Ka Nupepa Kuokoa, Volume LV, Number 8, 23 February 1917 — HE HOOMANAO NO KUU MAMA ALOHA. [ARTICLE]

HE HOOMANAO NO KUU MAMA ALOHA.

Ua hanauia kuu mama aloha Mrs. Lilia Kamoakeawe Puhi ma Kalokohonu, Pauoa, mai ka puhaka mai o Mikamoku (k) ame Kaneakauhi (w), no Puna ka makuakane a no Waianae ka makuahine, noho ma Pauoa nei, o kuu mama ka laua keiki mua a he mau keikikane aku ua pau mua lakou i ka make. Ua piha iaia na makahiki he kanaiwa a haalele mai la i keia ola ana. Iloko o keia mau makahiki o kona ola ana, he wahine kino ikaika oia e hooikaika ana ma na ano hana apau, mai na hana a na wahine, a na hana a na kane, aole nawaliwali o kona kino, o kona ma'i hope iho nei he makapo, ua hiki no i ka hopena o ka ikaika ike. I kona mau la opiopio, hele kuu mama me kona mau makua a noho ma Kohala, noho malaila he mau makahiki, hele i ke kula malaila, o kana kumu oia o Nawaa, kupunakane o J. H. Wise. I ke kukuluia ana o ka halepule o Iole, o kuu mama kekahi i auamo i ke one, pohaku, puna, ohia, aole i pua ka halepule hoi hou lakou i Oahu nei. Hele kuu mama i ka hana me na haku haole oia o Pekuiki ame Kukaela, mahalo na haku iaia i kona hoolohe ame ka malama maikai i na keiki liilii, loaa oia i ka ma'i hepera a na kona mau haku haole no ke kauka i lapaau ai iaia a ola. Mare oia i ke kane oia o Keawepooole, puka mai mailoko mai o ko laua mau puhaka he elima keiki, pau loa i ka make a koe hookahi kuu kaikunane Lapana Keawepooole, maka'i kula. Make o Keawepooole, hele kuu mama i Kaupo, e ike i kona kaikunane Rev. Kaawa. Ilaila loaa o Rev. Daniel Puhi kuu papa aloha, mare laua a noho ma Kipahulu. Aloha ia wahi a makou i noho ai a kulaiwi. Puka mai mailoko mai o ko laua mau puhaka he eono keiki, pau i ka make a koe hookahi au kana kaikamahine. Pau ka noho ana o kuu papa i Kipahulu hoi mai makou a noho ma Pauoa nei. Mare au i ka'u kane oia o Jas. Pohina a na maua no i malama i ko'u mau makua, na pokii, a ua pau mua lakou i ka hele ma ka lakou huaka'i hele, a o ka mama o makou ka hope i hele aku la, ma ke ala hookahi. O kuu mama no ko'u hoa lei keiki, a he mea nui na moopuna iaia ahiki i kona hopena hope loa e kahea ana no i na moopuna. O kana moopuna wahine Helen Aulani Pohina ka mea nana i malama a lawelawe no kona kupunawahine ahiki i kona haalele ana mai la i keia ola ana, a o na moopuna no ka poe i ike i kona hanu hope loa. O kana huaolelo hope loa, aloha mai la i na moopuna, na ka waimaka no e kahe, pili iho la kona mau maka o kona hiamoe aku la no ia, kuu ka luhi. He haipule oiaio kuu mama, he hoahanau kahiko oia no ka Ekalesia o Kawaiahao, a moe aku la. O kuu mama, he wahine ike makamaka oia, he opu aloha, oluolu, lokomaikai, heahea, hookipa, puuwai hamama, aole e koe kana, he lima hemo e haawi ana i na mea apau e loaa ana iaia. Aole poina ka pule iaia i ke ao, ka po, i na manawa apau ahiki i ka minuke hope loa o kona ola ana, e kau ana no ka huapule ma kona waha. Na kuu kaikunane aloha, na hunona ame na moopuna i huna aku i kona kino lepo. Nana no i haawi mai, a Nana no i lawe aku, o kona makemake ke hookoia. Aole au i ike i ka hanu hope o kuu mama aloha, ua hele au i Kauai, a haalele iho no iaia me ke ola kino maikai no, aka, ua hiki mai ka hopena i ka manawa i maopopo ole ia'u o kona manawa iho la ia. Pau ko'u ike ana i kuu mama aloha, hoomanawanui ia makou na keiki. O ka puu lepo ka'u i ike iho a hookahe no hoi i ka waimaka. Ua hala ka mea waiwai, o ka ike aku i na maka o ka makua aloha, aloha kuu mama hele loa! Nolaila ma ko'u aoao ka mea i hoonele ia i ka mama, ke haawi aku nei au i ko'u hoomaikai i ka poe apau i haawi mai i ka lima kokua aloha no kuu mama, ma ka hooponopono ana nona, maluna o kona kino, ka hoowehiwehi ana

iaia me na pua, ke ala ana nona a ao ka po, ame ka hele pu ana i kona huaka'i hope loa, a ke haawi pu nei au i ka hoomaikai i ke Kahu H. H. Parker o Kawaiahao, ke kahu kula Sabati nui o Kawaiahao, Mrs. May Wilcox ame Mrs. Julia Bowers, no ko oukou hui pu ana mai me ka ohana i hooneleia me ka makuahine, ka malama ana i ke anaina haipule hope loa maluna o kona kino lepo. Nolila ua hala kuu mama aloha, aka, o kana mau hana aole e poina. Owau iho no kana kaikamahine, MRS. DEBORA A. POHINA.