

Kumumua Kula Sabati,           .           .           .           .       12@

Haawina Kamalii Buke 2,      .           .           .           .       12@

Buke Lawe Lima,       .           .           .           .           .       12@

 

Eia na buke haawi wale.

Ui.

No ka Aoao Pope.

Hoike Pope.

Ka Ekalesia Oiaio.

Palapala Liilii -

            Helu 4 - Makemake anei oe i ke ola?

            Helu 6 - E hele i o Kristo la.

            Helu 7 - Ka hoi ana mai e ke Keiki Uhauha.

            Helu 11 - No ka hoohiki wahahee i ke Akua.

            Helu 16 - Ka @hia ana o ka Ahaaina a ka Haku a me ka Pepekiko ana.

            Helu 17 - Mai hana ino i na Holoholona.

            Helu 18 - No ka mahi ana, kuai ana @ ka inu ana i ka Awa.

Ka Davida Malo Kumumanao.

Ka Moolelo a Batimea Puaaiki.

                                                            L. H. Kulika

Kakauolelo o ka Papa Hooko o ka Ahahui Kuanelio o ko Hawaii Pae Aina.