Ka Nupepa Kuokoa, Volume XLIII, Number 52, 29 December 1905 — Page 3

Ka Nupepa Kuokoa

KE KILOHANA POOKELA NO KA LAHUI HAWAII.

 

NUPEPA KUOKOA, POALIMA, DEKEMABA 29, 1905.     3

KULIANA

Ka Weli o Damaseko.

KA HOOKO MOEUHANE A KA U'I ULINA.

KE KANAKA ISERAELA.

MOKUNA VIII.

HOBADANA.

"Aole pela, kuu haku," i pane aku ai o Alabia, "aole he mea pono ia oe ke hoomaka mai pela.  E hoike mua mai ia'u i na kumu o kou kaumaha; a e waiho mai na'u no ia e hooholo.  E hoike mai---a e hilinai mai maluna o'u, a e ae mai e lawe aku i ko'u mau manao aloha apau nou."

No kekahi mau minute i noho hamau iho ai o Ulina, alaila, me ka leo malie i pane mai ai oia:

"E kuu Alabia aloha, ia'u i olelo ai e male aku ana wau me ka moi, aole wau i maopopo i ka'u mea e kamailio ana.  O kela moeuhane kamahao, i hoomauia mai me ka pahaohao, na ia mea i alakai aku i kuu makuakane e hoike aku ia mea, a aole hoi wau i hoole aku.  I kona manawa e kamailio mai ai ia'u no ko'u lilo ae i moiwahine, ame ko'u hanau ana i keiki na ka moi a Damaseko, ua manao wau he hana ia na'u ka haawi ana aku ia 'u iho  Ia manawa aole i maopopo ia'u ko Horama ano.  Aka,---i keia manawa---ua ike wau he mau mea hou.  Ua maka'u wau i ke alahele a'u i lawe @ai.  ke maka'u a ke weliewli nei wau i ke kanaka a'u i ae aku ai e lilo i wahine nana.  I ko'u manawa mua loa i ae aku ai e lilo i wahine na Horama ua manao wau ua hiki ia'u ke hana aku ia @ me ka loaa ole mai o na ake'ake'a, a aia hoi iloko olaila ka pono @o a i ole ka hauoli o ke ola ana.  Aka, ke ike nei wau i ka loli ane e.  Aole wale ua haalulu ko'u kino holookoa ma keia hana a'u @ hana'i, aka me he mea la ua huipu mai ka make iloko olaila.  I ka @ nei ua moeuhane iho la wau o Horama ka'u kane, a ua paa hoi kona manao e pepehi ia'u.  Aole oia i hooholo e luma'i ia'u, e liek me kana i hana aku ai no Helina; aka ua kukala ae oia e kiolaia wau me ke ola no iloko o kekahi lua o na holoholona aikanaka.  He mea keia e lia ai kou ili, e Alabia."

"Auwe no hoi ka manaonao e!" i hooho ae ai o Alabia.

"Eia nae, e kuu Alabia aloha, ua moe iho la no wau me he mea @ na loaa mai he kokua nui no'u oiai no nae ua maopopo no ia'u ko'u poino.  O he ku maoli no keia i ka weliweli!  E kuu Alabia aloha, ke maopopo ole nei ia'u ka'u mea e hana aku ai."

"Ua hoike pau loa mai ana anei oe ia'u?" i hawanawana iho ai o Alabia, me kona apo ana aku i ka a-i o kon ahakuwahine, a honi iho la maluna o ka lae.

"Aole anei na lawa aku la na mea a'u i hoike aku nei?" wahi a Ulina, me kona huna ana ae i kona mau maka me kona mau lima.

"Aole, ina nae he mau mea hou no koe i kupono e hoike ia ma e kuu lede maikai.  Ua hilinai mai oe ia'u a hoike mai oe i kekahi hapa---e hilinai mai ia'u a e hoike pau loa mai.  Ua ha'i mai oe ia'u i kou makau i ka moi:  a aole o'u pahaohao no ia mea.  Ua ha'i mai oe ia'u o kou male ana aku iaai ua oi aku ia mamua o ka make; a aole hoi o'u kanalua ia mea.  Aole paha oe i poina ua ku-e mua aku wau i kou male ana iaai.  Ma ko'u noonoo iho ua ku ole keia i na rula.  Aka, e kuu haku maikai, me he mea la he mau mea hou aku no koe."

"Aole he mea aku i koe e hiki ai ia'u ke ha'i aku ia oe, e kuu Alabia.  Aole---mai ninau hou mai oe ia'u.  ua hoike aku nei wau ia oe i na mea apau i hiki ia'u ke hoike aku.  Ano, e ninau aku ana wau ia oe---heaha ka'u e hana aku ai?  Ke kokoke mai nei ka hora a'u i ae aku ai e molia i kuu kino no ka moi."

"He hookahi wale no au hana hiki, e kuu haku,---he hookahi wale no, a oia wale no ka'u mea e ike nei."

"E hai mai, e kuu Alabia."

"Ua hiki ia oe ke holo mahuka."

"Mahuka!"  i hoopili mai ai o Ulina me kona ano puiwa. 

"Aia no hoi he alahele okoa ae i hamama nou."

"A heaha la ia?"

"E male aku i ka moi."

"O, e kuu Alabia, he ku maoli no keia i ke kaumaha!  Ua loaa mua mai no ka manao iloko o'u e mahuka; aka e hiki ana anei ia'u ke haalele iho i kuu makuakane?"

"Ina no oe e male aku ana i ka nmoi, e haalele ana no oe i ko makuakane.  E noonoo i keia mea, e kuu haku."

"Aka hoi, ihea wau e mahuka aku ai?"

"Ua noonoo mua no wau no ia mea," wahi a Alabia i pane aku ai, "a ke manao nei wau ua maopopo no ia'u kahi e loaa mai ai ka malu ia oe.  He mau mile mai Damaseko aku, iwaena hoi o na puu, kahi hoi e kikee ae ana ke kahawi o Papa, a e o-e malie ana hoi kona wai, aia ilaila e noho nei kekahi kanaka elemakule i ku kaawale aku mai na kanaka aku.  O Beni Hada kona inoa.  Aia kona home iloko o kekahi ana nona na paia pohaku paa i hookumuia mai ka hookumu ana o ka honua: a o kona ola ana ua hawi aku oia no na hana manawalea apau i ka poe ilihune.  Ua ike mua wau iaia. a ua maopopo no hoi ia'u he kanaka oluolu a lokomaikai oia."

"Pehea i loaa mai  ai ia oe ka ike no keia kanaka?" i ninau aku ai o Ulina me kona ano pahaohao.

"I ike wau iaia ma o kekahi wahine luahine, o Izabela kona inoa, he wahine hele mau hoi keia ike kulanakauhale nei, a na kamaaina no hoi oia i kou makuahine.  He hele pinepine mai keia Izabela i ko kakou hale nei, a i kekahi hele ana mai ana o keia Beni Hada pu kekahi me ia--he kanaka poohina oia i hala aku hoi kona mau makahiki maluna o ka palena maamau.  Ua haawi aku ko makuahine iaia i ke dala e hooliloia aku no na hana maanwalea; a ua olelo mai keia elemakule i ko makuahine, ina e hiki mai ana ka manawa e hooko aku ai oia i kekahi hana maikai ma ke noi ana o kou mama, e hana no oia.  Ua ike no wau e lilo mai ana oia i hoaloha nou.  Ina oe e mahuka ana e hele pu no wau me oe, a me kahi ikaika hope loa i loaa ia'u a e like hoi me ka loihi o n ala a'u e ola ai, e ku no wau a e kakoo ia oe wale no.  E noonoo i keia, e kuu hakuwahine."

"E noonoo ana wau i kau e kuu Alabia, a i kakahiaka o ka ia apopo e hooholo no wau i ko'u manao.  E hoi aku oe i keia manawa, oiai ke aumoe loa aku nei, a he mea pono ia kaua ke hoomaha iho."

I ka manawa i noho hookahi iho ai o Ulina ua haalulu iho la oia i kona manawa i noonoo ae ai i keia hana hou imua ona.  He mea hou i ka noonoo ana iloko ona no ka mahuka aku, a oiai ua waihoia mai la imua ona ua hiki ole iaia ke kapae ae.  Ua hoiek piha aku oia ia Alabia i kona manao holookoa e pili ana no ka moi, a iaia i hoihoi mai ai i na mea ana i lohe ai no Heleina ame na hoike maokaka a na moeuhane, ua law ia nona e kau ai ka weli no ka hoi ana aku no ka moe o ke alii Horama.  Me he mea la ua nana mai ka uhane hala ole o ka Moiwahine Helina iaia i kela manawa, e ani mai ana hoi kona mau manamanalima i ka U'i Ulina e hookaawale ae iaia mai ke alo aku o Horama; nolaila, i ka hala ana aku o na hora kupilikii o ia po, a hohola mai hoi na kukuna malamalama o ka la; ua hooholo iho la oia i kona manao, aole loa oia e male aku i ka moi kuolo in aia he mea hiki iaia ke alo ae.  I ko Alabia manawa i komo mai ai, a ninau aku la hoi oia i kona haku i kana mea i hooholo ai, ua kuha'u iho la na Ulina la.

"Aka, e kuu Haku." i panai aku ai o Alabia, "he hookahi wale no alahele e hiki ai ke kapae ae i kau i ae ai.  Ua makaukau anei oe no ka holo mahuka ana aku?"

"Aole i keia manawa--aole i keia manawa, e Alabia.  E kali kana i keia la."

I ka auwina la kipa aku la ka moi i ka hale o kona kuhina nui a hoohala iho la i kekahi manawa pokole me Ulina.  Aole loa he manawa mamua aku i hoike ae ai o Horama i kona hauoli piha e like iho la me keia kipa ana mai la ana; aole no hoi he manawa mamua aku i hoike piha aku ai ua olomana la i kona aloha piha no Ulina e like iho la me keia hui ana he alo a he alo me ka opio wahine ana e ake nei e mukiki aku i kona waihona meli momona.  Ua haanui iho la ua moi la i kona aloha. a kukala ae la ua kokua mai o Alahe iaia, a ke haawiia mai nei na pomaikai he nui nona i panihakahaka no na la i hala ana e noonoo nui ana no ka waiwai ame kona nohaolii ana i manaolana poho ai, aole loa e loaa hou mai ana iaia he mea nana e hoohauoli iloko o kona mau la kahiko.  eia nae, o keia hauoli piha o ua mai la, ame keia lu ana i kona mau manao aloha no Ulina, ua hiki no ke hoomaopopo ia aku he mau haawina ia i loaa mai mamuli o kona pa wahi kiaha mua ana mamua o kon akipa ana mai e ike i kana wahine hoopalau.  Iaia i haaleel iho ai ia Ulina, hehee iho la ua u'i la iluna o kekahi noho pulu, popoi ae la i kona mau maka me kona mau lima, a uwe iho la me ka ehaeha, me he mea la e puana ae ana oia i keia mau wahi lalani mele:

"Aole oe o ke kipikua.

E holu nape ai nei kikala."

"E Alabia," i pane aku ai ua u'i la i ka loaa ana he manawa nona e kamailio ai, "aole loa e hikki hou ia'u ke hoomanawanui i keia mea.  Ua oi loa ka pono no'u e make mua mamua o ko'u haawi ana aku ia'u iho i kela kanaka.  Ina hoi wau e make ana, o ka nele ana no ia o kuu makuakane; aka ina wau e mahuka ana mai Damaseko aku, malia paha o hiki mai no ka manawa a'u e hoi hou mai ai me ia.  Ina e hiki ana ia oe ke hoomakaukau no ka haalele ano iho i ke kulanakauhale nei, e hahai no wau ia oe i keia po no."

Ae mai la o Alabia e hooikaika no oia ma na ano apau e hiki ana iaia; ame kona kali hou ole iho a hopau manawa ma ke kamailio ana , ua haalele iho la oia i kona hakuwahine a hele aku la no kahi ana i manao ai e loaa mai ana na kokua ana o laua.

Uhi mai la na eheu o ke ahiahi, eia nae aole i hoololi ae o Ulina i kana i hooholo ai.  He elua kumu nui i nalo aku ai ka hie ame ke aloha o kona home mai iaia aku a e hiki ole ai aiai ke hoihoi mai i kana i hooholo ai.  Mamuli o ka make ana o kona makuahine ua kailiia aku mai iaia aku ka nani piha o kona home; a o ka lua, ua kokoke mai ka maanwa e nalo aku mai iaia aku na paia aloha o kona home ina no ia e noho iho ana ma Damaseko.  O ia home aole ia nona, a o ka halealii o Horama, kahi hoi o ke kanaka ana e kau e nei no i ka weli, oia aku ana kona hale paahao no ke koena aku o kona mau la.

Pela iho la i oho ai ua Ulina la, e noonoo ana hoi i na kumu kupono apau e kakoo ana i kaua mea i hooholo ai, a ia manawa i komo mai ai o Alabia, me an kapuai wawae mama ame na helehelena hauoli.

 "E kuu haku," i pane aku ai o Alabia, i kona manawa i hoomaopopo ai o laua wale no ko loko o ka lumi, "aia he kanaka iloko o ka malapua i makemake e kamailio pu me oe."

"He kanaka!" i hooho ae ai o Ulina.

"Ua olelo mai nei oia he mea ano nui kana i pili i ke ola ame ka make--a i ole he make paha a he ola paha no kekahi mea, a he make hoi ame ke ola no keia kulanakauhale," i hoomau aku ai o Alabia, me ka nana ole ae i ka hooho ana o kona haku.  "Ua komo mai oia iloko o ka malapua me ka ike ole ia, a ua huli ae oia no ka U'i Ulina.  Aole  oia i hoike mai i kona inoa; aka ua ike no wau oia pu kekahi me ka haku o na powa ma ka Halealii o ke Awawa, a ua hoike mai nei no hoi oia he hoaloha oia no Kuliana.  Ina he makemake kou e ike iaia i keia manawa, ua hiki ia'u ke alakai mai iaia maanei me ka loaa ole mai o na poino."

"Auwe no hoi oe, e Alabia; heaha ka manao o kau mau olelo?" i paneia aku ai me ka haalulu.  "Heaha la kona makemake ia'u?"

"Ke manao nei wau he kanaka maikai oia, e kuu haku, a ke manao nei no hoi wau he mea maikai no nou ka ike ana aku iaia.  O ka'u keia e hoike aku nei ia oe."

"Ua ha'i mai anei oia na Kuliana i hoouna mai iaia?" i ninau hou aku ai o Ulina me ka haalulu i ka manawa ana i hoopuka kau ai i ko Kuliana inoa.

"Aole na Kuliana oia hoouna mai nei." i panai aku ai o Alabia; "eia nae i hele mai nei oia ma ko Kuliana aoao.  Ke manao nei wau ua komo ka haku opio iloko o ka pilikia, a ua manao keia kanaka malia paha ua hiki ia oe ke haawi aku i na kokua ana."

"He mea oiaio, e kuu Alabia, aole loa ia he hana pono na'u e hana aku ai.  He hana pono ole ia.  Aole wau e hana ana.  Heaha keia haku o na powa ia'u?"

"Aole i loaa mai ia'u ka ike o ia maoli ka manaolana o keia kanaka; aka ua ike wau i kona nonoi haahaa maoli ana mai e ike ia oe.  Eia nae, ina aole ou makemake e ike aku iaia, ua hiki no ia'u ke lawe aku i ka lohe."

"Heaha kana e hana mai ai ina wau e hoole aku ana i kana?"

"E hele aku no oia a aole oia e hoouluhua mai ia oe."

"Pela anei ka oiaio, e kuu Alabia?"

"Ae, e kuu lede.  Ua nonoi haahaa mai oia ia'u e hoike aku ia oe e noonoo no oe i kau mea e hana aku ai.  Aole oia i hookonokono mai i kekahi koi, a aole hoi oia e hanaino mai ke hoole ia aku; aka ua nonoi haahaa mai oia e ae aku oe e ike mai oia ia oe."

Aole he manao iloko o ua u'i la e kua aku i ka uhane nana e hookonokono ana iaia e ike aku i ke kanaka powa.  Aole wale hoi i nele iloko ona he manao pahaohao nana e hoala ana i kona lunamanao, a o keia mau mea elua e hoholo ana iloko ona ua hiki ole iaia ke hoomoakaka loa ae.  Hoike aku la oia ia Alabia na hiki no iaia ke kii aku i ua kanaka la a lawe mai imua o kona alo.

"E hele pu mai no oe me ia, e Alabia, a e noho pu mai no oe me a'u iaia o noho ana iloko nei."

Hala aku la kona hoaloha, a aole no hoi i liuliu aku hoi mai la oia, me ka hahai pu ana mai o kekahi kanaka loihi, kulana ikaika, i hiki aku hoi kona mau makahiki i ke kanaha.  I ke poha ana aku o na kukuna malamalama o ke kukui maluna o ka halehelena o ua kanaka la, hoomaopopo koke iho la o Ulina ua ike no oia i kela kanaka me Kuliana ma ka Halealii o ke Awawa.  Kunou haahaa iho la oia i kona manawa i komo mai ai a i kona ike ana mai @ko ka opiowahine ano nona, hoomaka koke mai la oia e hoike i kana misiona i hele ae ai.

"E ka lede maikai," i puana mai ai na kanaka la me ka leo e hiki koke ai no ke hoauheeia aku na manao maku'a mai ka mea e lohe ana i ua leo la.  "ua kipa mai nei wau imua ou maluna o kekahi hana kupaianaha, a he mau olelo pokole ka'u e ha'i aku ai no ka'u huakai o ka hiki ana mai nei.  O kuu haku opio ua komo oia iloko o ka pilikia."

"No Kuliana anei kau e kamailio mai nei?" i ninau aku ai ka opiowahine me kon ahikilele ana ae.

"Ae, e kuu lede," i pane mai ai na kanaka la, me ke ku maloeloe ana mai imua o Ulina, e paa ana hoi kona lima akau i kon apapale kapu.

(Aole i pau.)

TISIA - O - ATICA

Ka Wiwoole o na

Wiwoole

Ke Ahikanana nana i Ulaa ke Kana-

wai o ka Make o Ciretia.

MOKUNA III.

KE KAUA ME KA NEWA HAO.

Ma ka leo nui o ka huhu ame ka eha i uwo ae ai o Perifita a huli ae la a mama ana i ka holo no kahi i haula aku ai o ka newa i ke koko e kahe ana mai kona lima kau.  I ka nana aku ua pii maoli ka ula o ka nui huhu me ka pilikua.  Alaila, nee aku la no hoi ka opio ma kahi o ua Perifita nei e holo ana a ma kahi kupono i ano kokoke aku i ku iho ai oia me ke kilakila nui i ka oioi o kaua pahikaua ilalo o ka honua a kelele hoomaha iho la kona mau lima a elua maluna iho o ke kuau.

Alaila huli hou mai la ua kupua nei i ka wa i loaa aku ai kona newa e paaia ana ma ka lima hema ame ka huhu nui na hapau ae la ua lima hema nei i ua newa nei, a i ka nana aku he mea e ka mama maoli o ua mea kaumaha nei i ikaika maoli no o kona lima hema a i ka wiliwili ana mai aia hoi ua like no ka makaukau o ia lima hema me kona lima akau.

Aka, ua makaukau e no ke Kaikialii Tisia oiai aia ka oioi o kana aulii iloko o ka lewa e olino ana i ka pa iho o ka la, a i ka iho hou ana iho o ua newa nei maluna o ke kanaka opio aole no i loaa aku oia a halulu hou ana no ua newa nei iluna o ka honua.  A e like no me ka eleu hikiwawe loa ana o Tisia alii pela no i loaa hou aku ai ka lima hema o na kupua nei i ka oioi o ka pahikaua a pahemo aku la ua pauku hao nui nei mai ka lima aku o kona haku a lele hou ana i kula.

Me ka uwo nui i hooho ae ai o Perifita e hoike ana i kona huhu nui ame ka hoopuhiliia ame ka hoikaika kuanui oia i hapai hou ae ai i ka pauku hao i ka wa i loaa hou aku ai iaia eia nae aole i hiki ke hapaiia ka mea kaumaha mamuli o ka nele o kona mau lala i ka ikaika.

A no ke ko ole o kona makemake ua hoohana he la oia i kona mau wawae nunui pepeekue a ina no i loaa i'o mai ka opio o Atica i ka hehi ikaika o ia mau wawae me he peku hoki la ina no ua palupalu ame ka nanaina wiwoole mau oia i ku, aku ai imua o ka pilikua a hiki wale i kona pipika ana.

Ma ka hehi ana mai o ua kanaka nui nei ua loaa aku la i ka aulii a ka opio a kaka ae la ka wawae me ka nui o ka eha, alaila lele mai la oia iluna o ke kanaka opio me ka manao e o-pa pu iaia me ke kaumaha o kona kino, eia nae, aole oia i kau iluna o ke kanaka opio oiai ua kau mai la oia iluna o ka oioi o k aaulii punahele a na ka nui kaumaha i'o o ua kanaka nei i onouia aku ai ka pahikaua a puka pu ma ke kua.

Ma ke kupaka ikaika ana ua ala hou aku la o Perifita i hope, a ia wa hookahi no i loaa aku ai iaia ka ike i ka hulali o na kamaa o ke kanaka opio a i ka wala ana aku o ua kupua nei i hope ua lawe pu aku la oia ia ike me ia oiai no e koe ana no ke ola iloko ona, a hooho ae la oia me ka leo nui me na maka aa no hoi a hemo mai la no hoi ka aulii mai ke kino nui mai.

"Ha!"  i hooho ae ai ua Perifita nei me ka pupuku nui o kona mau maka, "o oe---o oe ke keiki a Atira.  O kou inoa o Tisia!"

Haka pono aku la o Tisia maluna o ke kanaka nui me ka pahaohao nui.

"Pehea oe i ike ai?" i ninau aku ai oia me ke kunana nui iaia no hoi e paa ana i kana aulii.

"Ua ike maopopo wau, no ka mea aole he mea e ae e komo i kena mau kamaa gula a aole e loaa kena pahikaua a kou makuakane i ka mea e ae koe wale no ia Tisia.  O,---O,---O,---he make weliweli loa keia o'u.  Aka e hoomaikai mau ia oe no keia mua---" a waiho make aku la o Perifita iluna o ka honua, me ka pau pono ole o kana hhopuna olelo, mahope iho o ka hikaka ana iaia e pane ana i na ninau a ka opio alii.  Eia nae, me ka hoohakalia ole iho ua holo koke aku la o Tisia i kahi e waiho make ana ke kanaka nui, a iaia i hakilo pono iho ai aole i halele mai ke ola hanu me ia, eia nae me ka hanu haili mauliawa wale no oia e hanu ana.

"E Perifita, e pane mai oe i ka haina o keia ninau a'u mamua o kou make ana:  Owai kuu makuakane?"

"Alaila, aole oe i ike iaia?" i ninau mai ai o Perifita.

"Aole au i ike," i pane aku ai ka opio.

"Alaila aole e loaa aku kekahi ike ia oe mai ia'u aku nona, ua make au ia oe, aka, aia he mau poino he nui mmua ou e lanakila ole ai oe maluna o lakou.  Makehewa kou hooikaika nui ana i kou lanakila maluna o ko pahikaua, no ka mea, he mau poino huna lakou.  Aia mawaena ou ame ko makuakane he mau awe'awe'a pohihihi loa e hiki ole ai i kou mau maka ke hoomaopopo ia mau poino."

"Ha'i mai! ha'i mai!!" wahi a Tisia i hooho ae ai me ka leo pihoihoi nui ma ka manawa i hoopau ae ai ka pilikia i kana mau olelo, "heaha ia mea?"

Aka, aole i pane hou mai ka weli o ke kuahiwi, no ka mea ua lele koke ae la kona hanu hope loa mahope iho o ke kupaka ana e liki ana no ka wa hope loa.

Ua kunana iki iho la o Tisia me ka minamina loa i ka hala e ana o Perifita no ke ake e loaa na mea huna i ha'iia mai, aka no ka hiki ole ae ke alo oiai ua make ke kanaka, ua huli ae la oia ame kona mau hoahele i piha i ka olioli no k ahana kila nui o ko laua haku alii a komo kau la iloko o ka halealii o Perifita.

Aole no i hoololoiahili wale aku ka lakou komo ana iloko o na keena o ua hale nei aka aole nae he uhane ola i loaa aku, oiai nae, na iwi kanaka e waiho mokaki ana iloko o ka pa--na iwi hoi o ka poe i loaa aku iloko o kana umii ana a make hoi i na hanna o ka newa hao.

A i ko lakou haalele ana ia hale a kamoe hou aku la ko lakou huakai ua hakanu loa iho la ua kanaka opio nei me ka noonoo nui ana.  O na olelo hope a Perifita ka mea nana i hoala ae i ka noonoo a helu aku la kona noonoo e hakukoi ana i ka nui io o kona mau enemi o mua e nee mai ana.

Heaha la keia mau mae huna i ha'i ole ia mai iaia a lilo i mea hoala ikaika i kona noonoo?  Heaha la lakou, a pehea la ko lakou nui ame ko lakou ikaika e ku nei mawaena ona ame kona makuakane?  A kau nui aku la kona mau anei ana no mua me ka nui powewehi nae.