Ka Nupepa Kuokoa, Volume XXVI, Number 27, 2 July 1887 — Na Anoai o Kohala Akau. [ARTICLE]

Na Anoai o Kohala Akau.

E kuu Kilohana, ke kuokoa. He mau nuhou ano nui ka'u e panee aku nei imua o kou poe puni heluhelu, nona ke poo e kau ae la maluna "Na Anoai." Mai ka la 18, lune nei, a hiki i ka la 23 o nei mahina ae la no, o ka nui o na paa moekolohe i hopu ia he 14; he eono o keia aluka akahi no a mare, mamuli o ko lakou ae ana; he elima i kapiia i ka paakai; he akahi i hookuuia, he hookahi i kaliia, no ka holo mahuka ana o ka hoike ma ka aoao o ke 'Lii. Mai ka la 13 o neia mahina ae la no maluna, a hiki ma ka la 20, ka nui o na ''ona rama" he eiwa. Ke kau nei ka lia me ka maeele i ka houpo o ka poe moekolohe a me ka ona. Na ka poe makai kauwai keia anee i ka hopuhopu; a o ka hana a na makai uku mahina he hookauli lua wale iho no i ke anu o Waialeale; aohe luli a onioni o ke poo, aohe hoi he oni o ke kino, he kohu kii o "Pakaka" ka waiho wale aku no i ka hewa maopopo. Ke kukulu ia nei kekahi hui telepone ma Kohala nei, a ua kapaia ia hui ka "Hui Telepone o Kohala Company" he mau haole a he mau kanaka kahi i komo pu iloko o keia hui; a ua manao wale ia ke kahua, ma Puehuehu e kukuluia ai. Eia no i Kohala nei he hale pai kii, i noho hana ia e Mr. Severence, ke hele nei ka hapauea a me ka poe opiopio e pai kii. Ua oki ka nome ana a na hale wiliko o Kohala nei i keia mau la, aneane e piha ka mahina o ka wili ole ana o na hui mahiko. Ke lohe maopopo ia mai nei e noho ana iloko o ka Banekarupa o P. A. Dias, ma kona halekuai ma Kaiopihi, a ke kau aku nei na hoolaha mailoko aku nei a waho; o keia ke pukiki nana i hoonaueue iho nei ia Wilder &Co, ma na mea kuai. I kekahi mau makahiki pokole i kaa hope iho nei, ua lilo aku ua pukiki nei he $15,000. O keia mau dala ka i hemo aku mai na halekuai aku o Wilder &Co. Aka, ua pau kana hoonioni ana ua komo iloko o ke ehu me he Moi la. Ke mau nei no ka hui o ka haole me he pohaku a-la la. Ke kukulu la nei kekahi halekuai nui ma Puehuehu; he hale nona paha ka loa he 60 kp. a he 30 k. lau'a. No na haole Pelekane keia halekuai. Ma ke aumoe o ka Poalua nei a ao Poakolu, ua pau ka hale amara o Geo. Sanaderson i ke ahi; aole i maopopo ka mea nana ke ahi. Ke kaapuni nei ka Peresidena o ka hui Hoole Waiona Z. Kalai, ma na apana; ma ka Poakahi iho nei ua hoomaka mua mai mawaho o Kahei, he mau kauna no i komo mai. Ke ano hauna ia mai nei na balota holo o keia makahiki ae, he elua no mau inoa e lohe la nei, W. R. Kakela opio, no ka aoao Kuokoa J. W. Moanauli, no ka aoao Aupuni, aka, ke waiho nei nae oia i ka mai i maopopo ole kona hopena. A he mea no e i ana kanaka i keia manawa, ke huhu oa nei i na makai no ko lakou hopuhopuia, a me he mea la, e haule hou aku ana ka lunamakaainana pili aupuni ma Kohala nei. Ke liuliu nei na keiki Amerika i ko lakou la nui, ua lohe ia ae he mau hei

hei lio ke malama ia ana ma ka la 4 o July iho, ma Kohala Mill, a he mau heihei eke. Ma ka mahina aku nei o Aperila, ua haanui ae o W. H. Kailiwai oia ka Luna Helu o Kohala Akau nei mai ka Moi mai, a ua makaukau na hope a me na Kupakako; i keia mau la nae, ua hoomaopopoia mei ua haule aku oia i ka hope moku, a o Jim Kaai ka Luna Helu, ma kona makalua. O keia aela na mea i hoomanaoia, a e haawi hou aku au i na no'a huna po hihihi o ka manawa no keia mau iho. H. K. KAOPUA