Ka Nupepa Kuokoa, Volume XIV, Number 5, 30 January 1875 — Page 1

Ka Nupepa Kuokoa

KE KILOHANA POOKELA NO KA LAHUI HAWAII.

 

BUKE XIV.   HELU5.          HONOLULU, POAONO, IANUARI 30, 1875          NA HELU A PAU 687.

 

E Pau na Pupupu Kahiko!

 

E pani me na Hale Laau!

 

PAPA, PAPA, PAPA

O KELA ME KEIA ANO,

A ME

NA LAKO KUKULU HALE

O KELA ME KELA ANO, MA KA

PA-PAPAO S. G. WAILA MA!

KIHI O

ALANUI PAPA me ALANUI MOIWA

HINE, uo ke Kumakuai HAAHAA

LOA ! ae like ka nui me

ka makemake

 

LAAU NOUAIKI!

NA LAAU KAOLA,

            NA PAPA MANOANOA,

                        NA PAPA HELE,

                                    NA KUA,

                                                AAHO,

                                                            AAHO LIILII, &C

LAAU ULAULA!

NA LAAU KAOLA

            NA PAPA MONAONOA,

                        NA PAPA HELE,

                                    NA KUA,

                                                AAHO, POU,

                                                            AAHO LIILII

                                                                        MOLINA, &C

            Pili Cida keokeo, Pili Laau ulaula,

            Na Puka Hale, o na ano a pau,

            Na puka Aniani, o na ano a pua,

            No Olepelepe Paka, o na ano a pau.

 

Papa Hale me na Lihilihi.

 

            NA LAKA PUKA

NA AMI-PUKA,

            NA AMI-PUKA LIILII,

                        NA KUI NAO

 

PENA, AILA-PENA, VANIKI,

WAI HOOMALOO.

 

PAAKAI Helu 1,

O PUULOA

 

            E lawe wale ia no na mea i kua; ma ai kela Pa Papa aku a i kahi o ka mea, kuai mai, ina ma ke kaona nei, a me na Awa o kela Paeaina a like me ka aelike.

 

Aia maanei ke Keena o ka

            MOKUMAHU "KILAUEA,"

                        L. MARCHANT, Kapena.

                                   

                                    S.G. WAILA MA.

                                             670 3M

 

HE MOOLELO KAAO

NO RAIANAHU.

KA

HUHUI HOKU NANI O PEKINA!

 

Unuhiia no ke "Kuokoa" mai ka Olelo

Pake a i ka Olelo Hawaii.

HELU 6.

 

            AKA, kakali nae oia o ka lohe pono ia mai, a i ole o ka hiki hou mai la hoi o Vaifu, oiai he manao loa oia e ninau aku, i hoopau kokeia'i kona kuhihewa, mamuli o kana mea i noonoo e ai, mahope iho o ko Vaifu hoi ana aku, aole nae o Vaifu i hoi hou mai, a hiki wale i kona kauohaia ana aku.

            Mahope iho o ka hala ana o kekahi ma hora mai ko Vaifu hoi ana aku me na lole ana i kuai ai, a oiai o Niu Fona e holoholo ana me kona kahiko nani, ua ike laula ia ae la oia e ko ka hale koa a pau, a o ka poe i ike mua ole iaia, ua mahalo mai la lakou, a o ka poe i ike mua, mahele lua iho la ko lakou mau noonoo, aka, aole nae he huaolelo moakaka e hiki ai ke hoopuka ae, no ka mea hoi, na Sinigo no kela, a na Sinigo no hoi keia, a hookahi wale no mea pono ia laua, o ka noho like, a na kekahi ka olelo, e hoolohe kahi, a pela laua e pono ai, aka, ina kekahi o laua e hoala ana i ka manao kue, aole laua i ike i kahi a ka hapanui e hio ai, aia malaila ka pilikia loa, no ka mea, o ka lahui e noho mai nei, aole no paha ia i hulimahi loa mamuli o ka Moi e noho nei, a o kekahi poe hoi, aole no paha lakou i poina i ka hoomanao ana no Niu Fona, a ina paha lakou e lohe ana, eia o Niu Fona iwaena o lakou i keia manawa, aole anei lakou e ala like mai ana me na naau aloha a me na lima kokua, a o kona hopena, he mea maopopo ole ia ma ka hoike ana aku i kona oiaio maoli, nolaila, he mea pono ia kakou ke noho me ka maluhia aole hoi me ka waha a wale aku, e ai kakou, a ino hoi, a e noho hoi i ka hanokano a ke aupuni i haawi mai ai ia kakou, o ka hoopuka ana i na olelo hoino i kekahi aoao, mai noho a hapai kekahi i ka noonoo ana pela, o lilo auanei kana olelo i kaula kaawa nona e make ai, a owai ka mea e hiki ke kuai aku i hoihoi hou ia mai kona ola?  Nolaila,

"E uumi malie iho,

Iloko e nunulu ai,"

a na ka ulia o na pomaikai e hoike mai ia kakou, no ka mea, o kekahi poe, ua mahalo lakou no ka Moi e noho ana ia wa, a o kekahi poe, ua hoowahawaha lakou, no kona hoopau ana i na kanawai kahiko, a ae aku la i ko na wahi a pau o ke ao nei, e komo maime ke keakea ole ia.  Aka, o Niu Fona, aole no oia i hoahewa, ina la hoi he hana ka ke kaikaina no ka pono.

            Ma ka lua ae o ka la o ka noho pu ana o Niu Fona me Vaifu, ua nui wale ka poe i hele mai a hooninauninau iaia, a ua hahai aku no oia e like me na mea i kamailioia ma kela Helu, aole oia i haku hou iho i kekahi manao no kona kaena ana iaia iho, aka, ua noho no oia me ka hamau, aole hoi me ka hio a pupuahulu, aka, ua noho no oia me ke akahai, a hiki wale i ka la o kona kaikaiia ana a noho maluna o ka noho alii.

            Ma keia la, ua hiki aku ka lohe imua o ka Moi, e i ana,  Ei ae kou kaikuaana ua hiki mai, o ke elua keia o ka la o ka noho ana maloko nei o ke pakaua, a aia oia ke noho pu la me Vaifu ma ka hale koa, a e hele mai ana paha oia ma keia auina la e ike ia oe, no ka mea, haalele aku nei makou, ua makaukau loa oia no ka hele mai, a i hakalia wale no paha, no ka pau ole o ke paina ana ma ka hora 2.

            Aia nae i ka lohe ana o ua Moi nei, pane mae la oia me na huaolelo ano e, a me he la he ano makee kona i ka noho alii, me kona kuhihewa paha, ua huliamahi na mea a pau mamuli ona, nolaila, hoopuka mai la oia, "Aole o'u kaikuaana i koe e ola nei i keia manawa, ua make e no ia mamua o ka make ana o ko makou makuakane, a he elua wale no maua e ola nei i keia manawa, owau ma ka noho Moi, a o kuu kaikuahine nei no ko'u hooilina, a oia no ko oukou alii i keia manawa, a o na mea a pau ana e hana ai a e hooholo ai paha, o ka hooko wale aku no ka'u, aka, i keia la, ma ko'u ano Moi, a makua hoi no oukou a pau, a mamuli o ka mana o ka'u olelo, ke hoolaha aku nei au ma ke akea, ina oukou e lohe ana i kekahi mea, he kaikuaana oia no maua, e hopu koke ia oia a me ka poe i hui pu me ia, a e lawe kokeia ko lakou mau ola me ka hookolokolo oleia,"

            O keia olelo kukala alii, ua kaulana ae la maloko o ka pa kaua a puni, a laulaha aku la ma na wahi a pau o ke aupuni, a o ka poe i hooia i keia, ua ala like mai la lakou me ka makaala, e hoolono ana, a e hoolohelohe ana ma kahi e loheia ai, nolaila ua hakiloia na wahi a pau, a ua ala like mai kekahi poe, e hooiaio i ka olelo hoolaha alii, no ka mea, aole lakou i poina i ka hoomanao ana no ko Niu Fona nalowale ana no kekahi mau makahiki loihi, a ua manaoio ia no hoi e na mea a pau ua make, a nolaila, aole lakou i hoomaopopo no na mea i oleloia mai no Niu Fona, aka, koe nae ko lakou hoole ana i ka wa a lakou e ike maka ai.

            O ka mea humuhumu lole nae, aole no i pau kona kanalua, ua kauoha oia ia Vaifu e hele mai imua ona.  Aia nae a hiki mai o Vaifu, a mamuli o na hooniele ninau ana a ka mea humuhumu, ua hoike mai o Vaifu me ka i mai.  He oiaio, ua hiki io mai no o Niu Fona, a aia oia ke noho pu mai nei maua, a nona na lole a'u i hele mai ai e kuai, a ua aie loa au iaia, no ke kupono ole o kona kulana i ko'u wahi rumi koa, a ua aie loa ia au i ka hilahila nona, a ua oluolu ia hoi ko'u manao, no ka manaoia e hoi aku i ka Halealii me ka Moi, mahope iho o ka pau ana o ka hora 2, aka, hiki aku nei ka lohe i ka Moi, mai kekahi mea mailoko aku nei o ka hale koa, nolaila, ua hoolaha akea ae oia i hana olelo hookae i ku i ka weliweli, nolaila, ua hoopau maua i ka manao no ka hele ana

aku e ike, a ke kali wale nei no i ka hiki mai o ka make.  I aku ka mea humuhumu lole, Pela no au i hoomaopopo iho ai, no ka mea, o kela mau lole a'u i humuhumu ai, aole no ia i kupono no ke kulana e like me kou, no ka mea, o kau wahi loaa, aole no ia i kupono no ke kuai ana ia mau kapa, nolaila, o kela mau lole a'u i humuhumu ai, no ka Moi no ia, a pela wau i haupu ai, ua hiki mai o Niu Fona, a i ole ia, ua hoi ae nei la ka Moi, a ke noho pu mai nei la me oe, a nona la ia mau lole au i hele mai nei e kuai.  E loaa ana ka ia oe ka pomaikai, a o oe ka o kakou ke lilo ana i mea nui ma keia hope aku; heaha la hoi kana, o na lole a kaua i kuai ai, ke makana wale nei no au ia oe ma ke kumukuai ole, a o na dala au i hoolilo mai ai no kela mau lole, ea mai  no ia, me ko'u lawe ole ae i hookahi keneta, a o ka pomaikai e loaa ana ia oe ma keia hope aku, e hoomanao mai oe ia'u, i hoi aku ai au a noho kanaka malalo ou, a i haaleleia ai e a'u keia hana luhi.

            Laha ae la ka olelo hoolaha Alii, hele laula mai la a lohe o Niu Fona, kulou iho la oia ilalo a kulu iho la kona mau waimaka aloha, a puana ae la paha i keia mau wahi hua olelo:

            "Wehe i ka piko la e ka hoahanau," no ka mea, o na olelo a ka Moi, ua lohe akea ia ma na wahi a pau, me kona ninauninau ole mamua, a maopopo la hoi ka oiaio a me ka ole.

            I ka lohe ana no nae o na mea a pau, eia o Niu Fona ma kahi o Vaifu, ua hele nui mai lakou e ike maka i ka oiaio, a i ko lakou ike ana, ua piha loa lakou i ka olioli, a hooho ae la me ua leo nui, a piha loa ae la ka pakaua i ka hauwaleau, hele aku la ka lohe a hiki imua o ka Moi, aka, aole nae ia he mea e loli a e ai kona manao, a hoihoi hou mai i kana olelo mua, aka, kupaa loa oia maluna o o kona manao kuhihw a hiki wale i kona hopu pio ia ana.

            Ala like mai la na mea a pau, a huliamahi aku la mahope o Niu Fona, a koe wale aku la  no o n a koa kumau a me kekahi poe nuku mahope o ka Moi, a ua ike no ua Moi nei, ua hapa loa ka poe ma kona aoao, aka, hapai no oia i ke kaua, a nana no i alakai aku ma ke kahua kaua, a no ko Niu Fona aloha i kona kaikaina, ua haawi oia na Vaifu ke alakai ana i ko laua puali, no ka mea, ua menemene oia ke ike aku i ka haule ana o kona kaikaina imua o na lima o kona aoao, aka nae, mamua ae o ka hele ana o ka laina kaua, ku mai la o Niu Fona a i mai, No ko'u noonoo mua ole ma keia ano, aole no hoi o'u manao, ma keia ano e loaa ai ia'u ka noho alii, a ma keia ano no hoi e loaa ole ai ia'u ka noho alii, a ma keia ano no hoi ai ia'u ka noho alii, aka, i hoi mai nei no au e noho kanaka aku malalo o kuu kaikaina, a ma kana mau hana a ma kana mau hoounauna a pau, e lawelawe ana no au me ke kanalua ole, no ka mea, ua ike ano au, o ka hanohano a me kona lilo ana i makua no ka lahui, ua lawa like maua ma ia ano, a o na mea a pau ana e noonoo ai, a hoopuka ae, e ae aku ana no au ma ka mea hiki, aka, ma kahi a'u i ike aole e hiki ana, e alakai no au me ke akahele, aole me ka pupuahulu e like me keia a'u e ike nei, a keehi loa mai la ia'u i kona hoahanau ma ke ano makee aupuni a hookae paha, me kona manao o ke kumu ia o ko'u hoi ana mai, aka, pela no, ke haule aku nae oia i ka make e like me ka makuakane o maua, alaila, e ili io mai ana no ke aupuni maluna o'u, aka, ina hoi au e make e mamua o kana make ana, alaila, e ili aku no ia i ke kaikuahine o maua, aka, o ka loaa ana o ke aupuni ia'u ma ka lima ikaika, he mea kaumaha loa ia ma ko'u noonoo ana iho, a pela no hoi paha ia oukou, no ka mea, e haule ana kakou iloko o ka poho o ko lakou la lima, a e haule ana hoi lakou la ma ka poho o ko kakou lima, aka, o ka loaa ana o ka lanakila, ua huna loa ia'ku ia mea, aka, ia kakou i keia la, ke ike aku nei au, ke pili mai nei oukou i ka mahuahua loa ana, nolaila, ke hilinai nei au maluna o oukou, me ke kupaa o ko'u manao, e loaa ana ia kakou ka lanakila i keia la, nolaila, ina e loaa ana ia kakou keia mea huna, (lanakila) alaila, ke nonoi nei au ia oukou, e malamaia ke ola o kuu kaikaina ma ka poho o ko oukou mau lima, a e hookuu aku no hoi iaia me ka lanakila, no ka mea, aole paha oia i ike i kana mea e manao nei, no ka mea, ua hoolaha akea ae oia me ke kuhihewa.

            Aia nae i ka hiki ana o na aoao elua ma ke kahua kaua, aia hoi ka Moi ma ke poo o kona puali, ao Vaifu hoi ma ke poo o ko Niu Fona puali, aka, i ka wa no o na koa o kela aoao i ike mai ai ia Niu Fona, haalele koke iho la lakou i na mea kaua a me ko lakou puali, a hele mai la e lulu lima aloha me Niu Fona, a he kakaikahi loa i koe aku ma ko ka Moi aoao, nolaila, emi hope aku la ua Moi nei a me ka poe a pau me ia, a puka aku la mawaho o ka pakaua, a imi aku la i ko lakou ola maloko o ka aina palahalaha o Kina.

            A o Liu Fata hoi ko laua kaikuahine, lohe mai la oia ua pio kona kaikunane Moi, hele naauauwa aku la oia a me kana kauwa wahine, a puka aku la mawaho o ka pakaua, a imi aku la i ko laua ola a noho pu me ke poe wahine kane ole, no lakou na hale i kukuluia maloko o ke kai, he poe lakou e noho mau loa ana malaila, a o ka lakou poe keiki, ua kapaia he "kinikakai," oia hoi he poe keiki aole i ike ia ko lakou poe makuakane, a ua piha loa ka moana ia ano, a malaila o Liu Fata i noho hoopiliwale ai, me kona malama no nae i kona maluhia, a hiki wale i kona loaa ana ia Kale Vina, a lawe ae la iaia i wahine nana"

                                                                                                                                    (Aole i pau).

 

Ke Alii Ka Moi Kalakaua!

MA

AMERIKA HUIPUIA!

 

Ka Moolelo o ka Huakai Alii!

 

Palapala mai ke Lutanele Whiting mai.

 

Arlington Hale, Wasinetona, Dec. 5, 1874

            Ia makou i haalele iho ai ia wahi, ike ia ae la ua haule o Robert (kuene) i hope ma Omaha mamuli o kona ano lalau i ka haalele wale ana i ke kaa ahi i ka wa a makou i hele ai i ka holoholo kaa.  Ua kali ke kaa i e umi minute nona, me ka manao la hoi ina he noonoo kanaka kona, alaila la e ukali wale mai la hoi a e loaa ole ana; a oiai e holo ana makou mahope o ke kali ana i e umi minute, hiki mai ana ka lono waea olelo e i ana penei:  "Ua haule iho nei au i ka hope kaa ahi; a heaha la ka'u mea e hana ai?"  Pane aku la ka Luna Nui Goodman e hoonua mai iaia ma ke kaa ahi o ka la apopo, a no ia mea, aole oia i hui hou me makou a hiki wale mahope iho o ko makou hiki ana i Wasinetona.

            Mahope iho o ko makou naue ana aku, ua hoikeia mai imua o ka Moi o J. W. Morse, ka Luna o ke Alanui Kaa Ahi O Kikako, Balinitona a me Kuineke.  Mohope o ka pau ana o ka paina awakea,  lawe aku la o Mr. Moi e hoomakaikai i ke Kaa Ahi Hiamoe kaulana o Pulumana, oiai e paahana ana na me a pau, a ma ka papa kuhikuhi o na mea ai, maopopo iho la ia makou e loaa ana ia makou na mea ai maluna o ke kaa oiai e holo ana, i like ka maikai me ko ka hotele.

            O keia Alanaui Kaa Ahi, oia no kekahi o na Alanui Kaa Ahi oi loa o ka maikai ma Amerika, oiai o na pale alanui e moe la, he mau kila wale no, o ka oni ana, he mama loa a ku maoli no hoi i ka iini o ka o ka manao i ka haalele ana'ku i ke alanui hao o ka Pakipika.  Ma keia alanui i hoikeikeia mai ai imua o makou kekahi holo ana mama loa, oia ka hooholo ana i ke kaa nona ko kaa e hoowelaia ai ka mahu, hookahi ukali, hookahi kaa ukana, ekolu kaa ohua, a he hookahi haneri a me iwakaluakumamalima mile iloko o na minute he hookahi haneri a me iwakaluakumamawalu, ke hui pu ia na manawa o ka hoomaha ana.

            E like me na haupu wale, aole e ahona ae ana ko ka Moi leo ha ke holo aku mawaena o kahi anu loa, nolaila, me he la, ua mahuahua ae nei paha kona anu i keia po mamua aku o ka wa i ka auina la o nehinei.

            Dekemaba 10.  I keia kakahiaka polehulehu wale oiai ke kaa ma Balinitona, hele mai ana ka Lunakanawai P. C. Wright iluna o ke kaa a haawi mai la i kona aloha i ka Moi.

            Ke hoomanao la no paha oe ua hoohala oia he elua a ekolu paha malama i hala aku nei ma ka Pae Aina o Hawaii ma ke kukulu ana i na hui ano malu.  Aole i maikai loa ke ola o ka Moi i keia kakahiaka, a me he mea la, e noho mau ana oia ma kona wahi moe a po keia la, no ka leo ha i loaa iaia, a oia ka hopena o kona hoikeike pinepine ana iaia iho ma ke anu o Omaha.

            Ma kahi kau hale o Somonauk he wahi kau hale uuku, he 50 mile paha ka mamao mai Kikako mai, halawai mai la makou me na mea kakau nupea o Kikako.  He heluna nui lakou, he huluaa a'u i ike ole ai i ko lakou akoakoa ana i kahi hookahi, me he mea la ua iwakalua ko lakou nui.

            Aka no ka Moi nawaliwali a maluhuiluhi, aole lakou i aeia e ike i ka Moi, aka o makou, ua pau i ka nienieleia mai a kau wahi poliuliu ole iho i koe.  He poe maikai lakou, aka o ko lokou ake nui ka loaa aku ona moolelo loloa.  Ua pau aku ka makou mau wahi ike a pau i ka haiia aohe mea i koe i ka ka mea i ka noi pau mai.

            Ma kahi i kapaia o Aurora, ua halawai mai la makou me na kauka Laimana a me Ethridge o ke Kulanakauhele o Kikako, a no ka nele o ka Moi i ke kauka ole, ua kahea ia aku laua e komo mai e nana i ke Moi.  O Kauka Laimana, oia no ke kaikuaana o Laimana e noho la i Hilo a ua mare i kekahi kaikamahine a kauka Kalaka.  Ke hoomanao la no paha oe ia kauka Kalaka, oia no kekahi o na misionari kahiko; a eia no oia ke noho nei ma Kikako, a i ko makou hiki ana mai, akeukeu e mai la no ia e haawi mai i kona aloha i ka Moi.  Me he mea la i ka ike aku eia no oia iloko o kona ola ana maikai.

            Ua hooika ia ae la ko makou kaa i ko makou komo ana aku iwaho o ka poai o waho o ke kulanakaukale, a nolaila aole makou i hiki laa aku i kahi hookio a ua kaa ahi, no ka mea, aole i oluolu loa ko Moi, a makemake iho la e hoalo iaia iho mai ka ike ia ana mai e ke anaina.  Kilouia aku la ko makou kaa i ke kaa ahi o ke alanui hao Pittsburgh a me Fort Wayne.  Ua noho mai nei ka Moi iluna no kekahi mau minute pokole i keia ahiahi a nana mai la i ka makou paani pepa ana.  Ia makou e nanea ana i keia paani, komo mai la kekahi kanaka ui a hoike mai la iaia iho, he mea kakau oia no ka nupepa Fort Wayne Gazette a ua makemake oia e ike i ka

            Ua hoolaunaia aku la oia i ka Moi, a na ke Kiaaina Dominis ka hai ana i na ninau.  I keia po, ua ane mahuahua mai o ka mai e ka Moi.

            Dec. 11---I keia kekahiaka, aohe i oluolu ka moi, ua noho no oia ma kona moe.  Ua hiki mai makou i Pittsburgh mahope koke iho o ka hora 12, a loaa iho la ia makou he anaina nui, ua akokoa a me ke aka e ike i ka Moi.  Ua pinana mai la na kanaka ma na alapii, a lalama ae la kela a me keia maluna o ka poohiwi e kuku ai, me ke ake e ike lihi mai ma na pukaaniani.  O Col. Wherry, ka mea i ku ma kahi kiekie o mua, a hai aku la i ka poe a pau o ninau mai ana i ka Moi, aohe i oluolu kupono ka Moi no ka ikaia mai e ka lehulehu.  Hookahi haole i hookeke loa mai e ake e ike i ka Moi; a i ka hoole paakikiia ana aku aole oia e ike ka Moi, ninau mai ana kela, "Pahea kona nanaia?  Ua like no anei ia me ko na kanaka e ae, a ua like paha me a'u?"  A i ka halia ana aku, he wahi paewa uuku wale ko ka like ole mawaena o ka Moi a me ia, huli aku la ia hoi, me ka lawa o kona mea i ake mai ai e ike, me ka olelo iho, "Ae, ua like loa no me ka'u mea i manao ai, ua like no ia mea kanaka e ae."

            Maanei, ua konoia mai makou e haalele i ke "kaa alakai," ke kaa a makou i kau ai mai ka haalele ana aku ia Kepalakiko, oiai ua akea loa ae ia no ka holu ana aku maloko o ke Alanui Eli.  Nolaila, ua noho makou maanei a i ke kaa o ka auina la; ke hiki ia wa, e paa ana ke kaa ahi moe o Pulumana i ka hanaia no makou.  Ia wa, ua haawi manawaleaia mai la ua keena kookipa o ka hale hotele malalo o ko ka Moi makemake, a malaila oia i hookuu iho ai i ka luhi a hiki wale i ka wa i makaukau ai ke kaa.

            Ua hele wawae aku nei makou, ae Kiaaina Dominis a me Kapena, a me a'u e holoholo ma kekahi mau alanui o ke kulanakauhale, a hoe mai mamua iho o ka maeawa o paina i wakea ai.

            I ka hora 4:20 o ke ahiahi ua haalele iho la makou ia Pittsburgh, a i ka nana aku i ka Moi, ua pii mai kona maikai, aka ua hoi e nae ia e moe.  Ma o iki aku hoi o Pittsburgh, ua houkauluaia makou he hapalua hora, mamuli o ke keakeaia ana o ke alanui e ka lepo hanae ia kakahiaka no, a ua makaukau ole ka alanui mamua iho o ko makou hiki ana aku, ua ala ao maua me ke Kiaaina Dominis a hiki i ka wa i haalele iho ai ia Altoona.

            Me Altoona, ua loaa mai na kauoha ia makou, mai na luna alanui kea ahi, e kali ma ka akau ae o Baletimona, a hiki i ka hora !0:5 P.M. a ma ia wahi e halawai mai ai o Capt.  Teneple a me kona mau ukali me makou.

            Ua hoouua waea olelo aku makou, paina aku ko makou kakahiaka i loke.  Haalele makou ia Altoona, me he mea la elua hora ka haule mahope o ka manawa helo mau, aka, mamuli o ka hooholo nui loa ame, ua hiki aku makou i Harrisburgh, iloko o ka manawa mau.  Ua holo nui loa makou, ke hele la o Mr. Goodman a haalalo i ka ko mea a ka makou, a no ia mea, ua mai oia i ke kaa hope loa a moe ai, maloko o kekahi keena waiho wale.