Ka Nupepa Kuokoa, Volume LIV, Number 45, 10 November 1916 — HE HOOHENO LEI NO KALANIANAOLE. [ARTICLE]

HE HOOHENO LEI NO KALANIANAOLE.

1 E ho mai i na pua nani o ka wao, Wehi lei no Kalanianaole, Elele i Wakinekona. E kui mai no a lawa, Hiiia mai no Kalani. 2 E Hawaii Mano o Kalanipo, Kui mai i lei no ke Alii, Elele i Wakinekona. Ohu lei mokihana, Kau papahi lei nona. 3 E Niihau e, e o mai oe, O kau lei no Kalanianaole, Elele i Wakinekona. I wehi lei rube, I pulupe i ka hunakai. 4 E Oahu i ke kaona nui, Ho mai i le no ke Alii, Ka Elele i Wakinekona. I wehi carnation, I wiliia me ka ilima. 5 E o e Molokai nui a Hina, O kau lei no Kalanianaole, Ka Elele i Wakinekona. I wehi lei kukui, Kau ohu ia no Kalani. 6 Eaha ana hoi oe e Lanai, E wiki, i ohu no ke Alii, Ka Elele i Wakinekona. I lei pua hinahina, I pulupe i ka hunakai. 7 E Maui i ka Honoapiilani, O kau lei hoi no ke Alii, Ka Elele i Wakinekona. I wehi lei roselani Moahi aala i ka poli. 8 E Hawaii nui Moku o Keawe, Kui ae i wehi no ke Alii, Ka Elele i Wakinekona. I na lehua o Panaewa, I wiliia me ka maile. 9 Hainaia mai ana ka puana, Na wehi lei o Kalanianaole, Ka Elele i Wakinekona. Kii mai no e lei, I ohu nou e Kalani. Hakuia e ka HENE WAI O HIILAWE. By. Samuel L. Kalainaina. O ka Rev. John P. Erdman ka mea nana e haiolelo mai ana maloko o ka Luakini o Kaumakapili ma ka hapalua o ka hora ehiku o ke ahiahi o keia Sabati iho. E hiki mai ana na keikikane o ke Kula Kamehameha ma na halawai, a na lakou e mele mai ana i kekahi mau himeni. Oiai he halawai kela no ka pono o na opio o keia kulanakauhale, ua konoia na mea apau, e hele ae mai ia halawai, no ka lohe ana i na olelo ku i ka naauao, e paneeia mai ana e ka mea haiolelo.