Ka Nupepa Kuokoa, Volume XV, Number 45, 4 November 1876 — Page 1
NUPEPA KUOKOA :
KE KILOHANA POOKELA NO KA LAHUI HAWAII.
BUKE XV. HELU 45. HONOLULU, POAONO, NOVEMABA 4, 1876. NA HELU A PAU 779.
MAIKAI KA HOI KA PAPA !
— A ME —
Ka Laau o kou Hale ! No Hea la ?
KA I NO HOI NO KAHI O
WAILA MA !
Nana aku no hoi ia la,
OHI KA IO O KA LAAU O MAKAWAO, i ka ua mea o ka nani o
Na Papa, Na Laau
— A ME —
NA PONO KUKULU HALE
O NA ANO NO A PAU,
— MA KE KIHI O —
Na ALANUI PAPU a me MOIWAHINE,
...... Honolulu ......
MALAILA E LOAA AI E LIKE ME KA makemake, no ke
Kumukuai makeponoloa. PAPA, PAPA, PAPA
Na PAPA huluhulu,
Na PAPA manoanoa, Na PAPA i kahiia, Na PAPA kepa,
PAPA holo keokeo, PAPA holo ulaula.
NA LAAU! LAAU!
NA KUA.
NA KAOLA, AAHO,
MOLINA,
PEAPEA, PINE HULUHULU,
PINE I KAHIIA,
Na Papa a me na Laau Ulaula ! PILI ULAULA
PILI KEOKEO, PANI PUKA,
PANI PUKA ANIANI IPUKA ANIANI,
OLEPELEPE.
PENA O NA ANO A Pau
Hulu Pena mai ka liilii a ka nui !
AILA PENA ! AILA HOOMALOO,
WANIKI, PATE
NA LAKO
o kela a me keia ano. NA AMI-PUKA HALE,
NA AMI-PUKA PA.
ANIANI !
Pepa Hale me na lihilihi
E LOAA NO MALAILA
KA PAAKAI Helu 1,
O KAKAAKO a me PUULOA
No ke Dala kuike, e loaa no na mea a pau i haiia ae la no ke kumukuai emi loa.
O na kauoha a pau mai Hawaii a Niihau, e loaa'ku ana ia lakou, e hooko koke ia mai ana no ia me ka lawa pono.
E kipa nui ilaila, i ike i ka oiaio
775 3m 766.
NA PALAPALA I KE KUOKOA.
Haiolelo a ka Luna o Kona Akau ma ka la 4 o Iulai ma Kahehuna.
E NA MAKAMAKA A ME NA HOALOHA :
Ua ili mai maluna o'u ka hanohano, a ka Luna Hoomalu o ka la, i kahea mai nei ia'u, e kukai olelo aku, ma ko makou aoao, o na Luna Makaainana, o ko kakou Ahaolelo Kau Kanawai. O makou hoi, ke mahalo aku nei i ka hana a na keiki Amerika, no ko lakou hapai ana, e hoohiehie i ka la o ke kuokoa ana o ko lakou aina.
Ke hoomanao nei au i kekahi hana maikai a ko Amerika Huipuia poe i ko Hawaii nei, ma ko lakou hoonaauao ana mai. A ma ia hoonaauaoia i loaa ai i ko kakou wahi aupuni uuku, me he aupuni nui la iwaena o na aupuni nui o ke ao nei e kuokoa ana me ka lanakila. A me ia hoonaauaoia ana no hoi, i loaa ai ia makou, he mau Luna Makaainana no ko kakou Ahaolelo Kau Kanawai.
Ke hoomanao nei no hoi au, me ia hoonaauaoia ana no, ka mea nana i hookiekie ae i ka Lahui ponoi o Hawaii, ma ke kulana like me na Lahui nui o ke ao nei, ma ka nee mua ana, imua i ka naauao, ka noho pono ana a me ka maluhia.
Ma keia mea, he mea pono ia'u ke olelo aku ia oukou e o'u hoa Lahui Hawaii ; ua pono ia oukou ke apo aku i ko Amerika poe e noho pu nei me oukou, i mau makamaka maikai, kuilima pu ana me na hana maikai a me ka pono io ; e like me ka pono io a oukou i haawi aku ai no na Lahui makamaka e ae e noho pu nei me kakou.
Ke mahalo aku nei au i ko Amerika poe e noho nei iwaena o kakou, i ko lakou hoomanao no ka puni ana o na makahiki he haneri, o ka noho aupuni kuokoa ana o ko lakou aina, a i ko lakou kono ana mai hoi ia kakou a pau, e komo pu mai i na hauoli ana, a lakou i hapai ai no ko lakou aina hanau.
Ma ka aoao o na Luna Makaainana, aole au e hoopoina ana i ka hoomaikai nui ana aku i ka Peresidena o Amerika Huipuia, ma o kona Luna Kiekie la, i olelo iho nei imua o kakou, he makamaka maikai, a he hoaloha no kakou. Ano, e ka Luna Hoomalu o na hana o ka la, ina ko makou aoao ko na Luna Makaainana, ke haawi aku nei au i na hoomaikai ana aku ia oe, ma kou ano lokomaikai a oluolu, i kou kono ana ae ia makou, na Lala o ka Ahaolelo, e huipu mai i na hauoli ana, a oukou i hapai ae nei no ko oukou aina. A e oluolu pu mai hoi i ka hookuu ana mai ia'u, me ka mahalo ana aku ia oe, a me na mea hoi a pau i kokua pu aku ia oe no na hana o keia la.
Aloha i Ka ainu hanau.
E KA NUPEPA KUOKOA E ; Aloha oe :—
Ma ka ka la 22 o Aug. 1876, ua haawi pio aku la au ia'u iho ma ka lima o ke aupuni, no ka mai hookaawale ohana i loohia mai maluna o'u, oia hoi ka mai lepera, a ua haalele aku i ka ike ana i ka aina hanau a me na ohana a pau, ua laweia i Honolulu, a hoonohoia ma ka Halemai Lepera. Ua noho malaila no na pule elua, a mahope lawe loa ia mai no Kalawao nei, ma ka la 11 o Sepatemaba, A puka maanei ma ka la 15.
Ma ko'u ike ana i ke ano a me ke kulana o keia aina, a me na helehelena a pau, he aina maikai no, he kiekie nae na pali ma ke kua mai o keia wahi. He la ikaika a me ka makani. He ano huihui no i kekahi wa. He ulu maikai no na mea kanu ma Kalawao nei, aka, makai o Kalaupapa a me Ilioapii, he maloo ino ka aina.
Oiai au e noho nei ma keia aina, ua lawa hoi i ka ai a me ka ia a ke aupuni, aka, ua oi loa aku ke aloha i ka ohana, mamua o keia mau mea elua, nolaila, ke haawi aku nei au i ko'u aloha i na ohana, a nau ia e ke " Kilohana" e alakai aku imua o lakou a pau, i kuilima pu aka hoi oe i ka waimaka no ko'u one hanau. O ko'u noho ana ma keia wahi, ua maopopo, he noho ana wale no i ma-
naoia no ka pilikia a me ke kaumaha, a he kuleana pono hoi na'u e puana ae ai i keia mau lalani mele e i mai ana, " Hu wale mai no ke aloha, O ko'u aina hanau."
Pela no ka hakukoi mau ana o ko'u puuwai, no ke aloha i ka aina hanau a me na ohana a pau ma ke kino, nolaila, e o'u ohana ma Maumau, Hilo a me Makuu i Puna paia ala, aloha no oukou a pau loa : Eia no au ke hoomanawanui ae nei i ke kau o ka pilikia a me ke kaumaha nui no na eha e hoopuni nei i ko'u kino holookoa. Aka, ina he aloha ko ke Akua, e hoopakele ia'u a me ko'u mau hoa lehulehu e noho pilikia nei ma keia wahi aupuni poepoe, alaila, e hoomaikai mau loa ia na lani, a e mahalo palena ole ia ka Mea Mana Loa.
W. S. KIPI.
Kalawao, Molokai.
Pule ikaika a ke kanaka pono.
Ia Adamu Kaulehua i haalele aku ai i ke Taona o Honolulu, no ka huli hoi ana i ka home olu o Waianae-uka, Ekolu nae lakou i ulele aku ai ma na lio. A no ka haule ana o ke kaula lio a Kaulehua, nolaila, huli hope aku la ia, a haalele kona mau hoa iaia, Oia paha ka mea i olelo ia, haalele koa kanaka i ka hoa, haule i ka hope moku la, naue hookahi aku la ia mahope ma ke alanui hoi e iho aku ai ma Kolekole. Napoo iho la ka la, ma Puupouwela, Lihue. Iaia i pii aku ai pulu mai la i ka ua paa mai ia i ka ohu, uhi mai la ka pouli, a hiki aku la ia i Pii o Ninia o Kolekole hiki ole ke hele aku ka lio, lele iho la i lalo, aaki loa iho la ka pouli ; pahee iho la ke alanui, a malaila iho i manao ai e noho ; ke noke hala ole nei ua paka ua pulupe iho la, aohe wahi kapa, uhi a e la i ka palelio maluna, me ka manao e malu aohe nae wahi malu iki ; nee mai la ke anu, me he wai hau la ka hele a huihui o ke kino. Ua manao no e haalele mai i keia noho ana, aka, hookahi ana manao o ka pule ia Iesu — oia kana hana ia po a ao, a nana no i kokua mai i kana kauwa a hala ia po, puka mai la ka la, pela no i pakele mai ai ke ola. Ke olelo nei oia " ina paha he kanaka pule ole au i ke Akua, ina paha ua make wau." Nolaila, ke kahea nei oia i na hoa kanaka a pau, mai Hawaii a Kauai, e pule nui i ke Akua no ka mea, he poe pilikia wale no kakou a pau ; aole hoi no kakou keia ola e ola nei nona mai no, a i pule aku kakou ia ia me ka oiaio, aole oia e hoonele mai.
Owau no me ka mahalo,
ADAMU KAULEHUA.
Puea, Waianae-uka, Oct. 9, 1876.
Mau Kahuna lapaau hoomanamana.
E KA NUPEPA KUOKOA E ; Aloha oe :—
Eia ma Punaluu, apana o Kau nei, he mau kahuna lapaau hoomanamana, o Kumiki k., a me Hana w., no Hilo mai laua, a malaila laua i hanau ai, a nui a oo iloko oia mau haua daimonio i uluhia e ka uhane ino, maluna o ko laua mau piko poo, a ua lilo laua i mau kumu ao na kekahi poe o ko makou kalana aina nei, e haku ai i mau manao hoopunipuni imua o ka lehulehu, a penei ke ano o ka laua hana ana i ka mai.
O Kumiki he kanaka kino puipui maikai oia, nona nei mau akua ana e pale nei o Kumukahi a me Palamoa, he mau akua lapaau keia nona, a penei e pule ai i ka wa inu awa a me ka wa hana, na aumakua i ka po, na aumakua i ke ao, pale ka po puka i ke ao, owau nei o Kumiki, hoomai ho ike, homai he mana, e ola ia'u i ka'u pulapula a kau i ka puaaneane, a kanikoo a palalauhala, haumakaiole o kau ola ia ia e ke akua, amama ua noa lele wale. Mahope iho o keia pule ana e inu ka awa a luna aku i ka mea mai. Ia wa e hai ai i ka ike no ka make a me ke ola. He puaa, he moa, aholehole, opae, amaama, luau, uala, a me ka awa a ma keia mea e ai ai ka lehulehu a me ka mai. Eia ka mea kapu, aole pono ke hoolei i ka iwi na ka ilio, ka pono loa, o ka malama i ka iwi a me na mea a pau a kiola i ke kai.
O Hana he kaikuahine ponoi no keia no Kuaiki, ua oleloia he wahine mana oia he ike, he akamai, no kana oihana he poi uhane ; ua nui a mahuahua kana mau mea i olelo ai e make. Ua manao loa kahi poe ua lilo ko lakou mau uhane i ke poi ia, aole nae i make ia poe a hiki i keia la a'u
e hai laula nei ma ke akea, o ka mana o ka mea nana i hana ka lani a me ka honua, ua hapa ia, oia ka Hana ka oi o keia mau la ma kekahi mea ua like no ka laua ano hana, o ka hipa o kahi mau mai a laua i lapaau ai, ua haalele i ka la i ka mea mahana, auhea la, iho la hoi ka ike o na hoopunipuni nui ? Ke manao nei au, aia i Puna i Kapoho.
E ka punahele, mai hoomahui oe i ka hewa, aka, i ka maikai no, oia ka ka buke nui hooweliweli i ao mai ai ia kakou, e nana mai kakou i keia mau diabolo aea haukae. Owau mau no me ka mahalo,
JOHN E. ZAKARIA.
Na mea hou o ka moku o ka Kaululaau.
O keia aina he aina keia i piha i na mea hou, a ka lehulehu e anoi iho ai, a welina iho ka naau.
No ka Ekalesia. Ke noho kuokoa nei keia Ekalesia, e like me ka Ekalesia o Kelina ; o Makalio o Kauaihilo i Oahu. Ua pau kona hui ana mai ka ahahui mokupuni o Maui mai. Na keia Ekalesia no i kono iho nui i haiolelo no lakou, oia o W L Lokai, me ko lakou lokahi ma ke koho inoa ana, no ka elua mea a lakou i koho ai, o Kealakaa, a me Lokai ; ua oi ko Lokai mau inoa hoahanau, kohoia.
No ke Kula Sabati. Ke holo nei keia Kula Sabati imua, ma ke alakai maikai ia e W L Lokai ke Kahu Kula Sabati. Ke hele nui nei na kanaka a pau i ke Sabati no keia hana maikai
No ka lawe leta ole. Oia no kekahi mea pilikia loa ma keia aina ; no ka mea ole nana e lawe hele na leta a kanaka a a puni keia aina, e like me ko Maui. No keaha la keia malama ole o ke aupuni i keia mokupuni i lawe leta ? O na leta a kanaka e noho nei, he ekolu pule hiki mai elua. O ka pono anei keia e nana mai oukou a me lakou la ae. E pono e kokua mai i lawe leta no makou.
No ka hale kuai. Hookahi hale kuai e ku nei ma keia mokupuni, no ka haole Gipikona. Na lole o kela ano keia ano, a me ka palena a me ka laiki. He laikini paha ko keia haole, aole paha ? E kuailo mai.
No ko la hoihoi ea. Ua malama ia keia la e na keiki o keia aina me ka makee no i ka maluhia o kona aupuni, me na lealea no. 1 Waipipii o Kaleponi ; na Nahinu. 2 Olelo uea, na W Nahinu. 3 Paikau lealea, na Mr Kaiama ; he 15 koa o ka puali. 4 Hapai kanaka na Ioane, hiki ole. O ka Peresidena nae o ka la, o Nahinu, nana i hoolako i ka ai, o ka i-a i kela hoa keia hoa no ia la ma ka lulu dala ana, o na keiki makee aina o keia wahi. Ua hele nui mai na makaikai he nui loa, na ai, a ua lawa a kau ka puu i ka wai a ka naulu. W S KAWAA.
Make i alohaia.
E KA NUPEPA KUOKOA E, Aloha oe :—
E oluolu oe e hookomo iho i keia wahi ukana ma kahi kaawale o kou mau kolamu, i ike mai ai na kini makamaka o ka mea i make, e noho ana ma ka la puka i Kumukahi, a ka welona a ka la i ka ili kai o Lehua. Ma ka la 31 o Augate, M. H. 1876, ua kii mai na lima menemene ole o ka make ia Ku ; ua piha ke kanaono o kona mau makahiki. He kanaka i aloha nuiia, a no ka nui o ko makou aloha ia ia, ua haku iho makou i wahi kanaenae nona, oia hoi keia malalo iho : Kanikau aloha keia ia oe e Ku Kuu kane mai ka malu hau o Kapohaku, Aloha ia wahi a kana e noho ai Auwe kuu kane hoi a, Kuu hoa o kahi anu e. Kanikau aloha keia ia oe e Ku Kuu kane i ka malu hale o Paukeole, Mai ka ua hehi mai mawaho o ka hale Auwe kuu kane hoi a, Kuu hoa o kahi anu e. Kanikau aloha keia ia oe e Ku Kuu kane mai ka hale anu o uka, Hale laumaia o Poauwai. Aloha kuu kane mai ka pii'na loa o Mahaawole Hoomaha aku kaua i Malualua Auwe kuu kane hoi a, Kuu hoa o kahi anu e. Kanikau aloha keia ia oe e Ku Kuu kane mai ka aialo o hale o Kaukeano, Mai ka ua luku mai iluna o Kaulu, Luuluu au i ko aloha e noho nei Auwe kuu kane hoi a, Kuu hoa o kahi anu e. Kanikau aloha keia ia oe e Ku Kuu kane mai ka lai o Haleanu, Mai na pihe ua lua i ka moana
mai ka i-a kuhea mai i na pali, Aloha ke kane ka hoapili o ke kino. Kuu kane mai ka po loloa o Kahooilo, Auwe kuu kane hoi a Kuu hoa o kahi anu e. Kanikau aloha keia ia oe e Ku Kuu kane mai ka pii'na o Leauhihala, Mai ke kula loa o Wailani Hoomaha aku kaua i Maunaaleo, Auwe kuu kane hoi a Kuu hoa o kahi anu e. Kanikau aloha keia ia oe e Ku Kuu kane mai na pali mahoe elua, Mai ka wai huihui o Manuhele, Oia wai awili pu no me ke kai, Mai ka i-a kuehu lepo o ka aina, Mai ka pii'na ikiiki o ka Lehua. Aloha ka bele kuilua o Kiona hou, Oia wahi a kaua e hele ai, E hoolohe ai kaua i ka pono o ka uhane, Auwe kuu kane hoi a Kuu hoa o kahi anu e, KUPENU w. Kanikau aloha keia ia oe e Ku Kuu makuakane mai ka uka anu o Kahalewai, Aloha ia hale a kaua e noho ai E lai ai kakou i ka po me ke ao, Elua hoi olua na makua He nui hoi makou na keiki, Auwe kuu makuakane hoi a Kuu hoa o kahi anu e. Kanikau aloha keia ia oe e Ku Kuu makuakane mai ka ua Kualau Aloha ka makua ka hoa pili o ke keiki, Kuu makuakane mai ka i-a hoohei kaha Auwe kuu makuakane hoi a Kuu hoa o kahi anu e. KALIULA K Onomea. Hilo, Hawaii. Oct. 25, 1876.
Na hunahuna Mea hou o na Aina e.
He kanaiwa kumamalima tausani elma haneri a me kanahakumamalima haumana kula o Nu Ioka i hoi ae ma na kula a pau o lakou ma ka la i hoomaka ai ke kulai keia makahiki. Puni naauao no ka haole.
Ke manaolanaia aku nei, e hiki kino ae ana ka Hooilina Emepera o Auseturia i Ladana ma kana huakai makaikai ia Enelani. A mailaila aku, e holo loa aku ana oia i Amerika Huipuia. O ka loihi o kona manawa ma keia huakai makaikai, e hooloihiia aku ana i Elua makahiki.
Ua hoike ae ka nupepa British Medical Journal i ka make ana o kekahi luahine nona na makahiki he 115. Ua noho keia luahine iloko o kahi hale pupupu, i na la pau o kona ola ana. Aole oia i mare iki a make wale aku la.
Ua manaoia, ua hiki aku i ka 15,000 na koa Rusia iloko o Serevia, a o kekahi poe o lakou, ua komo kino iloko o na puali koa Serevia, a o kekahi poe nui, ke ku makaukau nei o ke kaheaia mai.
I ka wa e kokoke ana o Kauka Desmoulins, ka oi o na Kauka akamai loa o Farani e make, aia hoi, ua poaipuniia ae la oia e na kauka kaulana a pau o Parisa, kona moe make, ka poe hoi i hele aku e u no kona make aku. Aka, oiai oia e moe ana, hoopuka moakaka mai la oia i kekahi mau huaolelo, me ka pihoihoi ole, a puana ae la, " Ke ku nei no a hele, a e waiho ana au mahope nei he ekolu mau kauka lapaau i oi aku ka ike i ko'u " Huli ae la kela a me keia e hoolohe, me ke ake nui e lohe pono ia aku ka inoa o ia mau kauka e hoopukaia mai ana. Eia kana pane, " O lakou no ka wai, ka hooikaika kino a me ka ai kupono. Ke makemake i ka wai, e inu no me ke keakea ole ia ; i ka hooikaika kino hoi, e hana mau ; a i ka ai hoi, e paina kupono, aole ka ai a oi wale aku mamua o ka palena kupono."
Ua koho iho o Rev. J. Milles i ka nui o na Iudaio ma ka honua nei, aia ko lakou nui ma kahi o 7,074,858. Aia ma Europa, he 5,226,853 o keia helua ; ma Asia, he 591,000 ; ma Aferika, he 792,000 ; a ma Amerika, he 450,000 ; ma na Panalaau o Beritania, he 15,000.
Ma ka heluna o na kanaka o ka Emepera o Geremania, i Dekemaba 1875 i hala, ua ikeia ua hiki aku ka nui o kona mau makaainana i ke 42,757,812.
Ma ke ahiahi o ka la a ka Moiwahine Isabella o Sepania, i haalele ai ia Farani no ka huli hoi i Sepania, ua kakau aku oia he palapala hoomaikai ia Peresidena Makamahone, no na lokomaikai a pau i pahola ia mai iaia iloko o ewalu makahiki o ka noho kuewa ana ma Farani.
Ua hoolaha ae ke aupuni o Rusia i kekahi papa kuhikuhi, e hoike ana i ka nui o na poino i ili aku maluna o kekahi o kona, mau makaainana a me na bipi. Ua manao waleia, aole i emi malalo o 170,000 mau ilio hihia hae iloko o ke aupuni holoakoa ; a i ka makahiki i hala aku nei, ua pepehi
iho lakou i na kino kanaka, he elua haneri ka nui, me ka helu ole ia o na bipi i pau ia lakou.
Oiai hoi e hookolokolo ia ana kekahi hihia imua o kekahi aha ma Nu Ioka, ninau aku la ka lunakanawai i ka makai, he Irelani oi ma ke ano o ka lahui, " I ka wa hea kou ike hope loa ana i kou kaikuahine ?" O ka manawa hope loa a'u i ike ai iaia, e kuu haku, ua awalu paha malama i hala aenei, oia ka manawa ana i hele ae ai i kuu hale, aole nae hoi au o kauhale. " No keia haina ano e, akaka ae la ka aha. Pane hou ka lunakanawai : ina pela, aole oe i ike i ko kaikuahine ia wa ?" " Aole e kuu haku, aole au malaila." Hu ae la ka akaaka a puni no ka keia wahi Irelani pane hoakaaka, aka, o ia okoa iho la no nae ko ke kanaka Irelani ano he puni kolohe hoakaaka o keia ano.
I ka makahiki 1872, mahope koke iho o ke kohoia ana o Samuel J Tilden i Kiaaina no ka mokuaina o Nu Ioka, a iaia hoi e huli kino ana i na helu o ka Poe Hui Apuka, o Nu Ioka, iloko o ka Banako, a ike oia i ka hewa, eia kana olelo mua : " Aia, loaa ia'u keia poe hui apuka, ua hewa maoli ! Ua nui ko'u luhi, aka, e hoomau ana au i ke alualu ia lakou a pau nui i ka hoopaiia, ina no e hala ana he mau makahiki ka nui, a a-e ana paha maluna o ka moana, e alualu ana no au."
Ua hiki kino ae ma ke kulanakauhale o Nu Ioka i ka la 30 o Sepatemaba o Hon. J O'Connor Power, he hoa no ka Ahaolelo o Beritania Nui me ka palapala hoomaikai a kanaka o Irelani i ka puni ana o na makahiki he haneri o ko Amerika Huipuia noho ana aupuni kuokoa, a e waiho aku ana i ka Peresidena.
Ma ka la 27 o Sepatemaba, ua haawiia aku i ke kulanakauhale o Nu Ioka, ke kii pohaku i kalaiia o Hon. W H Suwada i make. Ma ke alo o ua pohaku la, ua kakauia na huaolelo penei : " W H Seward," " Kiaaina" " Luna Senate o Amerika Huipuia" a " Kuhina Nui."
Ma ka la 23 o Sepatemaba, oia ka la hookahakaha nui o ka mokuaina iho o Peniselavenia ma ke kahua o ka Hoikeike Nui. He 260,000 ka nui o ka poe komo aku, a he 257,296 poe uku.
Ma ka make ana o James Lick, kekahi o na ona miliona o ka mokuaina o Kaleponi, ua waiho iho oia ma keia honua, he elua miliona ($2,000,000) e maheleheleia ma waena o kona mau hooilina, na ahahui manawalea a me kekahi mau hana nui ana i hapai ai e kaulana o kona inoa.
I ka wa kaua iho nei mawaena o Perusia a me Farani, ua hooliloia aku e ke aupuni o Amerika Huipuia na lako kaua waiho wale ma ka aoao hema hewa o ia aupuni i ka poe hoopukapuka no ke kumukuai he $8,000,000 a he $10,000,000. Ua ike nae no ke kumukuai o keia hoolilo ana, me ke kumukuai o ka wa i loaa mai ai.
Ua noi ikaika aku o Rusia a me Auseturia i ke Keiki Alii o Millan o Serevia, aole e ae aku i ka inoa Moi a ka puali koa i hookau mai ai maluna ona, a ua hoike aku laua i ka ahaolelo, aole e kokua ia ia ina e hoopaakiki ana ua Keiki Alii la e lawe ia inoa.
O na kino kanaka loloa, oia o Kapena Beti a me kana wahine nona ka inoa ohana Miss Anna Swan, ka mea hoi a ko La-
dana mau makaainana i hoonaue ai mawaena o lakou iho i ka wa a laua i mare ai he mau makahiki ae nei i hala, ua waiho laua i ka laua hana hana mau, he hele hoikeike, a ua hoi aenei a eia ma Rochester, Nu Ioka, e noho nei. O ka loihi o ke kane, he 7 1/2 kapuai, a o ka wahine hoi, he iniha kona oi i ko ke kane. Ua kaupaona ia laua a ma ka eha haneri paona pakahi a oi aku ke kaumaha. Ka loihi o ko laua moe, he 10 kapuai.
Eia ka poe kaulana a koikoi o Amerika Huipuia e hooikaika nei ia Samuela Tilden, ka Peresidena a ka aoao Democarata e koho aku ai auanei i keia Novemaba ae : Hannock, William Cullen Bryant, Fred. Hassaurek, Chas. Francis Adams, ke Kuhina Ripubalika A G Curtin, ko Linekona Kuhina Kaua Gideon Welles, Cassius M. Clay, ko Linekona kokoa Kuhina Kaua Peter H Watson, a me ka loio kaulana Chas. O'Connor.
O ka mea a ko Farani i aie nui ai, oia o Madame Hurtudo. Ke ohi nei oia i kela a ma keia makahiki i ka uku panee o kana mau dala i waiho hoaie ai i ke aupuni ma ka $800,000. Aohe no he dala he nui.