Ka Nupepa Kuokoa, Volume XXII, Number 1, 6 January 1883 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

KA NUPEPA

KUOKOA ME KE AU OKOA.

(I Huiia.)

No ka Makahiki..............................................$2  00

 E ono Mahina....................................................1 00

Dala  Kuike  ka  Rula.

PIAONO,  IANUARI  6,  1883.

O D W. Aiwohi wale no ka i aeia e kakau inoa no

na dala i hookaaia mai ma ke keena o ka

Nupepa Kuokoa.

 

NU  HOU  KULOKO.

  Ukele na Alanui iloko o keia mau la, ka ua mea o ka ua.

 

  He keu ke puanuanu o Maui i keia mau la e nee nei.

 

  He ino nui ka i hoohakui iho ma ka hapa hikina o Maui.

 

  I ka Poakolu nei ka noho ana o ke kau Kiure o keia kau ma ke keena hookolokolo mau ma Aliiolani Hale.

 

  Uuku loa ka ona ma Honokaa, Hawaii, i ka la Karisimaka iho nei, pela na lono i hiki mai i o makou nei.

 

  Nni no ka poe ona i ka la Hape nuia nei.  Pelapela na hana, ku no hoi i ka hilahila maoli kekahi mau hana.

 

  He paikau hookahakaha ka na puali koa hui o keia kulanakauhale ma kuioloia, i ka Hape nuia nei.

 

  Ua hopuia kekahi kalaiwa kaa Pale i ka Poakahi nei, no ke kau ana i ka hoailona pihi ano e ma kona kuka.

 

  Ke papale nei ka Mauna Haleakala i kona papale keokeo (hau) i keia mau la, pela ka hoikeia mai o na lono.

 

  He elua mau paa mare Pukiki i hoohuiia ma ka la Karisimaka, ma ka hui mahiko o Kilauea i Kauai.

 

  O ka la Sabati i hala, oia hoi kala 31 o Dekemaba, oia ka la hanau o ka Moiwahine Kapiolani, a o ka piha ana ia o kona mau makahiki he 48.

 

  O kela luina Kukuma o Likelike i pa ai kona poo i ke balaka moku mamua aku nei, ke pii ae nei ka hikiwawe o ka oluolu o kona eha.

 

  I ka la Hape nuia nei ka hukiia ana o ka mokuahi Mokolii iluna o ke Ala Huki moku, makena ua poe i akoakoa ae malaila no ka makaikai ana.

 

  Ua hoomanao ae ko Kapaa poe i Kauai, he lealea heihei lio ma ka la Karisimaka iho nei.  Holopono na hana, wahi a na lono i hoikeia mai.

 

  Ke laha nei he ano mai fiva ma ka hni mahiko o Honokaa iloko o keia mau la.  He mau paahana ka i make ma o keia mai fiva.

 

  Ua lohe mai makou e kukulu ana o Mr. S. G. waila i pa kapili moku nona ma Hawaii nei ma keia mua iho.  He lono keia i hoikeia mai ia makou a pela no hoi makou e hoike lono aku nei.

 

  Ma ka po Poaha o ka la 28 o Deke maha i hala aku la, ua hoao iho kekahi mea kolohe e puhi i kekahi mala ko a Bailey ma i ke ahi, aole nui ka poino i hanaia,  ke imi ia'la ke kolohe.

 

  Ua hiki mai a nalo aku ka la Karikimaka ma Wailuku Maui me ka maluhia.  Ua malamaia, e like me ka mea mau na anaina haipule, a o kahi lealea i malama ia oia no ke ki pu ana, a ko laila hui raifela.

 

  Ua haule o Hon. S. Aiwohi mailuna aku o kona kaa a make loa, i ka Poakolu ka la 27 o Dekemaba, 1882.  E nana iho e na makamaka i na hoike piha a kekahi makamaka e puka aku nei ma ka pepa o keia la.

 

  Ua haawi ae ka poe limahana o ka Ona Miliona ma Kamaomao, Maui, he anaina hulahula i ka po Karisimaka iho nei.  Ua hookaawaleia kekahi rumi nui no keia hana, a ua hoowehiwehi ia no hoi me na lau nahelehele o ke kuahiwi.

 

  Na la S. Keanilani i hoike mai i keia lono malalo iho:  Ma ka la 23 o Dekemaba o ka makahiki i hala i hoike ai ke kula a D. Kaluaokeala ma Kawaihae.  Ua maikai na hana, wahi ana, a ua nui ko lakou mahalo.  O Keaniani a me kekahi mau mea e iho na Komite hoike.

 

  Ua ninau mai o J. N. Uahinui o Kaunakakai Molokai i keia ninau penei:  Owai la o Keaniani o Manawainui e noke nei ka hoolaha ma ka nupepa?  Owai la keia kanaka i kapa i kona inoa o Keaniani?  O Manawainui ka apana a keia kanaka e noho nei, he kahawai wale no ia, a ina aia ilaila keia kanaka o Keaniani, alaila aia iuka kona hale kahi i ku ai?  He kahawai wale no o Manawainui a he alanui kaa hoi ia no na kaa a Meyer.  Ua kamaaina wau ia Molokai nei, aole nae au i ike i kekahi kanaka i kapaia kona inoa o Keaniani.  He haohao nui ko'u i keia inoa a no ia haohao ke ninau akea nei au.

 

  Ke hoomaemaeia nei ke alanui Puo waina i keia mau la.

 

  I keia la e hoea ai iwaena o kakou ka helu mau o ka nupepa Kahokuokekai.

 

  Ua aneane e kani ka hora 5 o ka Poalua nei ka holo ana o ka makuahi Likelike.

  Ke pii hikiwawe nei na paia pohaku o ka hale pohaku hou e kukuluia nei ma na kihi o na alanui Moiwahine me Nuuanu.

 

  Ua haule iho kekahi kuaua koikoi ma Kohala l ka la 29 o Dekemaba 1882.  Ua oleloia kekahi ia o na kuaua koikoi loa i haule iho iloko o ka makahiki i hala.

 

  Ua lohe mai makou ua pupuleia ka o Hon. P. Haupu, ka lua o na lunamakaainana o ka apana o Hilo o kela makahiki aku nei.  O ke kumu i pupuleia ai, aole i maopopo ia makou.

 

  Ua malamaia he mau ahaaina ma Waikiki-kai, Kamoiliili, a me Makiki i ka la Hape Nuia iho nei.  Nui ka poe i konoia i keia mau ahaaina, a ua nui no hoi ka poe i hele aku ma kekahi ano e ae.

 

  Piha pono ke anaina mele i haawiia ma ka luakini o Kaumakapili i ke ahiahi Poakahi nei.  Ua haawiia keia anaina mele no ka pomaikai o ko ia luakini Ahahui Opiopio.

 

  Welo kapalili lua ka hae makana a ko Waikiki-kai poe ia lakou i hoi ai i ka auina la Sabati nei.  E mahalo nui ia ko Waikiki-kai poe no ko lakou ala like ana mai a hapai i ka hana me ka eleu nui.

  Ua lilo i ka papa Pokoo o Kawaiahao ka makana mua o na hae makana o ka la hoike hapaha o na Kula Sabati i ka la Sabati i hala, a ia Waikiki-kai ka makana elua.  Mahalo makou i ka eleu o na kumu a me na haumana.

 

  Ua makanaia mai makou e ka hui hoolaha nupepa haole Pacific Commercial Advertiser &co.  o keia kulanakauhale, he Alemanaka nui a maikai o keia makahiki.  E like me ke ano mau o ke KUOKOA, pela no oia e haawi aku nei i kona mahalo kuokoa i keia hui hoolaha nupepa.

 

  Aole i holo ka mokuahi Madras i ka Poaha o kela pule aku nei, e like me ka hoike a ka Elele ma kekahi o kona itamu, aka ua holo aku oia i ke ahiahi Poaono, e like me ka makou i hoolaha aku ai.  Lalau maoli no na hoolaha ana a ka Elele, oia nae hoi, ua ike mua ia no kona lalau i kala kahiko aku nei.

 

  Ua hoikeia mai ia makou he lono e e i ana, ua papa ae nei ka Papa Ola ia H. Walakahauki, aole e hoouna i na ukana kaumaha i ka poe lepera ma kalawao, e laa na pahu nunui berena, kamano, a pela aku, koe na puole liilii mama a oia na ukana e hoouna, malalo o na lilo o ka Papa Ola.  Heaha hoi keia hana a ka Papa Ola?  Ke waiho nei makou na ka Elele e kuailo mai ka hana.

 

  Ke hoea aku nei ka helu mua o ka NUPEPA KUOKOA i keia la, a hiki no hoi i keia la, aole i loaa iki mai ia makou ka haina o ka nane a S. E. K. Wainohea i hoolahaia i ke akea.  He makana ke haawiia ana i ke mea e loaa ana ka haina o keia nane.  Auhea hoi na olohe puni name, eia iho kahi hana he imi iho i ka nane a ke kaeaea o Honuakaha.

 

  Malalo iho e ike ana ko makou poe heluhelu i keia wahi Iono, mai Paukaa, Hilo, mai a J. N. Kealohuli mai, a penei:  He pepa pili dala ka hana a ko Paukaa nei poe ma ka po o na la noa, a o ka oi loa aku o na la Sabati.  Pau pulu o na makua me na keiki a me ka makai i keia hana, he keu a ka apiki o keia makai, nana no e hele e huli i ka poe makemake pepa a hoomuu aku la iloko o kona hale ponoi.  Pehea la keia ano hana.

 

  Ma ka la Hape Nuia nei, ua nui loa ka poe ona i ikeia ma na alanui o ke ke kulanakauhale nei.  Ua hoopukaia na olelo pelapela a kupono ole, a ua hanaia no hoi kekahi mau hana pono ole i hiki ole i ka makou maka peni ke hoike aku ma ke akea.  Ua ike pono makou i keia hana i hanaia, aka, iloko o ia ike pono ana o makou, ua manene ka makou maka peni ke huai ae i ke akea i ua hana la i hanaia.  Ina aku la o ka Elele, huai ia ae la i ke akea, no ka mea, ua kuluma ia pepa i ka hoopuka i na huaolelo pelapela.

 

  Ua makanaia mai makou me ke aloha pumehana o Mr. Thos. G. Thrum, he buke Alemanaka maikai, i paiia ma ka hale pai "Saturday Press."  He buke keia ua kamaaina ma Hawaii nei a puni, a ua nui no hoi kona laweia e kela a me keia.  Iloko iho la o keia makahiki ka piha ana o na makahiki eiwa o kona paiia ana malalo o ka hooponopopono noeau ana a Mr. Thos. G. Thrum.  He buke keia e kuhikuhi ana i na hoakaka kupono ana no na mea e pili ana ia Hawaii nei a he nui wale aku na mea oloko.  Ke haawi nei makou i na mahalo i ka ona o keia buke.

 

  He uliuli maikai no na hiona o na pali Koolau.

 

  Mohaha maikai no ke ola o ka Luna makai o Koolau a me kana lede.

 

  Aohe kanaka ona i hoopaaia i ka hale paahao o ka apana o Koolau poko, ma la la Hape nuia i hala aku la.

 

  He77 dala a oi ka loaa o ka Aha Mele i haawiia ma ka luakini o Kaumakapili i ke ahiahi Poakahi nei.

 

  Ua loaa mai ka Ogana hou o luakini o Kaumakapili, a i ke ahiahi Poakahi nei kona hoau ia ana, imua o ke anaina nui i hiki ae.

 

  Ua holo aku i Koolau ae nei kekahi o ko makou mau makamaka i ke ahiahi Sabati iho nei, no ka hoohialaai ana i na hiona nani o ua mau pali hauliuli 'la.

 

  Ke hoomau ala no na Opio o Kaneohe a me Heeia i ka malama i na halawai.  Ke hapai pu a la ka Luna makai Asa Kaulia me na makamaka i ka hana me ka maikai.

 

  Nui na paina liilii i malamaia ma na kauhale o na kamaaina o Koolau-poko ma ka la Hape nuia iho nei, he hauoli makahiki hou, a ua malamaia me ka maluhia na hana.

 

  He ahaaia Karikimaka ka i malamaia e ka Hui Opiopio o Kaneohe, a ua ua malamaia he wahi lulu, ua mahuahua  no na wahi okeni i lu ia mai; uleu no na Komite o ka Ahahui i ka hoolako ana i mea ai.

 

  Eia ma ko Keena Oihana ka papa kuhikuhi hou o ka manawa holo o na mokuahi lawe leta mai Kapalakiko a hiki loa aku i Kikane me Aukalana.  Na ka Agena o ia laina i makana mai ia makou.

 

  Ua hoikeia ae he lono, a hoi mai o Likelike i ka la apopo e hukiia ana oia iluna o ke ala Huki moku i ka Poakahi, a o Lehua ke pani o kona mau awa, a o Mokolii hoi ke pani ma ko Lehua mau awa ma Maui a me Molokai.

 

  Nui na Kalabu mele o Koolau i hele ae e kuupau i ko lakou mau kileo kani i awili pu ia me ka leo unahe o ke gita ma na kauhale, no ka olioli makahiki hou ma ka la mua o ka makahiki iho nei; o ka oi aku o ke Kalabu malalo o ka Pii opio alakai ana, a he ku i ka ii aloko ke hoolohe aku i kona leo.

 

  Maikai a holopono na hana hike hapaha o na kula Sabati o Kawaiahao i ka la Sabati i hala, piha pono no hoi na noho i na makaikai.  Hehe ka aka a kela a me keia, paiakuli na pepeiao i na hehihehi mahalo a ke anaina, a o na hiohiona holookoa a pau, ua nani a ua holopono.  E mahaloia na kumu a me na papa kula Sabati a pau.

 

  Iloko o keia makahiki 1883, he elua pouli ana o ka la a me elua pouli ana o ka mahina, a e ikeia no keia mau pouli ana ma Hawaii nei.  E ike mua ia no ka pouli ana o ka mahina iloko ae nei o ka mahina o Aperila i ka la 21 a me 22.  O ka pouli mau hoi o ka la e ikeia no i ka mahina o Mei i ka la 6.  O ka pouli elua o ka mahina iloko ia o ka mahina o Okatoba i ka la 15, a o ka pouli elua ana o ka la e ikeia no iloko no oia mahina hookahi i ka la 30.

 

  Iloko a ka nahenahe kupilikii i lohe mai ai makou i ka make ana o ko makou kuahine aloha o Kauakanilehua ka mea hoi nona na hiona waipahe oluolu e poina ole ai ia makou na kunane e u aku nei ma keia aoao o ka muliwai eleele o ka make.  He wahine ui opio o Maria Keakaheiheimalie Kai, a he lede opio hookipa oluolu i na kamaaina a me na malihini.  He mau makua kona a me na kaikaina, a ke hui pu aku nei makou me ka ohana o ka mea i hala.

 

  Ma ka po Hape Nuia iho nei o keia makahiki hou, ua hoohuiia ma ka berita o ka mare o Mr. A. Rosa Kakauolelo o ke Keena Loio Kuhina, me Mrs. Joanna Niau Ladd's, ma Haleakala Home Honolulu.  Na ka Rev. T. Mackintosh laua i mare.  He anaina uuku wale no ka i akoakoa ae malaila; o na hoa'aloha a me na makamaka ponoi wale no o na paa mare ka i akoakoa ae.

 

  He mea mahalo nuiia na anaina halawai hoomana ano nui ma na wahi a pau o ka mokupuni, aka, i ko'u hoolohe pono ana i na hana a kekahi hoahanau, ua komo iloko o'u ke kahaha no kekahi o kana mau olelo, penei:  "O na aha halawai e malama mau ia nei e na opiopio o Kaumakapili a me Kawaiahao maloko o na hale halawai aole ka e ola ana ia poe ua huhu ke Akua no lakou.  Aia ka ma ko lakou aoao Mamona e maliu ana ke Akua."  Ua komo iloko o ko'u lunaikehala na manao kahaha.  Aka, eia Kana i olelo mai ai:  "E hele mai oukou a pau i o'u nei, ka poe luhi a me ka poe kaumaha, a Na'u oukou e hooluolu aku."

LOHEPONO.

 

PAPA  KUHIKUHI  NO  KA  HEBEDOMA  HAIPULE.

KA  MAKAHIKI  KANAKOLU  KUMAMAONO

MAI  KA  MUA  MAI.

  La Sabati,  Ian.  7. - "No ka mea hookahi no Akua, hookahi no mea uwao, iwaena o-ke Akua ame na kanaka, o ke kanaka Kristo Iesu.  Ka mea i haawi mai iaia iho i Kakahaka no na mea a pau, e hoikeia nei i ka manawa pono." 

  Tim.  1,  2: 5 - 6.

  Poakahi, Ian.  8. - Ka hoonani ana i ke Akua no Kona lokomaikai i hoikeia ma ka hoolako ana i ke ola no na kanaka a pau loa.

  Io.  25: 1 -9.  Tes. 2, 2 - 17.

  Poalua, Ian. 9. - Ka mihi a me ka uwe no na mokuahana iwaena o na hoahanau, no ka nui o na manao ino, no ka uuku o ke aloha, no ka hoomaloka, a me ka palaka, no ka nui o na hewa i ae ia.

  Hal.  130:  1-8.  Iak.  4: 1 - 10.

  Poakolu, Ian. 10. - Pule no na ohana, no na makua, no na keiki, no na kula, a me na kumuao, i mea e alakai ponoia'i ka poe opio a i hoopakeleia lakou mai na hoowalewale mai, a i hoomakaukauia hoi no na hana maikai o na makahiki e hiki mai ana.

  Kan. 6: 1 - 18.  Ep. 5: 22, - 6:4.

  Poaha, Ian. 11. - Pule no ka ekalesia, no ka launa ana mai o ka Uhane Hemolele, no ka hooikaika ana o na Kahunapule, no ka hoeueu ana i na hoahanau, i mea e hooluolu ia ai ka poe kaumaha, e hoihoi hou ia ai ka poe hewa a me ka poe auwana i o Iesu la ka Hoola.

  Is. 55: 1 - 11.  Io. 15: 1 - 12.

  Poalima, Ian. 12. - Pule no na lahui, e hoomaluia na aina, e malamaia ka Sabati, e hoopauia na kanawai e kokua ana i ka ona, e hoolaaia na waiwai o ke ao nei no ka hooholo ana i ko Iesu aupuni o ka pono, ka oiaio, a me ke aloha.

  Is. 1 7.  Rom, 13: 1 - 14.

  Poaono, Ian. 13. - Pule no na misionari, e hoopihaia lakou i ka Uhane Hemolele, e hoopauia na hoomana wahahee a me ka lokoino, e hoomahuahuaia ke aloha o kapoe manaoio no ka poe lalau; e holopono ka hana a ka Haku "ma ka manao aku a me ka hiki ana mai o ka la o ke Akua."

  Io. 6: 1 - 13.

  La Sabati, Ian. 14, - "E kiai ana hoi i ka manaolana e pomaikai ai a me ka ikea nana ana mai o ke Akua nui a o ko kakou ola o Iesu Kristo.

  Tito.  2: 13.

MA  KE  KAUOHA  A  KA  PAPA  HAWAII.

 

UA  HALA  O  SAMUELA  AIWOHI.

E  KA  NUPEPA  KUOKOA;  Aloha Oe.:

  Me ka naau i kaumaha luuluu i ke aloha, a me ko'u puuwai i hoonaluea ia, me ka minamina nui au e leta aku nei ia oe, a nau ia e hai ae i na hoa o kaua a puni keia mau Pae Aina.

  Ma ka hora 10 a oi o ka po Poakolu nei Dek. 27, ua motio awiwi aku la ka hanu ola o ka Hon. S. Aiwohi mai ko.  na kino lepo ae, e waiho ana mahope nei he hoapili o na la opio, he wahine a me na keiki, na moopuna, a me na hoaloha he nui o ua aina nei, e hui a; iloko o na hana pono, a me na hana hoonaauao, a he mea na keia maka peni e poina ole ai no kana mau hana maikai he nui, a me ke aloha nui loa, a he meheu no hoi kona i hiki ole i na opio o keia mau la ke uhai aku.

  Penei ka moolelo o kona make ana:

  Ma ka auwina la Poakolu Dek. 27 1882, ua holo oia maluna o ke kaa lio no kahi hoolulu o ke kaa ahi, no ka hoi mai o kana wahine mai Honolulu mai, me ka ukalo pu o kekahi o kana mau keiki maluna o ka lio.  A i ka hiki po no ana ae makai o kahi o Kukukamoku ma, ia wa, ua puiwa ae la ka lio e huki ana i kona kaa mamuli o ke kani ana o ka uepa a na kahu lio o Geo. F. Holmes, a me ka holo nui o ka pua lio e hoa ia mai ana.  I ka wa e holo nei ka lio me ka ikaika, a ma ka ihona mai o kahi kahawai mauka ae o ka Hale Hookolokolo ma Kapaau, ua huli ke kaa a haule aku la oia me ka puka o kona poo a me ka eha o kona mau papalina.

  I ka wa i haule ai, ua kii koke ia o Kauka Thompson, a ua olelo oia aole e ola no ka nui o ka eha ma ke poo.

  A ma ka wa i hoikeia mahope, ua make aku la oia, a ua hooholo koke ia iho la no hoi e hoolewa ia kona kino lepo ma ka hora 10 1/2 A. M. o ka Poalima Dek. 29.  Ua kono ia na hoaloha, a me na makamaka e ukali aku i kona hoolewa ma ka luakini o Iole; aka, no ka nui loa o ka ua ma ia la, aole i hiki aku ka nui o na hoaloha, a me ka mea nona keia pulima kakau.  E hoomanao i na olelo ma ka Baibala:  "O ka la o ka Haku me he aihue la i ka po."  O ko kakou ola me he mahu ia i pua'e a malo iho, nolaila, e makaukau mua mamua ae o ua la ino la.

 

Kou oiaio,  HENRY  KANEALAI.

Pahoa N. Kohala, Hawaii Dek. 30'82.

  P. S. Ma ka la 28, ua noho ka Aha Koronero e imi i ke kumu i poino ai o Hon. S. Aiwohi, a ua hooholo lakou mamuli o ka olelo hoike a kekahi o na na mea i hopu ia, a me kekahi mau ike e ae.  "ua make o Hon. S. Aiwohi mamuli o ka puiwa ana o kona lio i ka hoa ia ana mai o kekahi pua lio me ka malama ole ia o ka maluhia o ka mea e hele ana ma ke alanui."  A ua kue ia hana i ke kanawai a me ka pono o ka lehulehu.

 

NA  MEA  HOU  O  HILO.

E ke Kilohana a ka lahui Hawaii, Aloha oe"

Ke mau nei no ka ino o Hilo nei.

Nui ka ua me ka makani, hakukele na alanui, pii kahe-a iluna i ka ua mea o ka nui o ka ino

 

PAEWAEWA  KA  HANA  A  KA  I.  HELU.

  O ka hana a ka Luna Helu o Hilo nei, ua ku i ka pono ole kana mau hana, o ka poe keia i hookuu mua ia i na makahiki i hala aku nei, i keia Luna Helu iho nei hoi keia, helu nou ia iho nei.

  He ake dala paha i alunu wale ai, nui ka huikau me ka pono ole o kana mau hana, a ua kupono oia ke kapaia e a'u, he naaupo.

 

NO  KA  AHAHUI   OPIOPIO  KARIKIANO O WAIAKEA.

  O na lala oia Ahajui Opiopio Karikiano, ke hoomaka hou nei e inu bia hou i keia wa.  Eia ka mea apiki, ua hoole ka waha o na lala, aole e wala hou i na waiona, eia no nae drink bia no ma kahi o Mi. Kaiso, puu ka auwae o hana, akaka no hoi ka muhee hololua o Wailoa, palolo ka waha i ka hoole a hoi hou no e ai i ka luai; mamina wale na opio i hoi hope, ka poe hoi i kukulu i ko lakou kahua maluna o ke one, pa mai na makani pukiki ino o ka hoowalewale, a pau no i ka hiolo.  E nana i ka Haku ka mea nana mai na hoopomaikai ana.

 

OLA  HILO  I  NA  KEIKI  O KA  AINA  PUA.

  E ole na keiki lauoho loloa o Kina, ola ai na kini makapehu o kahi poe o Hilo nei, ma ka .25 a .50 keneta o ke pa-i hookahi.  Suna ole na wahi papakaukau i-a o Hilo nei i keia mau la, no ke ano pamalo loa mai no hoi; i ahona i na wahi kauna i-a maloohaha a makou o Keaukaha mai.

  Ke mau nei no ka loku ana a ka u-a kinai lehua o Panaewa ke halale nei iluna o ka lau ohia.

Jno.  I.  KANOA.

 

OWAI  NEIA  MAKAPO  NUI.

  No keia mauhua e kau ae la maluna e hiki ai ia'u ke pane me ka oiaio, he makapo a he nele maoli no paha no ka puniu o keia mea e kapa nei i kona inoa o Katolika; ina ka e kamailio ka Lunakanawai Kiekie i ka moolelo o ke au i hala, alaila he paewaewa ka ia, a he kapakahi ka.

  Auhea oe e Katolika, heaha hoi ko mea i huna ai ko inoa i kapaia ai e ko makua, piikoi mai nei oe i kou inoa o Katolika, a ke kapa maoli nei na ka Lunakanawai no i haku i ua moolelo nei.  Aole pela ka manao o ka mea e kakau nei.  O ka oiaio malaila e hiki ai ke olelo ae, he moolelo oiaio ia i hanaia e ka poe kahiko a i malamaia e ka poe noiau ike, a oia malamaia ana ka mea i ike ai ka Lunakanawai Kiekie a oia kana i hoike ai i ke akea, a oia mau mea kau e olelo nei he hoopunipuni a he hoomainoino.  Aole pela ka manao o ka mea kakau.

  O ka haina o ka mea kakau malaila, ua pololei na mea i hoikeia e ka Lunakanawai Kiekie, he hoike piha ana ia i ka moolelo o ke au i hala, ea, auhea oe e Katolika, mai oi aku ka pono ina e olelo akea ia e oe ia Kaahumanu, oia no ka i hoomainoino, oia no ka i paewaewa, a oia no ka i kapakahi.  O ka ike o ka mea kakau, me he la e hoili maoli aku ana oe i ka ino a pau loa iluna o ka Lunakanawai Kiekie a me ka ohana Misionari.

  E huli kaua a nana i ka hapa waena o ke kolamu elua o ka moolelo i hoopukaia e ka Lunakanawai Kiekie ma ka nupepa Paeaina i hoopukaia i ka 16 o Dekemaba, nona ka helu 50 o ka makahiki i kaa hope.  E ike ana no oe e Katolika a me a'u, o kekahi o na  ohana Misionari Amerika au e hakukole mai nei nona ka inoa o Rev. Binamu oia ka'u e olelo nei, oia ka makua nana i ao o Kaahumanu.

  Ke hea leo aku nei au ia oe e Kato lika ole huna inoa, o ka huaolelo ao a Binamu ia Kaahumanu, he keehina wawae ia a he kulana a he kahua ia e ku ai au a maloeloe a ninau aku ia oe.  Ina i ao aku o Binamu ia Kaahumanu aole make hoopai i na Katolika, alaila he paipai ana aku anei ia a ka poe Misionari Amerika e hookuke i na Katolika?  Ke hoole nei ka mea kakau, aole.  A ina o ia ao ana a Binamu ia Kaahumanu he mea anei ia e hoopilimeaai ai ka Lunakanawai Kiekie maalo o na Misionari Amerika?  Ke hoole hou nei au, aole.

  A ina o ia ao ana aku a Binamu ia Kaahumanu, he kapa ana aku anei ia i Ina Katolika he hoomana kii?  Ke hoole hou aku nei au, aole loa.

  Eia kahi haina uuku malalo nei, aole ia he wae kapakahi, he hana kaulike ia mawaena ou e Katolika huna inoa, a me na Misionari Amerika.

  Owau no me ka wiwo ole a me ka huma ole i ko, u inoa,

H.  B.  KALEIKUMAHOA.

 

HU  KA  AKA  I  KA  ELELE  POAKOLU.

E    KA  NUPEPA KUOKOA; Aloha oe: -

  E olnolu mai oe e hookomo iho i kela mau hua e kau ae la ma ke poo, oia kela mau hua a kahi Elele Poakolu i hoopuka mai ai ma ka pule i kunewa hope aku la, no ka haiolelo a ka mea haiolelo no ka hoole i ka waiona, o ka mea inu rama wale no anei ka mea i ike i ka maikai o ka rama, aole ka he ike o ka mea inu ole i ka rama, ina e kohu puaa mai ana ka poe i inu i ka rama, alaila, aole anei i ike ka mea inu rama ole?  Ke manao nei au, ua ike koke ka mea nana ka haiolelo i ke ino o ka inu waiona.  I kahi Elele Poakolu hoi, aia no ka nana e hoike mai i ke ino o ka rama na ka mea inu i ka rama, nolaila, pololei maoli kela mau hua e lau ae la, "hu ka aka i ka Elele Poakolu."

  Pela mau no ia pepa e kokua nei i ka hana pono ole a na Kuhina, nolaila, aia na ka poe i noho i ka oihana Kuhina, e ike i ka hewa o keia Aha Kuhina, pela ka hoohalike me keia mea i ku ma ka hoole waiona.                             Owau no  KEAHI.

 

 

 

Ma  ke  Kauoha.

  Ua hookohuia o Mr. W. H. Daniel i keia la i Agena Hooiaio Palapala Aelike Kepa mawaena o na Haui me na Kauwa no ka Apana o Hana Maui.

J. E. BUSH,

Kuhina Kalaiaina.

  Keena Kalaiaina,  Ianuari 2, 1883.                                          1101  3ts

 

  I ku like ai me ka Pauku 232 o ke Kanawai Kivila, ua hookohu aku au ia J. W. Kane i Luna Pa Aupuni no ka Pa Aupuni ma Halawela, Niihau.

PAULO P. KANOA,

Kiaaina o Kauai.

  Keena Kiaaina o Kauai,  Dek. 22, 1882.                                 1101  3ts

 

  I ku like ai me ka Pauku 231 o ke Kanawai Kivila, ua hookaawaleia he wahi kupono no ka hoopaa ana i na holoholona hele wale ma Halawela, Niihau.

JNO. E. BUSH,

Kuhina Kalaiaina.

  Keena Kalaiana,  Dek. 22, 1882.                                              1101  3ts

 

W.  L.  HOLOKAHIKI.

He Loio a he Luna Hooiaio Palapala.

  Ua hiki no ia'u ke lawelawe i na Palapala pili Kanawai a me na hihia o kela a me keia ano imua o na Aha Hookolokolo a pau o keia Aupuni.

No.  5.

  Keena Wehekealaula Alanui Betera.                                         1101  tf

 

OLELO  HOOLAHA.

  O na poe a pau he mau holoholona ko lakou e holo ana maluna o na aina i onaia a hoolimalima ia e ka "Hui o Puuhue" (Kohala Ranch.)

  Ke kauoha ia aku nei lakou, aole e hopu a hoa i na holoholona ma na la e ae.  Koe wale no na Poakahi o kela a me keia pule, me ke kii pu mai no nae i na Palapala ae mai a'u aku, a i kuu hope paha ma Puuhue nei.

  A o ka poe e kue mai ana i keia hoolaha, e hopuia a hoopiiia ana ma ke kanawai.  E hoolo ikaika ia ana keia rula.

JAMES WOODS.

Luna Nui o ka Hui o Puuhue.

  Puuhue, Kohala,  Dek. 17, 1882.                                                  1101  4ts

 

Hoolaha  Lunahooponopono  Waiwai.

  Oiai ua hookohu ponoia mai na mea nona na noa malalo iho e ka Aha Kiekie, i mau Lunahooponopono waiwai no ka waiwai o Joseph G. Tucker i make o Honolulu, ma keia ke hoikeia aku nei ka lohe, o ka poe a pau he kuleana ko lakou i ka waiwai o ka mea i make ma ke ano moraki a ano e ae paha, e waiho koke mai lakou i ko lakou mau palapala hooiaio kupono ia Alex. J. Cartwright iloko o na mahina eono mai keia la aku, a i ole, e hoole mau ia no lakou.  O ka poe hoi i aie i ka waiwai o ka mea i make, e hookaa koke mai lakou m ke kaulua ole.

ALEX. J. CARTWRIGHT.

ALLAN HERBERT.

  Na Lunahooponopono o ka waiwai o Joseph G. Tucker i make.

  Honolulu,  Ianuari  6, 1883,                                                              1101  3ts

 

Hoolaha  Hookapu  Aina.

  E ike auanei na mea a pau ke nano mai ma keia:  Owau o ka mea nona ka inoa malalo iho, ke papa, a ke hookapu loa aku nei au i kuu mau aina o Pihanakawai, Niumahi, a me Kumukahi, e waiho nei ma Kaupo Mokupuni o Maui.  Ke hookapu loa aku nei au i na kanaka a pau, aole hele wale a kolohe i na mea kanu, a me na mea e ulu ana iluna o kela mau aina i hai ia ae la maluna; oia ka alani, kope, ulu, lai, niu, a pela aku.  A ke hookohu aku nei au a hooiaio aku ia Wm. A. Kala, i hope no'u nana e hopu, a e uku aku i ka poe e hele wale ana maluna o kela mau aina, he $5.00 ka uku o ka mea hookuli.  Ua kapu pu ka poe e pii ana i ka alualu kao maloko o kela mau aina i haiia, i na e loaa pono aku i kuu hope, e hoopiiia lakou ma ke kanawai.  Nolaila o ka lohe ko oukou e ka poe o Kaupo, malama o pilikia.

MRS.  KAHANAAUWAI.

  Kaupo, Maui,  Dek. 21, 1882                                                             1101  3ts

 

E ka Lunahooponopono: -

  Maloko o kekahi o na nupepa o ka pule i hala, ua ike au ua hookomo kolohe a apuka ia ko'u inoa maloko o ka olelo hoolaha hoopuni nui, e hoao ana e hoowalewale i ka manao maikai o na poe heluhelu nupepa, me ka olelo ae, he hiki no iaia ke kuai i na waiwai malalo iho o ka'u kumukuai, o ka hana maalea ia a ke kalohe a me ka apiki.

  Ua hookomo ia keia mau olelo hoopunipuni, no kona ike ua haalele na kanaka i kona halekuai, aole o lakou hele ilaila e kuai ai no ko lakou ike, o na waiwai o kona halekuai he kahiko a ua mimino ia.

  E ike ana no ka lehulehu a pau loa, ke kipa mai ma ko'u halekuai, he mau mea hou wale no ka'u, a ke aa nei au e kaena ae, aole loa e hiki ia Charles J. Fishel ke kuai i kana waiwai no ke kumukuai i oi ka emi malalo o ka'u ka haahaa loa a me ka emi loa malalo o kana ma na ano waiwai a pau.

  Ke hooia nei au ia oukou e o'u mau anakamaka maikai o ka Lahui Hawaii, he kolohe a he apuka keia hana a kela powa, a he hoao e hao wale i ka oukou mau dala maikai.

  E kipa mai i o'u nei, a na'u e hoolawa me ka waipahe.  Owau no me ka haahaa.

A. M. MELLIS (MELEKI.)

Ona o ka Hale Hoahu Lole Nui o Honolulu

  Helu 104,  Alanui Papu.

  Honolulu,  Jan. 3, 1883.                                                               1101.  tf.

 

                      PAPA! PAPA!

                            - NO -

               ALLEN & ROBINSON

                Ua wehe ae nei maua

                    PA KUAI PAPA

                             - MA -

                  Ka Uwapo o Pakaka

          Na Papa Ulaula o na ano a pau.

          Na Papa Paina o na ano a pau.

                Na Pili Hale Ulaula.

                Na Pili Hale Keokeo.

                Na Pepa Molina.

                Na Pepa Hoonani Hale.

             Na Pena a me na Aila Pena!

                 na kui o na ano a pau.

                   Na Pani Puka a me

                   Na Pani Puka Aniani.    

                   Na Pani Puka a me

                   Na Olepelepe.

          NA LAKO KUKULU HALE

                 O NA ANO A PAU!

                      E kuaiia ma ke

         KE KMUKUAI HAAHAA LOA

                      O keia Makeke.

 

HOOLAHA  HOU.

  Ma ke Keena o ka Lunakanawai Kaapuni Apana Ekolu o ko Hawaii Paeaina.  Ma ka waiwai o WAIWAIOLE k, no Laupahoehoe, Hilo, Hawaii i make.

  Ua heluheluia a ua waihoia ka palapala hoi a Kualaakia k, e noi ana e hoonohoia oia i Lunahooponopono no na waiwai o WAIWAIOLE k, no Laupahoehoe, Hilo, Hawaii, i make.

  Nolaila, ua kauohaia na mea a pau ke pili, o ka POALIMA, oia ka la 19 0 IANUARI. M. H. 1883, ma ka hora 10 A. M., ma ka Hale Hookolokolo ma Hilo, oia ka manawa a me kahi i kohoia no ka hoolohe ana i ua noi ia a me na mea kue ke hoikeia.

F. S. LYMAN, Lunakanawai Kaapuni.

  Hilo, Hawaii.  Dek. 14, 1882                                                           1099  3t

 

Hoolaha  Lio  Nalowale.

$6.00  MAKANA.

  Ua nalowale ma ka la 17 o Okatoba, 1882.  kuu lio kane ulaula hauliuli, poepoe ke kino, a he pekipeki ka holo.  Ua kuniia me keia kuhi K. A. ma ka uha hema hope, i hele auwana a nalowale ma Kapa, Koolau.  O ka mea e loaa ai keia la.  i hoikeia maluna, e loaa no kela uku makana maluna, a e loaa no au makai iho o Kanekino.

C. T. AKANA.

  Honolulu,  Dek. 4, 1882.                                                                   1098  4t

 

        Mrs.  W.  H.  Wilkinson,

    MEA  HUMUHUMU LOLE.

   HELU  103,  ALANUI  PAPU.

  Ke makaukau nei oia e kuai aku i kona mau

lako hale o na ano a pau, oia:

  Na Lole Lihilihi a Lihilihi ole.

  Na Papale i kinohinokiia o ma Wahine

  a me Opio,

  Na Lole o na Lole o kela a me

  keia ano, ea., etc.

  Oiai e hoea mai ana ka lako lole hou, nolaila

e Kuai ia aku ana na waiwai maluna i hoike

ia, no ke

         KUMUKUAI  HAAHAA  LOA.

                         1095 tf

 

L.  WAY .

KAMANA  HALE

HELU  109.  ALANUI  MOI.

Na Pani Puka, Aniani, a me na Olepelepe, he

nui wale e waiho nei.

 

  He mau paahana ko'u o ka helu ekahi wale

no, a o na hana a pau e kauohaia mai ai, e

hookoia me ka eleu loa.

  A oiai he mau paahana helu ekahi ko'u.  e

hanaia no na hana a pau me ka maikai a me

ka haahaa o ka auhau.                 1048  tf

 

UA  MAKEMAKE IA

NA ILI BIPI,

NA KIWI BIPI,

NA IWI BIPI,

  E haawi ia no ke kumukuai kiekie o ko ka

kou makeke nei e

H.  HACKFELD  &  CO.

Honolulu   Mei 22, 1880.           19  4@

 

KO BIHOPA MA

BANAKO MALAMA DALA.

E MALAMA NO MAUA I KE DALA

o na kanaka maloko o ka Banako, penei:

  Ina hoomoe mai ke kanaka hookahi i na dala $300 a emi mai paha, alaila, e uku maua i eono hapahaneri uku panee makahiki, mai ka la o ka lawe ana mai a hiki i ka la o kona oki ana, ke waihoia ke dala hoomoe i ekolu malama a keu paha.  Aole ukupanee e helu ia no ka hakina o ke dala hookahi aole no hoi no ka hapa malama.

  Ina ohi koke oia i kana dala, aole i hala ua malama ekolu aole ukupanee.

  Ina e manao ke kanaka e ohi i kana dala.  e pono ke hoike e mai oia ma ka Banako i kona manao ohi, i kanakolu la mamua o kona ohi ana, a o kana buke kekahi ke laweia mai.

  Ma ke kikoo wale no a ka mea dala e haawi ai kana, ka Buke kekahi ke lawe mai.

  Ma ka la mua o Sepatemaba keia makahiki a i keia, e houluulu ai i ke dala, a e huipuia ka ukupanee me ke kumupaa o na dala homooria no na malama ekolu a keu, a mahuahua ke Kumupaa e loaa i ka ukupanee.

  Ina oi aku ke dala hoomoe mamua o $300.  alaila, hooholo pu ka olelo.

  E weheia ka Hale Banako i na la hana a pau.

  851  tf                                                                        BISHOP & CO.

 

                        S.  AUKAI.

                     LOIO!  LOIO!!

  Honolulu,  Oct. 19, 1882.        1090  3ms 

 

           HE  NUI  ANEI  KOU  MAKEMAKE  I  NA  

                    Mikini  Humuhumu  Lole!   

           Ina pela, e kipa mai no ma ka Halekuai o

                         Kakela  &  Kuke!

        a malaila oukou e ike ai a makaukau i @  @

          Mekini  a WHEELER  a  me  WILSON

           mai ke $40 a hiki i ke $50 ke kumukuai

                         ka mea hookahi

               NA  MIKINI  A  SINGER!

             ma ke $50 pakaha me ke ano

        MIKINO  A  WILCOX  ME  GIBBS

        ma ke $30 a hiki i ke $50 ke kumukuai

I mea e pau ai ko oukou kanalua e na makamaka  

  no ka kupono i keia mau Mekini, e naue mai no

         me ke kuihe ole, a e ike no oukou iho.

                            628  tf

 

            HALA  TELA  HOU!

                 KAUKAIWA

           Helu 11, Alanui Papu.

    KOKOKE  I  KA  UWAPO.

            S.  H.  MEIKAPU

     Iune 22 1882.         1074  tf

 

                  A.  ROSA,

                  (AKONI.)

He Loio a he Kokua ma ke Kanawai.

  Ua makaukau oia e kokua i na mea a pau e

hele aku ana i ona la ma na mea pili Kanawai

imua o na Aha Hookolokolo a pau o keia Aupuni.

He hiki iaia ke hana i na palapala pili Kanawai

o na ano a pau me ka pololei a me ka eleu.

  Keena hana: - Ma ke Keena o ka Loio Kuhina,

ma Aliiolani Hale, Honolulu.

                                                1101  1yr