Ka Nupepa Kuokoa, Volume XVI, Number 15, 14 April 1877 — Page 4
| This text was transcribed by: | Pulama Goodhue |
| This work is dedicated to: | Kauʻi Sai-Dudoit, my mother who works so har |
Ka Nupepa Kuokoa
KE KILOHANA POOKELA NO KA LAHUI HAWAII.
TIS BETTER ON BEFORE.
------
Gospel Singer p 80.
1
He ala pouli anei kou?
Mai noho kanikau.
Kokoke e poha ke ao;
He maikai ae ma o.
Ref---He maikai ae ma o,
He maikai ae ma o.
Olino no ke ao ma o.
He maikai ae ma o.
2
Ke naue na haipule nei
Ma kahi ino no.
Ke naue me ke mele e,
He maikai ae ma o.
Ref--He maikai ae ma o, &c.
3
A kao pa ʻ apu na mea alai,
A ane hioa no,
He leo hoohauoli nei,
He maikai ae ma o.
Ref.--He maikai ae ma o, &c.
4
A hele a kaumaha e,
A ane make no.
Hoolana nae ka leo nei.
He maikai ae ma o.
Ref--He maikai ae ma o, &c.
5
A ku ma Ioredane e,
A pa na nalu po,
He leo pa malie nei,
He maikai ae ma o.
Red.--He maika ae ma o, &c.
6
A pela no ma ela ao.
Aole eha hou--
He maluhia no a mau,
He maikai ae ma o.
Ref.--He maikai ae ma o, &c
Hawaii.
--------------------
HAAWINA KULA SABATI.
------
HELU 5----SABATI, APR. 29.
ELISAIMA DOTANA. 2 Na Lii 6:8--18.
8 A kaua mai ke alii o Suria i ka Iseraela, a olelo pu ia me kana poe kauwa, i aku la, Ma kela wahi ka ʻ u e hoomoana ʻ i
9 A hoouna aku la ke kanaka o ke Akua i ke alii o ka Iseraela, i aku la, E malama oe, mai hele oe ma kela wahi; no ka mea, ua iho maiko Suria maila.
10 Hoouna aku la ke alii o ka Iseraela i kela waho a ke kanaka o ke Akua i hai mai ai ia ia, a malama kela ia ia iho malaila, aole i kekahi manwa, aole hou i elua wale no.
11 A pihoihoi ka naau o ke alii o Suria no keia mea; a kahea aku la ia i kana poe kauwa, i aku la ia lakou, Aole anei oukou e hai mai ia ʻ u, owai ka mea o kakou i launa pu
me ke alii o ku Iesaela?
12 I mai la kekahi on a kauwa, Aole, e kuu haku e ke aliil aka, o Elisai ke kaula iloko o ka Iseraela, ka mea nana e hai aku i ke alii o ka Iseraela i na mea au i olelo ai maloko o kou keena moe.
13 I aku la ia, E hele oukou a ike i kona wahi, i hoouna aku ai au e kii ia ia. A haiia mai ia ia, Aia no ia ma Dotana.
14 Hoouna aku la ia malaila i na lio, a me na halekaa, a me ka poe koa, he nui: a hele aku la lakou i ka po, a hoopuni ae la i ke kulanakauhale.
15 A i ke ala ana o ke kauwa a ke kanaka a ke Akua i kakahiaka nui, a hele iwaho, aia hoi, ua puni ke kulanakauhale i ka poe kaua, i na lio, a me na halekaa: i aku la kana kauwa ia ia. Auwe, e kuu haku! pehea la e hanaia ʻ i?
16 I mai la ia, Mai makau oe; no ka mea, na oi aku ka poe me kakou, mamua o ka poe me lakou.
17 A pule aku la o Elisai, i aku la, E Iehova, ke noi aku nei au ia oe, e wehe ae oe i kona maka, i ike ia. A weheae la o Iehova i na maka o ke kanaka opiopio, ike aku la ia, aia hoi, ua paapu ka mauna i na lio, a me na halekaa ahi, a puni o Elisai.
18 A iho mai lakou io na la, pule aku la o Elisai ia Iehova, i aku la, Ke noi aku nei au ia oe, e hahau mai oe i keia poe kanaka i ka makapo. A hahau mai la ia ia lakou i ka makapi, e like me ka olelo a Elisai.
Pauka Gula. "Mai makau oe, no ka mea, ua oi aku ka poe me kakou, mamua o ka poe me lakou." Pauku 16
Manao waena, Ko ke Akua malama ana i kona poe kanaka
Ma kela Sabati ua ike kakou i kekahi hana mana a Elisai maluna o Gehazi, heaha ia hana? No keaha hoi? Ma ka mokuna eono, mai ka pauku q, a i ka pauku 7 he hanamana hou ka Elisai. Ua hele oia me na haumana kaula e oki laau no ka hana hou ana i ko lakou hale kula i akea ʻ e. Ma ke oki laau ana ua loaa ka pilikia a me ka pihoihoi i kekahi haumana, ua hemo kana koi-lipi, a poholo iloko o ka wai. Ke kumu o ka pihoihoi, no hai ke koi-lipi. Heaha ka hana mana a Elisai i hana ai i loaa hou ai ke koi-lipi? He mea lana anei ka hao ma ka wai? Owai ka inoa o keia wai, kahi i haule ai ke koi-lipi? Mahea hoi keia kula kaula?
P 8. He kaua, elua aoao, owai ma kekahi aoao? Owai hoi ma kekahi aoao? Ma ka aoao hea ka hoomaka ana? Ma ka aoao o Suria paha. Owai ke lii o Suria? Benehadada. Owai ke lii o ka poe Iseraela? Iorama. Heaha ke kumu o keia kaua? He aha ke kumu o ka nui o na kaua? Iakobo 4:1. No ke kuko ea, i mahuahua ka aina, ke aupuni, ka waiwai. Ke kaua aha e kaua weliweli ana i keia wa maluna o Europa? Ke kana paha mawaena o Rusia me Tureke. He kaua maikai anei ia? Ae, pela ma ka naa ʻ ku. Aole nae no ke kuko keia, no ka hoopau i ka hana ino loa a Tureke i na Keristiano. Maikai no kekahi kaua, maikai ole nae ka nui. Ua hai anei ke lii o Suria i kahi e hoomoana ʻ i?
P 9 Owai keia kanaka o ke Akua? Heaha ka Elisai i hai aku ai, a i papa aku ai ke lii o ka Iseraela? Nawai i kuhikuhi ia Elisai i kahi e hoomoana ana ke lii o Suria i hiki ia ia ke hai aku ia Iorama? He ike mana paha ia.
P 10 Ua hoolohe anei Iorama i ke ao ia Elisai? A no kona hoolohe pehea oia? Hookahi wale no anei ka pakele ana?
P 11. Pihoihoi ka naau o ke lii o Suria, no keaha? Heaha kona kuhihewa ana? Aole ka oia i ike, he kaula o Elisai e kokua an ia Iorama. Ua ike nae, ua ola Naamana kona luna koa i kona mai lepera ia Elisai. Poino koke i ka poe hewa ka mana o ka pule a ka poe haipule.
P 12. Pehea i pau ai kekahi hewa o Benehadada? Ua oi aku ka ike o na kau wa a ke lii mamua o ko ke alii. Pela paja i keia wa Ua oi aku ka ike o na keiki kula Sabati i ka ke Akua olelo mumua o ka kekahi poe alii. Pehea e ike ai na lii i ka ke Akua olelo ke hele ole lakou i ka halawai a me ke kula Sabati? Huli a hoopaa naau. Kekahina 10:20.
Kauoha ke lii o Suria i kana poe kauwa e aha? I aha oia ia Elisai? makau ole ka oia ia Elisai. Heaha kon amanao ke loaa Elisai ia ia? E pepehi paha ia ia, e like me Ahaba i manao ai e pepehi ia Elisai i ke loaa oia ia ia. Hoka nae ka manao o ka poe hewa. I mi no na Parisaio e pepehi ia Ieru, aole nae ehiki, oiai aole i hiki mai ko ua manawa e make ai. Ua loaa auei a haiia i ke lii o Suria kahi i noho ai Elisai? Aia mahea? mahea hoi Dotana? He kulanakauhale ia he 12 mile ma ka akau aku o Samaria, e ku ana maluna o kahi puu nuku, me na punawai elua e kahe ana malalo ae. aia Elisai ma Dotana, owai ke keiki maikai i hele ilaila mamua? Kinohi 37:17. A ua aha ia Iosepa malaila? p 18-28.
P 14. Heaha keia hana kupanaha loa a ke lii o Suria i hana ʻ i i loaa keia kanaka hookahi o Elisai? me he la, he mana loa Elisai a makau loa, in a he poe uuku ke kii aku. Pela ka poe i hoounaia e hopu ia Iesu.
P 15. Makau loa ke kauwa a Elisai? no keaha? Heaha kona ninau? Pehea hoi na haumana a Iesu i ko lakou ike ana i ka lehulehu i hele mai e hopu ia Iesu? Makau--hoao e pepehi--a auhee aku la.
P 16. Pehea Elisai I hoopau ai i ka makau o kana kauwa? Hai mai 2 Oihana Lii 32:7. Hal 55:18. Roma 8:31. Halelu 17;3.
P 17. Heaha ka Elisai pule no kana kauwa? Ua hooloheia anei kana pule? He aha ka ke kauwa i ike ai? He ike maka keia, he ike maka anei ko Elisai mamua? he ike manaoio paha? Pehea ka Iesu olelo ke noi aku oia i ka wa pilikia? Mataio 26:53. Heluhelu hoi Dan. 7:10. Hal. 34:7. No keaha i kii mai ia Elia? He poe aha na anela? Heb. 1:14. Maluhia ea na haipule. Ua ike e anei Elisai, e puni ana oia i na enemi? Pela paha, aole nae oia i holo i kahi e, noho oia no keaha?
P 18. Akaka ke kumu kona noho ana, i ikeia ka mana o Iehova ma keaha? ma ka hoomaka po ana i na enemi, a mahope hookaakaa ia na maka. Mana ka pule a Elisa
Owai kekahi poe i hoomakapoia mamua i ka wa ia Lota? Kin. 19:11.
Manao na enemi e hopu ia Elisai, hoopakeleia nae oia.
E ninau na kahu ma na mea nui iloko o keia Haawina, a e haawi i na himeni me na pule.
Haawina no Mei 2, 2 Na ʻ Lii 7;12--20.
No na Kahu o na Kula Sabati.
He olelo hoakaka kekahi, a he olelo kahea kekahi.
1. Mai kuhihewa ke Kahu, he mea noho wale oia maloko o ke Kula Sabati, a paa mau oia ma kona noho, me ke kakau paha i ka nui o na papa, o na haumana. He mea uuku ia. Ka hana a ke Kahu, ke ku a hele e nana i na papa, i na kumu, i ka lakou mau hana; e nana i ka poe hele mai, i ka poe hele ole mai, a ninau i ke kumu o ka hele ole. E hoomalu i ke kula. E lawe noi i ka papa haumana, ke hemahema i ke kumu kupono ole.
2. A pau ke ao ana a na kumu i na papa, e haawi i mau pauku himeni. A pau, e ninau i kela i keia papa, i mau ninau no loko mai o ka haawina, aole make e nana mau ka maka i na ninau i pana ma nupepa. Pono ke nana e ke Kahu ma na laaoa paha, i paanaau a maopopo loa hoi na mea a pau iloko o ka Haawina. He mea kokua na ninau i pai ia; pono no ke nana i kekahi manawa ke poina hoi kekahi mau mea. Aka, mai hoopili mau ka maka i ka nupepa, a hoopuka hemahema hoi i kekahi mau ninau. E mama, e holo ka ninau ana i makaala a hoihoi na haumana.
3. Ka pule ana, mai pule a loihi no kela me keia mea, paupauaho na haumana. Pule pokole, pule wela, pule kupono i na hemahema o na kumu me na haumana.
4. Na ninau mawaho a pili ole i ka haawina he mea hoopuehuehu ia i ka manao, a hoonalowale i na mea iloko o ka Haawina. Pono ke waihoia. Ua lawa ka momona o ka Haawina. E nau, a moni, a noonoo ia i lilo ia i mea hanai i ka uhane.
5. Ma na la noa, e imi ke Kahu i na haumana i haule, a i poe hou paha. A e paipai i na kumu me na haumana e heluhelu, e hoopaa i ka haawina no ke Sabati e hiki mai ana. E pule pu me na haumana, me na kumu, me na makua ma na la noa. A ninau, aia mahea ka Haawina? e kii a heluhelu mai i kekahi hapa, a kokua i ka imi ana i na pauku kuhikuhi. Nui ka manawa noho wale, poho wale. E hoolilo ia manawa ma keia hana.
LEO KAHEA.
E Hoolohe!
E na Kahu o na Kula Sabati, malalo ae o ka Aha Euanelio o Hawaii Akau; Aloha oukou:--
Ua kohoia au i Kanu Nui n ko oukou mau kula. A na'u e ninau i na mea a pau e pili ana i ko kakou mau Kula Sabati, a na'u e hoike aku i na haina i ka halawai o ka Aha Kula Sabati nui o Hawaii nei ma Honolulu, ma Iune 1877. Nolaila, e oluolu oukou e hai mai ia'u ma ka leta, mamua ae o ka pule elua o Mei, i na haina a ke Kahu Kula Sabati Nui e imi ana, e like me keia malalo io:
1 Ehia kane makua iloko o kau Kula Sabati?
2 Ehia wahine makua iloko o kau Kula Sabati?
3 Ehia keikikane iloko o kau kula Sabati?
4 Ehia kaikamahine iloko o kau Kula Sabati?
5 Ehia haumana ma ka pule mua o Iune 1876.
6 Ehia haumana ma ka pule mua o Mei 1877
7 Ehia kumu kane? ehia kumu wahine?
8 Hele mau anei na haumana i ke kula?
9 Nui anei ka poe hele ole i ke kula?
10 Heaha ke kumu o ka hele ole?
11 Hele mau anei na haumana o na kula la?
12 No ke aha ka hele nui ole?
13 Mahea na Haawina Kula Sabati?
14 Ua lako anei na Kula i na Haawina i paiia?
15 Ua lako anei i na Baibala, i na Kauoha Hou, i na Buke Himeni?
16 Ina lako ole, heaha ke kumu?
17 Ehia haumana keiki a haumana makua i huli mai a komo iloko o ka ekalesia i keia makahiki?
18 Ehia dala kokua mahina hou me na kokua e ae i keia makahiki?
19 Ka kora ehia ke kula ana?
20 Ehia kula ma ke Sabati hookahi?
21 Ehia haumana i haalele wale i ke kula Sabati i keia makahiki?
22 He mau ninau mawaho o ka Haawina anei, iloko anei iloko o kau kula?
Me ka mahalo,
L. Laiana.
Waimea, Hawaii, Mar 27, 1877.
============
Hoike a E. Bailey, Ka Elele o ka Papa Hawaii, NO KA PAEMOKU O MAIKONISIA.
---------
[Kakauia no ka LAHUI HAWAII.]
Aole loihi ko makou ku ana ma Butaritari i ka holo mua ana. Holo hou makou i Ebon ma ka la 11, aka, ku hou makou ma Bataritari i ka hoi ana mai, mai ke komohana i ka la 19 o Dek.
E noho ana na misonari iloko o na hale i kapiliia i ka papa ma na aoao, a he paku papa no hoi; aka, ua ako ia maluna i ka lauhala, a i ole ia, i ka lau niu, nana ka lauhala o Maikonisia; a in a e ako ia ka hale i ka lauhala e nui na makahiki o ka paa ana, aka, e ako pinepine i ka lau niu no ka popopo wawe.
Maikai ka wipuna o Butaritari. Hoopiha makou i na pahu wai o ka moku malaila. He aina momona, aka, he aina haahaa e like me ka nui o Miakonisia, nui ka niu ka ape a me ka hala. Aia ma ka aoao akau he mokupuni liilii, o Makin ka inoa, elua paha ekolu paha mile ke kaawale. He hale pule okoa ko Makin; o Rev. R. Maka ke kahu oia ekalesia, a ma kekahi wahi ma Butaritari---malaila he hale pule okoa, he 56 ka nui o na hoahanau malalo o ka malu o Maka.
O ka ekalesia ma ko makou wahi i ku ai, aia i Rev. Mr. Kanoa ka malama. Ehiku wale no ka nui o na hoahanau, ua nui lakou mamua, aka, hoi hope ka nui.
O Nan Teitei kekahi hoahanau kupaa. Ma ka hanau ana he hoahana a ke alii. Mahalo au i ka oluolu o Nan Teitei, haawi mai la oia i $200, o kana dala ponoi e hana i ka halepule hou ma kona wahi.
Paapu ka noho ana o na kanaka ma keia wahi.
Eia maanei ka maneapa oi o ka nui o na maneapa a pau o Kilipati. Aole au i ana pono, aka, olelo kekahi 200 kap. a keu kona loa, 80 ka laula, 70 paha ke kiekie.
Malalo, he hakahaka wale no a puni, 5 ½ kapuai ke kiekie o kahi hakahaka, ua paepae ia na kua lalo maluna o na papaakea e ku nihi ana. Aole komo kona mau pou iloko o ka honua; kau wale no maluna o ka paapaa koa. Ua kooia ka hale i na kumu niu i pio, a ua hoohuliia ka kumu i pio maloko o ka hale, a lilo ia i koa. Elua nae hina ana o ka hale i ka makani ino, i ka wa i kukulu ia'i, mamua o ka paa pono ana. Aole no na kanaka a pau loa o Butaritari & Makin---3000 lakou---aole lakou a pau i hana, aka, o ka poe a pau e noho ana ma ia wahi kokoke wale no, no ka mea, nui na maneapa e ae ma Butaritari, he hale hula, he hale hookipa malihini, a he hale ahaolelo hoi ka maneapa.
Olelo na misionari, aole nui ka aihue ma keia wahi. I ko lakou wa hele, aole e kolohe ia ko lakou hale a me ka waiwai. Haawi mai na misionari i mau haneri niu no ka Hoku Ao. Ina pinepine makou i ka wai o ka niu i ko makou holo ana ma Maikonisia.
Ua pa ia ka pa o na kumu, he pa pohaku--he papaakea no loko o ke kai a kahakai paha. Mahuahua iki ko lakou aina maanei, he eka paha a me ka hapa ke hui ia me ka loi ape. Nui maoli ka ape; 10 paha kap. o kona kiekie, a keu aku kekahi, He kino nui loa kona, aka, o ka ai ana ua ane like me ka ai ana i ka pauku laaum aole momona e like me ke kalo o Hawaii nei.
Maikai ka hua o ka hala, a ono loa i ka ai ana. Haawi mai o Malaia, ka wahine a Rev. Mr, Kanoa i ka hua nui na makou e ai ma ka moku, he 30 pauna ke kaumaha i ko'u manao.
I kekahi manao ana, e aho maanei ke kula nui o Kilipati, no ka mea, he ai maanei, he aina wi o Apaiana. Makai no hoi ka holo o ka moku o komo maloko o ka lakuna.
E oi no ka maikai o ka wai, he ano lako na kanaka. Aka, eia paha ka mea keakea---o ka ino o ke Alii. Lehulehu kana mau wahine, on a pinepine oia, a pepehi wale.
Oia ke alii nana i ki pu a make na kanaka Hawaii ekolu i kona manawa on a. A pepehi no hoi oia i kekahi mau wahine ana a make. Aole maopopo ka pono o ka noho ana, ka mea ia i kaulana no kona ai ana i ka io o ka wahine, i ai nana. Ike makou i kekahi keiki ana 10 a 12 paha on a makahiki, nui loa a momona kona kumo kapa ole, 100 pauna paha ke kaumaha; kau wale no ia maluna o ke kua o ke kanaka, aole makemake e hele ma kona wawae ponoi, me he bipi la i kupalu ia i ka nana'ku.
I kuu noonoo ana i ka home ma Kilipati, aole e maopopo ka pono o ka hana i keia manawa, loihi ka hooikaika ana o na misianari malaila, 20 makahiki, a ua hua maikai i ka hua. Aole makehewa ka hoomanawanui iloko o ka pilikia nui wale, a ke malamalama mai nei ka pouli oia Pae Aina, aka, nui loa ka hana e koe, a ua nawaliwali na paahana e koe, a ua haule kekahi i ka mea.
Kahikahi na mea e koe ana me na kino oluolu, o ka hoi pinepine mai e hoomaha ka pono. Nawai e hapai i ka hana i ko lakou hoi ana mai, a mahea hoi na panihakahaka no na mea i make?
Nolaila, i ko'u manaom ekolu mea e ku nei imua o kakou.
1. E haalele kakou i kela kihapai, e hoihoi aku i na misionari o Enelani---a i ole ia,
2. E hoonui i na misionari Hawaii no ia kihapai, a lawa---a i hiki ole ia,
3. E haawi hou i kumu a i dala no ke kula nui o Kilipati, i nui ka poe makaukau i kumu no lakou iho.
Ke hele nei ka Misiona o Kilipati i ka nawaliwali loa, nui loa na kanaka oia pae aina, a ke puka mai nei ma malamalama, aole make waiho e pio hou i ka pouli.
Ina e ola, a ikaika ke kula nui i na dala $1.000, a haawi no me ka minamina ole, e ohi auanei e like me ka helu ana.
He kihapai nui keia. O ka nui o na kanaka o Kilipati, ua manoia e kekahi he 30.000, aka, manao kekahi he 50.000. Malia paha he 40.000. O na pae aina elua, o Makala he 10.000 wale no, a hiki paha i ka 15.000, 5.000 o Ponape, 3.500 no na Mortlock, o Kilipati ka hapa nui o Maikonisia. A ua pili pono keia kihapai ia kakou o Hawaii nei. Makemake na kanaka o Kilipati i na lumu Hawaii, oluolu ko lakou manao i na kanaka Hawaii. He poe Polunesia lakou e like me ka lahui Hawaii.
No ka paapu o na kanaka, me ka uuku o ka ai e hele auanei lakou ma na aina e i ola no lakou. E hoonaauao ia lakou mamua o ko lakou hele ana, oi noho kamaaina ʻ na lakou, a e hiki ia lakou ke ao, a heluhelu i ka olelo ponoi.
Ina e ninau ia mai, ehia misonari Hawaii e hele malaila i lawa, eia ka ʻ u, i eha no Tapiteua, elua ma Nonouti, akahi ma Maiana, akahi ma Kuria, elua ma Tarawa, a, in a e haalele na misionari o Enelani i na mokupuni ma ka hema, oia o Arorae, Onoatoa, Nukunana, Aranauka, Tamana, alaila i eono hou aku no ia mau mokupuni--16 ka lawa pono i keia manawa, aka, in a e kahaha oukou no ka nui loa, alaila e haawi i aha no kela holo ana o Hoku Ao, a mahope kekahi no ka mea, he pilikia ka hana no ka uuku o na lawehana.
E haawi i ko oukou mau kanaka maikai no ia hana, o na mea oi loa ka oukou e haawi. O ka mea hooholo i ka hana maanei, e oi aku ia malaila, o ka mea alakai i na kanaka maanei, e oi aku ia malaila. O ka mea naaupo, a mea ole maanei, e mea luuluu wale no ia malaila, he mea ole loa no. O ka mea puni waiwai, a puni hanohano, aole make hele. Aka, o ka mea naauao, a me manao kupono, o ka mea i piha i ke aloha o Iesu, oia ka mea kupono ma ia hana. Aole make lolelua o ka manao, e pau loa ka manao ma ka hoola ana i na kanaka mailoko mai o ko lakou pio ana i ka hewa, a e hoolilo ana ia lakou i poe naauao, i poe kanaka no ke Akua.
Ma ka pepa hou e hoike au i ka Mokupuni o Makala.
KA AILA BALAKI A PINKHAMA!
---He Mea---
OLE KA WAI I KEIA AILA HAMO!
Paluplau Maikai na Ili Hooluu.
---------
Ke noi haahaa ia ʻ ku nei oukou, e hoao iho i keia
Aila Balaki, Hamohamo Palewai, Hoopalupalu Ili.
E kuai a e hoao i na Buti, Kamaa, Ili Kaao Kaa, a i na mea ili hooluu e ae paha i loaa ia oukou. Ua lana loa ka manao, in a oukou e hoao ana pela, e mahalo ana oukou, a hoomaikai aku auanei me ke kanalua ole. Ina e hamo pinepine ia i keia.
AILA BALAKI HOOPALUPALU ILI,
E mau no ka paluplau maikai o na ili, me ka nakaka ole. Aole hoi no ka wa ua wale no e pono ai keia aila, aka, no ka wa la kekahi. He 50 keneta no ke timi.
-----------------------
Aila Inika Balaki Hoomau Ili a PINKHAM.
He mea maikai loa, i hanapaka maoliia no ka hoopalupalu ana i na ili kaa lio, na kaulawaha lio, na noho lio, a pela aku. E hoao oe---Kumukuai no ke kini 75 keneta.
=======================================================================================
Na Olelo Mahalo.
Hilo, Nov. 5. 1875.
Ua hoao pono au i na Aila Ham Kamaa e ae, a ua hoao pono no hoi i ka Aila Hamo Balaki a G. S. Pinkham; a ua hiki ia ʻ u ke olelo me ke kanalua ole, o keia Aila ka helu akahi, a me ka oi o ka maikai, o na Aila Balaki a pau a ʻ u i hoao ai.
A.O. FORBES.
--------o--------
Ua hoao maua i na Aila Hamo kamaa a G. S. Pinkham & Co., a ua oi aku ka maikai mamua o na Aila Hamo Kamaa mai na aina e mai.
R. A. LYMAN,
S. KIPI.
Hilo, Nov. 10, 1875. Kiaaina o Hawaii.
Hilo, Nov. 10, 1875.
Ua hoao pinepine au i na Aila Hamo Kamaa a G. S. Pinkham & Co., a ua manao no au oia ka Aila Balaki Kamaa maikai mamua o na aila e ae a ʻ u i hoao ai mamua, a he oiaio keia.
C. K. HAPAI.
--------o--------
Hilo, Nov. 10, 1875.
No ko ʻ u ike oiaio loa o ka Aila Hamo Kamaa a G. S. Pinkham he Aila maikailoa no ka Hoowaliwali i ka ili.
D. KANAI.
Hanaia e G. S. PINKHAM & Co., ma Hilo, Hawaii.
E kuaiia aku no e BOLLES & Co., Agena, ma Honolulu. 790 3, 792
---------------------------------------------------------------------------------------------------------------------------------------------------------
ANOAI I KA LEHULEHU
------
E kipa mai a e nana,
i kamaka ai ka ike i na waiwai nani
i loaa mai nei iloko o na
La Kulaia iho nei.
------
Penei ke ano o ua mau waiwai la:
N Wati a me na kaula Gula,
a na Lede a me na Keonimana!
NA KAULA OPELE A NA LEDE
NA KOMO GULA NANI O KELA A ME KEIA
ano o na Lede a me na Keonimana!
NA KUPEE GULA,
NA LIPINE GULA
Na gula pepeiao o na wahine!
e oaka ai i na pepeiao, a e hulali ai
hoi na manamana lima, a e
kilipohe ai hoi na a-i.
------
Na komo humuhumu gula a me ke kala,
Na pihi pulima gula wahine a kane,
Na lakela gula lei wahine nani,
Na komo daimana o na Lede.
Na kaula laketa,
Na pine omau kihei,
Na laketa aniani,
Na huka gula wahine.
NA LAKO HALE.
NA PUNA,
NA PAHI,
NA KIAHA, KALA,
NA APO KALA
NA KAWELE holoi lima,
NA O DALA o kela a me keia ano,
a me na mea nani e ae no he nui wale.
------
E kuaiia aku ana no
ma ke kumukuai haahaa loa i ko
na wahi e ae o ke taona nei.
------
UA MAKAUKAU NO HOINA
mea nani no kanaka makua
a me na kamalii.
Na Kamaa Paa Loa,
e loaa no mane e like me ka
makemake; a in a e loaa
koke ka ino, he hiki
no ke hoihoi mai
M. McINERNY.
Kihi o na Alanui Papu a me Kalepa. 793 3m: 811
---------------------------------------------------------------------------------------------------------------------------------------------------------
E. T. Halolani.
LOIO!
E IA HE $20,000 E MAKEMAKE ANA E hoaie aku ma ka ukupanee haahaa loa mai ka $200 aku a pii ae ma ka moraki ana i na aina. Ua hoomakaukau e no oia i na palapala aelike, hoolimalima, moraki a me na hooilini, a he hiki iaia ke hoomaikai i na aina loaa ole na Palapala Sila Nui.
Hale Oihana, aie ma ka "Real Estate Exchange" Helu 31. Alanui Papu, Honolulu, malaila oia e loaa ai i na kanaka a pau, in a he mau aina kuai a hoolimalima ko lakou, a e hoopaaia me ka uku ole. 792 3m 815
---------------------------------------------------------------------------------------------------------------------------------------------------------
Milo Kuai.
O ka poe makemake kuai MILO laau hana ipu paka, e hele mai i ka Halekuai o KALE LONa, (Chas. Long).
Alanui Kalepa, Honolulu. 795 3m8.
---------------------------------------------------------------------------------------------------------------------------------------------------------
MAI KEIA LA A MAHOPE AKU NEI.
(KI ʻ I) O KA UKU O KA
OHUA ONEKI O
NETI MERRILL,
Mai Honolulu aku a me ka hoi ana mai he
ELUA DALA!
E. D. CRANE. @ (Kapena.)
Mar. 15, 1877 798 @ms.
---------------------------------------------------------------------------------------------------------------------------------------------------------
Lole Makepono ke Kuike!
E LOAA NO IA MA KAHI O
KAKELA ME KUKE,
--------E LAA NA--------
AHINAHINA,
KALAKOA,
KEOKEO,
LEPONALO
Pena, Aila, Aniani,
Na Mea Piula,
Kopa, Aila Honua,
Aila Hoomaloo
Kui Kakia, Pakeke,
Tabu, Kaula, Noho lio,
Hulu-palaki, na Pulumi.
A he Agena no hoi no na Mokupuni o Hawaii no na
LAINAKINI-NAO,
LAINAKINI-MAOLI,
PALULE KALAKOA,
ALAPIA, KELEPA, KILISA,
Na Lole kupono i ka wawae,
Palule Huluhulu,
Na Lole Huluhulu,
Na Lole no ka hoohehelo ana
Lipine, lihilihi, a me ia mea ʻ ku
--------A HE-------
MAU MEA AI KAHI
Ka Palaoa, Kopaa,
Raiki, Pia, Hoohu,
Paakai, Huaala,
Pia Kulina & c.
--------A HE--------
LAAU LAPAAU KAULANA LOA
A Dr. JAYNES.
Laau Kunu,
Laau Hoomaemae Koko,
Laau hoopau naio,
Penikila, Huaale,
A me na Laau Hamo, a pela ʻ ku
788 3m 801
---------------------------------------------------------------------------------------------------------------------------------------------------------
Papa! Papa!
------NO------
ALLEN A ME ROBINSON.
--------
Ua wehe ae nei maua i
PA KUAI PAPA!
------MA KA------
UWAPO o PAKAKA.
------
Na Papa Ulaula o na ano a pau.
Na Papa Paina o na ano a pau.
Na Pili Hale Ulaula.
Na Pili Hale Keokeo.
Na Pepa Hoonani Hale.
Na Pepa Molina.
Na Pena a me na Aila Pena!
NA KUI O NA ANO A PAU!
Na Pani Puka a me
Na Pani Puka Aniani.
Na Pani Puka a me
Na Olepelepe.
------
Na lako kukulu Hale
------O NA ANO A PAU------
E kuaiia ma ke
Kumukuai Haahaa Loa!
o keia Makeke.
ALLEN & ROBINSON.
Honolulu, Aper 13, 1876. 783 3m 801