Ka Nupepa Kuokoa, Volume LII, Number 48, 27 November 1914 — HE HOOMANAO A HOALOHALOHA I KO MAKOU MAKUAHINE I HALA MRS. SUSAN KAHOA. [ARTICLE]

HE HOOMANAO A HOALOHALOHA I KO MAKOU MAKUAHINE I HALA MRS. SUSAN KAHOA.

Hoomaha ka luhi o mama, pau ka auwe ana, a hoi aku la me ka Makua i kela Lani ko kakou Hoola a puuhonua i kela ao lani ma o, ma o maluna. Nawai la ka hulahula o ka maka ame ka hina o ka po, eia ka e uwe aku ana makou kau mau keiki ia oe. e ko makou makuahine aloha. Na ka leka aloha a ko makou papa i loaa mai, ame ka elele aloha a kau moopuna, Esther Maemae Kaiwi, i hoike mai o ko makou mama i aloha nuiia ua hala, ua kuu ka luhi, ua pau ka auwe ana, ame ka ike ana i na inea he nui o keia ao, aloha no. Ua pau ko makou lohe hou ana i kou leo kahea e mama, ua hala oe a koe hookahi iho la o papa, ame na pokii, kaikaina o makou, e paiauma aku me ke aloha a hoomanao ana ia oe e mama hele loa. Ilaila paha ia i ko ai ka ka Buke Nui. o ka la o ka Haku me he aihue la ia i ka po; a wahi pu a ka Haku, e kiai oukou a e makaala, no ka mea, aole oukou i ike i ka la ame ka hora e hiki mai ai ke Keiki a ke Kanaka. A oiai kakou, ua okiia e ke kai nui, kaawale oe e papa, ame na kaikaina aloha nuiia o makou, o ka hoomanao aloha nae no mama hele loa. Nolaila, O makou o kau mau keiki aloha e noho nei ma Niumalu, Lihue, Kauai, ke hui pu aku nei me oe e ko makou papa aloha nuiia, Mr. John E. Kahoa iloko o kou nohona kaumaha, luuluu, a pilihua, ke komo pu aku nei makou me oe e papa, me ka makou leo pule, e hoomamaia ae kou naau ehaeha, ka noho mehameha ana, ame

ka naau e paiauma ana no mama, me ke kau ana aku o na maka maluna o ko kakou Hoola, ame ko kakou puukalahala. Nolaila, ina o makou iho kau mau keiki ma ke kaawale ame kau mau moopuna he lehulehu, ke hui pu aku nei makou me na manao aloha, mailoko mai o ko makou puuwai a ke noi ae nei i ka Makua Lani e hoomama mai i kou naau kaumaha a luuluu e papa, a nana no e holoi ae i na waimaka helelei he nui. 1,— Ke kauwa a Iesu, Ua pau ka paio au, Ua kau ka lei maluna ou, Ua lanakila mau. 2.—Ua aloha ia mai Lohea ka pule au, Ua kiina oe e laweia ae Iluna me Iesu. Ua haalele iho la oe i ko makou makua aloha nuiia, a hoi aku la oe me ka makua nui ma ka lani, a oia ka makou, kau mau keike e hoomaewa ae nei i ke aloha mama. Nui ke aloha pa i ka Lani, Poeleele loko o ke kanaka; Wehea mai nei no e oe Minamina au i ka haule ana ae. No ka nui no o ko makou aloha nou e mama hele loa, nolaila, ke hoomanao pu nei makou i keia mau lalani, e poina ole ai ia oe e mama i ka himeni pu ia o kakou ilalo o kauhale mai Manana. Ma ko Iesu mau lima, Ma kona poli no: Malaila au e malu, A maha maikai pu: Hamau he leo lani Ke meleia mai. Ma o mai na puu nani, Mai kela ao maikai. Me keia mau Kanaenae aloha no mama, e oluolu nui oe e papa e lawe aku i ka makou mau hoomanao hoalohahola ana, no ko makou mama i haalele mai ia kakou ka ohana apau, a na ka makua e hoomaha mai i ko kakou mau naau luuluu a kaumaha. Kau mau keiki aloha nui, me ke aloha makua. Mrs. Hana Kaiwi, Mrs. Pakaka Kaiwi, Mrs. James H. K. Kaiwi. Niumalu, Lihue, Kauai, Nov. 16, 1914