Ka Nupepa Kuokoa, Volume XV, Number 16, 15 April 1876 — Page 4
KA NUPEPA KUOKOA, ME KE AU OKOA I HUIIA.
HE HIMENI.
Eighteen Hundred & Seventy Six
Song King. p. 148.
1 Ala'e, e na hoa, he wa oli nei,
E kau i na bana, na bana lai e,
Hookani na oli a kupinai ae
Mai nei a na mauna, a hoi hou mai.
Cho — Kau, e kau i na bana, e nee halelu ;
Aloha na hoa, a hauoli pu.
2 Ua pau ka wa luhi, he wa maha nei.
E pau na luuluu, a e hauoli e,
E moku na kaula, e hookuu ia'e ;
E holo a oli, a maha maikai.
Cho.— Kau e kau i na bana, &c.
3 He wa hoomanao keneturia no nei ;
He wa hui nui, a hauoli e ;
He Hoikeike kaulana ma o,
Ma Amerika Hui, e hui kakou.
Cho.— Kau e kau i na bana, &c.
4 Makena na kula, na kula hanai,
Na kula aupuni, a pii anuu ae.
A loaa ke Kula, ke Pookela nei
E pii na buro me na o paipai e.
Cho.— Kau e kau i na bana, &c.
5 Hoopili kakou i ka pono a mau,
E naue imua, mai hele lalau.
Ka Lama Hawaii na kula ao nei,
E ku no a mau ma na puu uli e.
Cho.— Kau e kau i na bana, &c.
Hawaii.
HAAWINA KULA SABATI.
HELU 5. SABATI, APER. 30.
KUMUHANA — Ke kanaka oopa i hoolaia. PAUKU BAIBALA — Oihana 3 : 1 — 11
PII pu aku la o Petoro a me Ioane i ka luakini i ka hora pule, i ka iwa.
2 A haliia'e la kekahi kanaka, ua oopa mai ka opu mai o kona makuahine, a waiho no lakou ia ia i kela la i keia la, ma ka puku o ka luakini, i kapaia, He nani, e nonoi aku i ka poe komo, i manawalea.
3 A ike ae la oia ia Petero, a me Ioane e komo ana iloko o ka luakini, noi aku la ia i manawalea.
4 Haka pono mai la o Petero, laua o Ioane ia ia, i mai la, E nana mai ia maua.
5 Nana aku la oia ia laua, me ka manao e loaa ia ia kekahi mea na laua mai.
6 Alaila i mai la o Petero, Aole a'u kala, aole he gula ; aka, o ka mea i loaa mai ia'u, o ka'u ia e haawi aku nau ; Ma ka inoa o Iesu Kristo no Nazareta, e ku oe, a e hele.
7 Lalau ae la oia i kona lima akau, a hooku ae la ia ia ; ikaika koke iho la ua kapuwai, a me na puupuu wawae ona.
8 Lele aku la ia, a ku iluna, a hele a komo pu aku la me lakou iloko o ka luakini, me ka holoholo, a me ka lelele, a me ka hoomaikai aku i ke Akua.
9 A ike aku la na kanaka a pau ia ia e hele ana, a e hoomaikai aku ana i ke Akua :
10 A i ko lakou ike ana, oia no ka mea i noho ma ka puka nani o ka luakini, no ka manawaleaia mai ; pilihua iho la lakou, me ke kahaha o ka naau, i ka mea i hanaia mai ia ia.
11 Aka, paa aku la ka oopa i hoolaia ia Petero ma laua o Ioane, a holo mai la na kanaka a pau ma ka lanai i kapaia ko Solomona, me ke kahaha nui o ka naau. Puuku hoopaa p. 6.
Mele — Him. 142 6 — 8. Leo.
l E ala a mele ae
I mele no Iesu,
Na leo, na naau a pau,
E ala a mele pu.
4 E mele hele no,
Na kauwa a Iesu !
Hauoli i na la a pau
Ia Kristo, ke Lii mau.
Pule no ka poe oopa, lolo, eha, nawaliwali ma ke kino, ma ka naau, &c.
NA NINAU A NA KUMU.
P I. Owai keia mau haumana elua ? Pii aku laua i hea ? i kekahi keena pule e pili ana i ka luakini. I ka hora ehia ? Ka hora 9, ka hora ehia ia ia kakou ? Nana mok. 2 : 46. Halelu 55 : l7. Dan. 6 : 10.
P 2. Owai ka i laweia, a waihoia mahea ? Owai ka inoa o ia puka ? Nohea hoi ia inoa ? No ka nani io paha o ka puka. Heaha ka hana a ua oopa nei ? He mea mau paha ia o ka poe oopa, a pilikia, o ke noi ana i wahi makana. Pela hoi aela makapo ma Ioane 9 : 8.
P 3, I kona ike ana ia wai ? a aha aku la oia ia laua ?
p 4 — 5 Pehea laua i pane ai ia ia ? a aha hoi oia ia laua me ka manao aha ?
P 6 Heaha ka Petero i hoole ai ? heaha kana e haawi aku ana i ka oopa ? Heaha kana kauoha ? ma ka inoa owai ? He kanaka oopa loa ia, pehea la e hiki ai ke ku iluna, a hele ?
P 7 — 8. Nawai i kokua i ka hoola ana ? A pehea kona mau kapuai, me na puupuu wawae ? Pehea ae la ka oopa ? 1 lele, 2 ku, 3 hele, 4 komo i ka luakini, 5 holoholo, 6 lelele, 7 hoomaikai i he Akua. Heaha ka oi, ke kala, ke ola o ka oopa ? Pehea na kanaka maoli ? ma ke aha ko lakou hoola ana ? Hiki anei i ke kala ke hoola ?
P 9 — 11. Pehea na kanaka ? hoomaikai pili haa. kahaha, no ke aha ? Ua ike anei lakou i na hana me keia mamua ? Ua ike no paha i ka wa ia Iesu e ola ana. Io. 5 : 8 9. Pili nae ua kanaka oopa nei ia wai ? A holo kanaka ihea ? me ke aha ? Ka lanai o Solomona, mahea ia ? nohea ka inoa ? Aia no ia ma ka aoao hikina o ka luakini na Solomona hoi ia i kukulu.
Mele. Marching Home. Rorina Gula 4.
1 Ku a naue i ka home, e,
I ka aina ao mao,
Kahi maha no ka poe maemae,
Kahi ao a aloha no.
Cho.— Naue ae — naue ae —
Ku a naue i ka home e —
Naue ae — naue ae —
I ka home e maha'i.
4 Nani e na home maluna'e !
Lako ina mea maikai ;
Aia no na hoa aloha e,
Ke memele nani e !
Cho.— Nane ae —nane ae — &c.
NA NINAU A KE KAHU.
Na makua. Heaha ka hana kupanaha ma kela Haawina mamua aku nei ? Aia mahea ka nui o na malihini ? Heaha ka mea kupanaha ma keia Haawina ? E hele aku ana Petero ma ihea a halawai pu me keia kanaka oopa ? Ua hele e anei oukou i ko oukou keena pule mamua o ka hele ana mai i ke kula Sabati ? Elua wa pule ia Davida ? Ehia o oukou wa pule i ka la hookahi ? Na keiki. Elua haumana i pii ae i ke keena pule, owai laua ? Mahea ia keena pule ? He keena pule anei ko oukou ? Ehia wa pule ia oukou ? Heaha ka Iesu kauoha ma Mataio 6 : 6 Ua ike anei oukou i kekahi kanaka oopa, hiki ole ke hele ? Heaha ka pono ? e henehene anei ia ia ? e aloha a kokua a imi i ka mea e ola'i, e pono ai anei ? Mai oukou, eha, hui, lolo, oopa, nawai e hoola ? A ina ola, heaha ka pono ? I na aole o oukou kala, aole gula, ma ke aha e kokua ai ?
Ke kula a pau. Ka hora pule, ke hoomanaoia nei anei ia i na wa a pau ? Me kakou anei na oopa, na lolo, na mai ? Heaha ka kakou e hana'i no lakou ? He poe oopa paha ma ka naau, ma ka hana a ke Akua, hoololohi, hoopalaleha, komo hope i ka halawai, i ke kula Sabati, i ka ekalesia &c, pehea kakou ia lakou.
Heaha ka hana kupono i ka poe i hoolaia ? Ku — lelele — komo — hoopili — hoomaikai — pehea ?
Mele. Robina Gula mele 26.
1 Ia'u e nauwe maha ana
Mai nei ae a i ke ao,
E hai au la i ka hana
A Iesu i hana'i no'u.
Cho.— Nani, nani, Haleluia,
Nauwe malihini au ;
Ke nauwe la ia Ziona.
Me ka pauku elua
Pule i hoala ia ka poe hiamoe, palaka, kanalua, hoololohi, i ka imi, i ka huli &c.
HAAWINA KULA SABATI NO MEI 7. Oihana 3 : 12 — 26. HAWAII.
La Hoike ma Waimea Hawaii, Maraki 14, 1876.
NA HANA O KA LA —
Mele. " Ring the Bell."
1 Keikikane. Kani mai ka bele e,
Kani o, kani lai. Kaikam.
Ala e na kamalii,
Wa hoike nei.
Pau loa.
Ala e — ala e —
Pau ka lealea nei —
E hoike pololei,
Naue awiwi, &c.
Ekolu pauku.
2. Pule —
3. Hoikeia ka Papa IV me ke III ma ke Kumumua a me ka Helu kamalii ma ka olelo Hawaii, a me ka olelo haole.
4. Mele. " Let us all be merry."
1 E oli keia kula,
E i ae ka wa hoomaha,
Ka wa Hoike kula,
Hauoli wale paha.
Cho.— Me ka ha, ha, ha, me ka ho, ho, ho,
Me ka ha, ha, ha, ho,
Mele oli, mele oli,
Naue me ka oli pu ;
Mele oli, mele oli,
Naue mele like no, &c. 5 pauku.
5. Hoikeia ka Papa II ma ka Buke Ao Heluhelu, ma ka Helunaau, ma ka Hoike Honua, ma na olelo elua.
6. Mele. " Temperance Song."
l E na hoa oli e,
Oli e ua pokii nei,
Pau na mea e ona'i,
Lanakila no.
Kau na bana. welo e,
Naue, naue pololei,
Holo, &c — 2 pauku.
7. Hoikeia ka Papa I ma kekahi hapa o ka Helunaau.
8. Mele na kaikamahine. " Ellen Bayne."
1 Moe malie,
Pau na luuluu,
Moe uhane,
Moe olu no ;
Moe, e moe, ka wa moe nei,
Pua na pua nou, no Elena Lei.
Cho.— Moe oe a maikai,
Moe olu a ala'e.
Noho au la, a kiai,
Elena Lei, &c. 3 pauku.
9. Hoikeia ma ka hapa mua o ka Arimatika mok. 1 — 8.
10 Mele. " The Snow."
Huro, huro, huro, ke haule nei ka hau,
Huro, huro, huro, hauoli pu kakou,
Mailuna mai ka lani,
Aiai a kei ka nani ;
Huro, huro, huro, Olino mai ke ao, &c
3 pauku.
11. Hoikeia ma ka Arimatika mok 12 — 13, ma ka uku kuala hookui, kuala hoemi, waiwai hoopaa. Puka me ke Poho, Dute, Auhau, Wehewehe ano.
12 Mele —" Clatter, Clatter."
Ka ha ha la, pa. pa, pa la,
Helelei ka ua e !
Ka ha ha la, pa, pa, pa la
Ma na puka nei.
Nana ea, kahe mai la,
Pii ke kahawai la,
Kahe, kahe a halulu,
Oli na mea ulu, &c — 3 pauku.
13. Hoike ia ma ka Buke Honua, ma ke kakau lima, hai paanaau, na mea hoohauoli, &c.
14. Mele. " The Woods."
1 Maikai na waolaau,
Na wao laau omao,
Paapu i na manu memele,
Na manu ku ku a lelele
A puni na wao laau,
Na wao laau omao,
Tra la la la, &c —
3 pauku.
He mau mele e ae kekahi ma ka olelo haole, a ma ka olelo maoli hoi. He mau olelo paanaau, a he haiolelo kekahi, he kakau lima hoi. Maikai ka hoike. Mahalo nui ia na mele. Nani wale Elena Lei.
Eia nae ka hewa nui, ka hapa o na makua a me ka poe makaikai. Ikaika na keiki i ke ao ana, auhea la na makua e hele mai e nana i ka ike o na keiki. HAWAII.
NO GILIBETA KA IKAIKA !
KA LUA OLE O KE KOA,
A ME KA PUUWAI KINA OLE.
MOKUNA XI.
KE KA-KA LAAU ANA. — KA PANA PUA AKAMAI LOA — KA PEPEHIIA ANA O TETA.
KA PAKELE ANA O KA MEA NANA I PEPEHI.
A OLE i pane aku o Gilibeta, aka, he mau hiona aka ka i luna ona.
" A !" i hooho ae ai o Wili me ka manao kuhihewa iloko ona, he hopo wale o Gilibeta, a ua kuihe oia no kona lanakila ma ke kaka-laau ana. " He makemake kakou e lohe i ka uina o ko lae. A no ka wa e hoike aku ai au imua o keia aha kanaka i ka nui o ka lolo iloko o kou poo, a me ka olohaka paha me he pahu la."
" Ua oki kou hooio ana," i pane aku ai o Gilibeta, " e malama ia oe iho, no ka mea, o ua uhau ana o ka'u laau, aohe akamai nui e paa ai, a e hoao ana au e hana pela ina aole i oi aku ke oolea o ka laau oka mamua o kou iwi poo manoanoa."
"A o la hoi i hahau mai," i hooho mai ai o Wili me ka leo weliweli, a ia manawa pu no hoi i uhau mai ai oia me kona ikaika a pau.
Aka, ua pale maikai wale ia ae la no e Gilibeta. No ia mea, ua poha koke mai la ua hua hailiili mai ko Wili mau lehelehe mai,
" E malama i kau mau hoohiki ino no na pepeiao e ae, he mau mea okoa kau e hana ai o keia wa, aole o kela mau hua olelo pelapela."
" E uhau ana au ia oe i oi aku mamua o ka pahi ka ai, a ka mea mahiai," i puana hou mai ai o Wili me ka leo nui.
" O ka poe hooio ua piha mau ko lakou mau lehelehe i ka hoopunipuni," i pane malie aku ai o Gilibeta.
Nolaila, noke mai la ua'lii powa nei i ka hahau ma o a maanei me ka hoomaha ole, ua pale maikai wale ia no e Gilibata, me ka mahalo nui ia mai e ke anaina, a me ka hooinaina loa ia o Wili.
Aka i ka wa i akakuu iho ai ka uhau pinapinai ana a Wili, ua komo palamimo aku la ka laau a Gilibeta a kikoni ia iho la maluna o ke kipoohiwi o na kanaka ino nei, no ia mea i hoohiki ino ae oia me ka leo nui, e uhau hala ole ana i kela & me keia sekona me ka noonoo ole, no ka mea, ua piha a hu kona inaina, e oi aku ana i ko ka wa mua.
O keia ka Gilibeta i makemake ai, no ka mea, he mea ia e haalele ai o Wili i ka malama ana ia ia iho. Aole no hoi i hakalia o Gilibeta i ka ike ana i keia mea. Ua kakali oia no ka wa kupono e hoomoe ai i kana laau. Elua a ekolu mau hauna wikiwiki ana mai a Wili i ka wa hookahi, aka, ua paa wale no i ka pale ia e Gilibeta ma ke kumu, iwaena konu, a i ka welau o kana laau oiai oia e hoala ana i ka laau iluna ; a i ka hoi hou ana mai a Wili e uhau no ka ha o na manawa mahope iho o kona hahau pupuahulu ana me ka malama pono ole ia ia iho, ua haule iho la ka laau a Gilibeta me ka ikaika a pa pono i ka manawa o Wili. Ua palaha koke iho la ua nunui nei ilalo, me ka ano maule. Napele ae la ka manawa, a hiolo hou mai la ke koko mai kona poo mai.
I keia wa i hooho hou ae ai na leo hauoli no ke pio hou ana o Wili, a me ka lanakila hou ana o Gilibeta.
I keia wa no hoi aohe mea hookahi i a-a mai ia Gilibeta. Ua hooholo lokahi ka lehulehu i ko lakou manao aohe mea e lanakila maluna ona. Nolaila, ua hele aku la keia iwaena o na leo olioli a hiki i ka papahola o ka Peresidena o ka la.
Ma ia wahi i halawai mai oia me na mino aka ana o ke kaikamahine alii Beta, ka mea nana e haawi mai ka makana, he kiaha kala. Ma ia wahi, i halawai hou ai ko laua mau lima, a i nana hou aku ai kekahi i kekahi ; a pela i hookapalili hou ia ai ko Beta puuwai oiai oia e pahola mai ana i ka lima aloha.
Kulou haahaa aku la ke koa opio i ka lede a me kona luaui, a iho mai la ma na anuunuu, a ia wa i lawe hou ia aku ai o Wili iwaho o ka lina hakaka, mawaena aku o ka poe e huro olioli nei.
Ua kui koke aku la ke kaulana o Gilibeta a puni, no ka ikaika, ka makau ole, a me ke koa. Iloko o na uluaoa o ka lehulehu, ka hi-o ana hoi i o a ia nei no ka piha i ka hauoli, ua puana pu ia ka ninau ma ka lehelehe o kela a me keia :—" Nohea mai keia keiki wiwo ole ? " Owai kona makuakane ?"
Aka, aole he mea hookahi i ike i kona wahi i hele mai ai, a me kona makuakane nana mai oia. He poe nae kekahi iloko o ia lehulehu i ohumu malu e hoopoino i ke ola makamae o ke koa opio, a o na poe la, oia no na ohana powa o ka ululaau malalo o ke alakai a Wili Ahiu.
Ke naue emoole nei ka manawa, o ka hiki mai koe o ka wa no ka hoao ana i ka poe akamai i ka pana pua. Ua hookaawale ia ae la ke kahua no ka poe lena kakaka. O ka makana e haawiia ai i ka mea pana pololei, he pua kala. O keia ka lealea i hoopihoihoi nui ia ai ka lehulehu. O na poe pana pua eono haneri ua ku laina ae la lakou ma kahi i hookaawaleia no lakou.
I keia wa, ua kuai nui mai la lakou i na pua a Teta, alaila o ka hoomaka iho la no ia o ka pana pua ana.
Iloko o keia lehulehu eono haneri a keu, aole he mea hookahi o lakou i ku ai ka maka bipi, a i ka wa i manaka ai ka hapanui o lakou i ka pana ana, a koe iho na mea elua e ku ana i ke kahua, ia wa i komo aku ai o Wili Ahiu, me ka haohao nui ia e ka lehulehu.
Ua hauhoa ia kona poo a paa i ke kahakahana lole, a e paa ana i ke kakaka ma kona lima akau, a he a-apua ke kau ana ma kona kua. Ua lilo oia he mea henehene nui ia e ka lehulehu, no ka mea, elua ona hoohoka ia ana iloko o na lealea i hala ae, a o kona a-a hou ana mai iloko o ka lealea o keia wa, me na poino i loohia i kona kino, he kohu pupule maoli ia hana.
Aole i nana aku o Wili i ka henehene mai a ka lehulehu, aka, ua nonoi aku la oia e ae ia mai, oia kekahi e hoao no ke eo ana o ka makana.
Ua ae mai la o Sir Keoni i ka i ana, ua ao ia na mea a pau loa i makemake e hoao i ko lakou akamai.
No keia mea ua ku ae la o Wili mamua pono o ke kahua, me ke kahea aku i na makaikai e hookaawale. Kaulona aku la oia i kana pua, a hookuu aku la, ua lele aku la a ku i ka hapalua iniha mawaho ae o ka maka bipi. O keia wale no ka pana ana i lihi launa iki i kahi i manao ia e ku, no keia mea i puai mai ai na leo mahalo hou nona, mai na lehelehe mai o ka lehulehu. " He pomaikai wale iho la no kela ku ana," i hooho ae ai o Teta me ka leo nui. " He diabolo kekahi ma ka aoao o kela kanaka ino aihue."
Ua loheia keia mau olelo a Teta e Wili, no ia mea i huli mai ai oia i ke kanaka hana pua, me ka i ana :
" Ina he diabolo ma kuu aoao ina ua moku mua kou elelo ia'u i ole oe e hoopuka hou i kou leo."
" E ka makua, mai hoopuka hou i na olelo hooinaina nona, o hoopoino ia mai oe." O ka Belaneke olelo uwalo keia i ka makuakane, aka, puana koke ae la o Teta me ka manao koa, " Mai hopo oe. Ano, ina he mea kekahi i oi ae mamua o kela, e haawi no au i kuu mau pua maikai loa nana. Aole o'u makemake iki e lilo ka makana na kela kanaka kolohe, aihue, a me ka powa."
" Aole e eo ana ka makana ia ia. Ina he maikai ka hana ia ana o keia pua, e lilo no ka makana ia'u. Mai kanalua oe," pela i pane aku ai o Walata.
" E hiki anei ia oe ke pana pololei i ka maka ?"
" Manao au ua oi ae ka pololelei o ka'u pua mamua o kela," i pane aku ai o Walata. A ia ia e olelo nei pela, ua nee aku la oia imua a hiki i ke ku ana ma ka aoao o Wili.
I mai la o Wili. " E pana oe i ike ia ka oi ana o kau mamua o kela, a ina e kela aku mamua o ia, e hiki no ia'u ke huoi aku mamua o keia."
Lena mai la o Walata i kana kakaka, a hookuu aku la i ka pua, he hapaha iniha wale no i koe hiki iho i ka maka bipi.
He mau leo mahalo ka ka lehulehu i panai mai no keia lena kakaka akamai.
" E hoole ia ka mana o ke diabolo ino o kela pua ka mea e eo ai o ka makana," wahi a Wili i olelo ae ai, me ka huli ae ia Walata ; a he mea maopopo no hoi aole oia i ike o ke keiki opio no ia nana i kui kona mau maka a popolohua, iloko o ka po ino.
Aole i pau.
KA HUNT'S LAAU OLA
(HUNT'S REMEDY)
HE LAAU LAPAAU HOU, MAI AMERIKA MAI ! He Laau Maikai keia no Na mai pehu o ka opu, Na mai o ka puupaa a me ka opu mimi, Mimi-paa, Mimi-eha, Mimi-helelei, Ka lepo gravel iloko o ka opu-mimi, Ka mana ole, kapalili, hui ono ole ka ai. Na Mai Wahine, NAWALIWALI O KE KINO, LEPO ULA ILOKO O KA WAI MIMI, MANOANOA PAHA KA WAI E like me keokeo o ka huamoa, Like paha me na kaula silika keokeo, eleele, lenalena paha ; a i ole ua like paha me ka lepo i anaiia i na iwi keokeo, a i ka mimi ana, ua wela oioi ka mai, me ka eha nui o ke kikala a me ka puhaka. HE NUI NA HOIKE e ola nei, ka poe i loohia i keia mau mai i haiia maluna ae, ua pau lakou i ke ola maikai, no ka inu ana i ka HUNT LAAU OLA. ("HUNT REMEDY)!" UA HAAWI mua ia keia laau, e kekahi kahuna lapaau naauao, i ke kanaka mai pehu o ka opu, e noho ana me ka ohana a Mr. Hunt ; John Hunt kona inoa, he 45 kona mau makahiki, he kanaka nui poepoe, ua loohia i ka mai pehu. Ua haawiia kela me keia laau no keia mai, aole nae oluolu ; ua mahuahua mau kona pilikia, ua pau loa ke kino a me na wawae i ka pehu ; ua kokoke paa loa ka mimi ; kokoke pau loa ka hanu ana ; a ua mahuahua loa ka wai iloko o ke kino. Aole hiki iaia ke moe ilalo ma ka moe, nolaila, ua noho wale no iluna i ka po a me ke ao. Pela mau kona popilikia a hiki i kona hoao ana i keia laau, a ke kahuna i kuhikuhi mai ai. A i kona inu ana i keia laau, ua hoomaka koke ka oluolu. Ua paipai koke ia ka puupaa i ka laua oihana ; ua puka hou ka wai mimi a nui wale ; ua emi koke mai la ka pehu o na waewae ; a ua oluolu hou ke ake-mama i ka hanu ana ; ua oluolu a maikai ka io o na lala, a e hoi nui mai ana ke ola maikai, alaila, me ke kuhihewa, ua waiho oia i ka laau i kekahi mau la. Ua pono ole nae ka waiho ana ia manawa, no ka mea, aole i ola io maoli kona mai pehu. Ua molowa hou na puupaa i ka laua oihana, a ua mahuahua hou ka wai iloko o ka opu, a ua popilikia hou e like me mamua. Alaila, ua inu hou oia i ua laau la, a ma ka hoomanawanui ana, ua lanakila hou auanei maluna o ka mai, a ua ola io maoli, a ua hoomaka hou oia i kana oihana mawaho o ka hale.
Oia ka lapaau mua ana me keia laau ; a mai ia wa mai, (he 25 makahiki) ua hahanaia keia laau e like me ka hana ana o Mr. Hunt, a ua haawi na kahuna lapaau i keia laau i ka poe mai pehu a me na mai like.
Mai ia manawa mai, ua ikeia, e mahaloia hoi keia laau, mai o a o, e na kanaka, a ua inu ia hoi ma ke ao ana a me ke ao ole ana mai o na kahuna lapaau ; oia ka mea i hoola mai i na kanaka he nui, ka poe pilikia i ka mai pehu, a kokoke i ka make.
Na kuhikuhi no ka inu ana :
E INU I KE PUNA TI PIHA, a hala na hora 4, alaila, e inu hou. E mahuahua liilii nae a hiki i elua puna ti piha — a hiki hoi auanei i puna nui piha.
NO KE KEIKI hookahi makahiki a hiki i na makahiki eono, e haawi 5 kulu, a hiki i na kulu 20 ; eha hora nae mawaena o ka haawi ana.
KUMUKUAI, he - - $1.50 no ka omole.
DILLINGHAM & CO.,
735 3m 748 Na Agena no ka Pae Aina Hawaii.
OLELO HOOLAHA.
J. PORTER GREEN,
" KEIKI O KAUAUKIUKIU."
LOIO !
E HELE MAI NA MAKAMAKA A PAU IO'U nei, a na'u no e kokua ia oukou imua o ka Aha Hoomalu a me ka Aha Kiekie, me ka uku haahaa makepono loa. Aia kuu Keena ma kahi o ka Lunakanawai Hoomalu o Honolulu nei, oia ka " Aiko," ma Alanui Kalepa. 741 ly 792
C. H. DICKEY (Kalekika).
LOIO !
MA HAIKU, MAUI.
UA MAKAUKAU E HANA PALAPALA Kuai, Palapala Moraki a me na mea a pau e pili ana ma ka Oihana Loio. 743 1y 794
WING SING & Co.
Puhi Palaoa,
E waiho mau ana palaoa a me na berena palupalu. Kihi o na huina alanui NUUANU A ME BERITANIA. 703 1y 755
KE HOIKEIA aku nei i na kanaka a pau, aole lakou e komohewa ma ka Aina o ke Kula, ma Wahiawa, Waialua, Oahu, ma ke kua ana i na laau, a pepehi hoi i na Bipi hihiu, a alualu i na holoholona ma ua aina la ; aole hoi lakou e hookuu wale i na bipi a me na holoholona e ae maluna o ua aina la. W C JONES, Honolulu, Novem. 29, 1875 731 tf
NO KA MEA, ua koho mai ka Aha Kiekie ia'u i Kahu Malama Waiwai no HOOMOEAPULE w, i pupule, nolaila, ke papa nei au i na mea a pau loa, aole e hoolimalima aina me ia a me kana keiki me Hanaumaikai k. Aole pono e hookaa aku ia laua ka uku hoolimalima, aka, e lawe koke mai ia'u. J. PORTER GREEN, Luna Malama Waiwai no Mele Hoomoeapule.
Honolulu, Dek 22, 1875. 734 6m
NA MEA NANI E HIEHIE AI
NAUWE MAI * NAUWE MAI
MAHEA LA E LOAA AI NA PAPALE WAHINE AUlii kolomanu ano hou loa, a me na pua nani e kinikohu ai e kau ai ka iwa, he la makani e hao ai na polena o Haupu, kapakahi manuia o Keokoi ka moku, ma kahi o L. ASEU, Aia pu no malaila na HAINAKA SILIKA liilii LEI AI kae weluwelu, a me na LIPINE SILIKA puapua weluwelu, e kuwelu ai i ka makani. NA KALAKOA ANO HOU LOA i like oleia mamua, Na KAEI SILIKA Nani, NA MAKALENA KALAKOA me ka PUAKEA, na ALAPIA HULUHULU o na ano a pau, na KIHEI UHI hou a kohu ai ka lino ana, na mea ala waianuhea, e ku ai ka hoomau, a me na aila lukini e puia ai ka lauoho i ke ala. Na lilina ume naau o kela ano keia ano, na kamaa wahine o na ano a pau. Na lole kane o kela a me keia ano, na palule kalakoa a me ke keokeo, i humuia me ka mikioi loa. He makepono loa no hoi ke kuai i na mea i hoikeia ae nei maluna ke kuike. I mea e pau ai ke kuhihewa, e naue mai no e na makamaka ma kuu Hale kuai HIKIKIIKAUOENA. L. ASEU. Kihi ma Ewa o Alanui Nuuanu mauka o Alanui Moi. Honolulu, Aug. 27, 1875, 717 lyr 768
E. STREHZ, (AILUENE,)
HAAWI A KUAI
LAAU LAPAAU.
AIA.MA MONIKAHAAE, KIHI O NA HUINA o na Alanui Papu a me Hotele. Aia malaila na Wa Ala a me na Wai Rukini maikai loa e loaa ai. E hamama mau ana i na ahiahi Poaono a pau. 741 1y 792
E naue mai ! E naue mai !!
KE POLOAI IA AKU NEI OUKOU E NA keiki lalawai o na pali hauliuli, a me na kaikamahine puukani nohenohea o na pali Koolau, e naue mai ma ko makou mau Hale Kuai ma KAALAEA a me KANEOHE, malaila e loaa'i oukou na nuhou o na ano a pau. Na Lole Kane, Wahine a me na kamalii, Na Kamaa Na Hou. Na ano Papale a me na mea liilii o kela ano keia ano he nui wale. E loaa no ia oukou ke kumukuai makepono loa. E naue mai ! E naue mai !! E hoao i pau ko oukou kuhihewa. AKANA & KONGER & Co. Koolaupoko. Maraki 23, 1876. 747 6m. 771
ANOAI I KA LEHULEHU,
E kipa mai a e nana i kumaka ka ike i na waiwai nani i loaa mai nei iloko o na La Kulaia iho nei.
Penei ke ano o ua mau waiwai la : Na wati a me na kaula gula, a na Ledee a me na Keonimana ! NA KAULA OPELE A NA LEDE NA KOMO GULA NANI O KELA A ME KEIA ano o na Lede a me na Keonimana ! NA KUPEE GULA, NA LIPINE GULA, Na gula pepeiao o na wahine ! e oaka ai i na pepeiao, a e hulali ai hoi na manamana lima, a e kilipohe ai hoi na ai. Na komo humuhumu gula a me ke kala Na pihi pulima gula wahine a kane, Na laketa gula lei wahine nani, Na komo daimana o na Lede. Na kaula laketa, Na pine omau kihei, Na laketa aniani, Na huka gula wahine. NA LAKO HALE. NA PUNA, NA PAHI, NA KIAHA, KALA, NA APO KALA, NA KAWELE holoi lima, NA O DALA o kela a me keia ano, a me na mea nani e ae no he nui wale. E kuaiia aku ana no ma ke kumukuai haahaa loa i ko na wahi e ae o ke taona nei. UA MAKAUKAU NO HOI NA mea nani no kanaka makua a me na kamalii. Na Kamaa Paa Loa, e loaa no maanei e like me ka makemake ; a ina e loaa koke ka ino, he hiki no ke hoihoi mai. M. McINERNY. Kihi o Alanui Papu a me Kalepa. 750 3m 761