Ka Nupepa Kuokoa, Volume XL, Number 15, 11 April 1902 — He Buke Moolelo Hou Hoopukaia ka Moolelo o Pakaa ame Ku-a-Pakaa. [ARTICLE]

He Buke Moolelo Hou

Hoopukaia ka Moolelo o Pakaa ame Ku-a-Pakaa.

Ua aie makou i ka lokomaikai o Moses K. Nakuina no ka Buke Moolelo o Pakaa ame Ku-a-Pakaa. He moolelo Hawaii maikai keia, i hooponopono ia e Moses Nakuina me ke akahele loa no ka pomaikai o kona lahui puni moolelo, a i mea e maopopo ai o kona manao iho, e pili ana no keia puke, ke kope nei makou i kona manao hoakaka ma ka aoao mua o keia Buke Moolelo penei: "E ALOHA AUANEI!" E ka Lahui Hawaii, mai Hawaii o Keawe a Kauai o Mano, a welo loa aku i Kaula, ka palena o na moku, ka iwi o kuu iwi a me ke koko o kuu koko, ke kupa, ka oiwi ponoi o ka aina, Aloha oukou: He mau makahiki i hala ae nei, mamuli o ka imi ana i na moolelo Hawaii kahiko loa, ma ka ninau ana i ka poe kahiko, ua ikeia ko lakou waiwai ina e paʻi buke ia, a lilo i mea hoonaauao mai i ka lahui o keia au, no laila, ua ohi, houluulu, wae a hooponoponoia ka moolelo o Pakaa a me Ku-a-Pakaa kanaka keiki, a oia ka moolelo mua e hoolauna mua ia aku nei me oukou, a ina e apo ia mai ana me ke ohohia, alaila, e hoopuka hou ia aku ana kekahi mau moolelo e ae. He nui na mana o keia moolelo, a o ua mau mana like ole la i loaa mai oia ka i houluuluia, waeia a hooponoponoia me ke akahele loa, a kakauia ma ka olelo Hawaii oiaio maoli o ke au i hala. Ua olelo kekahi poe he kaao wale no keia a aohe waiwai; he kuhihewa ia, no ka mea, he nui ka waiwai o keia moolelo. Akahi, ua kakauia ma ka olelo Hawaii oiaio maoli o ke au kahiko. Alua, o na mele, na pa-ha a me na kau i nalowale kekahi a e nalowale aku ana, aole loa ia e loaa hou ina aole e paʻi buke ia. Akolu, ka inoa o na makani o kela a me keia mokupuni o ko Hawaii Paeaina, a Teritori o Hawaii i keia wa. Aha, o ka mea i oi ae mamua o na kumu mua ekolu i haʻi mua ia ae nei oia ke Aloha Alii oiaio o na kanaka Hawaii i ke au i hala a hiki loa mai no i keia au. Nolaila, e ke aloha Alii oiaio, ke aloha Lahui oiaio, ko Hawaii o Keawe, ko Maui o Kama, ko Oahu o Kakuhihewa a me ko Kauai o Mano, eia mai o PAKAA a me KU-A-PAKAA ke imi aku la ia oukou; e ike mai ina e kiei aku ma ko oukou mau ipuka, e hea mai a e hookipa ma ko oukou mau home. MOSES K. NAKUINA. Honolulu, Aperila, 1902. Mea Kakau. E kuai nui e na makamaka i keia Buke i ike i ko ke au kahiko mau na nea. Aole i pau loa keia moolelo iloko o ka buke hookahi, a e hoopau ia ana ma ka helu elua. E hui aku me Moses K. Nakuina a nana e hoolawa mai me keia mau buke. He oluolu loa ke kumukuai. He 25 keneta ko ke kope hookahi.