Ka Nupepa Kuokoa, Volume XV, Number 20, 13 May 1876 — Page 1

NUPEPA KUOKOA :

KE KILOHANA POOKELA NO KA LAHUI HAWAII.

BUKE XV. HELU 20. HONOLULU, POAONO, MEI 13, 1876. NA HELU A PAU 754.

MAIKAI KA HOI KA PAPA !

— A ME —

Ka Laau o kou Hale ! No Hea la ?

KA I NO HOI NO KAHI O

WAILA MA !

Nana aku no hoi ia la,

OHI KA IO O KA LAAU O MAKAWAO, i ka ua mea o ka nani o

Na Papa, Na Laau

— A ME —

NA PONO KUKULU HALE

O NA ANO NO A PAU,

— MA KE KIHI O —

Na ALANUI PAPU a me MOIWAHINE,

...... Honolulu ......

MALAILA E LOAA AI E LIKE ME KA makemake, no ke

Kumukuai makeponoloa. PAPA, PAPA, PAPA

Na PAPA huluhulu,

Na PAPA manoanoa, Na PAPA i kahiia, Na PAPA kepa,

PAPA holo keokeo, PAPA holo ulaula.

NA LAAU! LAAU!

NA KUA.

NA KAOLA, AAHO,

MOLINA,

PEAPEA, PINE HULUHULU,

PINE I KAHIIA,

Na Papa a me na Laau Ulaula ! PILI ULAULA

PILI KEOKEO, PANI PUKA,

PANI PUKA ANIANI IPUKA ANIANI,

OLEPELEPE.

PENA O NA ANO A Pau

Hulu Pena mai ka liilii a ka nui !

AILA PENA ! AILA HOOMALOO,

WANIKI, PATE

NA LAKO

o kela a me keia ano. NA AMI-PUKA HALE,

NA AMI-PUKA PA.

ANIANI !

Pepa Hale me na lihilihi

E LOAA NO MALAILA

KA PAAKAI Helu 1,

O KAKAAKO a me PUULOA

No ke Dala kuike, e loaa no na mea a pau i haiia ae la no ke kumukuai emi loa.

O na kauoha a pau mai Hawaii a Niihau, e loaa'ku ana ia lakou, e hooko koke ia mai ana no ia me ka lawa pono.

E kipa nui ilaila, i ike i ka oiaio

749 3m 760

Make i Aloha nuiia.

E KA NUPEPA KUOKOA E ; Aloha oe :—

Ma kou ahonui a me ka lokomaikai hoi o kou Lunahooponopono, e ae mai ia'u e hoike aku ia no, no keia wahi moolelo kaumaha a me ka popilikia i haulehia mai maluna o'u, oia hoi keia i haiia malalo iho :

Aia ma ka la 14 o Aperila iho nei, a ma ka hora 2 1/2 o ka auina la, ua kiiia mai la o Miss Jeria Kuahu, ko'u kaikamahine hanaukahi, e na lima menemene ole o ka make, a ua maneleia aku la ma kela aoao o ka lua, a ua haalele mai i na makua, na pokii, e uwe a e kumakena aku ma keia ao. Ua hanauia oia ma Waiohinu Kau, Hawaii, ma ka la 29 o Novemaba 1862. A o ka nui o kona mau la ma keia ao, he 13 makahiki, 4 malama, 11 la a me 14 1/2 hora, a kuu aku la kona luhi, a hoi aku la i ka opu o ka honua, kahi e hele nei ko keia ao a paa, i ka hopena awaawa o ka make i oleloia, " E ka make, auhea kou hueloawa, e ka lua, auhea kou lanakila ana ?" No laila, ua haku iho au i wahi kanaenae nona malalo iho nei : He u he aloha no Juria Kaahu, Kuu keiki — e kuu keiki hoi, Kuu keiki mai ka malu hale — e, Mai ka malu hale la o Waiohinu, Kuu keiki mai ka ua Haao — e, Ke lele ae la mauka o Aua ulele, Lele pu ka ua me ka makani — e, Kuu Keiki mai ka wai nauke a Keoua, Mai ka wai lele maopu i ka ha — e, Oia wai a kaua e auau ai, Kuu keiki mai ka ua Haao o Haleumiumi, E uumi iho ana i ko aloha aole e nalo, Ua haina ia mai e Kaweloahi — e, Ka wahine kui lei pua o Haona, Ua lilo kuu keiki i ka ia kaka ola — e, Kuu keiki mai ka ua loku mai i ka nahele, Mai ka pali kiekie e Pakua, Ke kakua mai la ka ohu i ka nahele, Aloha ia uka a kaua e noho ai — e,

Auwe kuu keiki hoi — e. Kuu keiki mai ka la wela o Naohulelua, Elua kaua i ka malu o ka Inia, Ke wehe mai la i ka lau o ka hale — e, Hele oe i ke ala koi-ula a Kane, Kuu keiki mai ka wai o Paula, O ia wai a kaua e auau ai, Aloha ka lae o Kimo nana i ka makani, Aloha ka plu niu nee o Honuapo, Aloha o Kamilo kahi a kaua e noho ai, Aloha ka maile aala o Hana, O ia alanui a kaua e hele ai,

Kuu keiki — e, kuu keiki ho—i. Kuu keiki mai ke kula wai ole o Kamaoa, Aia ka wai la i ka maka o ka opua, Ke hanini ae la i ka maka o ka lehua, He lehua ke aloha puni i kuu kino, Ke haale nei hanini i kuu manawa, Kuu mea pono ole minamina he keiki, Ua kii mai au ka mea nana i hana, Kuu keiki mai na lae loloa o Kona, Mai na aa hauliuli o Kapalilua, Oia one hanau o ka makua — e, Aloha Kapua kahi a kaua e noho ai, Aloha ka ulu niu moe o Niuaou, Aloha ka lae au o Hanamalo i ke kai, Aloha ke kawelu holu o Lanihuli E peahi mai ana iloko o ke ana o Kulukahi Huli ka uhane nana i ka opua.

Kuu keiki — e, Kuu keiki hoi. Kuu keiki ma ka wai kui a Kekele, Oia wai a ka ilio i inu ai — e, Inu aku la ka uhane i ka ua naulu, Ulu mai ke aloha puni kuu kino, Loaa ka ukana a loko e hana nei, Hana ke aloha me he mikini mahu la, E hoomalo ana i kuu nui kino,

Kuu keiki — e, Kuu keiki hoi. Kuu keiki mai ka pali kapu a Keoua, Mai ke kai hawanawana e Kii, Mai ka ua poo nui o Alanapa, Po ke aloha i na ulu a Weu — e, Weliweli ka elelele a ka make i kii mai ai E kohi aku ana au i ke kaula gula, A paa aku ana i ke kaula dala,

Kuu keiki — e, Kuu keiki hoi. Kuu keiki mai na hau o Maihi, Mai na waa huli lua i ke kakahiaka, Oia kai malino a kaua e holo ai, Kuu keiki mai na moku lewa i ke kai Mai na ale huli loa o Alemihaha, Oia kai koo-u a kaua e holo ai, Kuu keiki mai ka hono o na moku, Make kuu keiki la kaawale oe, Hele oe i ke ala hoi ole mai, Noho au me ka u, me ka minamina, Me ke aloha pau ole ia oe No ka nui o kau mau hana maikai, Kuu keiki mai ka lae loa o Kalaau, Nana aku kaua o Laeahi, Kau ka laau ena o Kaimuki, He maka holo ia no na moku,

Kuu keiki — e, Kuu keiki hoi. Kuu keiki i ka la kanaka nui o Honolulu, Mai ka ulu moku iwaho o Mamala, Oia aina makamaka ole a kaua e noho ai, Hookahi no makamaka o na lima, Kuu keiki mai ha hale a ke dala, Mai ka ai uwahi ole a ka haole, Mai ka ia leo nui o Ulakoheo, Mai ka piha kanaka i Aina-hou, Mai ka huikau a na kua i ka Nekina,

Kuu keiki — e, Kuu keiki hoi. Kuu keiki mai ka pele kuilua o Kaumakapili. Oia hale o ke Akua a kaua e hele ai,

o oe o kaua pu ilaila, E uhai e holo ana i ka pono o ka Haku, Mehameha ka hale o ke Akua aole oe, Owau hookahi ia e hele nei, E hui mai e, kuu keiki — e, Kuu keiki mai na ale hulilua o Pailolo, Oia kai loaa kana e holo ai, A ka makani hoolaa i ka ihu o ka moku, Kau aku ka ihu o ka moku i Kekaa — e, Kaa ka ihu o ka moku o i ka makani, Makani aheahe ka leo o kuu keiki Makani ahiu o Puukoae — e, Aloha ka ia hala o Kahului, Oia one malihini a kaua e hehi ai, I kupa ai kaua ia aina malihini, A hiki mai ke aloha e uwe no au — e, Kuu keiki i ke kula welawela o Kamaomao Oia kula anapa i ka la a kaua e hehi ai, Hehi kaua i ka Hekuawa o Wailuku — e, Oia kaona hanohano a kaua e noho ai, I noho ia ai e kaua a kupa. Me he ipo aloha'la ia'u o Kanaha me Manoni, Oni ke kuahiwi o Haleakala i ka lani — e. He lani oe, he hiwahiwa na'u, E hoi mai — e, Kuu keik = e, Kuu keiki i ka la kanaka nui o Wailuku, Mai ka ia iniki i ka Makeke, Mai ka piha kanaka i ke kahawai, Aloha ka lua kahi a kaua e noho ai, Aloha ka wai o Waiale i ke kula, Oia wai au e auau ai — e, Auau aku la ka uhane i ka wai lani, Hoomaha aku la oe i ka Paredaiso, Me na puali anela Hemolele — e, Ke hosana 'la oe ma ke alo o ke Keiki Hipa Ka palena hope o ke ao nei. Auwe kuu keiki — e.

Mrs. KALEHUAWEHE, G K KOALII. Kapuukolo, Mei 8. 1876.

Ke Kau Ahaolelo o M. H. 1876.

LA HANA 6 — Poalima, Mei 5.

Halawai ka Hale ma ka hora 10 kakahiaka. Peresidena ma ka noho. Pule ia e ke Kahunapule. Heluheluia ka moolelo o ka la i hala, a aponoia.

HELUHELUIA NA HOOPII A WAIHOIA.

Na Mr. Aholo, mai Lahaina mai, e hoopau loa i ke kanawai hookamakama. Na Mr. Nakaleka mai Molokai, e ku-e ana i ke Kuikahi Panailike, i ka aie miliona, pepa dala, aole e haawi dala no ka Hoopae Lima Hana, hale alii a me ka mokuahi hou ; e hoopauia ke Kakauolelo alua o ka Aha Kiekie ; aole hoi e haawiia i haawina no ka hookomo ana mai i na manu o na aina e. Na Mr. Helekunihi mai Keanae mai, e hookaawaleia i $600 no ke alanui mai Keanae a hiki i Haiku. Na Mr Pilipo mai Koolauloa mai, e hoonoa i ke kohoia ana o J L Naili ; mai Waialua mai, e hoonoa i ke kohoia ana o S M Naukana. Na Mr. Aholo, mai Lahaina mai, e hoonoaia na kai lawaia konohiki. Na Mr. Kanealii, mai Wailuku mai, e ae ia e wehe i ona hale leta okoa no Waihee. Na Mr. Birch, mai Wailuku, e lapaau wale na kauka Hawaii me ka laikini ole. Na Mr Mahoe, mai Hilo mai, e aeia na paahao e hana ma ko lakou mau wahi i hoahewaia. Na Mr. Birch, mai Wailuku mai, e hanaia ona kanawai no na paahana. Na Mr. Halstead, mai Makawao mai. e hoopau loa i ka aie miliona a e kokua ana i ke Kuikahi Panailike. Na Mr. Pilipo, mai Kona Akau mai, e hoopau loa i ke kanawai aie miliona.

Heluhelu mua mai o Mr. Preston i kana bila e hoopau loa ai i ke Kanawai aie miliona dala. Waihoia no ka heluhelu alua.

Heluhelu mua mai o Mr. Birch i kana mau bila, e hoopau loa ai i ka auhau kino a me ka hoololi i ke kanawai o na luna pa aupuni.

Waiho mai o Hon S K Kaai he olelo hooholo, e hoopau ae i elua lala o ke Komite o na aha hookolokolo, a e hookomo i elua mau alii. Hooholoia. Koho ka hale ia Hon J Moanauli a me J P Parker ma kahi o D W Kaiue a me L Kaina.

Hoolaha mai o Hon D W Martin e lawe mai ana ia he bila e hoololi ai i ka Pauku 1 o ka mokuna 41 o ke Karaima, e pili ana i ka mea haawi wai ona.

Hoolaha mai o Mr. Birch e lawe mai ana ia he bila e hoololi ai i ke Kanawai laikini awa o 1870.

Hoolaha mai o Mr. Lilikalani he bila kana e hooponopono ai i na hora o na paahana i e iwa wale no hora hana.

Waiho mai o Mr. Kauai he olelo hooholo e noi ana i ka makai o ka Hale e hoolako mai i na hoa pakahi me 100 poo leta. Hooleia.

Hapaiia ka noonoo i ka hana i hoopanee ia i nehinehi, oia ka hoopanee loa i ka olelo hooholo e ku-e ana i ko na kuhina koho ana iloko o ka Hale.

LA HANA 7 — Poaono Mei 6.

Halawai ka Hale i ka hora 10 A. M. e like me ka hoopanee ana.

Heluhelu ia ka moolelo o ka la i hala a aponoia.

NA PALAPALA HOOPII.

Waiho mai ka Hon Aholo, he mau palapala hoopii mai Lahaina mai, e noi ana kekahi e hoopauia ka oihana Kahukula nui, a na na kiaaina, e malama ia mau oihana ; a e noi ana kekahi e hookuuia na kauwa hana e paa ana malalo o na palapala aelike ma na la kulaia a pau o ke aupuni. Waiho mai ka Hoa Mahoe he palapal hoopii mai Hilo, e hoopauia ke kula hoopololei o Keoneula.

Waiho mai ka Hon Birch he palapala hoopii mai Wailuku, e hoopii ia'e ka uku o na kumu kula i ka $1 00 no ka la.

Waiho mai ka Hon Pilipo he palapala hoopii mai Kona Akau, e waihoia mai ke Kuikahi Panailike imua o keia Hale Ahaolelo.

Waiho hou mai ka Hon Pilipo he hoopii mai na lepera mai o Kalawao, e noi ana e aeia ka poe mai i hiki ke malama ia lakou iho e hoi mai i na home.

Waiho mai ka Hon Kalaukoa, he palapala noi na Kahaleaahu, ke kauwa lunakanawai kahiko no ke aupuni, e hookaawaleia i $800 no ka malama ana i kona ola, oiai ke hoomaka mai nei kona makapo.

Hai mai ka Peresidena ua makaukau ka olelo hooholo no na lilo o ka ahaolelo no ke kakau poepoe ia, a o ka waiho wale aku no koe no ka apono ana mai o ka Moi.

Ma ke noi, ua kohoia ke Alii Leleiohoku Hons Aholo, Kahuila, a me Kalaukoa i komite no ka waiho ana'ku imua o ka Moi.

Waiho mai ka Hon Nawahi he olelo hooholo e ninau ana i ke kumu i hookuu aku ai ka Papa Hoonaauao i ke kumukula nui e holo ma na aina e, a haalele wale me ka hoohemahema i kana oihana. Waihoia a laweia mai ka Hoike a ka Papa Hoonaauao.

Waiho mai o Mr Aholo he olelo hooholo e ukuia ka elele o ka hale i $2.00 no ka la. Hooholoia.

Heluhelu mai o Mr Lilikalani no ka manawa mua loa he bila e hoololi ana i ka pauku 480 o ke Kanawai Kivila e pili ana i ka auhau kino. Waihoia no ka heluhelu alua ana.

Heluhelu mua mai o Mr Lilikalani he bila e hoololi ana i na hora hana o na kauwa i eiwa. Waihoia no ka heluhelu alua ana.

Heluhelu hou mai o Mr Lilikalani he bila e hoonoa ana i na kai lawaia a pau o keia paemoku. Hooholoia, no ka heluhelu alua ana.

Heluhelu mai o Mr Lilikalani, he bila e hoopau ana i ke kanawai i aponoia i Iulai 18, 1870, e pili ana i na koina i na waiwai o ka poe i make. Waihoia no ka heluhelu alua ana,

Waiho mai o Mr. Nawahi he olelo hooholo, e hoole ana i ka mana koho o na Kuhina maloko o ka Ahaolelo. Kapaeia.

Waiho mai o Mr. Kauai, he olelo hooholo, e kauohaia ka Makai o ka hale, e hoihoi hou aku i na pono kakau a pau — inika, peni, a pela'ku, no ka mea, ua kue ia ka olelo hooholo e noi ana no na poo leta, maloko o ke kumu hooemi lilo, a he mea pono e hoomauia ia mea, ka hoemi ana i na lilo, oiai he mau lilo ko keia mau mea a pau. Hoopanee loa ia.

Waiho mai o Mr. Mahoe, he olelo hooholo, e ukuia ka Maheleolelo i $5. no ka la hookahi.

Hoololi mai ka Hon. Kaai, i $10. no ka la, Hooholoia ka hoololi a me ka olelo hooholo.

Hoolaha mai o Mr, Pilipo, he bila e hoololi ana i na Pauku 4, 20 a me 45 o ke Kumukanawai.

Ma ke noi, ua hoopanee ka hale.

LA HANA 8—Poakahi Mei 8.

Halawai ka Hale ma ka hora 10 A. M. e like me ka hoopanee ana.

Peresidena Hon Godfrey Rhodes ma ka noho.

Pule ia e Rev M Kuaea.

Heluhelu ia ka moolelo o ka la i hala, a hoaponoia.

HELUHELUIA NA HOOPII A WAIHOIA.

Na Mr. Aholo, mai Lahaia, e hoemiia ka auhau lio i 50 keneta. Na Mr. Nawahi mai Puna mai, e hoemi ka auhau lio i 50 keneta. Na Mr. Aiwohi, mai Kohala mai, e hoopauia ka auhau o na lio malalo o elua makahiki ; e hoopau loa i ka medala ilio ; e hoopau i ke kanawai hookamakama ; na

kekahi kahunapule i komo i lunamakaainana e pule mamua o ka hoomaka ana o na hana. Mai Kohala hou mai no, e hoopau loa ia ka bila aie miliona ; e a pono aku i ke Kuikahi Panailike ; e hoomauia no na dute o na waiwai komo mai ; mai ae hou aku i na hoopae lima hana. HOIKE KOMITE.

Hoike mai ke Komite o na aha hookolokolo no ka hoopii mai Ewa a me Waianae mai e noi ana e hoonoa i ke kohoia ana o ko lakou luna, e noho no ma kona noho. Ae ia. No ka hoopii mai Molokai mai e ku-e ana ia Mr. D W Kaiue, e noho no ma kona noho. Ae ia. No ka hoopii mai Wailuku mai e ku-e ana ia Mr. L W P Kanealii, e noho no ma kona noho. Ae ia.

Hoike mai ke Komite hooiaio bila kanawai ua kakau inoa ka Moi i ka olelo hooholo no na lilo o keia ahaolelo. Ae ia.

Kamailio mai ka Hon J M Smith ka Hope Peresidena o ka Papa Hoonaauao, ua makaukau ka hoike a ka Papa Hoonaauao. Ma kona noi, ua waihoia e pai.

Heluhelu mua mai ka Hon H Kuihelani he bila e hoohana ai i na paahao i hoopaiia malalo o na malama ekolu, e hana ma na wahi i hoopaiia ai.

Waiho mai o Hon S K Kaai he olelo hooholo, aole e ohi na lunamakaainana i hoopii ia i na uku, aia a pau ka hookolokoloia ana. Hooholoia.

Hoolaha mai ka Hon S K Kaai he bila e hoololi ai i ka mokuna 58 o ke Kivila.

Na Mr. Birch, he bila e hoololi ai i ka pauku 517 o ke Kivila e pili ana i na dute maluna o ua waiwai komo mai.

Heluhelu mua mai o Mr. Kanealii he bila e hoololi ai i ka pauku 1417 o ke Kivila ; na Mr. Matina, he bila e hoololi ai i ka pauku 1 mokuna 41 o ke Karaima.

Hoolaha mai o Mr. Nahaku, he bila e pili ana i ka opiuma.

Heluhelu mua mai o Mr. Birch he bila e hoololi ai i ka pauka 14 o ke kanawai o 1870, e pili ana i na laikini awa, oia hoi i 3 laikini awa no Honolulu, 2 no Lahaina, Wailuku a me Hilo pakahi ; a i 1 no na apana e ae.

Hoolahaia mai keia mau bila malalo iho : Na Mr. Birch, he bila hoopaa loa ai i ka pauku 1 mokuna 41 o ke Karaima. Na Mr. Aholo, e hookuuia na paahana ma ua la kulaia a he bila e hoololi ana i ke kanawai hookamakama. Na Mr. Kanealii he bila, e hoopau loa i ka pauku 1420 o ke Kivila. Na Mr. Mahoe he bila, e hoopau loa'i i ka pauku l mokuna 34 o ke Karaima. Na Mr. Kamauoha, he bila e hoopau ai i na pauku 2 a me 3 o ke Kanawai i hooholoia i Iune 22, 1868. Na Mr. Lilikalani, he bila e hoopau loa ai i ka pauku 1418 o ke Kivila.

Waiho o Mr Pilipo he olelo hooholo, e hoopaaia na lilo o ke aupuni no na makahiki elua e hiki mai ana a i ka $800,000. Waihoia ma ka papa a hiki i ka wa e lawe ia mai ai ka Hoike a ke Kuhina Waiwai.

Hoike mai o Mr Helekunihi he olelo hooholo, e hoolako mai ka Makai o ka Hale, i na hoa o ka Hale me 90 poo leta palua keneta. Ae ia.

Hapaiia na hana o ka la, oia ka heluhelu alua ana i ka bila e hoopaa loa ai i ka Pauku 4 o ke Kinawii o 1874, oia ke kanawai Aie Miliona Dala. Waihoia no ke kakau poepoe a heluhelu akolu i ka Poakolu.

Heluhelu alua ia ka pila e hoopau loa ai i ka Pauka 480 o ke Kivila, e pili ana i ka Auhau Kino. Waihoia i ke Komite Waiwai.

Heluhelu aluaia ka bila e hoololi ai i ka pauku 233 o ke Kivila e pili ana i na luna pa aupuni. Waihoia i ke Komite o na aha hookolokolo.

Heluhelu aluaia ka bila e hooponopono ai i na hora hana i 9 hora hana o ka la. Waihoia i ke Komite o na Aha hookolokolo.

Heluhelu aluaia ka bila e hoonoa ai i ka lawaia akea ana maloko o keia aupuni, a ma ke noi, ua komite ka hale no ka noonoo ana. Noho o Hon S M Naukana ma ka noho. Ma ke noi, ua noonoo pakahiia ma na pauku a hooholo pakahiia.

Hoopauia ke komite a hoopanee ka Hale me ka waiho o na noi e waiho i ke Komite o na aha hookolokolo i ka bila a me ke noi e kakau poepoe.

LA HANA 9.— Poalua, Mei 9.

Halawai ka ahaolelo ma hora 10 A M e like me ka hoopanee ana. Heluheluia ka

moolelo o ka la i hala a hooholoia. HELUHELUIA NA HOOPII A WAIHOIA.

Na Mr Aholo mai Lahaina mai, e hookuuia ka auhau waiwai paa o na lepera. Na Mr Birch mai Wailuku mai, e uku na hui panihakahaka i laikini e like me na hui e ae. Na Mr Mahelona mai A J Matina mai, e uku aku ka Luna Leta Nui iaia $148 no kana hana i kekahi manawa i hala. Na Mr Nawahi mai Puna mai, e hoopauia ka auhau medala ilio.

Waiho mai o Mr Aholo he olelo hooholo e hoopaaia ka manawa hana o keia hale i ka hora 10 A M o kela a me keia la. Hoololi mai ka Hon S N Kakela a ka hora l P M o kela a me keia la halawai. Hooholoia

Hooholoia ka olelo hooholo me ka hoololi.

Hoolaha mai o Mr. Waterhouse e lawe mai ana ia he bila e hoololi ai i ka pauku 215 o ke Kivila, a e hoopau loa i ka pauku 216 o ke Kivila.

Heluhelu mua mai o Hon S K Kaai he bila e hoololi ai i ka mokuna 58 o ke Karaima. Waihoia no ka heluhelu alua.

Waiho mai o Mr. Birch he olelo hooholo o na bila a pau i holo ma ka heluhelu mua e waihoia na ke Komite Pai. Hooholoia.

Heluhelu mua mai o Mr. Martin i ka bila e hoololi ai i ka pauku l o ka mokuna 37 o ke Karaima. Waihoia no ka heluhelu alua.

Heluhelu mua mai o Mr. Helekunihi he mau bila malalo iho : e hoemi ana i ka auhau lio i 50 keneta ; e hooponopono ana i na paahana ma na mahiko a e manaoia ka 9 hora hana, he la holookoa ia ; e hookomo mai i na waiwai ekalesia me ke dute ole. Waihoia no ka holuholu alua.

Hoolaha mai o Mr. Helekunihi he bila e hooulu ai i ka lahui mailoko aenei o ka aina.

Heluhelu mua mai o Mr. Kanealii, he bila e hoopau loa ai i ka pauku 1420 o ke Kivila. Waihoia no ka heluhelu alua.

Waiho mai o Mr. Preston he olelo hooholo e hoihoiia na dala loaa a pau o ke aupuni i ka waihona dala a ke aupuni. Waihoia i ke Komite Waiwai.

Waiho mai o Mr. Preston he olelo hooholo e noiia aku ke Kuhina Waiwai e waiho mai i mua o keia Hale i ka aelike mawaena o ke aupuni a me ka haole nana e hoolimalima nei i ka hotele. Hooholoia.

Hoolaha mai o Mr. Kauai, he bila e hoololi ai i ka pauku 1331 o ke Kivila, i aponoia i Iulai 8, 1870.

Waiho mai o Mr. Kaine, he olelo hooholo, e ninauia aku ke Kuhina Kalaiaina, no keaha la i hoolaha ole ia ai ke kanawai e hoololi ana i ka pauku 1035 o ke Kivila, a aponoia o ke Alii ka Moi, i ke kau o 1874. Ua waihoia ma ka papa, a noonoo hou i ka la apopo.

Waiho mai o Mr Pilipo, he olelo hooholo, e kauoha ana i ke Kuhina o ko na aina e, e haawi ae i ke kope o ke Kuikahi Panailike, i ke Komite Pai, no ke pai ana ma ka olelo Hawaii a me Enelani, a e hoolako mai i na hoa pakahi me elima kope. Hooholoia.

Hoolaha mai o Mr Mahoe, he bila e hoopau loa ai i ka mokuna 15 o ke kanawai, i aponoia i ka la 23 o Iulai 1874.

Waiho mai o Mr Kalaukoa, he olelo hooholo, e kauohaia ka Luna Paahao, a Ilamuku paha, e waiho nui i ka hoike o na loaa o na paahao i hoolimalimaia. Waiho ia a noonoo pu me ka hoike a ke Kuhina Waiwai.

Hoolaha mai o Mr. Kaina, he bila e hoololi ai i ka pauku 5, mokuna 13 o ke Karaima.

Waiho mai o Mr Preston, he olelo hooholo, e noiia aku ke Kuhina Kalaiaina, e hoike mai imua o keia hale, i na loaa a me na lilo o ka mokuahi Kilauea, iloko na makahiki eha i hala. Hooholoia.

Hapaiia ka hana i hoopaneeia inehinei, oia ka ninau, e kakau poepoeia ka bila a me ke noi, ua waihoia no ke kakau poepoe.

Ninauia ke noi hope, a hooholoia.

Hoopanee ka hale, a halawai hou i ka la apopo, hora 1 P M.

LA HANA 10 — Poakolu, Mei 10.

Halawai ka ahaolelo i ka hora 1 auina la, e like me ka hoomaka ana.

HELUHELUIA NA HOOPII A WAIHOIA.

Na Hon S K Kaai. mai Kona Akau mai, e noi ana e hoonoa ke kohoia ana o G W Pilipo. Na Mr Kalaukoa mai Honolulu mai, e aeia na kahuna Hawaii e lapaau