Ka Nupepa Kuokoa, Volume LI, Number 13, 4 April 1913 — HE NANE. [ARTICLE]

HE NANE.

Mr. Lunahooponopono, Aloha oe; —E oluolu mai hoi kou kiekie no ka'u wahi puolo e kau ae ia maluna ke kauwahi kaawale o kou moku lawe meahou a e ae mai oe, eia iho kahi lei o kana: Kuu lei ula i ka nahale, Ua nohea wale i ke kaunaoa, I ka ohai o kaiona, Ua maka noni wale i ka la na wahine o Kamao-e, ilaila Aia la o Kalalea i puanoni, Ke kii la ka manu i ka wai a ke kupa I lahuiia oia wale no ke inu, Ke malama la i ka wai ono a ka manu, Ka manu nani olaila, Malama wai o kaiona e ilaila, Malama o ikea auanei, Ke malama nei no i alakai o oe anei e, llaila au i ke kaha o Kalamakopili, E nana ana i ka hale o Limaloa, Ke ako pua mai la i Waiolono, E paa paha auanei i Kalanamaihiki e ilaila Hiki mai nei ke aloha me ka olioli, O laua pu no me ka olioli ka hoina mai. E hoi mai ana o hoolaukanaka, I kinikini ka kale piha i ke kanaka o ilaila I piha mau no ka hale i ke kanaka I makaukau pono ka noho ana, Oe anei e. I ka hoopauia ana o keia lei o kaua, e hoi pono ae kaua e nana i ka waiwai o kela puolo e kau ae la maluna, o ia iho keia: Kuu manu noho uka noho kai, noho kipalale, noho ana i ke kula i ke alialia o kaiona la lele wale. I noho nanea me ka pua o ka ilima, inu ana i ka wai lau laau, he koana wai lehua no panaewa ia wai hoomalule i ke kino hai aku au e loaa no i ke ahe a ka makani, he Aeloa e holu ana i ka lau o ke pili, huna iho au, noho i ka pali o Kanehoa. Eia ka ninau: 1. Owai ka inoa o kuu manu? 2. O ka pua hea kona hoa hoonanea? 3. O hea kona aina e noho nei? 4. O ka wai o ka lau laau hea kana e inu nei? 5. Heaha ka ma'i i loaa iaia. I ka hoopau ana i keia mau ninau, e pono no kakou e na loea huli mea pohihihi ke lei pu ae i keia lei lau onaona: Lau onaona iluna o Maohelaia, Maikai i ka la kaiolohia. Pua na lehua o kaona i kala e, O ka mapu leo a ka manu, Ke oe la i ke Kaeleloli, Hoene lea ka leo o kaikioe, Ko ana i ka la'i luahine, I ka makani he lawe malie, Ka manu lawe kai olaila, Ke ai la i ka pua Akuli, I ka ae kai o Halekii e ola e, O kuu makani kaao lai, Lai kaao i ke ahiahi, He kohu la'i a ke kioea, A ka manu lawelawekeo Ulili naholo i ke kai o Punalau, Paa ia lloli me Hoolehua, E hooponopono ana i ka aekai malie e ola e, He malie maikai ka maka i ka nana O kau wahi ahonui no ia, I ahonui no au e nui ke aho e ola e, I ka hoopau ana o keia lei, e haawi aku ana au i ko'u aloha nui i ka Lunahooponopono ame na kela moku lawe meahou ame na loea huli mea pohihihi. Kou oiaio, GEO. M. K. AEKAI O KULOLOIA. HOME LAU HUNEHUNE O KE KIAWE, Kamooloa, Pearl City, Feb. 20, 1913.