Ka Nupepa Kuokoa, Volume XIII, Number 24, 13 June 1874 — Page 4

Ka Nupepa Kuokoa

KE KILOHANA POOKELA NO KA LAHUI HAWAII.

 

KA NUPEPA KUOKOA. ME KE AU OKOA I HUIIA.

 

Ka Nupepa Kuokoa

 

The Golden Shephard.

Golden Chain. p. 79.

 

1.

Girls.-E hui me ke Kahu,

Ke Kahu maikai e,

A nana e hoomalu,

A kiai pono mai.

Boys-Ua lawa kona aloha,

Ka mea e paa ai,

A nana e kokua,

A nana e alakai.

 

Cho. E ku, e ku, e ku, ku, ku,

A hui mai

Na kamalii,

E hui ma ka pa maikai,

Maikai, maikai, me Iesu e maha'i.

2.

Girls.-E pau no na auwana,

E ku a hoi mai;

Maloko no he lama,

Mawaho, pouli e.

Boys-He ino no ke ala,

He ala malu nae;

Na Iesu no e pale

Na ino a hee ae.

Cho. E ku, e ku, e ku, ku, ku, &c.

3.

Girls-Paapu na mea onou la,

Me na kaumaha pu;

Pomaikai nae oukou la

Ke hui me Iesu.

Boys-Auhee na mea okou la,

Me na waimaka pu;

A poha mai na oli

Ke hui me Iesu.

Cho. E ku, e ku, e ku, ku, ku, &c.

HAWAII.

 

HAAWINA KULA SABATI.

 

No ka Sabati hope o Iune, Helu 26.

 

KA HOIKE HAPAHA ELUA O 1874.

 

KUMUHANA-Ka hui hope ana.

PAUKU BAIBALA. Mai kinohi a Kanawailua.

PULE hoomaikai no ka loaa ana o na Kula Sabati a pau iloko o keia hapaha me keia hapalua o ka makahiki.

MELE. Him 3, (6-8)Leo-

1

E ku a hoomaikai

1 ke Akua mau,

E ku a hoomaikai pu ae

Na leo, na na au.

4.

Ke Akua no ke koe,

Ke ola o kakou,

E hoolaha'e mai o a o

I kona aloha mau.

 

KA NINAU A KE KAHU.

            Na MAKUA. Ua hiki i ke kula hope ma ka Penetetuke, oia hoi na buke elima a Mose i kakau ai; owai na inoa o ia mau buke? Nohea hoi na inoa? Pehea ka loihi o ke kula ana ma keia mau buke elima? Elua hapalua o na makahiki elua, 1873-1874. E haalele ana kakou i ka Penetetuka i keia la; ina e hoomania ke kula ana ma na Haawina Hui Lahui, ehia makahiki e bala ana a hiki hou kakou i ka Penetetuke? Elima paha. Make e paha kekahi poe. He lima e paha nana e kakau na Haawina hou. Ua pau ke kula ana ma kea Penetuke,a  hiki ilaila, aka, mai haalele i ka heluhelu ana ma ka ohana, a ma kahi mehameha.

            NA KEIKIKANE. Oukou ka poe mea i ka hoopaanaau, hai i na mea nui iloko o Kinohi. 1 Ka ke Akua hana ana i na mea a pau iloko o na la eono. 2. Ka mala o Edena. 3. Ka haule ana o Adamu me Eva i ka hoowalewaleia e Satana me ka hope. 4. Ke ano maikai o Abela, ke ano hewa o Kaina me ka hope. 5 Noa me ke kaiakahinalii, ka halelana. 6 Babela, ka hookahuliia ana o ka olelo, me ka hope. 7 Ka moolelo o Aberahama, o Leta, o Isaako, o Iakoba, o Isemaela, o Esau, o Iosepa. 8 Ka pau ana o Sodoma ma i ke ahi. 9 Ka wi nui ma Aigupita, a ma Kanaana. 10. Na moeuhane o Parao. 11 Ka hele ana o Iakoba ma i Aigupita. 12 Ka make ana o Iakoba laua me Iosepa. E ka mea ike, hai mai i na kanawai me na wanana no Iesu ma Kinohi; Laaukapu, Kanawai mare, Hookahe koko, &c.

            NA KAIKAMAHINE. Hai mai i na mea nui iloko o Pukaana. 1 Ka mahuahua ana o ka poe Iseraela. 2 Na hana hooluhi, a pepehi i na keikikane i mea e emi ai lakou, aole nae i emi, mahuahua loa no. 3 Ka hanau ana o Mose, kona hanaiia ana, kona haalele ana ia Parao, a holo i Midiana, a lilo i kahu holoholona, Kona kahea ia e ke Akua e lilo i mea hookuu i ka poe Iseraela mai ka lima hooluhi o Parao, a alakai aku, mai Aigupita a Kanaana. 4 Na hoopai he 10 i mea e ae ai o Parao e hookou ia lakou. 5 Ko Parao hookuu ana me ka ikaika, a mahope kii aku e hoihoi hou mai. 6 Ka make ana o na hiapo o ka Aigupita ma ke aumoe. Pakela na? na hiapo, a ka poe Iseraela no ke koko o na keikihipa i hamoia ma na puku hale.7 Ke kukulu ana o ka ahaaina berena hu ole. 8 Ka mahele ana o ke Kai Ula, a pau ko Aigupita poe i ka make iloko i ka hoi hou ana mai o na wai. 9 Ka puka lanakila ana o ka poe Iseraela ma kela aoao o ke Kaiula. 10 Ka ohumu ana o ka poe Iseraela no ka wai awaawa o Mara, a hoomanaloia ka wai.

            NA POKII. Hai mai oukou i kekahi mau mea no ke ai lani, a me ka wai lani. Ohumu ka poe Iseraela no ka ai ole, ka wai ole. A haawi mai ke Akua i ka ai mailuna mai, oia ka mane. A haawi mai oia i ka wai noloko mai o ka pohaku. He mau hoailonaia no ke aha? Ina he pauku paanau no ia, e hai mai. Ua lohe oukou he kaua ma Repedima, hai mai i na aoao elua 1 Na Amaleka ka aoao kue mai. 2. Ka poe Iseraela ka aoao pale aku. Owai ka luna kaua o ka poe Iseraela? IosuaKa aoao hea ka i lanakila? Ma ke aha ka lanakila ana? Na Ameleka, ka poe Iseraela, na ka ohana nui hookahi lakou, na Isaaka, a na na keiki elua, na Esau ke kaikuaana, na Iakoba ke kaikaina. Pela anei i keia wa, mokuahana na ohana, a kue mai kekahi hapa i kekahi hapa? No ke aha? Heaha ka mea e pau ai a e kuikahi ai? Ke Aloha.

            MELE. Hae Hoonani, p 21. Kai a Naue

            1 Kai a nauwe i ka nani, (pa3)

            Nauwe me ka hae aulii

            Nauwe me ka mililani, (pa 3)

            Ia Iesu ka Alakai.

            Nana kakou e kai ae

            I ua puka o ke ao maikai.

            Cho. Mele ae, mele ae

            No ka lanakila nani e.

            2 Aia onou mai na ine, (pa 3)

            Ko ke ao me ko ka po,

            Ke ka uhane, ko ke kino, (pa 3)

            Lanakila ia Iesu.

            Hapai nui i ke Alii

            No ka lanaila nani e.

 

Cho. Mele ae, mele ae, & c.

NA MAKUA. Hai i na mea kupanaha e pili ana i ko ke Akua haawi ana mai i na Kanawai. Mauna Sinai, owai ka i iho ilaila? Pehea ka mauna? Owai ka i heaia e pii ilaila? Ehia la o ko Mose noho ana ma ka mauna? Owai pu me Mese? Mahea ka poe Iseraela? Nawai lakou i malama, ia Mese ma ka mauna? Ua malama pono anei Aarona ia lakou? Ua noi lakou ia Asrona e hana i aha no lakou? Heaha ka Aarona i hana ai i akua no lakou? I ka wa e ahaaina lealea a hula ana lakou, owai ka i hoea mai? Ua loaa e anei na kanawai ia Mose/ Ehia papa pohaku? Ua aha Mose i na papa kanawai? Ua aha hoi oia i ke keiki bipi gula? Ua huhu anei ke Akua i keia kipi ana o ka poe Iseraela? heaha kona manao mua? Nawai i uwao no lakou? Ua mihi koke anei lakou? Me ke aha i  mihi ai a kalaia'i lakou? I ko Mose kahea ana, owai ma ko Iehova aoao, owai ka i hele mai? Kenaia ka ohana a Levi e aha? Enia ka poe i make?Oia anei ke kumu e ka mihi, ka makau i ka pepehiia? Ua kalaia anei ka poe i kipi no keia mihi/ He mihi oiaio anei/ Pehea ka mihi o na kanaka i keia wa? He mihi oiaio ole paha ko ka nui, mihi no, hoi hou nae i ka hewa.

            NA KEIKIKANE. Hai mai i na mea i haawiia mai ia Mose ma Sinai? 1 Na Kanawai he 10. 2 Na Kauawai no na hewa, no na mea he nui wale, kanawai karaima, kanawai kivila. 5 Ke kuhikuhi no ka halelewa, pahu kapu, na keena , ua uhi, na hana ka poe kamana, ua kokua, ua makana e paa ai, na nahu o na kahuna. Ehia la i noho ai ma Sinai a iho mai ilalo? Heaha kaua ai no ia mau la?

NA KAIKAMAHINE. Ka haawina hope ma Pukaana, heaha? Ke kukulu ana i ka halelewa. Hai mai i na hana. 1 Ke kukulu ana i ke keena kapu mamua; he mau papa laau kona mau paia,a me na kala me na pale lole hoi. He halelewa mawaho, he mau uhi lole, uhi ili kao, uhi ili hipa kane, uhi ili tehasa. 2 Ka hookomo ana  i ka pahu berita iloko o ke keena hoano loa. Heaha maloko e ka pahu berita? Heaha maluna ae? Heaha ma na welau elua? Heaha mawaena o na kerubima elua? He hoailona ia nowai? Elua mahele o ke keena kapu. 1 Kahi hoano loa. 2 Kahi hoano. Heaha mawaena? Ua akaka ka mea iloko o kahi hoano loa, heaha na mea ekolu iloko o kahi hoano? Loaa keia ninau ia wai?

            NA POKII. Ehia kanawai? Ua paa naau anei? Hai mai i na kanawai i paa, ke kanawai eha me ka lima, na kanawai nui elua. Mahea i haawiia mai ai na kanawai? Ua haawiia mai ia wai? Ehia papa? Mahea i waihoia ai mahope? Heaha ko oukou pahu berita/ Halawai pu Iehova me Mose mahea? Mahea oia i halawai pu ai me ka poe Iseraela mahope? Ma ka halelewa. Mahea kona halawai pu me kakou i keia wa? Mahea kona wahi hoano loa? Hiki anei ia kakou ke komo iloko o ka lani? Ma ke aha? Ma o wai la? Ka ipukukui, ka papa berena, ke kuahu no ka mea ala, mahea i waihoia ai? Ma kahi hoano, o ke keena kapu. Owai ko oukou kukui nui, a me ka berena e ola ai? Iesu. heaha ka lama o ka poe Iseraela? Kia ae, kia ahi.

            MELE. HIM 137. Leo-Rock of ages.

1 Hoku loa ano e,

Lilelile a maikai,

Kau iluna ma ke ao,

Lama no na aina a pau;

Hoku loa, Hoku mau,

E kokua ia makou.

3 Emi i ka nani ou

Na hoku mai o a o;

Pio e na lama a pau,

Ke hoea mai Iesu.

Hoku loa, nani mau,

E manao mai ia makou.

            NA MAKUA. Ma ka Haawina ehia na mohai elima? Ma ka buke hea? Nohea kona inoa? Hai mai i na mohai nui elima? Ma na mohai aha i hookahe oleia'i ke koko? He mau mohai aha ia? Owai na mohai koko? Owai na mea i pepehiia? He hoailona nowai? Pehea ka hewa ke hookahe oleia ke koko? Kalaia anei ka hewa o ka naau ma ke koko o na holoholona? ma ke koko owai? nawai i mohai i na mohai holoholuna, &c? Maemae loa anei ia mau kahuna? Mohai anei lakou no lakou iho? Mohai pinepine anei? Ehia mohai maka la hookahi? He la mohai kalahala nui kekahi, hai mai ia la, ka malama, ka la, ka hana, ke kahuna, &c. Ku a hai mai ka mea i ike. Make pinepine anei na kahuna kahiko? Owai ko lakou kahuna nui? me ka mohai nui hoi? Ehia ona make ana? Nona iho anei kekahi hookalahala ana? Owai na kahuna me na mohai malalo ae o Iesu?

            NA KEIKIKANE. Na ahaaina makahiki nui ekolu, hai mai. Mahea i kakauia'i? ke ano, ka manawa, ka loihi, na hana, na mohai. Hiki ole ka; owai ka i hiki ke hai mai? Loaa ole ka, huli hou ma ka hale.

            I KA Ahaaina berena hu ole; nohea ka inoa? no ke aha hoi? He hoailona nowai? A no ka ahaaina hea/ Ehia inoa? A owai hoi? 2 Ka ahaaina hebedoma hai mai, nohea ka inoa? Owai kekahi mau inoa? Penetetoka, heaha ia? Mai hea ka helu ana i na la 50? Heaha ke kaulana no kekahi la Penetetoka ma Oihana mok 2? Na manawa aha ka i kapaia he Penetetoka i keia wa? 3 Ahaaina kauhalelewa, hai mai, ke ano, ka manawa, he hoailona no ke aha? Mahea kahi paa a kuonoono loa o ka poe pono? E loaa anei ia oukou?

            NA KAIKAMAHINE. Na Kauwa a Iehova. Ka Haawina ehia keia? ma ka buke hea? Nohea ka inoa? Ehia heluna? Ehia makahiki mawaena? Ka ohana aha ka i helu oleia e like me na ohana e oe? Owai ka i heluia o ia ohana? Na keikikane maluna ae o ka malama hookahi. Ehia lakou? He poe pani nowai? Ehia makahiapo kane o na ohana e ae, mailuna'e o ka malama hookahi? Ehia ka oi? Heaha ke pani no na oi? Hai mai i ke ano, o ke kumu o ka lawe ana i na keikikane a pau a Levi i pani no na hiapo keikikane a pau o na ohana e ae? Owai ke poo o ka oihana Kahuna? Owai ke kahuna nui? Owai na kahuna malalo iho? Owai na kauwa, na kokua ae na kahuna? Ehia mahele ana o na Levi? Ekolu, e like me ka nui o na keiki a Levi? Ekolu, e like me ka nui o na keiki a Levi. 1 Ka Geresona 2 Ka Kahasa. 3 Ka Merari. hai mai i na hana a kela a keia mahele. Ma ka makahiki ehia e hoomaka ai? Ma ka makahiki ehia e pau ai ka na Levi oihana? Owai ko kakou kahuna nui? Owai na kahuna malalo iho? Owai na pani no na Levi? Pau ka oihana a Levi ia wai?

            NA POKII. Owai ko oukou kahuna nui? Owai ko oukou kahunapule, a kahu ekalesia? Hiki anei ia oukou ke lilo i mau kauwa, i mau kokua nona? Ma ke aha?

            MELE. "Mai paupau aho oe." Hae Hoonani, p2

            KE KULA A PAU. Hai mai i ka kipi nui o ka poe Iseraela, i kapaia "Ka hoomaloka" ke kumum ka hana, ka hope. Ehia makahiki i hoauwanaia'i lakou ma ka waonahele no ke kipi ana? A pau ka poe hea i ka make? A koe ka poe hea i ae ia e komo iloko o Kanaana? He mea aha ia ia kakou? Hai mai i ke ano nui o ka Haawina no ka pohaku i hahauia? Ka loaa ana o ka wai, ka hewa o Mose, ka pili ana ia kakou.

            Ka Nahesa Keleawe. Ka Haawina ehia ia? Ke ano, ke kumu, ka hope, ka pili ana ia kakou ma o Iesu la hai mai.

            Ke kaula oiaio. Ma ka buke hea ia? Nohea ia inoa? Owai ia Kaula? Ua hiki mai anei? Pehea hoi ke malama oleia? Ka make ana o Mose, ke kanuia ana, &c., hai mai. Make i ke aha? Nawai i kanu? mahea? Owai na hoopaapaa no kona kino? Mahea Mose i keia wa? Na mea pili ia kakou.

            MELE 369. Leo-Pisgala Mountain.

            PULE i ae ia e komo iloko o ka hapaha ekolu me ona mau kula Sabati a pau-a hookuu aku.

            Haawina Kula Sabati no Iulai 5; Mareko 1:1-11                                HAWAII.

 

No Maikonisia.

 

HOKU AO, Nov.7,1873.

 

I KUU MAKUA HANAI UHANE A KUMU

HOI, REV. J.D PARISA.

            Aloha oe!-Me ka malu mai ke Akua mai. Eia ka moku i keia hora a'u e kakau aku nei ia oe, mawaena o Namarika a me Jeruiki, no ke alanui e hoihoi ana ia makou e noho ma kahi a ko makou misiona i hoonoho ai. I keia la a'u e kakau nei ia oe, he 152 na la o makou, mai ko makou e haalele ana aku ia oukou, a hiki i keia la. Nani ka lokomaikai o ke Akua ia makou ka poe ma ka moku, a me ka moku pu no hoi.

            I ke kakahiaka o ka la 28 o Iune, kaulo iho la makou ma ke alo o Arorae, kekahi mokupuni o ka Pae Aina o Kilibati ma ka hema loa; kahi hoi  a na kumu Samoa e ao nei. he wi ma ka aina o Arorae i kela wa a makou i ku aku ai, no ka ua ole; maloo ka niu a me ka hala, a nui no ka poe i make; a o kekahi poe holo ma na moku, i pakele ko lakou ola. Hoomanawanui no nae na kumu Samoa i keia wi o ka aina. he mau wahi pauna berena wale no 7 o lakou i kela wa a makou i hiki aku ai; a he loihi nae ka manawa a ku hou mai ko lakou moku; aole e lawa kela ola no lakou. E ku hou mai ana ko lakou moku i ka malama o Sep. ai ole, ia Oct.

            Hai mai laua, "Ina he oihana e ka laua, ina ua haalele kahiko laua; aka, o ka oihana a ke Akua, aole i haalele, hoomanawanui no: aole makemake e hoi i ka aina." Ma keia aina au i ike ai i ke ano o ka aina na kanaka, a pela aku. He haahaa ka aina, e moe lakee ololi ana, mai ka Akau a ka Hema. O ka niu a me ka hala na laau o keia pae aina, a lakee ai ka ai ke nana ae, aole hoi ua laau o ka aina-hanau e hui ai ka ai.

            Ma keia aina no hoi i hoohalawai mua ia ai ka maka me na kino olohelohe o na kanaka, a me na hua ino o ka pouli. Makemake nui iho la keia poe i ka paka, he hapa ka makemake i na meae ae. Nani no hoi ka hoohaumia ana o ka hewa me ka pouli! Ma ke ahiahi oia holo aku makou no Nutunau, a ku ma ka la 29 ae, halawai hou mai la makou me na kamaaina o ka aina; aole wi ma keia aina; momona a nunui na kino o na kanaka. Oia mau no nae ka noho pouli ana. He ekolu kumu Samoa maanei e ao ana. Mamua o ko makou hiki ana aku, ua makaukau e lakou la no ke kau mai maluna o ka moku a holo pu me makou, no ka manao na ka poe Hawaii e malama ia mau aina. I ka halawai ana me Bingham, ua pau ia kuhihewa o lakou.

            Ma ka la 30 ae i Peru makou, a lele aku la i uka, he aina niu keia a lehulehu no hoi na kumu e noho nei ma keia aina; Ke nee mau aku nei no na hana a ka Haku. Aole makou i holo aku i Onoloa a Tamana kekahi mau mokupuni a na kumu Samoa e ao nei. O keia iho la ka pau o na aina a na kumu Samoa e ao nei; na aina hoi i manaoia na kakou o Hawaii e pani, a hoopiha i keia mau kihapai. ma ka la 1, o Iulai i Tapiteuea makou; o keia aina kahi a ko Hawaii e ao nui. Aia maanei o Rev. W.B Kapu a me H B Nahinu; he nawaliwali o Nahinu i keia wa a makou i ku aku ai; oia wale no ka mea pilikia oia mau ohana. Ua lele makou i uka a nana i ka hoike, ua makaukau no na haumana ma na mea i ao ia ia lakou. Ma ka la 3 ae ua kukulu ia ka ahaaina a ka Haku, a hookomo ia kekahi poe i ka ekalesia, he elima o lakou. Ma ka la 4 i Nonouli ka moku a kau mai o Rev. G Leleo, me T Kaehuaea, me na ohana o laua, a holo aku ka moku no Apemama, kekahi aina aole i noho kekahi kumu e ao i ka olelo a ke Akua ia lakou, Ma ka  7 ae, holo aku o Bingham a launa me ke alii o ka aina. Ma ke kamailio ana, ua ae mai ke alii, e noho kekahi kumu me lakou, e ao ai i ka olelo a ke Akua. Ma ka la 10 holo aku la makou no Maiana, a ku aku la malaila i ka la 11; ma ka la 12 halawai me Lono ma. He oluolu no laua. Me ka laua mau keiki. Ua holo ke aokula maanei, a ua mare ia kekahi poe. Ma ka la 15 holo aku makou no Marakei, kahi a D Kanoho e noho nei; ma ka la 17, kalewa ka moku, a lele aku makou iuka. He wahi aina uuku keia a oluolu no hoi, a he maikai no ke ao kula maanei. ma ka la 17 ku aku la makou i Apaiana. he kaua ko Apaiana me Tarawa poe i keia wa. E hoomoana ana lakou ma APaiana. He mau la ke ku ana o ka moku, a hoolei ia aku la ka ukana o ka moku mauka, a holo aku la ka moku. Halawai iho la ko lakou aha hookahi pule, a hoihoi aku la ka moku i na kumu. Iloko o ko lakou halawai. Eia na mea i hooholo ia.

            1. E hoihoi aku ia T. Kaehuaea, no kona oki ana i kekahi pegana o ka aina me kana pahi loihi, a pakele mai make loa ke kanaka; Ka hana ku ole i ke kauwa a ke Akua e hana ia mea.

            2. E hoopau i ko Rev. J D Ahia lawelawe ana i ka hana a ka Haku i ko na aina e nei.

            3 E hoonoho aku ia Kanoaro i Apemama e malama ia kihapai.

            Oia na mea nui a'u i lawe mai a hai aku ia oe e ka makua, me ka eha nae o ka naau i ka lohe ana i ka moolelo o keia mea pono ole i hala ia i ko na aina e nei.

            I kekahi la kaua o ko Tarawa me ko Apaiana nei, ua make kekahi kanaka, o Tarawa. Manaonao ke ike aku i na kulu koko e kahe mai ana. he nui ke kaua ana o ka malamalama me ka pouli, ahea la e auhea ka pouli a lanakila ka malamalama? Ma ka la 18 o Aug. hoihoi aku la ka moku i na kumu e hoonoho ma ko lakou mau kihapai. Ma ka la 2 o Oct. ku mai la ka moku, me ke ola mahunehune. I ka haalele ana ia Butaritari, hai ka laau ihu; i ka hookomo ana mai i Apaiana nei, ili iho la oia ma ke komo ana mai; ma ka ikaika o na luina i ka huki, ua hemo ka moku, ua manuheu iki no nae. Ma ka la 3 ae, kau aku makou a holo aku no Tarawa, e hoihoio ana ia G. Haina, a holo loa mai i ka pae aina o Makala nei. I ka hiki ana i Tarawa, ua loaa kekahi haole luu i na mea o ke kai, a ua luu oia e hana i kahi i poino o ka mo ku, a paa iho la. Ma ka la 8 haalele aku la makou ia Tarawa, a holo mai no ka pae aina o Marshall nei. ma ka la 11 ike aku la makou io Mile, a no ke ino o ka makani aole i komo iloko. Ma ka la 11 ike aku la makou io Mile, a no ke ino o ka makani aole i komo iloko . Ma ka la 12 ae ku ma kekahi hapa o ka aina, kokoke i kahi i ili ai mamua, no na mile he 20 mai ko Kahelemauna wahi mai. Ma keia wahi nae o Kahelemauna i loaa ai ia makou, oiai ua haalele oia ia Mile me kona ohana pu, a hele mai ma keia mau aina no ke ao kula. he mau pule oia malaila a hiki aku ana makou. Ma ka la 13 ae, holo makou i Mile. Oluolu maikai keia, aina nui ka ua, a me na mea ulu e kupu mai ana.

            Ua lana ka manao i ka ike ana i na kanaka, keiki he poe oluolu, noho malie, aole pipili mai; aole aihue, maluhia loa. Me he mea la he hoike ana ia ua kukulu paa ia ke aupuni o Kristo iloko o ko lakou mau naau. Aole pela o Kilibati a'u ike ai, he aihue ke waiho wale ia kekahi mau mea, a pipili mau mai na kanaka. Aole pela ma Mile, Ebono, Namorika. Ma kekahi mau halawai ma Mile, ia'u kekahi olelo paipai ia lakou. He aloha ke Akua. Hauoli ko'u manao no ka ike ana aku i na kanaka, hoihoi lakou ma ka hoolohe ana i ka olelo, a maluhia no hoi ke anaina hoomana; aole walaau na kanaka, aole hawanawana, e like me a'u i ike ai ma Hawaii. He mau haneri o lakou, aole lohe ia kekahi mau leo hamumu. Ma ka la 16 ae, holo aku la makou no Ebona, a kau pu aku o Kahelemauna ma me makou no ka halawai ma Ebona, Ma ka la 19 ku aku la makou i Ebona, a hui pu me Mr G B Snow & Mr. I F Whitney ka oluolu. Aole i kii aku ka moku ia Kaaia ma namoriko. Ua halawai no ka aha, a eia na mea i hooholo ia.

            1. E noho o Rev. D. Kapali i Jeruiki; S.P Kaaia i Arano; a o maua i Mejiro. 

            2. E hele pu kekahi mau kamaaina o ka aina me makou, a no Namorika, Malaio i Namorika, Ieremia, me maua; Anaru me Kaaia.

            3. E noi aku i paahana hou no Hawaii nei e holo mai i keia makahiki ae.

            A hookuuia ka halawai a halawai hou ma Namorika. Ma ka la 31 o Oct. hole aku la ka moku no Namorika kalewa ma ka la 2, la 5 lele aku la makou a launa me Kaaia ma. Hauoli ka manao i ka ike ana i na kanaka o ka aina, he poe paa i ka lole, a makemake i ke ao i ka palapala.

            Ma ke ahiahi o keia la, holo aku makou i Jeruiji, e hoihoi ana ia Kapali ma. Ma ka la 8 ae, hiki aku la makou i Jerujii, a lele aku o Kapali ma. Nui ka makemake o na kanaka i ke kuai buke, a me ke ao kula. Makemake nui lakou e kuai mai i ka lakou mau mea kuai i ke dala, aole i na mea e ae. O ke kuu no ka makemake e loa ka buke. Oia ke oki o na mea a'u i ike ai ma keia hele ana. A ke ninau ae nei au, Owai la o kuu mau hoa e ukali mai ana mahope o makou? Ke mau nei anei ka manao paa o kekahi poe no ka oihana, a ka Haku i ko ua aina e nei?

            He mea e ko'u hauoli ke halawai au me kekahi o kuu mau hoa, i keia makahiki ae. Aole nae o ko'u makemake, ke hooko ia Aole no hoi ia kakou ka ike i ua kau a me na wa. "Aole e hiki ia oukou ke hana i kekahi mea ke ole wau," wahi a ka haku. Nolaila e noi aku kakou i ka haku nona ke kihapai, e hoopiha i keia mau kihapai i uhi paapu ia e na nahelehele ino o ka pouli.

            A eia hoi, e noi nui aku oe i ka Haku no kau keiki ke noho iwaena o na aina pegana nei. Ia'u i hiki ai ma Mile, a ma Ebona, a me Jeruiki, lohe mau au he kaua ko Mejero i keia mau la; aole nae ou hopohopo, ka hele nei no e noho malaila.

            He oiaio he oihana pilikia keia.O Paulo ko kakou kaikuaana nana i wehe mua i keia pomiakai i kona aina e ; aole oia i lanakila mai na pilikia ae; komo mua oia i na pilikia; paio oia me na enemi, i ka po a me ke ao, ma ka manao , ma ka hana ana, a ma ka olelo no hoi, pela no a hiki i keia wa, a mau aku, e halawai ana no me na enemi o ka po. Nolaila, aohe ia he mea e kanalua ai. Oia ke oki, o kuu makua. Ma ke aloha o ke Akua e kiai a malama ia kakou a pau i keia ola ana. Aloha oe:-

S W KEKUEWA.

 

Haiolelo a W.P Ragsdale, Imua o ka hoike kula Sabati, ma Siloama, Kalawao Molokai.

 

E O'U MAU MAKAMAKA:=Ma ka la i nehinei, ua kohoia owau kekahi Komite no keia hoike kula Sabati, a ina ua maikai na mea i hanaia, e hoopuka i ka mahalo, a ina hoi e maikai ole, e hoike aku no au i ko'u mahalo ole.

            Me ka hauoli nui, ke hoike e aku nei au i ko'u mahalo piha, no ka maikai o na mea a pau a oukou i hoike mai nei. Lealea na himeni, maikai na haiolelo, a ua pololei no hoi na haina pauku panaau o ka Baibala, a pela no hoi na mea hoonanea, ano nui loa a oukou i hana mai nei, oia hoi, o Ewa a me Adamu, o Davida me Golia; Ka moe a Nehukanega; Ka hanau ana o Kristo, a pela aku. Me he mea'la e kau-o aku ana ka oukou mau hana ia'u.

            O na mea a pau a oukou e hoike mai, na hoikeike mai ia i na helehelena o na mea i hanaia mai ka makua mua mai o ke kanaka a hiki i ka hanau ana o ka Hoola Hiwahiwa o ke Ao nei. he mau kaona pakahi ko ia mau mea a pau. A ina kakou e lawe mai a hoomaopopo, mea e ko kakou homaikai.

            No ka mea, ua hoike mai nei oukou ma na mea e pili ana ia Ewa a me Adamu, i ka makamua o ko ke kanaka haulihia ana i ka hewa mamuli o ka maalea o ka nahesa. A pela hoi ka Lanakila ana o Davida uuku o ke kino (me ka hilinai i ke Akua) maluna o Golia ke kanaka kino nui, a ke Akua i noho pu ole ai. Pela pu no hoi o Nebukaneza, ke alii hanohano kiekie loa-lako i na mea a pau e oluolu ai keia ola ana ilihune nae i ka manao ana i ke Akua. Nolaila, eia ka mea pono ia kakou e hana aku ai, mai puni iki kakou i ka naheka, (oia no ka hewa) e like me Ewa- E ikaika kakou ma ka hana ana i na mea a ke Akua i kauoha mai ai ia kakou e hana, a e lanakila auanei kakou maluna o na  tausani Golia. Ua hiolo ka nani o ko Nebukaneza hanohano nui no kona haalele ana i ke Akua. E hoike mai ana no ia mea ia kakou, he mea ole ka hanohano, ina aole ke Akua pu me ia hanohano. A ma kakou e hoao e hana i ko ke Akua makemake, a one kulanalana a kikiwi paha io ia nei, alaila e hopu wikiwiki ae ia Iesu Kristo, a nana no e auamo aku ia kakou a hiki i ke ola mau loa.

            Eia ka olelo hoolana ia oukou e na Kumukula Sabati, e akamai oukou i ke ao ana i na haumana a oukou, ma na mea o ka pono. E hoike mai oukou ma ka oukou hana i kela la, keia la, i ko oukou manaoio, a me ko oukou hooko i ka hana ana i na mea a oukou hooko i ka hana ana i na mea a oukou e ao aku nei i na haumana. A pela no hoi oukou e na haumana, e hoike mai oukou ma ka oukou hana i kela la keia la i ko oukou no ka pono. I hoike mai ai ka hua o ka oukou hana, i ko oukou ano.

            Ke kapa mau mai nei oukou ia'u he "makua" no oukou, no ka mea, owau ko oukou Luna; ina pela io ka oukou e manao nei no'u, alaila, eia ke noi a me ka olelo ao a ka makua ia oukou e na keiki: E hana mai ole oukou ma ka imi ana i ka pono, e hooipo mau ma ka Baibala, a e hilinai aku ia Iesu Kristo, ka mea i noho mau ia e ka i ini aloha no ka poe a pau i luuluu a kaumaha, a i makemake hoi e hooili aku maluna Ona i ko lakou kaumaha a pau.

            Ma keia Panalaau Lepera, kakou ka poe i hookaawale ia mai, i pakele ai ko kakou lahui, mai ka holokikiki ana i ka nalowale; Ke i aku nei au, aohe manaolana no ke ola o nei mai he lepera; ua huli ka poe noiau o ke ao holookoa, a aole loaa ka laau i hiki e hoola. Nolaila, e huli kakou a pau e hana i na mea a pau a ke Akua i kauoha mai ai, i mea e loaa ai ia kakou ke ola mau ma kela ao. Ina kakou e huli na a loaa o Kristo, paa no a paa, aole e hookuu iaia, alaila, e lilo no keia loohia ana o kakou i ka mai lepera, i mea e pomaikai loa'i no kakou a pau. A e lilo ka inea a me ka ehaeha i loaa ia kkaou ma keia wahi, i kapaia he luakupapau, i mea e loaa'i ia kakou ke ola pio ole, a ole, eha ole, waimaka ole, ma ka poli o ka Makua Mana mau; he huli kakou me ko kakou ikaika a me ko kakou mau puuwai a pau me ka manaoio ia Iesu Kristo, a hopu hoi iaia a paa, a paa loa no. Aloha oukou.

 

NA BUKE

I HOOLAHAIA E KA PAPA HAWAII

ME KE

KUMUKUAI O KELA ME KEIA.

 

BAIBALA HEMOLELE NUI ILI GULA NANI

me na kuhikuhi ma na aoao     $12 00

Baibala Hemolele Nui ili eleele kaekae wai gula        $5 00

Baibala Hemolele uuku iki iho kae wai gula   8 00

Baibala Hemolele pananaiki iho ili eleele        4 00

Baibala Hemolele ili eleele      2 00

Kauoha Hou ili gula nani me na kuhikuhi       3 00

Kauoha Hou ili eleele kaekae wai gula           1 00

Kauoha Hou ili eleele  75

Kauoha Hou Hapa Haole        75

Lira Hawaii 1848 me ke kanawai       25

Lira Hawaii 1855        25

Moolele Ekalesia         50

Haiao ili lahilahi          10

Hele Malihini ana        25

No ko ke Akua ano     25

Lira Kamalii    25

Hoike Palapala Hemolele        20

Moolelo o Heneri Opukahaia  25

Hoike Akua     15

Wehewehehala            10

Ninau Hoike ili manoano        20

Ninau Hoike ili lahilahi           03

Kumumua Kula Sabati            20

Buke Lawe Lima        25

He Buke no ka Pope   15

Ui Kula Sabati Helu 3 25

Ui Kula Sabati Helu 4 14

Ui Kula Sabati Helu 5 20

Buke Euanelio a Ioane            15

Himeni Hawaii            1 00

Himeni Hawaii ili nani            1 70

Kumu Leo Mele          15

Kumu Leo Mele ili nani          50

 

NA KAUOHA HOU PAKEKE.

Ili gula nani     1 50

Ili eleele kaekae nani   50

Ili eleele           35

KAUOHA HOU PAKEKE ME NA HALELU

Ili gula nani     1 75

Ili eleele kaekae wai gula        50

Ili eleele           50

Buke Wehewehe Huaolelo baibala, elua ano

Buke Wehewehe Ano Mataio

 

NA HALELU PAKEKE

Ili Gula nani    50

Ili eleele kaekae wai gula        30

Ili eleele           20

Ka Hae Hoonani (Buke Mele)            25

 

EIA NA BUKE HAAWI WALE

PALAPALA LIILII-

            Helu 4-Makemake anei oe i ke ola?

            Helu 5-E hele i o Kristo la.

            Helu 7-Ka hoi ana mai o ke Keiki Uhauha.

            Helu 11-No ka hoohiki wahahee i ke Akua.

            Helu 15-Ka Eehia ana o ka Ahaaina a ka Haku a me ka Bapetizo ana.

            Helu 17-Mai hana ino i na holoholona.

            Helu 18-No ka mahi ana, kuai ana a me ka inu ana i ka Awa.

Ka Davida Malo Kumumanao.

Ka Moolelo o Batimea Puaaiki.

            Aia ke keena kuai buke o ka Papa Hawaii me ka huina o Alanui Berela ma ALanui Kalepa, e kokoke ana i ka Hale Leta.

J.F POKUE.

            Kakauleta o ka Papa Hooko o ka Ahahui Euanelio o ko Hawaii Pae Aina.

[END]