Ka Nupepa Kuokoa, Volume VIII, Number 16, 17 April 1869 — Make i Aloha nui ia. [ARTICLE]

Make i Aloha nui ia.

Make o Maloeloe ma Kamalo i Molokai, i ka la 4 o Feb., makahiki 1869, hora 9 o ke kakahiaka nui ; i ke kanaha a oi ae o kona makahiki o ke ola ana ma keia ao : a ua hoi aku la ia i ka aoao mau o ka honua. I kahi hooilina paa o na kanaka, a he haipule io hoi oia mamua o kona make ana, aole oia i hooki i ka pule ana i ke Akua Mana Loa, a hiki wale i ka haalele ana mai o ka uhane i ka hale kino lepo. He wahine maikai oia he hookipa, he oluolu, he aloha ohana, aloha kane, a he makuahine aloha keiki, a he hoa aloha oiaio iloko o ka Haku. A nolaila, ua koe iho makou na ohana me na heleuma hao kaumaha a ke aloha nona ; a no ia hoi, ke haku nei makou i Kanikau nona malalo iho. He kanikau aloha keia no Maloeloe, Kuu kaikuahine mai ka hale kaikuahine nui, Mai ka malu o ka hale o Wehekealoha, Wehe mai nei oe i ka pili aloha ua hala, Hala aku la oe i ke ala maawe ula a Kane, Noho iho nei makou me ka-u, minamina ia oe, Kuu kaikuahine mai ka lai a ka manu, Manuwa wale mai ana no ia'u ko aloha, Aloha wale ke alakahi o Molokai, Oia wahi a kaua e haele ai, Aloha wale ka Ia ka wawae o Hilia, Oia wahi a kaua e pili ai, Auwe! kuu mea aloha he kaikuahine-e. Kuu kaikuahine mai ke kaha pili a Kaiakea, Akea ka manao haiki mai loko, O ka loko mea nui ia e hana nei o ke aloha, Aloha o Kukalia me Kaana, Aloha o Kaiolohia me Niniwai. O ka waiwai nui no ia o ka waimaka o ke Aloha, Aloha wale ia la hoi o Kaunuohua he puu ia, He hoa hoi keia mai kahi haiki-e ; E paa la hoi ia oe ka puka, Aohe ia makou e hoea i ke ao malama, E malama ae ana i ko aloha aohe e pau, Auwe ! kuu mea aloha he kaikuahine-e, Kuu kaikuahine mai ke one hanau la e Molokai, Mai ka piha kanaka la o Pupukanioe, Aloha ia wahi a kaua e noho ai, Kuu kaikuahine mai ka hale piha ina pokii ame na keiki, Kuu hoa nana o na hono o na moku, Ke hoonana nei au i kou aloha aole e pau, Ke loku nei no iloko o'u me he pololi ai la, Aloha oe aloha makou na pokii aloha ke kane ka hoa pili o ke kino, Auwe ! kuu mea aloha he kaikuahine-e, Kuu kaikuahine mai ke kula welawela o Kaakeke, Mai ka piha kanaka la o Kaluaaha, Oia wahi a kaua e haele ai i ka pono o ke Akua, Kuu kaikuahine mai na ale hulilua ia e Pailolo, Mai ka makani anu ia he Hoolua, Na ia makani kaua e lawe aku, A komo i ka lai o Lele, Lele ka manao hoonui i ke aloha, Aloha ia wahi a kaua e noho ai me na pokii, Elua kaua e alo ai iwaena o lakou, Auwe ! kuu mea aloha he kaikuahine-e, D. KANOHO. He kanikau aloha keia no Maloeloe, Kuu kaikuaana mai ka aina malihini, Mai ka hale makamaka ole a kakou e noho ai, Hookahi hoi makamaka la o ke kane, Kuu kaikuaana rnai ke ala lewa i ke kai, Na ka ihu o ka boki kaua e lawe aku, I ike aku hoi ina ale kuehu o ka moana, Ua ana au luuluu i ko aloha ia e kuu haku, He hana mao ole ia na ka manao i ka po a me ke ao, Kuu kaikuaana mai ka makani Kilioopu o Waihee, Mai ka piha kanaka la o Halehaaheo, I Aloha ia wahi a kakou e noho ai, Mai ka papa hulihuli la e ka ua-po, He apo pili paa ia o ke aloha i ke kino, [ike, E au wale ae ana i kahi o ka ike aole nae e Kuu kaikuaana mai ka la wela o Pahaalele, Haalele mai ana ka oe ia makou na lehulehu, Ke kane hoi, me na keiki ka luhi o kakou, Kuu kaikuaana mai ka ua hoeha ili o WaiMai ka piina ikiiki la o Poliala. [ehu. - Aloha ia wahi a kaua e hoomaha ai, He puu-oioina la na ke aloha e-u nei, E hana wale ana no ia i kuu manawa aole e pau, Auwe! kuu meaaloha he kaikuaana-e, Kuu kaikuaana mai ka Hekuawa o Wailuku, Oia aina kuahiwilua a ke anu i noho ai, A kaua e hoholo ai i uka i kai, Kuu kaikuaana mai ka ia kolo o Kahului, Mai ke kai hawanawana la e Kaihuwaa, Aloha ia wahi a kakou e hele malihini ai, Hookahi hoi kamaaina la o na lima, Hele no oe ko makou makua hooponopono, Ka ukali o makou o na pokii o oe, Ka mea haule ole ia oe ina kau a kau, A kahi ka kau e haule ai ua hele oe, Kuu kaikuaana mai ka nalu pehi kino o Makawela, [hele-a, He welawela ka manao ia oe i ka ike ole a Hele i ka hale koolua ole la e kuu mua, Noho makou me ka luuluu kaumaha ia oe, Auwe! kuu mea aloha he kaikuaana-e. MRS HOOIPO. Wailuku. Maui. Aperila 6, 1869.