Ka Nupepa Kuokoa, Volume LIV, Number 30, 28 July 1916 — O MRS. K. KAEO UA HALA. [ARTICLE]

O MRS. K. KAEO UA HALA.

Mr. Solomon Hanohano,Lunahooponopono o ka Nupepa Kuokoa, Aloha oe:—E oluolu oe e ae mai i kekahi wahi kaawale o kau nupepa no keia mau wahi manao luuluu a nau hoi ia e pa hola aku i na kini makamaka o kaua, ke kukini mama hoi o ko Hawaii Paeaina. O ko maua pokii kaikuahine Mrs. Kawaianuenue Kaeo, ua hala, ua hala i ke ala hoi ole mai, a waiho iho ma keia ola ana i kona makua he kane, Jas. K. Kaeo, ame kona mau pokii kaikunane aloha Jas. Neenee Kapunilihau ame Jas. K. Kuoha e u a e auamo i ka luuluu o ke aloha. Ua pauaho mai oia i keia ola anama ka la 19 o Iulai, 1916, hora 2 o ia kakahiaka, a hoi aku la i ka poli pumehana o kona Makua; no ka mea Nana no i haawi mai a Nana no i lawe aku; e hoomaikai ia Kona inoa nani, he malu ma ka honua a he aloha i kanaka. Ua hanauia oia ma Kaluaaha, Molokai, a ua hoonaauaoia no malaila a hele aku ma Kauai me kona pokii kaikunane, a malaila oia i hoohuiia ai ma ka berita maemae o ka mare a lilo i makuahine haahaa no ia home aloha Pakaalana. Aloha na kualono ou e Molokai nui a Hina, ua hahahai malie au, ua pau kou ike hou ana i na hiona o ko maua pokii, na ale hanupanupa ou e Pailolo, ua pau kou aleale hou ana ma kona mau wawae, ua hala, ua hala i ke ala hoi ole mai. Aloha wale no! O makou iho no iloko o ka luuluu. JAS. K. KAEO, J. N. KAPUAILIHAU, JAS. K. KUOHA.