Ka Nupepa Kuokoa, Volume XXXV, Number 29, 17 July 1896 — Na Hale i Kapiliia me na Pohaku Hawaii. [ARTICLE]

Na Hale i Kapiliia me na Pohaku Hawaii.

Aole paha a makou mau olelo e ae e haawi aku ai no ka nani ame ka maikai o ka hanaia ana, ke kapiliia ana ame ke kukuluia ana o kekahi o ko kakou mau hale hiwahiwa o loko nei o ke kulanakauhale me na pohaku Hawaii, o ka mahalo wale no. Aka nae, oiai makou e haawi ana i na mahalo ana no ia mau ano hale, he mea pono ia makou ke hoike aku i kekahi mau manao hoakaka i kupono loa ke laweia a noonoo, a nana ia hoi me ke akahele e ko kakou poe loea kukulu hale-pohaku. O ka makou wahi i makemake ai e kamailio aku, oia ke ano pohaku e hoohanaia nei no keia ano hana. Mawaena o na kanaka Hawaii, i ko lakou wa e makemake ai e loaa ona mau pohaku no ko lakou mau imu, e huli ana lakou i na pohaku ano pukapuka, nokamea, wahi a lakou he mau pohaku pa ole ia i ka wa e wela ai i ke ahi; a e haalele loa ana lakou i na pohaku a-la me na pohaku paakiki, oia hoi, na pohaku pukapuka ole, oiai he mau pohaku pa lakou i ka wa e wela ai i ke ahi o ka imu. Ua maa na kanaka | Hawaii i keia mea. Aole o lakou makemake iki e komo kekahi oia ano pohaku iloko o na imu a lakou i hana ai, a ma na kāpuahi paha a lakou i hoonohonoho ai. I ka wa e pa ai kekahi 0 keia ano pohaku, mamuli o ka wela ana i ke ahi, e lele liilii ana ka apana 1 o a ia nei, elike no me ka lele liilii ana oia ano pohaku ma ka wa e hoopahu ia ana e ka pauda. Nolaila, i ko makou ike a hoomaopopo ana hoi i keia mea, ua hapaiia mai la ko makou noonoo e olelo ae, ma ka ninau ana, Aole anei o keia mau pohaku Hawaii e hoohanaia nei i keia wa he pohaku pa ia, a i ole, o kekahi paha oia ano pohaku, i komo iloko o ka papa 0 na pohaku pa i ike a i kamaaina ia e na kanaka Hawaii? Ina paha he poe pohaku pa wale no keia e hanaia mai nei ma kekahi o na hale pohaku nani o kākou nei, elike hoi me ka pa ana oia ano pohaku ma ka imu a na kanaka Hawaii, elike me ka makou i hoakaka ae nei; alaila, aole anei he mea weliweli ole no kakou ke hoomaopopo iho i keia wa, no ka hopena e hoea mai ana ma kekahi wa pauahi nui iloko o keia kulanakauhale, a komohia pu hoi ko keia kulanakauhale iloko o ia popilikia? Ina io he mau pohaku keia o ke ano a makou e kuhikuhi nei, oia hoi, ma ka wa e wela ai i ke ahi, e poha ae anei a lele liilii i o a ia nei, aole anei he kumu hoopilikia mai ana ia i ke ola o na kanaka kinai ahi ame ka poe apau e haawi ana i ka lakou mau kokua ana 1 mea e pakele ai ka hale e unuunuia ana iloko o ke okooko o ke ahi? Manao makou, aole keia he ninau i kupono i ka hoohemahema wale ia, aka, | e pono e huli koke ia aku ka hopena o ! ka oiaio a makou e kuhikuhi aku nei.