Ka Nupepa Kuokoa, Volume XXII, Number 1, 6 January 1883 — NA MEA HOU O HILO. [ARTICLE]

NA MEA HOU O HILO.

E ke Kilohana a ka lahui Hawaii, Aloha oe; Ke mau nei no ka ino o Hilo nei.

Nui ka ua me ka makani, hakukele na alanui, pii kahe-a iluna i ka ua mea o ka nui o ka ino Paewaewa ka hana a ka L. helu. O ka hana a ka Luna Helu o Hilo nei, ua ku i ka pono ole kana mau hana, o ka poe keia i hookuu mua ia i na makahiki i hala aku nei, i keia Luna Helu iho nei hoi keia, helu hou ia iho nei. He ake dala paha i alunu wale ai, nui ka huikau me ka pono ole o kana mau hana, a ua kupono oia ke kapaia e a'u, he naaupo. No Ka Ahahui Opiopio Karikiano o Waiakea. O na lala oia Ahahui Opiopio Karikiano, ke hoomaka hou nei e inu bia hou i keia wa. Eia ka mea apiki, ua hoole ka waha o na lala, aole e wala hou i na waiona, eia no nae drink bia no ma kahi o Mi. Kaiso, puu ka auwae o hana, akaka no hoi ka muhee hololua o Wailoa, palolo ka waha i ka hoole a hoi hou no e ai i ka luai; mamina wale na opio i hoi hope, ka poe hoi i kukulu i ko lakou kahua maluna o ke one, pa mai na makani pukiki ino o ka hoowalewale, a pau no i ka hiolo. E nana i ka Haku ka mea nana mai na hoopomaikai ana. Ola hilo i na keiki o ka aina pua. E ole na keiki lauoho loloa o Kina, ola ai na kini makapehu o kahi poe o Hilo nei, ma ka .25 a .50 keneta o ke pa-i hookahi. Suna ole na wahi papakaukau i-a o Hilo nei i keia mau la, no ke ano pamalo loa mai no hoi; i ahona i na wahi kauna i-a maloohaha a makou o Keaukaha mai. Ke mau nei no ka loku ana a ka u-a kinai lehua o Panaewa ke halale nei iluna o ka lau ohia. Jno. I. Kanoa.